کوئٹہ ریلوے کالونی ٹی سرکاری اُرا اسینا چھت نا تمننگ آن اُرا ٹی مروکا 3 چنا تون 5 بندغ ٹپی مسر ۔

ٹپی مروکا بندغ آتے ہسپتال آ علاج کن راہی کننگا ۔

دا ویل آن پد ریل نا ملازم آتا پاننگ ءِ کہ دا وختا 800 ریل نا سرکاری کواٹر آک بد حال ءُ۔ ہرافتا تمننگ نا خلیس ارے ۔

دا ملازم آک پاریر کہ ہر توہ آ ننا تنخواہ آتیان 5 فیصد اندا کواٹر آتیکن کاٹ مریک اوکان ابید ام دافتے جوڑ کننگ افس ۔

ٹپی مروکا بندغ آتا سیال و اُرا والاک پاریر کہ آفسر آتیکن تینا خاطر کن پیسہ وسائل ارے ولے نن غریب آتیکن اوفتون ہچ ام اف ۔

دا ویل آن پد ریل نا ملازم آک سرکار آن دا کواٹر آتا زیہا کاریم کننگ و اوفتے جوڑ کننگ نا خواست کریر

اینو آن تیوہ آ بازارک، دکانک، شاپنگ سینٹر آک ملینگور۔ کروناوائرس نا سوب آن ہرا پابندیک خلینگاسر او تیوہ آک ایسر کننگار۔

بلوچستان حکومت صوبہ ٹی سوداگری کاریم تے پوروی وڑ ئٹ ملنگ نا پڑو کرینے۔ محکمہ داخلہ بلوچستان نا رد ئٹ صوبہ ٹی سوداگری مرکز آ وخت وخت و اسہ دے ئنا چھٹی نا پابندی ایسر مرو۔

محکمہ داخلہ نا پاننگ ءِ کہ داسا بلوچستان ٹی سوداگری مرکز آتے تیوہ آ ہفتہ و 24 سائت اسکان ملینگ کیرہ۔

یاتی مرے کہ بلوچستان ٹی کورونا نا کیس آتیٹ کمبوتی خننگنگ ءِ، تدوکا دے صوبہ ٹی کورونا نا 14 کیس پک مسوسس ہراڑان گُڈ بلوچستان ٹی کورونا آن زیمی ناجوڑ تا کچ 11835 مسونے اندن داسکان وائرس نا سوب آن 137 بند کزیت کرینو۔

تدوکا دے تیٹ ترجمان حکومت بلوچستان لیاقت شاہوانی نا پاننگ ئس کہ بلوچستان ٹی کورونا نا رد ئٹ حالیت گچین ءِ داسکان کورونا ایسر متنے، شاریک خیالداری گام تے برجاہ تخیر ۔

او پاریسس کہ برام نا جاگہ آتے ملینگ نا رد ئٹ داسکان ضابطہ کار (ایس اوپیز) جوڑ متنے، برام نا جاگہ آتے ملار گڑا سخت کارروائی کرون اندن اِرا ہفتہ آن گُڈ حالیت ءِ اوریسہ تعلیمی ادارہ آتے ملینگ نا فیصلہ کرون۔

یاتی مرے راجی حوالکاری کمیٹی تیوہ آ ملک ئٹ ایس او پیز نا رد ئٹ ریسٹورنٹ، کیفیز، تھیٹرز، سینما ہالز، مزارات، بزنس سینٹر و ایکسپو سینٹرز 10 اگست آن ملینگ نا فیصلہ کرینو۔

جُفت جَھمّرک ہنار تُوبے آ تاک تاک چَٹ الکُر
بَرفی آ چہرہ غا اندن اونا زلفاک چَٹ الکُر

خَن تا دریا تیان ہیناری مَلاسی چُرّنگے
گلشن اَٹ اُست ئنا ویرانہ غا صحراک چَٹ الکُر

اُست ئنا خازہ انگا سُو آ نما غَم شولنگا
بارن انگا جغر آ دا نما درداک چَٹ الکُر

خاک چَٹ اَلک ننا کاٹم ءَ ہم باسُن ءَ دشت ئٹ
گلشن اٹ خَرُّن آ نا نَت تے آ پُھلّاک چَٹ الکُر

