بلوچ اکثریتی علاقہ لیاری آن پاکستانی لشکر اسہ بندغ ئسے دزگیر کریسہ بیگواہ کرینے۔
بیگواہ مروک بندغ نا چاہنداری اکبر نا مار اختر نا پن ئٹ مسنے۔
پن کروک ورنا ءِ تدوکا درو یانزدہ اپریل آ سہب ئنا چار بجہ غا پاکستانی لشکر لیاری نا علاقہ کلری سرگوات نا ہند آ اُرا غا چھاپہ خلیسہ دزگیر کرینے ہراڑان پد او بیگواہ ءِ۔
راہشون تا دزگیری نا برخلاف 13 اپریل آ تیوہ بلوچستان ئٹ ریلی و تولوک برانز مرو۔ بلوچ یکجہتی کمیٹی
بی وائی سی نا بیان ئٹ پاننگانے کہ بلوچ یکجہتی کمیٹی نا بنجاہی قیادت نا دزگیری و تنظیم آ ریاستی کریک ڈاؤن دائسکان برجاء ءِ، واہم غٹ ریاستی تادی و بیدادی آن پد ہم بی وائی سی نا قیادت و باسک آک تینا اصولی ہیت، نظریہ و راجی مسخت آ سلوک ءُ۔ تدوکا بیست دے آن تیوہ غا بلوچ راج برانز کننگ ءِ۔ دا سخت و نازرک آ وخت ئٹ بلوچ راج سیوت و ہمکوپئی نا اسہ جوانو مثیل اس جوڑ کرینے و سوگو دروشم ئٹ ریاستی تادی نا برخلاف مزاحمت برجاء تخانے۔
بیان ئٹ پاننگا کہ بنجاہی قیادت نا دزگیری نا برخلاف 13 اپریل یک شمبے نا دے اکن تیوہ بلوچستان ئٹ برانزی ریلی و تولوک برانز اڈ تننگو۔ غٹ زون آک دا بابت جوان تیاری کیر و مزاحمت ءِ سوگو و جوان وڑئٹ برجاء تخر۔
بیان ئٹ پاننگا کہ بلوچ یکجہتی کمیٹی ریاست پاکستان آ پاش کیک کہ ریاستی فاشزم و تادی بی وائی سی نا نظریاتی قیادت و باسک آتے لپڑزہ کننگ کپک۔ نن السی مزاحمت ئٹ دا تادی تون مون ایتون، و ننے پک یقین ءِ کہ نن ظلم ئنا دا نظام ءِ السی طاغت ئٹ شکست ایتون۔
بلوچستان نا ضلع ڈیرہ بگٹی نا علاقہ سوئی آن پاکستانی لشکر اِرا بندغ زوراکی ئٹ بیگواہ کرے۔
شابیتی حوال تا رد ئٹ اینو سوئی نا اسہ ہوٹل ئسے آن سینزدہ سالی آ محمد حیات ولد تولا بگٹی و سیوا ولد ناڑی بگٹی ءِ پاکستانی ڈھکوک ایجنسی و “ڈیتھ اسکواڈ” نا کارندہ غاک بیگواہ کرینو ہراڑان گُڈ ہڑتُما بیگواہ ءُ۔
خیال ئٹ مرے کہ بلوچستان ئٹی زوراکی نا بیگواہی تا تدینی تیٹ اسہ وڑ ودکی مننگ ءِ۔
بلوچستان نا ضلع ڈیرہ بگٹی آن پاکستانی لشکر اسہ بندغ ئس دزگیر کرسا بیگواہ کرینے۔ اندن اسہ بیگواہ کننگوک بندغ ئس آجو مرسا تینا اُراغا سر مسنے۔
شابیتی حوال تا رد ئٹ درو سوب ئنا سوئی، ڈیرہ بگٹی ٹی سی ٹی ڈی و ڈھکوک ادارہ غا تا کارندہ غاک انور ولد مغیم بگٹی ءِ عدالت نا پیشن آن دزگیر کننگ آن گُڈ بیگواہ کرینو۔
