چین – ایران نا ہم کوپئی و بلوچستان
ٹی بی پی سرگپ
گدرینگوک آ ہفتہ 18 پنہ نا اسے مسودہ ئس ایرانی احوال کاری پڑ آ گوئی کننگ اس، نیو یارک ٹائمز ام اسے نوشت ئس شینک کریسہ اندا مسودہ ءِ ایران و چین نا نیام ٹی مروکا معاہدہ پِن کرے۔ مسودہ نا ردئٹ بروکا 25 سال ٹی چین ایران ٹی 400 ملین ڈالر نا سرمایہ کاری کیک، اونا بدلہ ٹی ایران چین ءِ ارزان آ قیمت ٹی تیل ایتک۔
اندا معاہدہ نا ردئٹ چین بینکنگ، ٹیلی کام، پورٹس، ریل و ایرانی فوج ٹی ام سرمایہ کاری کیک۔ ذکر مروکا دا بھلا اسٹریجک کمک نا ردئٹ ہڑتوما ملک آک انٹیلیجنس معلومداری نا ام ہل و تس کیرہ و اوار جنگی مشق ام کیرہ۔ تینا وڑاٹ دا پوسکنو معاہدہ ئس اف، چین نا ایران تون است خوائی بھاز بھلو وخت سے آن ءِ۔ چین داڑان مست ام ایران ٹی سرمایہ کاری کرینے ولے امریکہ نا پابندی تا سوب آن اوفتیٹی نزوری مس۔
بھاز آ ذرائع تا ردئٹ چین دا معاہدہ ءِ داڑان مست 2016 ٹی ایران تون کرینے ولے اوبامہ نا دور حکومت ٹی ایران ءِ اسے امیت اس خںنگ ئس کہ اونا سیالیک امریکہ تون جوان مننگو، وختس کہ امریکہ ایران نا زیہا خلوک آ گڑاس پابندی تے ایسر کرے و ہڑتوما ملک آتا نیام ٹی جوہری معاہدہ آ دستخط مس۔ اندا بنیات آ ایران چین تون باقاعدہ معاہدہ کننگ آن پد توریکہ تینے، و اندا سال ایران بھارت تون ام بھاز آ معاہدہ غاتے دستخط کرے۔ ولے ایران نا بابت ٹرمپ انتظامیہ نا سخت انگا پالیسیک ایران ءِ چین تون پاش وڑاٹ بھلن وخت اسیکن معاہدہ غا دستخط کننگ نا نیمہ غا ایس۔
ہراڑسکان انڈیا ءِ چابہار – زاہدان ریل پروجیکٹ آن کشنگ نا حوالک گوئی کننگ ءُ او غٹ دروغ ءُ۔ ایران دا حوال ءِ رد پاریسہ پارے کہ ریلوے پروجیکٹ آ اونا بھارت تون ہچو معاہدہ ئس متنے۔ بیرہ اسے “ایم او یو” ئسے آ دستخط مسونے۔ او داسہ بھارت تون فنڈ آتا اُرے کننگ نا سوب آن دا ریل نا پٹڑی ءِ تینٹ جوڑ کیک۔ ایران دا ریل نا پٹڑی آ 2011 غان کاریم کننگ ءِ۔ زو تیٹ روس نا پارہ غان ایران ءِ 5 بلین ڈالر نا وام تننگ آن گڈ داسہ ایرانی حکومت امیت ٹی ءِ کہ او دا پروجیکٹ ءِ 2022 اسکان پورو کیک انتیکہ ایران تینا راجی دیمروی فنڈ آن دا پروجیکٹ کن 300 ملین ڈالر خرچ کننگے۔
ولے انڈیا چابہار پورٹ ءِ امو وڑ مونی دیک۔ چابہار – زاہدان ریلوے لائن نا فائدہ وڑ نہ وڑ اسیٹی بھارت ءِ رسینگک۔ چین نا ایران ٹی ساڑی مننگ یخیناً بھارتی مفاد آتا مونا اسے زیر ئس ثابت مریک انتیکہ چین اولیکو دے آن انڈیا نا دارہ ایرا غا اندا وڑ نا پورٹ آتا دام شاغان ءِ۔ دا معاہدہ غان یخیناً چین کن مشرق وسطی نا دروازہ غاک مچے پین ملننگرہ و او دا ڈیہہ ٹی مروکا گوازی نا اسے سوگو ءُ گوازی گر ئس جوڑ مریک۔ تاریخ ٹی اولیکو وار چین جہان نا ہفتنگا “چوک پوائنٹس” آتیان اسٹ (آبنائے ہرمز) آ کوزہ کیک۔
داڑے اسے ہیت ئس بھاز جوانی ٹی خفتوروئی کہ دا غٹ معاہدہ غاتیان بلوچ و بلوچستان آ انت فرخ تمک؟ چین نا بلوچستان نا داپار ایپار آ مننگ ہچبر بلوچ آتیکن جوانو ہیت ئس مفک۔ دا معاہدہ غان چین نا ایران ٹی اثر و رسوخ ٹی گیشتری بریک و دا ہیت ءِ ام چپ بٹوئی اف کہ دے ٹکی بلوچستان امبار او دے کہی بلوچستان نا مڈی تے کوزہ کننگ نا کوشست کیک۔
اسے پارہ غان گوادر پورٹ مست آن چین نا دوٹی ءِ۔ دا گمان رد کننگ مفک کہ چین چابہار پورٹ ءِ ام تینا کوزہ ٹی کننگ نا کوشست کیک۔ دا ہڑتوما پورٹ آک بلوچ ڈغار آ ءُ۔ چین بیلٹ اینڈ روڈ منصوبہ بیرہ اسے بد ءُ منصوبہ ئس اف بلکن چین جنوبی ایشیاء، مشرق بعید، افریقہ و مشرق وسطی نا جواننگا بندرگاہ آتے آ کوزہ کریسہ اسے “سمندری سلک روٹ” ئس جوڑ کننگ خوائک۔
دے کہی بلوچستان مرے یا دے ٹکی بلوچستان، داڑے اخس کہ چینی مفادات آک جوڑ مریرہ اوفتا رکھ کن داڑے چین نا مننگ ہموخس زیات مریک، و دا ڈیہہ ٹی اگہ کس ئس باقاعدہ چین نا خلاف مزاحمت کننگے او گڑا بلوچ ءِ انتیکہ او چین نا داڑے ساڑی مننگ ءِ تینا قومی مفاد آتا خلاف سرپند مریک۔
دے ٹکی بلوچستان ٹی بلوچ مزاحمتی تنظیم دُنکہ بی ایل اے بھاز وخت چینی مفاد آتے ٹک کرینے۔ دے کہی بلوچستان ٹی ام بلوچ راجی مفاد و آجوئی کن اسے وڑو جوزہ خننگسہ ءِ۔ چین نا دا ڈیہہ ٹی پوسکنا ساڑی مننگ چین و بلوچ نا نیام ٹی اسے پوسکنو جنگ اسینا بندات مننگ کیک ۔