ہفت دریا وہِرَک ہفت سمندر نا ملاسی
سیر کے یار اگہ دا خن تا خڑینکاک چَٹ الکُر

او کِہ تقسیم کرے اُست ءِ تینا پین ئسے تو روحانی
مَسّو تالان ننا ہم گُڑا مِہراک چَٹ الکُر

روحانی طـوقی

بھاز خلق آتیٹ ہن بر نا کسک بند مسر، مکران کوسٹل ہائی وے آ 30 فٹ مرغن آ بند ءِ دیر درے، کوہلو نا تلاف نالی تیٹ دیر نا ترندی سوناری پول ءِ تینتون درے، کوہلو نا سبی و کوئٹہ آ ہن بر نا کسک بند مسر۔

طوفانی آ پِر بلوچستان ٹی تباہی بش کرے۔ مستونگ، خضدار، ہرنائی، نوشکی، لورا لائی، ڈھاڈر ٹی نوکاپ نا دیر بھازا ساہدار تے تینتون درے، گڑاس اُرا نا دیوال آک تمار، پالیز آک ہم نسخان مسر اندن بھلا روڈ آتیا جاگہ جاگہ ہن و بر بند مس۔

ترند پِر ئنا سوب آن مکران کوسٹل ہائی وے آ 30 فٹ مرغن آ بند ءِ دیر درے، کوہلو نا تلاف نالی تیٹ دیر نا ترندی سوناری پول ءِ تینتون درے ہرا نا سوب آن کوہلو نا سبی و کوئٹہ آ ہن بر نا کسک بن مسر۔

صوبائی حکومت نا ترجمان لیاقت شاہوانی نا پاننگ ءِ پِر و نوکاپ نا وختا جتہ ویل آتیٹ داسکان مُسہ بندغ کزیت کننگ نا ہم حوال رسینگانے۔

کوئٹہ تون اوار بلوچستان نا مون سون رینج والے علاقوں آواران، تربت، گوادر، اورماڑہ، ڈیرہ بگٹی، جھل مگسی، زیارت، ہرنائی، لسبیلہ، جعفر آباد و نصیر آباد، بولان و سبی، تون اوار جتا علاقہ آتیٹ پِر ئنا لڑ مدان مدان آ برجاہ ءِ۔

جعفرآباد ٹی پر ئنا سوب آن مروکا ویل آتیٹی 2 بندغ مرگ نا گواچی مسونو اندن حب اٹی نوکاپ ئٹ گٹ مروک ارا بندغ ءِ بچفنگا۔

خضدار نا سیل و سوات نا ہند مولا چٹوک آ نوکاپ نا دیر اٹی گٹ ہفت بند ءِ بچفنگا۔ اندن مکران کوسٹل ہائی وے پسنی نا بدوک نا خڑک نوکاپ نا دیر پل ءِ تینتون درے، ہرانا سوب آن گوادر لسبیلہ و کراچی نا ہن بر نا کسرک بند مسر، و بھاز آ گاڑیک گٹ مسر۔

ضلع ڈیرہ بگٹی ٹی جتہ علاقہ آتیٹ 4 آن 5 فٹ دیر بندغ آتا اُرا تیٹ پترینگا، ضلعی کوالخواک بندغ آتے رکھوک ہند آتیا سرکریر۔ ہرنائی ٹی اسہ ساہت نا برجاہ پر آن شیفکو علاقہ غاک دیر اٹی اندر مسر۔ مَش تیان بروکا دیر ئنا سوب آن کور تیٹ نوکاپ نا دیر اوار مس و غریب آباد نا گڑاس اُرا تیٹ پترینگا۔

بولان نا علاقہ کرتہ کور ٹی پِر ئنا سوب آن بد ءُ حالیت ودی مس ہرانا سوب آن کوئٹہ سبّی روڈ بند مس، نوکاپ نا دیر کرتہ ٹی پاوالی تا ساہدارتے تینتون درے۔

ڈیرہ بگٹی ٹی نوکاپ نا دیر اٹی بروک دوشہ بندغ ئسے ڈنگ خلک ہراڑان اونا حالیت بد مس و اودے ڈسٹرکٹ اسپتال سرکننگا، نوکاپ نا دیر ہندی مخلوق نا بینوکا گڑا تے ہم تینتون درے۔

