بے حیاتی
نوشست: مہروان جان
دی بلوچستان پوسٹ
اے ھون کہے زمانگے دامنا شلینتگا انت
اے ھون ء قصہ مکا اے ھون ء قصہ ء مکا
اے ھون کہے چو ھِنّی ءٙ مئے اندرءٙ رجینتگ انت
بلوچ ء زگر ھون زندگی ء دامنا کپ انت
مبارک قاضی
آتو امر اورے کنا شیراک کنا راج نا لغوراک۔۔۔ خلاس مسر نما دو رنگی آ چودہ اگست نا ناچ آک یا انگہ سلوکو؟ چٹار نما آزاتی یعنی غلامی نا ریلیک یا انگہ اریر بوٹ چٹنگ و پالش کننگ آک؟ ٹک ٹاک نا ویڈیوک جوڑ مسور؟ یوٹیوب ءِ ویڈیو تے اپلوڈ کریرے یا سلوکو؟ خرچہ اس جوڑ مس یا کل بے سود و بے فاہدہ مسور؟
امر گوڑا دسا ایف سی والاک سوج کپہ سا نمے کے ہراکان بننگ ارے؟ خیصار یا پٹی ءِ انتکن اننگ اورے؟ آزات و مخلص پاکستانی مننگ نا کاغذات آک جمع مسر؟ دسا کس تو شق کپرو نما آ، نہ!!
ایمان نما تازہ مس۔۔۔ مسلمان مسرے۔۔۔۔ محمد علی جناح و اونا چیلہ غاک طارق جمیل آنبار نمے امر شاد کونفیر یا آخہ اندن خوار مسونرے موٹو دا باسونی ٹی؟
دا کل حوال آتیان پد ببو داسا اُرن کہ داسا ننکن نمکن یعنی بلوچستان کن انتس تخوکے…
دا پوسٹ اٹے فوٹو اس تروکے، دا فوٹو ءِ تالی چٹ، مفاد پرست، موقع پرست و ذہنی غلام آک بلکن سرپند مفس ولے ہراکہ غیرت مند، حقیقت پسند و آجوئی پسند انگا مخلوق ارے او ضرور سرپند مرور…. دا فوٹو 13 اگست 2020 نا ئسے. ننا بد چوچ و بے زہن انگا چنا تا محافظ ایف سی نا کنڈان شہید کروکا حیات بلوچ نا ءِ۔ شال آن کے ٹیپل کے بریس تو جاغہ جاغہ ایف سی نا چیک پوسٹ تے لکھوکے “ایف سی بلوچستان اور عوام ساتھ ساتھ” تو کنے اندن گمان مریک دا عوام نا مطلب ءِ تالی چٹ، بد چوچ، بے زہن انگا چناک۔۔۔ ہرافتہ سفت ءِ ای ایزدے کریٹ تینا پوسٹ اسیٹی۔۔۔۔
بہرحال بربو کے اُرن حیات بلوچ دیر اس اسیکہ، انتیکہ باز آتے دا دسکان سما اف کے انت کسہ مسونے، دا دیر ئسے، دا دیر خلکونے و انتکن خلکونے۔ انتیکہ ننا لس مخلوق پاکستانی میڈیا ءِ خوانوک و منوک ءِ دنکہ انتخاب اخبار ٹی ایذے بسوسوس “تربت بم دھماکہ میں ایک نوجوان جانبحق۔”
ایہن تو کنے لکھنگ بفک، ای تپرہ ولے امر کیو کنے کنا اُست نا خڷ ہلیپک، کنے بے جارات کرینے۔ ای ہبکہ اٹ کے انتس کیو۔ امر تینا است نا لار ءِ کشیو، امر تینا استے پدین کیو۔ خیر باز مشکلے کے دا لکھنگ اٹ کنا ڈیہہ نا دڑداک خلاس مریر ولے واہم ای پاؤ گڑاس نا گڑاس تو کیو تینا کچ اٹ، دا ڈیہہ نا وامک بغیر آجوئی آن خلاس مفسہ۔
حیات بلوچ ولد محمد مراد تربت آبسر نا تولوک ءُ ورنا اس ئسکہ، او کراچی یونیورسٹی ٹی ساہیکولوجی ڈیپارٹمنٹ ٹی آخری سال نا نودربر اس ئسکہ، ایہن تو دا وختے اودے یونیورسٹی ٹی مروہی اس ولے کرونا نا سوب آن دا 13 اگست ءِ او تینا علاقہ ٹی ئس۔ تینا لمہ و باوہ ءِ الار نا باغ ٹی کمک کریکا ہرادے اونا باوہ ٹھیکہ ٹی ارفیسوس۔ 13 اگست نا دے تربت ٹی بم تراک اس ایف سی والاتیا مس، ایف سی والاک حیران و ہبکہ مسر، ہیتاک ہنار ایہان تا دنکہ ہر وخت او مریرہ۔ ایلو ورناک ہشار مسر نرار، اوفتے خبر اس دننگا وختے ایف سی والاک پی بیغرہ۔ دا گڑا المی کل ءِ خبر ءِ ولے حیات الار نا باغ ٹی تینا کاریم اٹ لگوک مس، حیات کن بے حیاتی اس مس۔ اونا زند ءِ بے زند کننگ نا ذریعہ اسے بہانہ اس مس۔ ایف سی والاتا کل ءِ خبر ءِ کہ او کچک ءُ بندغ ءُ۔ ولے حیات موٹو سادہ مس۔ حیات نا ہڈ کننگ اس متو ایف سی نا کچکی و ستم گری نا اسے پین دڑدی ءُ داستان اس مسک دنکہ ہمے وختان پاکستانی فوج نا دو آن مننگے۔ حیات نا دوک پیہن ءُ چادر اسیٹی تفنگار، اونا بے وس و بزگ انگا لمہ باوہ نا مونا۔۔۔۔ لمہ و باوہ پریاد کریر، منت کریر۔ لمہ تے گد ءِ تینا تورے ایف سی والاتے دنکہ بلوچ دود و ربیدگ ٹی جنگ بندی کن کننگک ولے کچک انت پو مریک انسان و انسانیت نا بولی ءِ۔۔۔۔ حیات نا لمہ باوہ غا ترند مریسہ او حیات نا نت و دوتے تفیر، بقول خن خنوک شاہد آتا “حیات نا خنتے تفنگ آن پد اونا مون ڈغار کن تسر اودے لیٹفیر۔ و اسہ دم تون سم کاری کریر۔ حیات دیخہ لڑزہ و لتڑی کرے, دوتے سریفے کاٹم ءِ برڑ کننگ نا کوشست کرے ولے اچ کننگ کتو بس ساہ ءِ باہیفے۔”
حیات نا زند اخس سخت مسونے کل بلوچ آتے جوان سما ءِ انتیکن کل بلوچ راج نا حالیت اسہ وڑ ءِ۔ غلام قوم نا حالیت داکان بیدس انت مرو۔ اندا تو غلامی نا بلا نسخان ءِ کہ نئے تینا وڑ ٹی زند کننگ کیسہ نئے تینا منشا ٹی کہنگ کیسہ۔ نا انتس ارے او نا اف، اگہ نا مرے ہم ولے اونا اف معنہ او استعمار نا ءِ۔
نا مخنگ، اوغنگ، خوشی، غم، سیل و سوات، ہیت و مجلس، چاہے انتس ارے دا کل استعمار نا کوزہ ٹی مریرہ۔ اگہ نی اسے گڑاس ہم تینا مرضی و منشا ٹی کننگ خوائسوس یا اندنو ارمان اس تینا است ٹی زندہ تخاس تو ایسری اندن مرو دنکہ حیات جان مسک۔
کوزہ گیر ریاست ءِ دا اسل منیپک کہ اونا منشا آن بیدس نی گڑاس کیس انتیکن او خلیک، خلیک تینا اختیار و تینا اقتدار کن ولے اگہ نے آجو مروہی ءِ، تینا زند ءِ تینا کروہی ءِ گڑا اوڑکن آزات ءُ سوچ اس ہتوہی تمک۔ آزات ءُ خیال اس تینکن جوڑ کروہی تمک۔ تینکن و تینا راج و ڈیہہ کن آزات و فکر اس کروہی تمک۔
ولے ننا بد بختی اندادے کہ نن دا گڑاتے سوچپنا، نن خُلینہ، تینا است نا لاڑ ءِ لغوری اٹ کسفنگ نا کوشست کینہ ہرا آخیر ءِ ننا ضمیر ءِ کسفسہ ننے زندہ ءُ جون اس جوڑ کیک۔ ننے مون ءُ نشان جوڑ کیک تاریخ نا خیسنا پنہ غاتے۔
تو خدارا کنا یوٹیوب و ٹک ٹاک والا سنگتاک، میر و ٹکر و سردار نا گاٹ مروکا ایلماک، بلوچستان آن کشمیر کن ریلی کشوکا ورناک، تالی چٹنگ و سلامی تننگ اٹ خوش مروکا سنگتاک، جاغہ جاغہ اِرا گریڈ نا پیشن نا بروکا سپاہی تا مونا خنتے لڑونج کریسہ تینا جاغہی مننگ نا ثبوت تروک ایلماک دسا تو سماء کبو۔ اخس پین بے ضمیر مرورے؟ اخس پین ظلم سگورے؟ اخس پین لغوری کرورے۔۔۔۔ بس کبو خدارا بس کبو، اینو بش مبو دا ڈیہہ کن بش مبو، دا راج کن، دا قوم کن، دا قوم نا حیات کن بش مبو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