انور بگٹی، ہرا لیویز فورس ئنا حاضر سروس کارندہ ئسے، زوراکی ئٹ بیگواہ کننگانے ہراکان گڈ اونا ہچ ڈس اف۔
ایلو کنڈ آن ورنا نوشتکار و پی سی ایس کوالیفائیڈ نظام حسن بلوچ آجو مسنے۔
یات مرے کہ اینو اونا پی سی ایس نا اہمو انٹرویو ئسے۔
کتاب وار آف دی فلی
( گوریلا جنگ ئنا کلاسیکل مطالعہ اس)
نوشت: مہروان بلوچ
وار آف دی فلی اسہ اندُنو صحافی ئسے نا کتاب ءِ ہرادے تیوہ غا جہان نا بلا قلم کارک گوریلا جنگ ئنا بارہ ٹی دا کتاب نا حوالہ ءِ ایترہ۔ دا نوشتوک نا پِن رابر ٹیبر ءِ ہرا کہ ارٹمیکو جہانی جنگ ئنا وخت امریکہ نا خذمت ءِ کرے۔
1950 ٹی “سی بی سی” نا بشخ مننگ آن ُمست او queens evening news اٹ ہم صحافتی کاریم کرینے۔ اوڑان پد او اسہ پٹ پولی صحافی ئسے نا حیثیت ئٹ چی گویرا، فیڈل کاسترو و اوفتا سپاہی تتون کیوبا ٹی ام ہم گام ئس۔ ہندا پاس اٹ فیڈرل کاسترو نا انٹرویو آس کرے ولدا تینا دا جاچ ءِ M_26 biography of revolution اٹ نوشت کرے۔
دا امو مظلوم آ قوم آتا دڑد و غم تا جنگ انا کسہ غاتے کیک ہرا تا کسر نا مسخت تینا قومی آجوئی کن گوریلہ جنگ ئنا کسر ءِ ارفیر و سر سوب ہم مسُر۔ سرسوب امر مسر؟ امر کوزہ گیر ءِ اونا طاغت نا باجود اودے شکست تسُر؟ امر تینے غلامی نا زمزیر تیان آزات کریر؟
دا کتاب 11 باب ئٹ بشخوک ءِ۔ دا باب آتے ٹی او دنیا نا بلا بلا گوریلہ جنگ آتا کاریم و تجربہ غاتے کُل ءِ سر جم کرینے، او سن زو آن الیس ماؤ، جنرل گیاپ، چی و کاسترو نا گوریلہ جنگ انا ٹیکٹکس(tactics) و اوتا سر سوب مننگ نا و گوریلہ جنگ ئٹ اخس چمپ مسنو اوتے ہم مونا اتِسہ گپ و تران کیک۔
او کُلان مُست گوریلا جنگ انا شرجاچ ءِ الیسہ پائک کہ گوریلا جنگ اسہ انقلابی و جنگ ئسے۔ ہرا شاری آبادی یا تینا لس مخلوق انا اسہ لشکر ئسے۔ ہرا فوج و کوزہ گیر حکومت نا خلاف جنگ کیرہ و داتا مسخت تینا قوم ءِ آزات کننگ و آسرات و سوب اسے کن جہد کننگ ءِ۔ اندن او مونا گوریلا جنگ ئنا بابت اٹ پائک کہ دا یک دم جنگ انا بنا ءِ کپسہ۔ او کُلان مُست لس مخلوق ءِ جنگ انا شعور ایتک اونا بزگی و بےوسی اونا ہمدردی ءِ ہلیسہ اسہ تینا طاغت نا مرکز ئس ءِ جوڑ کیک۔ انتئے کہ گوریلا نا بلا طاغت اونا لس مخلوق ءِ۔
اندن تینا ہیت ءِ مونا دریسا پایک کہ: ہرا گوریلا تینا کاریم آن واخب ءِ و ارا تیتون لس مخلوق نا حمایت تد کیک اوتے حکومت ختم کننگ کپک۔ او ارٹمیکو نیمہ آن فوج اخس ہم طاغت ور مرے بیدس منہ گوریلا، سیاسی، نفسیاتی و معاشی زوراکی آن مونا تا او ہچ سلیکنگ کپک۔