ایلو کنڈان صوبائی ڈیزاسٹر منیجمنٹ اتھارٹی (پی ڈی ایم اے) پر آن ودی مروکا حالیت نا سوب انتظامیہ ءِ خبردار کریسس۔ کوالخواک مچی ہلوکا تا کڑمب آ سمندر، پر ئنا کور، سیل و سوات نا ہند و کور تیان خڑک ہننگ و شار تیا ہن بر آ پابندی خلکنو۔

مُد حوالکار محکمہ ساڑی آ پر ئنا لڑ نا یک شمبے اسکان برجاہ مننگ نا گمان نا درشانی کرینے و پی ڈی ایم اے نا پارہ آن زیمی بندغ آتے کن المی گڑا رادہ کننگانے۔ زیمی علاقہ آتیٹ ٹینٹ، ایلو المی گڑا رادہ کننگ ءُ۔

بلوچستان حکومت نا ترجمان لیاقت شاہوانی کوئٹہ ٹی نیوز کانفرنس نا وختا پارینے کہ بلوچستان ٹی پر ئنا لڑ برجاہ ءِ، بھاز آ علاقہ آتیٹ ماڑی و جانی نسخان، حوالکاری بست و بند زیمی مسونو۔ وزیر اعلیٰ جام کمال خان ودی مروکا حالیت نا تینٹ ذمہ واری ارفینگ ءِ۔

او پارے کہ بشام نا پِر ئنا خبرداری شینک کننگاسس۔ پی ڈی ایم اے مالو آن خبردار ءِ، وزیر اعلیٰ محکمہ غاتے مشینری تے کاریم اٹ ہتیسہ کمکی کاریم تے ایسر کننگ نا پنت کننگانے۔

وکیل آتا پارہ غان، یوم سیاہ، قرآن خوانی و لنگر بشخ انگا۔

سانحہ 8 اگست سول ہسپتال کوئٹہ نا چارمیکو سال دے کووڈ 19 نا سوب آن سادئی ٹی مس۔ وکیل آتا تنظیم آتا پارہ غان بلوچستان ہائی کورٹ و شیفکو آ عدالت آتا بائیکاٹ کننگا۔ غٹ بار رومز آتے مؤنا جھنڈا خلنگاسس۔

شہداء 8 اگست نا یات اٹ وکیل آتا تنظیم نا پارہ غان بلوچستان ہائی کورٹ ٹی قرآن خوانی مس و لنگر بشخ انگا۔

احوال آتا ردئٹ کوئٹہ نا سول ہسپتال ٹی وکیل آتے مروکا تراک ءِ 4 سال پورو مس۔ چارمیکو برسی نا ردٹ وکیل آتا پارہ غان عدالت آتا بائیکاٹ کننگا۔ کوئٹہ تون اوار بلوچستان نا غٹ شار آتا بار رومز آتے مؤننگا جھنڈا خلنگا۔

یاتی مرے سانحہ سول ہسپتال چار سال مست سول ہسپتال ٹی وکیل آتا زیہا اسے تراک اس مس ہراڑان 56 وکیل 2 صحافی تون اوار 75 بندغ بیران مسر۔
سانحہ سول ہسپتال نا چارمیکو برسی پاکستان پیپلز پارٹی نا کماش بلاول بھٹو زرداری تون اوار غٹ سیاسی پارٹی تا کماش آک دا سانحہ نا مذمت کریر و جوانو وڑ سیٹی دانا پٹ وپول کننگ نا خواست کریر

بلوچستان نا مال و مڈیک براہوئی ادب نا رنگ اٹ

نوشت: محبوب شاہ
مسٹمیکو بشخ

دی بلوچستان پوسٹ

نیلسن منڈیلا پائک؛ ہرا راج اٹ انصاف مف ہمو راج اٹ مخلوق وخت اس ہم سکون دو بفک۔ جہان نا اصول ءِ کہ ہراتم قوماک تینا تقدیر نا فیصلہ کننگ نا لائخ مفس تو اونا تقدیر نا فیصلہ ءِ تاریخ کیک۔ تاریخ اسے اندنو ظالم ءُ جج اسے ہرانا عدالت اٹ رحم انا اپیل مفک گڑا فیصلہ قوم نا دوٹی بریک۔

