بھارت تیوی جہان ٹی کرونا آن زیمی مروکا مسٹمیکو بھلا ملک ءِ۔

بھارت تیوی جہاں ٹی کرونا آن زیمی مروکا مسٹمیکو بھلا ملک ءِ۔ دا وختا امریکہ و برازیل آن پد بھارت ٹی غٹ آن زیات کیس ءُ۔ ہرا 30 لکھ آن گیش مسونو۔

یک شنمبے نا دے اعداد و شمار نا ردٹ بھارت ٹی 69 ہزار 239 کیس مونا بننگ آن پد بھارت ٹی کرونا نا کیس آتا حساب 30 لکھ 44 ہزار 940 مسر۔ کرونا وائرس آن بیران مروکا بندغ آک 56 ہزار 706 آن گیش ءُ۔

سیرولوجیکل سروے نا ردٹ بھارت نا اِرا بھلا شار ممبئی و دہلی ٹی کیس آک زیات مننگو، اندن اترپردیش، بہار، تامل ناڈو، آندھرا پردیش ٹی ام کیس آتیٹی دے پہ دے آن گیشتری بننگے۔

یاتی مرے بھارت ٹی اولیکو کیس ریاست کیرالہ ٹی جنوری نا توہ ٹی ہمو وختا مونا بس کہ ووہان آن بروکا یونیورسٹی نا مسے خوانندہ غاتے کرونا مس۔

کوئٹہ نا سول اسپتال ٹراما سینٹر ٹی سرجن و کنسلٹنٹس آک رسک الاؤنس نا تفرنگ آ کاریم تیان دو ارفینو۔ ٹراما سینٹر نا بند و بست نا پاننگ ءِ سینئر ڈاکٹر تا کاریم تیان دو ارفنگ سوب آن ناجوڑ تا درمان زیمی مننگ ءِ۔

بند و بستی کوالخوا تا پاننگ ءِ کہ سرجن و کنسلٹنٹس تا کاریم آن دو ارفینگ آن نیورو سرجری، آرتھو پیڈک سرجری و ڈینٹل سرجری نا یونٹس زیمی مسونے۔ ایلو پارہ غان ڈاکٹرز ایکشن کمیٹی نا راہشون ڈاکٹر نور مغیری نا پاننگ ءِ کہ ٹراما سینٹر نا مُسٹ آن بیرہ اسہ آپریشن تھیٹر فعال ءِ۔

او پین پارینے کہ سینئر سرجن آک چار سال آن کوئٹہ نا سول اسپتال ٹراما سینٹر ٹی بد آ حالیت ٹی ڈیوٹی کننگ ءُ۔

ڈاکٹر نور مغیری خواست کرینے کہ ٹراما سینٹر نا ملازم تیانبار کنسلٹنٹس ءِ ہم رسک الاؤنس تیر، راہشون ڈاکٹر ایکشن کمیٹی نا دا پاننگ ءِ کہ رسک الاؤنس نا تننگ اسکان ٹراما سینٹر ٹی کاریم کروفن۔

بلوچستان نا ضلع مستونگ و نوشکی ٹی جتا تدینی تیٹی بیست نا کچ بندغ ٹپی مسر ہرافتیٹ بھاز آتا حالیت بد ءِ۔

گیشتری حوال تا رد ئٹ مستونگ بس اڈہ ٹی اِرا ٹولی نا نیامٹ جیڑہ نا سوب آن پنچ بند ٹپی مسر۔

جیڑہ ٹی ریاض احمد، رحمت اللہ، عبدالمنان، محمد امین و محمداکرم ٹپی مسونو ہرافتے شہید نواب غوث بخش رئیسانی میموریل ہسپتال سر کننگا ہراڑے اوفک درمان کننگار۔ پولیس دا بابت پین سر و سوج کننگ ءِ۔