یخیناً جنگ ئنا تینا اصول و ترتیت آک مریرہ۔ اسے کنڈا اگہ نن اندا جاچ آتے و خاص وڑ ئٹ بلوچ قومی بقا نا جنگ ء ارین او تینا جنگی حکمت عملی تا اسے بلو مثال ئس ننا نُما مونا اریر۔ دشمن تینا وس آتے خلینگ نا کوشیست کنگ ء و دا جنگ اٹی بے وس مننگ ء دُن کہ رابرٹ بیان کریسہ پارے کہ گوریلہ نا کُلان بلا تاغت اونا لس مخلوق ء۔ ننا وتن نا داسہ بلا تیان الیس چُنا اسکان دا گڑا غان واخف مسونے کہ ننا دشمن دیر ء و ننے دیر پُلنگ ء۔ ننا مخلوق نا پُرّ انگا اوراتے دیر خاخر نا گواچی کننگ ء۔ دیر ننا زبان و شناخت ءِ گوہنگ نا رندٹ تما نے۔ دا ہم کس آن ڈکھوک اف کہ بلوچستان ئٹ ہر دے پھل انگا ورنا تیتون دیر دتر نا گوازی کننگء۔
بلوچ گوریلہ لشکر تون داسہ قوم آنا بلا نیمہ سلوک ء۔ داڑان دا سابت مریک کہ بلوچستان نا آزاتی منہ قدم مُر ء۔ سر سہوبی نا چراغ ننا خن تا مونا روشن مننگ ء ۔
نشتوک اسے جاہ ئس ماؤ نا گوریلہ ٹیکٹکس(tactics )ئس نوشتہ کیک پائک کہ
ہرا تم دشمن مون مستی گام کیک گڑا نن پدی مرینہ۔ او کیمپنگ کیک تو نن اودی ہراساں کینہ۔ ہراتم دم درینگک تو نن اوڑا حملہ کینہ۔ او ہرا تم دشمن پدی مریک نن اونا رند ء ہلینہ و پٹینہ تہ۔
ماؤ نا اندا خیال ء بھاز جاگہ گوریلاک تینا کاریم ئٹ اتیرا دن کہ نن خنینہ کہ بلوچ سر زمین نا گوریلا لشکر ہم دا ٹیکٹکس ء کاریم ہٹ اتیک دشمن ء سر گردان کیک اودے سما تمپک کنے ارا کان و امر خلنگ ءُ۔
رابرٹ ہر ہمو پہلو ء دا کتاب ئٹ مونا اتیسہ پائک
کہ انقلابی جنگ مُرغُن مریک و انقلاب نا بِج کرار کرارا رودیسہ کیک۔ چُپی چُپی اٹ ودیسہ کیک۔ اسے دے ئس اندن او بریک کہ ہر جاگہ غا باغیک مریرہ۔
ہندن کہ دا کتاب ئٹ گوریلہ جنگ آتا سرسوبی نا بارو اٹ لکھانے اوڑتون اوار اوار بےسوبی نا سبب تا ہم زکر ءِ کرینے۔ رابرٹ ٹیبر، ماؤ نا اسہ تشبیہ اسے نا زکر ءِ کیک کہ “گوریلا آبادی نا سمندر ئٹ مچھی امبار تار خلیک، “ٹیبر پائک کہ دا تشبیہ ئٹ بنداوی و اہمو حقیقت اس ارے دا تشبیہ سہی معنہ ٹی اسہ جوانو و گوریلا اسے نا بنداوی عکس ئس پیش کیک و پائے اگہ مچھی ءِ دیر آن کشس اونا انت مریک؟ یخیناً گوریلا نا ہم اندا مثال ءِ اگہ اودے لس مخلوق آن پیشن کیس تو ناکام مریک و اندا وجہ آن باز اِنگا گوریلہ تحریک آک بےسوب مسنو۔