اینو ننا وطن نا خرن آ خولمک میوہ غاتا درخت آک باغ تا خرسی پگ آمبار بارنگو، آباد آ خلق آک کپی جوڑ مننگو، مدام وہوکا چکل آک خشک مننگو، اخس نیاڑیک جنوزان مسونو اخس چناک یتیم مسونو اخس تولوکا مسنک تینا دشتار تا کسر آ پالنا آ خن تیتون اروکو، اخس ورناک خیسن جمجلاہی کروکا برانز اٹ کباب مسونو۔ اخس لمہ غاک تینا ورنا تیکن مودہ کشنگو امن پٹوکا خاہوت آک تینا مال و مڈی ءِ قوم وطن کن ندر کرینو، توپ و تفنگ نا باٗے بند کننگ کن کاٹم کاٹم آ تخوک ءِ، دا ہمو مظلوم آ وطن ءِ ہرانا ہفت ورنا اسے ہفتاد سال نا پیرو مڑد اسے نا مونا پاہںو نا چٹ ءِ تینٹ تینا لخ اٹ شاغار، تینے وطن نا درو دیوار کن ندر کریر۔ دا فلسفہ نا بارو اٹ۔

بھگت سنگھ بھاز وخت مُست پاریسس کہ غلامی ٹی آسودہ او زند اس گدریفنگ آن جوانے کہ دشمن تو جنگ کریسہ پت آتیان پر زندءِ بہاٹ ہلنگے۔ و تینا بروکا نسل آتا زند انا رکھ آ کن تینا جان ءِ ندر کے۔

براہوئی ادب اٹ مزاحمتی ادب نا سرخیل بابو عبدالرحمٰن کرد،تینا مزحمتی شاعری نا کتاب شف گروک اٹ نوروز خان نا ماتا پاؤ تننگ نا وخت آ اوتا ترجمانی ءِ تینا جوزہ غاکے مزحمتی شاعری نا داوڑ اٹ کرینے۔

نا سُہب ءِ خنپرون نن اے شام گگ تہارا
بیگاررسینگک آرام اُستاتے بے قرارا
بین و ملاسی اٹ پا دشمن تو جنگ کرء دے
خیسن دتر تو پا نی بُھٹاتے رنگ کرء دے
وختا برم نا دِنا لٹنگا باغ نی پا؟
طوفان تو مس مقابل دنا چراغ نی پا
قربان دا وطن کن دا شام ٹی مرون نن
ظلماتے نن سہانن نا غم تے ہم درون نن

نور محمد ترکئی پائک: جہان نا ہر وڑ انا راج اٹ اِرا وڑ انا کماش مریرہ اسے ہمو ہراکے تینا ذاتء تینا خاہوتءِ ندر کریسہ روشنائی نا کسر نشان ایتک ایلو ہموکہ تینا ذات و خاہوت آتا مفادات آتیکن راج ءِ گگ تہار آ دُون اٹ بٹک۔

اندن براہوئی مزاحمتی ادب اٹ ورنا شاعر و نوشتہ کار آتا اسے گچین و ٹولی اس ودی مسونے ہراکے زبان و ادب ءِ مونا دننگ کن نن و دے کاریم کننگو، داتیٹی شاعر نوشتہ کار افسانہ نگار مضمون نگار آک خیسن آ ساہی ٹی است انا حب اٹ نوشتہ کننگو۔ اینو مزاحمتی ادب آ رکھ خلنگ نا باوجود قوم و وطن نا ڈکھ آک پیشن و ملکی ادبی رسائل و جرائد اٹ ہم نوشتہ مننگو، ادب نا پڑا کس انا مالی کمک اٹ کاریم مننگ اف بلکن ہر نوشتہ کار تینا بارن آ پڈ آ تینا تینا خیالات و تینا جوزہ غاتا درشانی ءِ کننگے، دا پڑا چندی مزاحمتی ادب نا کتاب آک شینک مسونو ہندن براہوئی مزاحمتی شاعری نا صنف آ اسے پروفیسر اس ایم فل ہم کننگے۔ مزاحمتی ادب نا شاعری نا ہر ا کتاباک چھاپ مسونو او تیٹی بابو عبدالرحمٰن کرد انا شف گروک، ایماندار نادر قمبرانی نا شنزہ گروک، ڈاکٹر لیاقت سنی چکار، غمخوار حیات نا آجوئی دتر خوائک، مرید بلوچ نا کتاب رخصت اف اوار اون سنگت ہم چھاپ مسونے۔

