ورنا ڈاکٹر آتا ایسوسی ایشن بلوچستان نا ترجمان نا شینک کروکا بیان نا رد ئٹ صوبہ نا سرکاری ہسپتال آتیٹ وی آئی پیز نا اِن و بر آ رکھوک پروٹوکول ناجوڑ آتا جانجوڑی ٹی ہڑاند نا سوب مریسہ ءِ، ہسپتال آتے اسہ کنڈان سیکیورٹی نا نزور و حالیت اسیتون مون تس ءِ۔

اندن ایلو کنڈان وی آئی پیز نا وزٹ نا وختا سیکیورٹی کارندہ آتا کنڈان ڈاکٹر آک و ناجوڑ آتے بد دننگ نا گواچی کریسہ اوفتے وارڈ ئٹی گٹ کیرہ ہراڑان ناجوڑ آتے جانجوڑی آتا سرکننگ ٹی بھاز سختی تیان گدرینگوئی تمک۔

ترجمان کوالخواہ تیان ترند خواست کریسہ پارے کہ ناجوڑ آتے بھاز گچین جانجوڑی آسراتی سر کننگ و دا وی آئی پی کلچر نا سختی تا ایسری کن تیوہ آ آفیشل ویزٹس آتیکن گچین ءُ وخت ئس ہڈ تریسہ اوفتے میڈیکل سپرٹینڈنٹس نا آفیس اسکان ہد و حویل آتیٹ تخنگہ و ہسپتال آتا سیکورٹی نا گندہ غا حالیت نا جاچ الیسہ عملی گام تے یخینی کیر تاکن ناجوڑ آتے ہچ ءُ سختی ئسے تون مون تروئی تمپ۔

بلوچستان نا شار سبی نا علاقہ تلی ٹی سیاہ کاری نا ڈوہ آ اسے زالبول ئسے گٹو کریسہ کسفنگا۔

ایدھی نا پاننگ نا ردٹ کہ گدرینگوک آ دے سبی نا علاقہ تلی نا خلقٹ اسے بندغ اس ہرانا پن نیاز محمد باوہ نا پن میاں خان ء۔ او تینا زائیفہ ء سیاہ کاری نا ڈوہ اٹی گٹو کریسہ کسفے۔

یاتی مرے زالبول نا لاش ء مستی کاروائی آن پد خاہور ء تننگا۔ داڑان بیدس ام ضلعی انتظامیہ دا بابت مونی پٹ و پول کننگے۔

نوشکی ٹی نا درست دز آک درے ننکان اِرا دکان اٹی اندری داڑیلی کریر، زیات نہاد موبائل و زر آتے دزی کریر۔

جناح روڑ آ راج کمار جنرل اسٹور و ازان موبائل آن درے ننکان نادرست دز آک اندر داڑیلی کریسہ جنرل اسٹور مالک نا رد ئٹ اسہ لکھ آن زیات زر، و اندن خڑک ئنا موبائل دکان آن 2 لکھ زر ئنا موبائل ارفیر نرار۔

ایس پی نوشکی حسین احمد لہڑی، ایس ایچ او تھانہ علی احمد بگٹی ہند ئنا جاچ ہلکر۔ پین سر و سوج نوشکی پولیس کننگ ءِ۔

نوشکی پولیس ایس ایچ او نوشکی علی احمد بگٹی تینا بیان ٹی پارینے کہ درے ننکان نوشکی بازار ٹی اِرا دکان نا بڑز آن اسہ یک و نیم فٹ نا کڑک ئس کننگانے ولے واقعہ نا ہند دز آتا ہچ ءُ شاہدی و آثار رسینگتنے۔

اندن راجی حوالکاری نا پڑ آ لکھ آ زر آتا دز نا حوال پیری کننگ ءِ ہرا ٹی ہچ ءُ راستی ئس اف و نوشکی پولیس دا بابت سر و سوج کننگ ءِ و ویل ئنا تہہ اسکان سر مریسہ مخلوق ءِ بھاز زوت گواچنی آ حوال ترو۔