دن کہ ڈیمو کریٹک آرمی نا یونانی گوریلہ کمیو نسٹ تا فوجی تباہی اسے جوانو مثال ئسے۔ ملیشیا ارٹمیکو مثال ءِ و ہکابالاپ اونا مسیٹمیکو مثال ءِ بقول اونا کہ دا ہر مُسِٹ آ تحریک آتا شکست نا وجہ لس مخلوق ءِ تینے آن مُر کننگ نا سوب اندن مریک دن کہ داتحریک آتا مسنو۔
اس۹ جاگہ ئس پین گوریلا جنگجو تا کمبوتی تا بارو اٹ پائک کہ ویت مینھ نا تحریک نا اول اول اٹ لس مخلوق اٹ او بدھ مت نا منوکا تے تیتون اوار نہ کننگ نا وجہ غان بلو نسخان ئس ارفیر اندا سوب آن جاپانی کوزہ گیر نا تاغت پین ہم زیات مس انتئے کہ مذہبی لشکر تے اسہ جاگہ غا نہ کننگ نا وجہ آن فرانس نا فوج جنوبی ویت نام اٹ سرسوب مس و منہ تُو ئٹی فرانسیسیک شار انا بلو بشخ ئس کوزہ کریر۔
یخیناً ٹیبر داڑے بلو کمبوتی ئس ننا مونا پاش کننگ ءِ دا چاہے امرو جنگ اس مرے اوٹی تینا راج اٹ ہمو کُل ءِ تیتون اوار کننگ لازم ءِ۔ انتے کہ درد و غم کُل راج انا اسٹ مریک۔ اسہ کوزہ گیر ئس ہرا تم تاغت نا جوش ہٹ بریک گڑا او کس ءِ معاف کپک اونا کوشست مریک کہ کل ءِ تیتون اوار کیو و تینا ظلم ءِ برجا تخیسہ و غلام ءِ پین غلام کننگ ئٹ سرسوب مریو۔
اندن رابرٹ مونا نوشتہ کیک کہ اسہ کامیاب ءُ گوریلا موہکش ئس مدام انصاف اٹ تینا مخلوق تون پیش برے۔ اگہ ساز و سامان ئس الیک اونا قیمت ءِ ہم ایتے و لس مخلوق نا ذاتی مال و مَڈی نا عزت ءِ کے او پاہک کہ امو بندغ تا ہم حق ءِ ایتے ہرا تون اونا نظریہ و خیال نا ہچ حمایت اف۔ اودے دا سما مرے او اسہ پیچیدہ و باہمی سماج اسے نا مشنری نا بشخ ئسے و دا داڑے اخس ہم حمایت کٹنگ کیک ہمو خس جوان ءِ۔
بارڑ و نئیل کتاب نا پیش ءِ لفظ ہٹ ٹیبر نا پنچ اہمو پہلو تا ہیت ئے کریسا پا ئک کہ (ای داڑی پنچمیکو پہلو ءِ نوشتہ کنگ ہٹ) شورش پسند جنگجوں نا مسسلا نا خلاف حکومت نا انت ردعمل مرو۔ حکومت (کوزی گیر) تینا ناقل یخین ہٹکل تا دو آن تینا تینتٹ دشمن جوڑ مریک۔ انتئے کہ ہو تینا چمبازی نا سوب آن و حد آن زیات جوش ہٹ ہو معصوم آ بندغ تیا تشدد کیک۔
دا کتاب ءِ اگہ نن خوڑتی ئٹ اُرین تو دا ٹی گوریلا جنگ ئنا بابت بھاز آ گڑا کننا مونا بریک۔ اسہ گوریلا یا جنگ آتا بابت معلوم داری تخو کا بندغ آتیکن دا کتاب بلو راہشون ئسے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچ یکجہتی کمیٹی نا راہشون ڈاکٹر ماہ رنگ بلوچ و ایلو باسک و سروک آتا برخلاف تری ایم پی او نا درخواست اینو بلوچستان ہائی کورٹ ئٹ بِننگ مس۔