اندن نوشکی ٹی بندغ تا گریزی کروک آتا گاڑی نوشکی نا خڑک کلٹی مس ہراڑان بھاز آ بندغ آک ٹپی مسونو۔ ٹپی آک سول ہسپتال آ سر کننگانو ہرافتا تعلقداری آزاد کشمیر و پنجاب آن ءِ۔

ٹپی مروک بندغ آک غیر کانودی وڑ اٹ نوشکی نا کسر ئٹ ایران آ ہننگ ئسر۔ رسینگوک حوال تا رد ئٹ بیرہ اسہ گاڑی ٹی 16 بندغ مسوسر، ہرافتیان 10 ٹپی ٹی 3 بد حالیت ٹی ءُ۔ ٹپیک نوشکی سول ہسپتال ٹی توروک ءُ انتظامیہ پین کاروائی کننگ ءِ۔

بلوچستان ٹی بشام نا پر ئنا سوب آن بلوچستان ءِ خیبر پختونخوا تون اوار کروک روڈ بند مس ہرانا سوب آن سد آ مسافر آک بس آتون اوار مال دروک گاڑیک گٹ مسر، مسافر بس آتیٹ چُنا نیاڑی ہم ساڑی ءُ۔

گیشتر حوال تا رد ئٹ بلوچستان نا ضلع ژوب، شیرانی ٹی ترند پر ئنا سوب آن ڈی آئی خان نا بھلا روڈ سنگر نا ہند آ بد حالیت مننگ نا سوب آن پول پننگ آن بند مس۔

بھلا روڈ آ گٹ مروکا بندغ غاک بھاز سختی تا گواچی ءُ، ضلعی بند و بستی کوالخوا تا رد ئٹ سواری تا ان و بر کن پین کسر جوڑ کننگانے، داسکان پر ئنا سوب آن گڑاس کسر تیا سواری تا ہننگ مفک، پول آ کاریم برجاہ ءِ زوت پورو مرو۔

بھلا روڈ آ گٹ مروکا مسافر تا پاننگ ءِ کہ روڈ بند مننگ آن بھاز فریشانی نا گواچی اُن حکومت و ضلعی بند و بستی کوالخوا تیان خواست کینا کہ سنگر نا ہند آ بند ڈی آئی خان نا بھلا روڈ ءِ زوت ملینگ کن دمدستی وڑ ئٹ گام ارفیر۔

نیشنل پارٹی نا راہشون و سینٹ نا باسک میر حاصل خان بزنجو کراچی ٹی بیماری نا سوب آن کذیت کرے۔

حاصل خان بزنجو منہ وخت آن پف نا کینسر نا گواچی ئس۔ اینو سہب تون طیبعت زیات بگڑینگ نا سوب آن اودے آغا خان ہسپتال آ دننگا ہراڑے ساہ تس۔

میر حاصل خان بزنجو 1958ء اٹ ضلع خضدار نا تحصیل نال ئٹ بلوچستان نا مسکوئی گورنر میر غوث بخش بزنجو نا اُراٹی خن ملا۔ بنائی خواننگ مڈل ہائی اسکول نال آن دوئی کرے۔ ہراتم باوہ تا بلوچستان نا گورنر مس او وخت او ہفتمیکو جماعٹ اٹ ئس۔ اوفتا خاہوت کوئٹہ غا بس، ہراڑے او اسلامیہ ہائی اسکول ئٹ داخلہ ہلک۔ 1977ء ئٹ میٹرک کننگان گڈ 1979 ئٹ گورنمنٹ کالج کوئٹہ آن انٹر کرے۔ 80ء نا وخت کراچی آ ہنا ہراڑے جامعہ کراچی آن آنرز کننگان گڈ فلسفہ ئٹ ماسٹرز نا سند ءِ دوئی کرے۔

حاصل خان بزنجو نا کذیت آ بلوچستان و ایلو علاقہ غاتیان سیاسی راہشون و باسک آک اُست ہسونی نا درشان کننگو۔