چندی براہوئی و بلوچی عشقیہ شاعر ہم ارے ارا کے وخت و حالات آن متاثر مریسہ شاعری نا ہر صنف آتون اوار تینا کتاباتیٹی مزاحمتی شاعری نا بھلو کچ اس اوڑدہ کرینوں گڑاس مزاحمتی شاعر ہندنو ہم اریر ہراتا کتاب آتے کس خلیس آن چھاپ کپک۔

مزاحمتی سوچ تخوک آ خواجہ غاتا بارو اٹ بلوچی ادب نا باسک ایماندار شیر محمد مری تینا تران اسیٹی پائک مزاحمتی ادب اٹ کتاباتا تہٹی و مزاحمت نا پڑا مش آنا چر آتیان آجوئی نا گودلء مر آن خناٹ بھاز زیبا اس بیدس سرخی پوڈر آن ٹمکاکہ ابوے ابوے اونا کجلی آ خنک اونا مرواری آ دندانک اونا گلابی آ جوڑک اونا اناری آ کلکاک تہار آ نن تیٹی گروک خلکورہ اونا بننگ آن بشام اٹ ہںورہ نا گمان مسکہ اونا زلف آتا سیخا ٹی نم کونا ورناک بادوی آن انارے ہر ورنا ہر بندغ اونا حسن انا تاوے اتنگ کپک۔

ای اودے بھاز مر آن خناٹ اینو اسکان بے سما گنوک و عبدال اٹ۔ مزاحمتی ادب نا دا ہمو گودل ءِ ہرانا بارو اٹ ایماندار نادر قمبرانی بھاز وخت مُست پاریسس
آجوئی نا گودلے دُن خمبٹی دیچا ہلیس
دا پری بیرہ دتر نا شولیفنگٹ دو بریک۔

انقلاب اسے کبینو و گندی ءُ عطر اسینا وڑ اٹ مریک ہرانا گند بیدس جسمانی و ذہنی مغرور وتکبر اسینا ایلو گل ءِ دوست بریک۔

بلوچستان نا صحافی ساجد حسین نا نماز جنازہ اونا بنماسی خلق ٹی خواننگا۔ نماز جنازہ غا سیال، وارث آتیان بیدس کئی بندغ آک اوار مسر ۔

ساجد حسین نا تعلق داری بلوچستان نا شار تربت نا خلق نذر آباد آن اس۔ اندا سال مارچ نا توہ آ سویڈن آن ساجد حسین بیگواہ مس۔ اوکان پد بلوچ صحافی ساجد حسین نا جون سویڈن ٹی اپسالا نا کور آن دوئی مس۔

یاتی مرے ساجد حسین نا خڑک نا سنگت و سیال وارث آک ساجد حسین نا خلنگ نا شک کیرہ ولے سویڈن پولیس پٹ و پول آن پد گدرینگوک آ ہفتہ ساجد حسین نا بیران مننگے اسے لس ءُ تدینی اس پاریسہ پٹ و پول ءِ ایسر کرے و بلوچ صحافی نا جون ءِ اونا سیال و وارث آتے دوئی کرفے.

ساجد حسین نا جون سویڈن آن بلوچستان آ اتننگا ہراڑے جمعہ نا دے دیگر آن پد اونا بنماسی خلق نذر آباد ٹی اونا نماز جنازہ خواننگا و ہمو جہی قبرستان آ دفن کننگا.

کراچی ٹی آئی آئی چندریگر روڈ آ پولیس کارندہ آک لس مخلوق ءِ داڑیل سرپد مریسہ سم کاری کرے ہراڑان اسہ بندغ ئس کزیت کرے و اسٹ ٹپی مس۔

پولیس نا ردئٹ سم کاری نا ویل ٹیکنو سٹی نا خڑک مس ہراڑے اِرا ٹولی نا نیام ئٹی ہڷ و تس نا معاملہ آ جیڑہ مننگ ئس کہ اندا وختا پولیس نا کمکار موبائل ہموکان گدرینگ ئس، کارندہ جیڑہ ءِ لُٹ و پل نا تدینی اس سرپد مریسہ سم کاری کرے ہراڑان اسہ بندغ ئس کزیت کرے و اسٹ ٹپی مس۔