جسٹس اعجاز احمد سواتی و جسٹس محمد عامر نواز رانا غا ساڑی ڈبل بینچ درخواست ءِ بِنگ۔
ڈاکٹر ماہ رنگ بلوچ نا کنڈ آن کامران مرتضی، راحب بلیدی ،خالد کبدانی ،علہ احمد کرد و ایلو وکیل آک عدالت ئٹ ساڑی اسُر۔
اوفتا پارہ غان عدلات نا مونا دلیل تننگا، عدالت نا کنڈ آن درخواست تروک وکیل آتے آرٹیکل5 ئنا رد ئٹ حلفیہ بیان جمع کننگ نا پنت، درخواست ئے بِننگ آن نیم ساہت ئس مُست پد تخنگا۔
درخواست تروک آتا پارہ غان آرٹیکل 5 ئنا رد ئٹ عدالت ئٹی حلفیہ بیان جمع کرفنگا۔ حلفیہ بیان جمع کننگ آن پد ایڈووکیٹ جنرل عدنان بشارت حلفیہ بیان آ جتا اعتراض آتے کرے۔ عدالت فریق آتا وکیل آتا کنڈ آن بحث آن پد درخواست آ تینا فیصلہ ءِ محفوظ کرے۔
کونسل نا وکیل کامران مرتضی ایڈووکیٹ میڈیا تون ہیت کرسا پارے کہ کیس آ بحث مسنے، جوانو اومیت ارے، کنا خیال آ گمان ارے کہ کیس ئنا فیصلہ اسہ نیم دے ئسیٹ بِنفنگ مرو۔
کامران مرتضی پارے کہ درخواست ڈاکٹر ماہ رنگ نا ایڑ ئنا کنڈ آن فائل کننگاسس۔
بلوچ اسٹوڈنٹس آرگنائزیشن آزات نا ترجمان شینک کروک بیان ئٹ پارینے کہ بلوچ راجی جنز عظیم انگا قربانی تا دیہاڑ آن پُر ءِ، اندا عظیم انگا قربانی تا سوب اینو بلوچ راجی جنز اسہ گواچن ئسے آنبار بلوچ اُلس نا تہٹی تیوہ وڑ ئٹ اوڑدہ مسونے و بلوچستان ئٹ تینا روتہ غاتے سوگو کرینے ہرا نا سوب آن دژمن کن بلوچستان تنک مسونے۔
او پارے کہ کوزہ گیر پاکستانی لشکر اینو آن شانزدہ سال مالو شہید غلام محمد، شہید لالا منیر و شہید شیر محمد ءِ زوراکی ئٹ بیگواہی آن پد اوفتا جشوک انگا جون آتے خسیسہ بلوچ راج ءِ اونا غلامی آ حیثیت آن پین چاہندار کرے و ہمو دے آن ہلیس اینو اسکان کوزہ گیر پاکستانی لشکر بلوچستان ئٹی تینا جنگی ڈوہ تے برجا تخانے و سیاسی باسک آتا زوراکی ئٹ بیگواہی، پدان اوفتا جشوک انگا جون تے خسِنگ دا درشان کیرہ کہ دژمن بلوچ راجی جنز ءِ نزور کننگ کن بد انگا تادی و بھیم آ دڑنگانے۔ ہرا زوراکی و بھیم ءِ او شہید واجہ غلام محمد و اونا سنگت آتے شہید کریسہ بنا کرے او اینو ہم ترندی ئٹ برجا ءِ ولے چیئرمین غلام محمد نا فکر و بلوچ راج ئٹ آجوئی نا شعور اینو بلوچستان نا اُرا اُرا ٹی سر مسونے ہرا نا سوب آن دژمن بھیم ئنا گواچی مسونے۔
