بلوچستان نا مال و مڈیک براہوئی ادب نا رنگ اٹ
نوشت: محبوب شاہ
چارمیکو بشخ
دی بلوچستان پوسٹ
اردو ادب نا امجد طفیل پائک کہ استعمار نا خلاف ادب نوشتہ کننگ پوسکنو ہیت اس اف، گدرینگوکا مسُہ سد سال اٹ ہرا وخت آن کے مغربی استعمار آک ایشیاء، افریکہ و لاطینی امریکہ ٹی تینا شل انگا چانپولءِ سخت کریر ہںمو وخت آن اوتا خلاف جدوجہد اسے وڑ اسے نا اسے وڑ اسیٹ چکنگے و ہندا جدوجہد اٹ نوشتہ کارآک تینا بشخ ءِ شاغیسہ ہنانو۔
بیستمیکو صدی نا نیام اٹ ہراتم استعمار پد تما تو دنیا نا چندی ملک آک آجوئی ہلکسر، ہمو تم دنیا اِرا بشخ مس ہرا بھلو عظیم ءُ طاقت جہان نا وسائل آکے دوئی کننگ کن اسے ایلوء شیف خلنگ کن مل ہلنگ نا فکر اٹ تیار سلوک ئسر ہمو وخت ہم نوشتہ کار آک ہندا ہیت ءِ تالان کننگ اٹ گٹ ئسر کہ نو آبادیاتی نظام کٹیتنے بلکہ اسے پوسکنو رنگ اسیٹی کرونا نا مرض آمبار دنیا ءِ ارفکنگے۔ ہندن دنیا داسہ اسے پزورو طاقت اسے نا مون اٹ بے وس سلوکءِ، داسہ امریکی استعمار آک بدمعاش اسے نا حیثیت اٹ نزور آ ملک آتیان اوتا وساہل آکے بے اریفنگ آن دننگو ، جہانی مزاحمتی ادب نا نوشتہ کار آک تینا قلم نا نوک اٹ استعمار نا بج آ اونا بدمعاشی نا تاریخ ءِ نوشتہ کننگء شروع کریر، مننگ کیک داڑان مُستی مورخ آک دنو تاریخ نوشتہ کتنو۔
ہندن ننا وطن دنیا نا مون آٹے، برم کروکا باغک، خیسن و پوشکن آ گواڑخ آک مونجا مننگو، ہتم نا شونمب گواڑخ آتا تالان بارن آ پن آتیا خڑینک شولنگے ، امن نا گوگوک اُست ہشوک آ ندارہ ٹی خرن و آبات آ چمن ءِ ہشنگنگ آ خننگو اسٹ اسٹ آ است بڈ مریسہ پوغ تا انگار اٹ تمنگو۔ ولے اسے دانائسے نا قول ءِ کہ بندغ آتا کہنگ آن اوتا دیارے ہشنگ آن قوم و وطن کٹیپک، قوم و وطن نا پن ہموتم کٹیک ہراتم اونا ورناک تینا شناخت ءِ گیرام کیر.