پولیس کوالخواہ تا رد ئٹ سم کاری کروکا کارندہ آک میٹھادر تھانے ٹی تعینات ءُ و ویل آن گُڈ مسٹ انگا کارندہ آتے دزگیر کریسہ اوفتیان سر و سوج بناء کننگانے۔

حوال: نجیب سائر

گرگل ادبی دیوان نا پارہ غان خلق خراسانی، گرگینہ، کردگاپ ٹی براہوئی بولی نا اسے مشاعرہ مجلس اس عئید نا مسٹمیکو دے ہڈ ڈ تننگا۔ دا مجلس دیگر نا  وختا کمیوٹی ہال ٹی بندات مس۔

دا مجلس نا اِرا بشخ ئسر۔ اولیکو بشخ ٹی پوسکنا گچین مروکا کابینہ نا سوغندی دیوان مس۔ اڑٹمیکو بشخ ٹی مشاعرہ ئس۔ مجلس نا کماشی ءِ شاہ محمد شاہ و راسکوہ ادبی دیوان نا چیئرمین عابد سلام کریر۔ اعزازی مہمان آتیٹی غلام فاروق سرپرہ، براہوئی و بلوچی بولی نا پنی آ گلوکار عبدالخالق فرہاد، ٹکری عبدالباسط ئسر۔

مجلس نا بندات قرآن پاک نا تلاوت آن مس۔ اوکان پد گچین مروکا کابینہ سوغند ارفے۔ گرگل ادبی دیوان نا پوسکنا گچین مروکا کابینہ دا وڑ ٹی ء؛ چیئرمین علی گل سرپرہ، وائس چیئرمین عبدالجبار زیب، جنرل سیکرٹری حسرت بلوچ، جوائنٹ سیکرٹری شاہد نواز، فنانس سیکرٹری ماسٹر نور محمد، پریس سیکرٹری شعیب براہوئی، آفس سیکرٹری فاروق راز، ساز و زیمل نا ڈائریکٹر عبدالخالق فرہاد گچین مسر۔

شاہ محمد شان پوسکنا گچین مروکا کابینہ غان سوغند ہلک۔ اسٹیج نا ذمہ واری تے جمیل فاکر دوئی کریسس۔

ارٹمیکو بشخ ٹی اسٹیج نا ذمہ واری تے شاعر حسرت بلوچ دوئی کریسہ تینا اسے غزل ئسے آن مشاعرہ نا بندات ءِ کرے۔ خالق فرہاد گُٹ نا پُر اٹ اسے نظم اس خوانا۔ ہرا شاعر آک تینا شیئرتے پاریر اوفتا پنک دا وڑ ٹی ء؛ شاہد نواز، ساجد ساجدی، صابر صدیقی، افتخار تناوش، ملک بلوچ، شبیر رودینی، بابل صبا سرپرہ، جبار زیب، جمیل فاکر، نور براہوئی، عابد سلام، شاہ محمد شان۔

دا مجلس ٹی نجیب سائر، آفتاب سرپرہ، غلام فاروق، عبدالباسط، عابد سلام و شاہ محمد شان تینا خیال آتا درشانی کریر۔ اوفک گرگل ادبی دیوان نا کوشست آتیا خوشی نا درشانی کریر۔ ورناغا شاعر آتا شیئرتا سفت و ثنا کریسہ اوفتا اُست بڈی کریر۔

اوفک مونی دا امیت نا درشانی کریر کہ بروکا وخت ٹی اندنو پروگرام ہڈ تننگ مریک۔ غلام فاروق سرپرہ دا ہیت نا پڑو کرے کہ زوت آن زوت اسے ساز و زیملی پروگرام اس ہڈ ایتنہ ہراٹی علاقہ نا و پیشن بروکا مہمان آتے بٹننگنہ۔

گڈ سر ٹی پوسکنا گچین مروکا چیئرمین علی گل سرپرہ غٹ مہان آتا منت واری ارفے۔ دا مجلس ٹی بندغ آتا بھلو کچ اس بسوس ہراٹی چنا و ورناک ام اوار اسر۔

1 of 4