او پارے کہ ریاست شہید غلام محمد و اونا سنگت آتے شہید کریسہ بلوچ سیاسی باسک آتا ذہن ئٹ بھیم ودی کننگ نا کوشست ءِ کرے ولے کوزہ گیر دژمن دا گواچن آن بے سما ءِ کہ نظریہ و فلسفہ بدنی جتائی نا حالیت ئٹ ایسر کننگ مفسہ، ہرا خیال و فکر آتے شہید غلام محمد بلوچستان نا ہر کنڈ ئٹ تالان کننگ نا کڑدار ءِ سر تِس اوفتے دژمن زوراکی ئٹ بیگواہی و مسخ انگا جون تا حالیت ئٹ ایسر کننگ کپک۔ اندا سوب ءِ کہ اینو مرگاپ نا شہید آتے شانزدہ سال گدرینگانے و آجوئی نا جہد پین سوگو، طاغتور و سوگو ءُ دروشم اس ہلکنے۔ کوہِ سلیمان، رخشان، نصیر آباد آن ہلیس بلوچستان نا کل علاقہ آتیٹ اینو آجوئی نا جدوجہد سوگو ڈول ئٹ سر مسونے و ورناک جہدِ آجوئی کن اسہ ہم قربانی اس تننگ آن پد مننگ افس ہرا مرگاپ نا شہید آتا نظریہ و فلسفہ نا سرسہبی ءِ ۔
او پارے کہ دژمن طاغت نا نشہ ٹی مریسہ دا گواچن ءِ سرپند مننگ آن ہورک ءِ کہ طاغت اسہ ہم نظریہ ئسے ایسر کننگ کپک۔ اندا چرجوئی ءِ برجا تخسہ تدوک اسہ تو ئسے نا تہٹی 20 آن زیات بلوچ ورنا تے شہید کننگانے ہراٹی مشکے آن تعلقداری تخوکا 8 ورنا اوار ءُ اندن بارکھان، کوہِ سلیمان آن ہلیسہ مکران اسکان بلوچستان نا جتا علاقہ آتیٹ کوزہ گیر فوج بندغ آتے زوراکی ئٹ بیگواہی آن پد اوفتا مسخ انگا جون یا kill and dump نا پالیسی ءِ برجا تخانے ولے تحریک آزادی دے پہ دے آن پین سوگو و اسٹ مریسہ ءِ۔
او پارے کہ ہرا سیاسی نظریہ آتا بنیات آ بلوچ سیاسی راہشون آتے زوراکی ئٹ بیگواہی آن پد شہید کننگا اینو او سیاسی نظریہ آک بلوچستان نا ہر اسہ اُراٹی سر مسونے و مرگاپ نا شہید آک تینا مسخت ئٹ سرسہب مسنو۔ کوزہ گیر پاکستانی فوج شہید واجہ غلام محمد و ایلو سنگت آتے شہید کریسہ بلوچ اُلس ءِ اندا کلہو ءِ تِس کہ دژمن بلوچستان ءِ اسہ کالونی ئسے نا حیثیت ئٹ طاغت و بھیم ئنا وسیلہ ئٹ چلفنگ نا لائخی ءِ تخک ولے اینو اُلسی جدوجہد و تحریک آزادی نا فکر و فلسفہ اوفتا تغ تے حرام کرینے۔
ترجمان پارے کہ اینو کوزہ گیر نا پارلیمنٹ آن ہلیس پنجاب اسکان کل بندغ آک بلوچ راجی جدوجہد آن سرپندار مسنو و ہمو دے مُر اف ہراتم بلوچ راجی و اُلسی مزاحمت آن تنگ مریسہ دژمن بلوچستان آن پیشتمنگ و نرنگ آ بیوس مرو۔ مرگاپ نا شہید آتا شہیدی بلوچ اُلس ئٹی راجی آجوئی نا جدوجہد و گواچن فکر و فلسفہ نا ودشت ٹی اہم ءُ کڑدار اس سر تِس و اوفتا قربانیک اینو بلوچ سیاسی باسک آتیکن کسر نا چراغ ئسے۔
