بلوچستان ئٹ بشام نا بُھس کاریک
دی بلوچستان پوسٹ سرگپ
مُد ئنا محکمہ، بلوچستان و سندھ ئنا جتا ضلع غاتیٹ ترند آ پِر تا اسہ پوسکنو لڑ ئسے نا پیش گوئی کرینے۔ ہفتہ نا دے بلوچستان ئٹ بروک آ پِر تا ساڑی آ بند دو شمبے اسکان برجاء شلوک پِر نا دروشم ئٹ مرو۔ دا برجاء سال نا بشامی پِر تا ششمیکو بند مرو، ہرا مالو آن بلوچستاں ئٹ کاروباری زند ءِ ایسر کروک تورینے۔
بشام نا پِر تا چارمیکو بند بلوچستان ئٹ کم و ود 15 ضلع ئٹ بُھس کاری کرے، ہرا 11 اگست اسکان برجا مس۔ پی ڈی ایم اے (پروینشل ڈیزائسٹر مینجمنٹ) نا حساب کتاب آتا ردئٹ بلوچستان ئٹ چارمیکو بند اسکان نوکاپ کم و وَد سینزدہ بندغ نا ساہ ءِ ہلک و کم و وَد ہفت بندغ نا ٹپی مننگ نا حوال ارے، ہرافتیٹ اِرا زالبول و مسہ چُنا اوار ءُ۔ زوت پِر تیٹ کم و وَد 861 اُرا دڑار، بولان ئٹ بی بی نانی نا ہند آ پول پننگ نا سوب آن سندھ و بلوچستان نا زمینی ہن و بر بند مس، کوسٹل ہائی وے آ پسنی نا رہی اسہ پول ئسے نا پننگ نا سوب آن گوادر نا زمینی ہن و بر ہم بند مس۔
بلوچستان ئٹ بشام نا پِر تا پنچمیکو بند ئںا وختا ہرا نسخان آک مسر، اوفتا شابیتی حوال ءِ دائسکان پی ڈی ایم اے شینک کتنے، واہم ڈان نیوز نا ردئٹ بلوچستان نا ضلع جھل مگسی ئٹ نوکاپ نا سوب آن 20 آن زیات خلق ءِ دیر ارفے، ہرانا سوب آن تیوی سڑک آک پنار و اوفتا بلوچستان نا ایلو علاقہ تیا ہن و بر نا کسر بند مس۔ حوال تا ردئٹ بلوچستان نا ضلع سبی، نصیر آباد، جعفر آباد، صحبت پور، ڈیرہ اللہ یار، بولان، جھل مگسی، خضدار، قلات، مستونگ، لسبیلہ و مکران نا مسٹ آ ضلع غاک گوادر، تربت و پنجگور اِرا دے اسکان ترند آ پِر تا مون ئٹ مسر۔
ٹی بی پی نا حوالکار آتا ردئٹ زوت پر و نوکاپ نا سوب آن بلوچستان نا جتا علاقہ آتیٹ اسیکہ وا بھاز مرک آک مسونو و اُراتا تمنگ نا تدینی تیٹ بھاز آ بندغ تا ٹپی مننگ نا حوال ارے۔ بی بی نانی پول ہرا مالو پناسس، اودے اسیکہ وا نسخان ارفوئی تما، ہرانا سوب آن این – 65 بھلا کسر آ ہن و بر بند مس۔
مُد ئنا محکمہ نا ردئٹ زوت پر تا سوب آن ضلع سبی، قلات، خضدار، لسبیلہ و ڈیرہ غازی خان ئٹ نوکاپ نا خلیس ءِ۔ زوت پِر تیان تیوہ غان فریشان کروک گڑا حب ڈیم نا خلیس بش کروک کچ ئسے اسکان پُر مننگ ءِ، زیات دیر نا کشنگ نوکاپ نا سوب مننگ کیک۔ ضلع کیچ ئٹ میرانی ڈیم نا تیوی پُر مننگ ئٹ بیرہ 20 فٹ نا جاگہ بچانے۔ 2017 ئٹ ہم ضلع کیچ ئٹ بھلا پِر تا سوب آن تاریخی بُھس کاری مسوسس، تیوی ضلع ئٹ ہزار آ اُراک نوکاپ آن بھاز زیمی مسوسر۔
حکومت بلوچستان نا ترجمان لیاقت شاہوانی اسہ حوالکاری مجلس اسیٹی میڈیا ءِ پارے کہ پِر تا سوب آن ضلع نصیر آباد ئٹ دریائے ناڑی پورو پُر مسونے، اگہ پین زیات پِر مس گڑا دا علاقہ نا لکھ آ بندغ آتیکن خلیس نا پڑو مننگ کیک۔
بشام نا برجاء بھاز آ پر تا لڑ ءِ اریسہ خننگ مریک کہ پین بُھس کاری بلوچستان کن کسر اُروک ءُ۔ سوج دا ودی مریک کہ حکومت ہرا دا وخت اسکان بیدس ہیل تس آ لیویز و پی ڈی ایم اے آن کاریم ہلنگ ءِ، او مننگ کروک بُھس کاری تیکن اخس تیار ءِ؟ تعلقدار ادارہ ہرافتا کاریم دُن انگا آفت آتیتون مون تس، تیار مننگ و تربیت ہلوک بندغی طاغت تخوک مریک، او نہ بیرہ بیوس خننگسہ ءُ بلکن او ہچو وڑ اسیٹ دا کچ ئنا قدرتی آفت آتیتون مون تس کن تیار خننگپسہ۔