آجو نظم

زمین ئے کربلا نا دا یزیداتا ستم اڑدے
ننے پِرغِک وجودئٹ یار تینا بس
ننے گُٹّو کرینو نالہ غاک شار ئٹ
ننے ساہ اف ننا بس جون ٹنگوکے

ننے انجام ئنا اڑدے ثمر مِلِّک

ننے دے مُہن ئٹی خلبو کسفبو نُم
نُمے وا انت ئنا چُرت ئے خُلیسے پا ؟؟
نُما لشکر نُما رہبر نُمے اف انت پا افّک ؟
نُمے شہرت ارے دولت فقط ایمان افّک بس

ننے بے پام ئنا اڑدے ثمر مِلِّک

ننا زمزیر ئٹی بخت ئے دا قسمت ئے
ننے قیمت اسُل اف بے بہا اُن نن
ننا دیرے !! فقط تینا امو ایلُمک
ہراتے لاش ئنا ٹیکیک مِلِّنگو

دتر گوربام ئنا اڑدے ثمر مِلِّک

شعور ئے دیر پاہوا حفیظاتا
گڑا کاغد قلم لکھوئے دڑداتے
اگہ لکھتو قلم ڈُکّھاتے نا سنگت
گڑا مَر خاک نی مِش تیٹی مَر اےمُہن

ننے الزام ئنا اڑدے ثمر مِلِّک

حفیظ شہزاد

دروغ تڑ آ حکمران تا بھلا گٹ انا توار جائی پارو کا چنکا قوم آکے چھپ تریفنگ کیک ولے جائی پاروکا چنکا قوم آتا چھپی دروغ تڑ آ حکمران تا بنداؤءِ سریفک۔

ڈاکٹر مبارک علی نوشتہ کیک کہ مزاحمتی ادب نا رنگ ہندوستان نا مہے ذات انا بندغ آتا جواننگا ادب پاننگک ہراکے بھلا ذات انا بندغ آتا پارہ غان صد آ سال آتا لٹ کٹ انا ثواب اٹ ودی مسونے، صد آ سال آتیان بھلا ذات انا بندغ آک شیفکو تپہ نا ذاتءِ سیاسی و سماجی، ثقافتی و اقتصادی و تعلیمی وڑاٹ پد بٹیر، ہندوستان نا آجوئی آن پد ہراتم شیفکو تپہ گڑاس تعلیم و ہنر ہیل کریر تو 1960، 1970نا سال آتیٹ اوتا نیام اٹ اسے ہندنو تعلیم یافتہ ءُ طبقہ اس ودی مس ہراتا باوہ پیرہ مزور و شوان ئسر، داکے بھلا بندغ آتا ذات والاک تینا مہے جوڑ کریسر داتا لٹ آک مدام داتا کاٹم آ کڑکارہ کریرہ دا بندغ آک ہندا خاطرآن اسے مزحمتیءُ ادب اس تخلیق کریر، ہرانا لفظ لفظ پوغ آمبار اشنگوکا سینہ غاتیان چڑینگ خلیسہ پیش تماکہ ہراٹی راج انا روایات و اقدار نا خلاف بھلو احتجاج اس ئسکہ۔