او پارے کہ مرگاپ نا شہید آتے اوفتا شہیدی نا دے دروت ندر کریسہ بلوچ اُلس و خاص وڑئٹ بلوچ سیاسی جہدکار آتیان خواست کینہ کہ او مرگاپ نا شہید ، شہید واجہ غلام محمد، شہید لالا شیر محمد و شہید لالا منیر نا فکر و فلسفہ نا ودشت ءِ کریسہ راجی تحریک آزادی ئٹ اوار مریر و راجی جہد ءِ سوگو و اسٹ کننگ ئٹ تینا کڑدار ءِ سر تیر۔ اینو بلوچستان نا اُرا اُرا دا ہیت و گواچن آن سرپندار مسونے کہ راجی تحریک و آجوئی نا جدوجہد ہی دژمن آن دو کشنگ نا اسٹ انگا وسیلہ ءِ ہرا کسر ءِ مرگاپ نا شہید آک تینا دتر آن ننے نشان تسر۔ مرگاپ نا شہید آتا قربانیک بلوچ راجی جنز ئٹ ہر وخت یات تخنگور و اوفتا نظریہ و فکر آتان بلوچ سیاسی باسک آک ہر وخت راہشونی دوئی کریسہ کرور۔
بلوچ یکجہتی کمیٹی نا باسک گل زادی بلوچ ءِ دزگیر کریسہ نادرست ہند آ دننگا۔
بلوچ یکجہتی کمیٹی اونا دزگیری ءِ پک کریسہ پارے کہ ننا باسک گل زادی بلوچ ءِ کوئٹہ آن پولیس و سی ٹی ڈی نا کارندہ غاک زور ئٹ دزگیر کریسہ درینو۔ اونا بابت ہچ سماء اف۔
او پارے کہ دا ریاستی تادی نا اسہ پین کاروائی ئسے ہرا پرامن باسک و مزاحمتی توار آتے ٹک کیک۔ نن دا بے قانودی دزگیری نا مذمت کینہ و اونا دمدستی آجوئی نا خواست کینہ۔
پین پارے کہ نن جہانی برادری و بندغی حق آتا تنظیم آتیان دمدستی نوٹس ہلنگ نا خواست کینہ۔
یاتی مرے دا وخت بی وائی سی نا بنجاہی قیادت نا برخلاف ریاست نا کریک ڈاؤن برجاء ءِ، بنجاہی آرگنائزر ڈاکٹر ماہ رنگ، شاہ جی، بیبرگ بلوچ تون اوار بیبو بلوچ مالو آن دزگیر ئٹی ءُ۔ ہرافتا دزگیری نا برخلاف اِرا ہفتہ غان تیوہ بلوچستان ئٹ برانز مریسہ ءِ۔
سردار اختر مینگل نا سروکی ٹی بلوچستان نیشنل پارٹی نا لانگ مارچ ءِ کوئٹہ ئٹ پیہنگ آن توننگا، بی این پی تیوہ بلوچستان ئٹ شٹر ڈاؤن و پہیہ جام ہڑتال نا پڑو کرینے۔
پارٹی نا باسک آتے پنت تننگانے کہ او ہراڑے ساڑی ءُ ہموڑے تولوک برانز بنا کیر، اندن لکپاس نا تولوک برانز برجاء مرو۔
اختر مینگل نا ردئٹ لانگ مارچ ہڑاند آتا سوب لکپاس آ توننگانے و ہموڑے تولوک برانز برجاء مرو، او پارے کہ اینو آن بلوچستان نا غٹ ضلع تیٹ پارٹی نا باسک آک تولوک برانز بنا کرور ایسکان کہ لانگ مارچ ءِ کوئٹہ نا پارہ غا برجاء تخنگ نا موکل رسینگتنے لکپاس آ برانز برجاء مرو دہ دے لگے یا توہ۔