پین حوال ئسے نا رڈ ئٹ صدر انجمن تاجران نوشکی نا سعید احمد بازار ٹى بھاز دکان آتیٹی بڑز آن ڈھکوک داڑیلی و ایلو دکان آتیان نہادی موبائل گڑا دزی نا ترند لوز آتیٹ مذمت کریسہ خواست کرینے کہ نوشکی انتظامیہ زوت آن زوت دز آتے ہلیر، و تاجر آتا موبائل گڑاتے تریسہ سوداگر آتے انصاف تیر۔

ولے پولیس نا کنڈان وخت آن مُست سر و سوج نا کاریم نا ہد آتے شابیت کننگ و گواچن آتیا سرمننگ آن مالو دود آتیٹ رکھنگ و وضاحتی بیان آن اندن لگیک کہ پولیس تینے بے قصور گوندنگسہ معاملہ ءِ دانگ اینگ کننگ ءِ یا گڑا زیمی دکاندار آتے سر و سوج گڑا نا پن آ تنک کننگ است کٹہ کریسہ چُپ کرفنگ نا ربیدگی کوشست ئسے۔

اُست انتئے داخہ در ویران اریس
نی مگہ پاوا بلوچستان اریس

نا کروکا اے گناہ ارمان اریس
نی ننے آ یوسفی بوتان اریس

دِیر نی تینے کرینُس مُفت ئَٹی
غَم سہوکا نی ہرا بولان اریس

اُست ئنا موکو کروکا روتَغاک
عمرسے آن پارا نی سُنسان اریس

نے خَننگ بس آخری کو خواہشے
خَنتا نُور ئُس اُستنا ارمان اریس

کَسفرہ دارُوک نا پَکّا ننے
نی ہناڑی آ امے لقمان اریس

نے آ ایمان نن اَتین پا انت ئکن
نی اریس دجّال ہرا یزدان اریس

نے آ بَننگٹ امہ کس رَد کے
کور ئتا اینو پگہ ملتان اریس

مَسنے نا کاٹم آن ایمون دے
داسِکان افسوس اُڑے تنگان اریس

کاٹم آٹے تاج نا ایہن مگہ
شاعری نا نی شبیر سلطان اریس

شبیرآجو

امریکی ریاست اوکلاہوما ٹی اسہ واری تون کورونا وائرس نا کیس آتیٹ ترندی بس و ہندی جانجوڑی چاہندار آتا پاننگ ءِ کہ صدر ٹرمپ منہ وخت مالو ہرا گچین کاری مچ گامی ءِ کریسس، گمانی اندا نا سوب آن دا ودکی مسونے۔

اسہ اندن ءُ وخت ئس ہراتم امریکا ٹی اولیکو وار اسہ دے آٹی کورونا وائرس نا ریکارڈ کیس آتا خبر تمانے، محکمہ جانجوڑی نا اسہ سینئر افسر ئسے نا پاننگ ءِ کہ دا ودکی نا سوب شار اٹی صدر ڈونلڈ ٹرمپ نا تدوکا تو ئنا گچین کاری مچ گامی داڑتون تفوک و ایلو پروگرام آک مننگ کیرہ ہراٹی ہزار آ بندغ آک اوار مسوسر۔

ٹرمپ تدوکا تُو ریاست اوکلاہوما نا شار ٹلسا ٹی اسہ بھلو گچین کاری مچ گامی ئس کریسس ہراٹی ماسک بیننگ آ پابندی متاوسس۔

ٹلسا شار ٹی محکمہ جانجوڑی نا اسہ سینئر افسر بروس ڈارٹ آن ہرا وخت صحافیک سوج کریر کہ دا وڑ ئنا بھلا مُچیک کورونا وائرس نا تالانی نا سوب مننگ کیرہ گڑا اونا پاننگ ئس “تدوکا گڑاس دے اٹی کم و ود پنچ سد کیس پک مسونے و ننے سما ءِ کہ اِرا ہفتہ مُست داڑے بھاز بھلو مُچی مجلس اس مسوسس۔ گڑا کنا خیال ءِ کہ نن بند آتے اوار کننگ کینا۔”

بروس ڈارٹ نا اشارہ دا ہیت ئنا کنڈا ئس کہ صدر ٹرمپ نا گچین کاری مچ گامی و داڑتون تفوک ایلو مجلس نا سوب آن کیس آتیٹ مننگ کروکا وڑئٹ اسہ وار تون ودکی مسونے۔