داہمو وطن ءِ، دا ہمو قوم ءِ ہرانا بارو اٹ نادر قمبرانی شنزہ گروک اٹ تینا مال و مڈیء نا رکھ کن تینا ورنا کے تغ آن بش کریسہ دا وڑک پائک:
بش مر کہ ورنا وخت ہںنا
دو آن نا تاج و تخت ہںنا
رہزنک پلار ملک ءِ دریر
بیرغ کہ تما بخت ہںنا
سیالاک ہںنار الار ننے
ولدا شغانٹ پار ننے
نامرد و بے ہںمت لغور
کم سیال و کٹوک چار ننے
دنیا ٹی چندی ملک آک اسے بھلو قوت اسیتون اوار چنکا چنکا قوم آکے تینا لتاڑنا پکر اٹی او ولے ایلو پارہ غان دا بھلا طاقت آک مالی و جانی نسخان نا وجہ غان نزور مننگو، اوتا مخ پنیسا کننگے۔ ہراتم استعماری قوت آک چنکا قوم آکے غلام جوڑ مننگ اٹ کامیاب مریرہ ہمو تم اوتا تباہی و بربادی نا کسہ غاک ہم سفر کننگ کن نن اوہی نن راہی مریرہ۔
اینو امریکہ کوننگا مست انگا لوک کل ءِ دنیا ٹی تنیا مننگے، مننگ کیک بروکو وخت اٹ زوال نا گواچی مرے۔ چنکا قوم آکے بکارے کہ اوک استعماری قوت آتا خلاف تخلیقی او توار چست کیر، طاقت نا خواجہ غاک مدام روشنائی نا مون اٹ مرک انا گواچی مسونو شڑط دادے قوم آتا ضمیر سلامت مرے انتیکہ ضمیر اسے ہندنو سنگت اسے ہرانا مدام قوم ءِ حق ئنا آجوئی نا کسرے نشان ایتک۔
اینو ادبی صنف آتیٹی براہوئی و بلوچی مزاحمتی ادب ہندا وجہ غان بھاز پنی ءِ اینو نا براہوئی نوشتہ کاراک تینا ادب ءِ مزاحمتی شاعری آن ہلیس مزاحمتی افسانہ اسکان تالان کننگ نا کوشست کننگو، بے شک ادب نا دا کوڑی ٹی منہ بندغ حکمران طبقہ نا بے میار ڈاچی نا تراپوڑی ءِ بھاز خوڑت اُننگو، ولے براہوئی اب نا دا بےوس آ صنف اینو نا براہوئی ادب اٹ اسے چنکو ادبی ءُ کمک اسے تون مونا رودنگے دنکہ فلسطین نا مزاحمتی ادب منہ سال پد تمنگ پد داسہ ولدا اسے پوسکنو جوزہ اسیٹی مونا سرنگے اندن بلوچ وطن ہم اینو براہوئی بلوچی شاعر و ادیب آکے کوک کننگے کہ تینا وطن و قوم نا تاریخ و ثقافتء تینا ادبی و قومی مڈی ء گوہنگ آن بچفبوں، براہوئی ادب اٹ مزاحمتی شاعر ڈاکٹر سنی، مرید بلوچ، حمید عزیز آبادی تو وخ کے ملا مزار، بابو عبدالرحمٰن کرد، نادر قمبرانی اسے اند مسرہ اوک وطن نا گک تہار آ دے کے تینا قوم انا پٹی ٹوری آ جغرے متکنا پنڈوکا پخیرکء کے پوسکنا ہڈ چونڈوکا میرکے بگی چک خواجہ و پیرکے تینا خن تیٹی خنوسر، تینا وطن نا ٹپی کپوت آکے خاخر نا زراب اٹ تمنگا خنوسر ندر مروکا پرک آکے پھل آتا بارن آ پن آتیا خیسن دتر نا لپ آتے، ٹپی توری ٹپ آتے تینا قوم انا لنگڑ لغڑ آ بدن کے ننا زبان نا لالچی و پنی آ شاعر و دانشور آکے ہراکے ہر حکومت اٹ جتاو سل اسیٹی ساڑی اریر، مزاحمتی دیوان ٹیٹ چرپو شاعری کروکا گپل الو کاک، ہراکہ پیسہ کے ہر دھول آ چھاپ خلکنو، ہراکے براہوئی ادب ءِ لتاڑیسہ ادب ءِ کاروبار اس جوڑ کرینو اوتا رنگ ءِ اوتا کردے ءِ، اوتا ڈلوکا مون ءِ خڑک آن خنوسر گڑا ضرور اوتا شاعری خاخر دسیکہ ولے بےوس آتا مظلوم آ وطن قوم ءِ بہا کروکاکے وخت اس ہم معاف کپک، انتئے کہ دا ہںمو وطن ءِ دانا خواجہ غاکے براہوئی ادب مدام یات تخانے، چاہے او انگریز نا دور مرے یاکے ایوب و بھٹو نا دور، ہندن براہوئی مزاحمتی شاعری نا اسے بے مٹ ءُ پن اس بابو عبدالرحمٰن انگریز دور انا مجاہد و جانباز آتا بارو اٹ دا وڑ پارینے، ہراکے انگریز نا بگھی ءِ چکنگ آن نمن مسر؛
سلامے شرف دار خیر بخش مری ءِ
او انگریز نا منیتو خود سری ءِ
ہںزار آفریں میرخان جان نوابے
پرنگی آن خوہا کہ حقے حسابے
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