او پین پارے کہ اگہ ننا اسہ ہم باسک ئسے نسخان رسینگا گڑا دانا ذمہ واری ریاستی ادارہ تیا و صوبائی حکومت آ مرو، پارٹی نا باسک آک ہراڑے گٹ مروک ءُ ہموڑے تولوک برانز کیر اینو آن تیوہ بلوچستان ئٹ شٹر ڈاؤن و پہیہ جام ہڑتال کننگو۔
بلوچستان نیشنل پارٹی مینگل نا لانگ مارچ ڈاکٹر ماہ رنگ بلوچ تون اوار بی وائی سی راہشون تا دزگیری نا برخلاف اینو کوئٹہ نا پارہ غا مارچ کننگ ئس ہرادے حکومت لکپاس ٹنل آ کنٹینر تخیسہ کوئٹہ نا تہہ ئنا کسر تے بند کرینے۔ حوال تا ردئٹ کوئٹہ ئٹ ساڑی بی این پی نا کم آن کم بیست باسک دزگیر کننگانو۔
بلوچستان حکومت درشان کرینے کہ اگہ اختر مینگل کوئٹہ ئٹ پیہنگ نا کوشست کرے گڑا اودے دزگیر کننگو، حکومت لانگ مارچ ءِ توننگ کن جتا ہند آتیا کڈ خُتسہ ہڑاند بش کرینے و کوئٹہ تون اوار ایب کیب ئنا علاقہ تیٹ موبائل نیٹ ورک بند کننگانے۔
بی این پی نا ردئٹ حکومت تولوک برانز نا ہند آ فورسز آتا بھلو کچ اس سلفینے و خُلیس پاش کرینے کہ حکومت تولوک برانز آ کریک ڈاؤن کریسہ پرامن برانزی تے دزگیر کرو۔
بی این پی نا راہشون و لانگ مارچ نا سروکی کروک اختر مینگل پارینے کہ اوفک ہر حال ئٹ کوئٹہ نا پارہ غا مارچ کرور اگہ اودے و اونا سنگت آتے نسخان رسینگا گڑا اونا تیوہ ذمہ واری بست و بند و صوبائی حکومت آ مرو۔
اندن بلوچستان نا حکومت نئے بیرہ کوئٹہ آن خڑک کسر تے بند کرینے بلکن نوشکے و گوادر آن مستونگ نا پارہ غا بروک قافلہ تے ہم توننگانے گوادر ئٹ دفعہ 144 نافذ کریسہ شاری تے اُرا تیٹ مننگ نا پنت تننگانے۔
ایلو پارہ غان حب بھوانی نا ہند آ بی این پی نا باسک آک کراچی – کوئٹہ کسر آ برانز کریسہ ہن و بر ءِ تورینو۔
بلوچستان نا علاقہ پسنی و قلات آن اِرا ورنا نا جون آک خننگانو۔
پسنی آن ورنا ساحل ولد گلاب نا جون اینو خننگا۔ جون پسنی وارڈ نمبر 1 ئٹ شاہ جان ہوٹل نا پد آن جِر بوچ آتیان خننگا۔
حوالکار تا رد ئٹ پن کروک ورنا تدوکا دے تیٹ بیگواہ مسوسس۔ جون ئنا خننگ آن پد اودے دمدستی آر ایچ سی ہسپتال آ سر کننگانے۔
پسنی پولیس تدینی نا پٹ و پول ءِ بنا کرینے تاکہ دا سما تمنگ کے کہ ورنا نا مرگ امر مس۔ خاہوت نا پارہ غان پسنی پریس کلب نا مون آ برانز کریسہ ءُ کہ پولیس زوت آن زوت دا تدینی ٹی اوار انگا بندغ آتے دزگیر کے۔
ایلو پارہ غان قلات نا علاقہ کپوتو آن ورنا ئسے نا جون خننگانے ہرانا چاہنداری امداد اللہ نا پِن ئٹ مسنے۔
کہوک ورنا عئید ئنا نن تینا اُرا پندران آ ہنیسہ ئس کہ گاڑی تون اوار بیگواہ مسوسس۔