امریکی صدر ڈونلڈ ٹرمپ 20 جون آ ٹلسا ٹی ہڈتروکو آسہ بھلو گچین کاری مچ گامی ئسے آن تران کریسس۔ داٹی اونا ہزار آ ہمکوپہ غاک اوار مسونو ہراڑا ماسک بینگ المی متوسس۔ دا رد ئٹ جانجوڑی چاہندارک ترند ہیت ارفیسر۔ ٹلسا ٹی کورونا وائرس نا 4500 پک مروک کیس ارے اندن داڑان کہوکا تا کچ 72 ءِ۔

ایڑے امریکا ٹی تدوکا 24 سائت اٹی کورونا وائرس نا 59 ہزار آن ہم زیات کیس پاش مسونے و کوالخواہ تا پاننگ ءِ اسہ دے اٹی انفیکشن نا پک مروکا کیس آتا دنو بھلو کچ ئس امریکا ٹی اولیکو وار پاش مسونے۔ ریاست فلوریڈا ٹی کم و وَد 10 ہزار پوسکنو کیس پک مسونو اندن ٹیکسس ٹى نو ہزار آن خڑک و ریاست کیلفورنیا ٹی ہفت ہزار 800 پوسکنو کیس نا ودکی مسونے۔

امریکا ٹی کووڈ 19 آن ہردے ئی مرگ ئنا کچ ئٹ ہم جون نا اول آن اولیکو وار ودکی خننگانے و داسا ہردے ئی مرگ ئنا کچ کم و ود 900 ءِ۔ ملک ٹی زیمی تا جمعی کچ 30 لکھ آن ہم زیات مسونے اندن اسہ لکھ 30 ہزار آن زیات بندغ داسکان مرگ نا گواچی مسونو۔

انفیکشن نا داخس ترندی تون تالانی آن بیدس امریکی صدر دا ہیت آ ضد کروک ءِ کہ اسکول آک یلہ کننگر۔ چار شمبے نا دے او تڑی تسوسس کہ اگہ ہتم ئٹ ضلعی بست و بند نا خوانندہ ادارہ آتیٹ خوانندہ غاک اسیکہ وا کلاس تیٹ بتوس گڑا اوفک بنجائی کمک ءِ تورور۔

جہانی ادارہ جانجوڑی نا پاننگ ءِ کہ کورورنا وائرس نا دین اٹی پین ترندی خننگ ءُ، ہرانا سوب آن زیمی تا کہنگ اٹی ہم بھاز ودکی نا خلیس ءِ۔

جہانی ادارہ جانجوڑی (ڈبلیو ایچ او) نا پاننگ ءِ کہ مچ جہان ئٹ کورونا وائرس نا کیس آتیٹ ترندی ٹى ودکی مننگ نا سوب دا اف کہ داسا مخلوق نا ٹیسٹ زیات مننگ ءِ بلکن دانا سوب دین نا ترندی ئٹ تالان مننگ ءِ۔ ادارہ تا پاننگ ءِ کہ ہرا ترندی ٹی دین تالان مننگ ءِ داڑان زیمی تا کہنگ ٹی ہم ودکی نا خلیس ارے۔

ڈبلیو ایچ او ٹی ایمرجنسی سروسز نا راہشون ڈاکٹر مائیکل رائن نا پاننگ ئس کہ تیوہ آتیان زیات خلیس نا ہیت دادے کہ دین آن زیمی مروکا تا کچ دیپہ دے ترندی ئٹ تالان مننگ ءِ۔ او پارینے ”خوڑتی ئٹ اوننگ نا ہیت ءِ کہ اپریل و مئی ٹی نن ہر دے اسہ لکھ کیس آتون مون تسونا وا اینو د اِرا لکھ ءِ سرمسونو۔ دا بیرہ ٹیسٹنگ نا سوب اف بلکن دین اٹی ترندی مسونے۔”