ہندوستان نا مہے تیامبار اینو نن تینا وطن اٹ ننا حیثیت ہم مہھے تیان کم اف، خوانندہ غا ورناک ہنر ہیل کروکا ایلمک بےروزگار آ ورناک وخت آن مُست پیری نا گواچی مننگو۔ ہزار آ انسانک نشہ غا تیٹی ٹامبو رینگانوں، وطن نا پٹ و بیوان تیٹ گٹ و تلار تا باٹغا ہزار آ ورناک ہزار آ ظلم سہوکا بندغ آک بینگن ملاس ڈاکٹر و انجینئر آک خیسن آ خن تیتو کاٹم اٹ توپ آتا باتے بند کننگ کن تیار سلوکو، بے مقصد آ زند آن بے زار تینا ہنین آ زندے ندر کننگ کن مخ تفوک وخت خلنگو۔ مزاحمتی ادب ہندا ورنا تا جدوجہد نا سیخاٹی مون مستی گام ارفنگے۔ اینو ادب اٹ مزاحمتی شاعری اُست ہشوکا اُست آتا توارے براہوئی شاعر آک ہراڑے کے تینا ماحول تینا چپ و چاگرد اٹ تباہی و بربادی بے وسی و مایوسی، غریبی و بزگی، جہالت و لنگڑی، بے وسی، پسماندگی ءِ تینا خن تیٹی خنیرہ گڑا اوتا شاعری نا لفظ لفظ گٹ انا دتر نا خیسنی ٹی نوشتہ مریک انتئے کہ قوم انا ڈکھ کل راج انا ڈکھ ءِ مزاحمتی شاعر تینا وطن دوست ورناکے تینا شاعری ٹی نازیفنگ تون اوار تینا قوم انا غدار کے ہم تینا شاعری ٹی خبردار کیک ہراتا خن تا پڑی چار پیسہ کے تمانے ہراکے چار گز دستار کن شس کلومیٹر نا جھنڈہء انگریز نا بگی آمبار چکارہ دننگا بندغ آتا بارو اٹ حضرت علی شیرے خدا پارینے دنیا ٹی کل آن بھلا خیانت تینا ڈغار تون غداری ءِ۔

حمید عزیز آبادی ہراکے مزاحمتی شاعری ٹی اسے بھلو پن اسے او تینا اسے گچین ءُ پن اسیٹی دا وڑ پیسہ نا شونکی آ ورناکے تینا شاعری ٹی شغان اٹ غیرت و ہمت نا درس تننگ نا کوشست کرینے؛
ہشانے وطن نا اگر سینہ ءِ کس
قبر مف کفن مف ہںمو نارواے

مزاحمتی ادب دنیا ٹی جدت نا پارہ غا سفر کننگے۔ مزاحمتی ادب چندی نزوری تیتون اوار ہر ملک انا ہر زبا نا مزاحمتی ادب نا وڑ و ڈول ئنا جاچ ءِ ہلیسہ ہر سیاسی تحریک نا وڑ اٹ تخلیق مننگے۔ براہوئی ادب اٹ براہوئی شاعر اسے پارہ غا بین و ملاسی نا گواچی ءِ ایلو پارہ قبائلی سردار و نواب آ تا سرکاری لٹ و کٹ ءِ جان آ سہنگے جاگہ اس اگر اونا دوی ءِ گڈنگ نا کوشست مننگے یا اونا با ءِ سیلہ ٹی گنڈنگنگءِ، تو اونا قلم نا سیاہیک بلسمی رنگ اٹ مزاحمت نا علامت اٹ نوشت اٹ تارخ نا بشخ جوڑ مننگو۔

حب ریور روڈ آ اِرا جتا ویل آتیٹ اسہ بندغ ئس مرگ نا گواچی مس، 23 آن زیات بندغ ٹپی مسر۔ ٹپی آک خڑک ئنا اسپتال سرکننگ و درمان کننگ آن گُڈ کراچی سول و جناح اسپتال سرکننگار، ٹپی تیٹ نرینہ، نیاڑی و چُنا ہم اوار ءُ۔

ویل آن گُڈ ریور روڈ آ ٹریفک بند مننگ نا سوب آن گاڑی تا مرغنو قطار لگا۔ حب آن کراچی آ ہنوکا و سندھ آن بلوچستان ٹی پترینگو کا شاری و مسافر آتے پریشانی نا گواچی مسر۔

دا رد ئٹ پاننگک کہ چار شمبے نا دے حب ریور روڈ مواچھ گوٹھ نا خڑک ہنوک آ آئل ٹینکر و حب آن کراچی ہنوک آ مسافر آک کوسٹر ٹی ڈک لگنگ نا سوب آن کوسٹر کلٹی مننگ نا سوب آن 23 آن زیات مسافر ٹپی مسر، داسکان ہچ نسخان نا حوال رسینگاتنے۔

پین احوال ئسے نا رد ئٹ چار شمبے نا دے حب آن خڑک رئیس گوٹھ آسکائی ہوٹل نا جاگہ آ ٹریفک ویل ئٹی 28 سال ئنا ورنا محمد شاہ، مار غلام حسین نا ٹپی مس و جاگہ غا ساہ تس کہوک نا جون اسپتال سرکننگا۔

بلوچستان آن ایف سی نا کشنگ نا بابت مہم اس تیوی بلوچستان اٹ بناء کرون – بی ایس او نا پڑو

تربت نا شا آبسر ٹی ایف سی نا کارندہ غاتا دو آن سم کاری آن بیران مروکا کراچی یونیورسٹی نا خوانندہ غا ورنا حیات بلوچ نا بیران مننگ آن پد تیوی بلوچستان و پین تین شار آ تیٹی برانزی مچیک برجاء ءُ۔ سیکیورٹی کارندہ غاتیا سوختی نا درشانی مننگے۔

احوال آتا ردئٹ اینو نا دے خاران ٹی سول سوسائٹی نا پارہ غان اسے چُپی ءُ برانزی مچی اس کننگا اوڑتون اوار اوار شہید حیات بلوچ نا یات اٹ موم بتی ام لگفنگا۔

اندن سوراب ئٹ برمش یکجہتی کمیٹی نا پارہ غان حیات بلوچ ءِ یات کننگ کن پروگرام ہڈ تننگا۔ ہراٹی مخلوق نا بھلو کچ اس موم بتی لگفس اودے یات کریر۔

دا وخت مقررین تا پاننگ ئس کہ ہراتم حیات نا جون دتر تیٹ اسٹ اونا لمہ باوہ نا مون آ  سڑک آ تموک ئس دا تدینی تیوی انسانیت ءِ سریفے۔ چاگرد آک کفر تون زندہ مننگ کیرہ ولے بے انصافی تیتون آخہ۔

یاتی مرے کہ 13 اگست نا سہب آ تربت نا شار آبسر ٹی پاکستانی سیکیورٹی فورسز نا گاڑی آ تراک اس مس، اندا تراک آن پد ایف سی نا کارندہ غاک خڑک نا باغ آن حیات بلوچ ءِ ہلکر و اونا لمہ باوہ نا مون آ بے دادی اٹ سم کاری کریسہ کسفیر۔

دا ویل آن پد بلوچستان تون اوار تیوی جہان ٹی کوکار مننگے۔ و کہی شار آتیٹی برانزی مچییک مننگو۔ اندن کوئٹہ، کراچی، سوراب، خضدار، تربت، خاران، قلعہ عبداللہ ٹی برانزی ءُ مچی کننگا و کہی شار و جاگہ غاتیٹی حیات بلوچ نا یات اٹ موم بتی لگفنگو۔

دا ویل نا پاکستان نا غٹ بھلا پارٹیک و اوفتا ذمہ وارک مذمت کریسہ دا پاریر کہ سیکیورٹی کارندہ غاتے ڈوہدار کریسہ سزا تننگے۔

بلوچستان نیشنل پارٹی نا کماش سردار اختر مینگل پارے کہ دا ویل اسے ایف سی کارندہ نا اف بلکہ تیوی سیکیورٹی کارندہ غاتا ذہنیت ءِ۔ ریاست ءِ دا ذہنیت ءِ سرپد مریسہ دانا بیخکنی کروئی ءِ۔

انداڑتون بی ایس او نا چیئرمین نذیر بلوچ بیان اسیٹی پڑو کرے کہ بلوچستان آن ایف سی نا کشنگ کن تیوی بلوچستان ئٹ مہم اس 22 اگست آن بناء کینہ۔ دا ردئٹ بلوچستان تیوی شار آتیٹ برانزی کیمپ خلون۔