اونا پاننگ انتے کن وائرس ءِ ناجوڑ نا تیٹی پورو اثر کننگ ٹی وخت لگیک، اندا خاتر کیس آتا کچ اٹی ودکی و داڑان مروکا کہوکا تا کچ پاش مننگ ٹی اسہ ہورکی اس سلیک۔ او پارے کہ تدوکا گڑاس ہفتہ ءِ دا ناجوڑى ٹی ہرا ترندی خننگا داڑان گمان مننگ کیک کہ دا دین آن مروکا دے تیٹ ہم کہوکا تیٹ ودکی نا خلیس ارے۔

جہانی سطح آ کورونا وائرس آن زیمی تا کچ دا وخت اسہ کروڑ 18 لکھ نا خوڑک ءِ اندن پنچ لکھ 42 ہزار آن زیات بندغ داسکان مرگ نا گواچی مسونو۔ دا دین آن تیوہ آتیان زیات اثر امریکا آ مسونے، ہراڑے 30 لکھ آن زیات بندغ زیمی مسونو و اسہ لکھ آن زیات مرگ۔

کولخواہ تا پاننگ ءِ تدوکا 24 ساعت اٹی امریکی ریاست کیلفورنیا ٹی دئے ہزار آن ہم زیات پوسکنو کیس پاش مسونے و اندا وڑ ئٹ ریاست ٹی زیمی تا کچ پاو کم مسہ لکھ آن ہم زیات۔ امریکی ریاست ٹیکسس ٹی ہم اسہ دے اٹی دئے ہزار آن زیات پوسکنو کیس پک مسونو۔

زیمی و مرگ نا گواچی مروکا تیٹ ایلو نمبر آ برازیل ءِ ہراڑے زیمی تا کچ 16 لکھ پاننگ ءُ، و ایلو نمبر آ بھارت ءِ ہراڑے ہفت لکھ آن زیات بندغ زیمی مسونو و بیست ہزار آن زیات مرگ نا گواچی مسونو۔ روس ٹی ہم زیمی تا کچ شش لکھ آن زیات ءِ۔

جرمنی ٹی ہم تدوکا دے بیست و چار ساعت اٹی 397 پوسکنو کیس مونا بسونو ہراڑن ملک اٹی زیمی تا جمعی کچ اسہ لکھ 97 ہزار 341 اسکان سرمسونے۔ کوالخواہ تا پاننگ دا نیام اٹی 12 پین بندغ مرگ نا گواچی مسونو و اندا وڑ ئٹ کہوکا تا کچ نو ہزار 36 مسونے۔

آسٹریلیا ٹی کوالخواہ آک کورونا وائرس نا ایلو لڑ ءِ توننگ کن ملبورن شار ٹی دوارہ لاک ڈاؤن کرینو۔

50لکھ نا آبادی دا شار نا ہندیک حکومت نا دا گام آ سوختئی نا درشانی ءِ کرینو کہ داڑان اوفتا کاروبار بس مرو ۔ داسکان حکومت دین نا دا ردئٹ تینا فیصلہ نا رکھ کریر۔

ایلو کنڈان تدوکا دے چار تو نا وقفہ آن گُڈ اینو آن جہانی کرکٹ میچ آتا واپسی مننگے۔ دا گوازی کورونا وائرس نا سوب آن تدوکا چار تو آن پد تموک ئس، اولیکو ٹیسٹ میچ ویسٹ انڈیز و انگلینڈ نا نیام اٹی چار شمبے آ ہشت جولائی آن گوازی کننگ ءُ۔ گڈیکو میچ مارچ نا ایسری ئٹ نیوزی لینڈ ٹی گوزای کننگاسس۔

پوسکنا اصول آتا رد ئٹ گوازی نا وختا اسٹیڈیم آن کرکٹ اروک و شہدائیک بے گواہ مرور، دین ئنا سوب آن پیشن نا امپائر آک بننگ کپسہ اندا خاتر دا میچ نا نیام اٹی آڑتوما امپائر برطانیک مرور۔ تیوہ آتیان المی ہیت دادے کہ دین اٹی، گیند آ تف خلنگ نا موکل اف۔ اندن انگا وڑ ئٹ گوازی و باؤلر گیند ءِ تُف خلیسہ ساف کارینو، داسا او تف ئنا جاگہ آ مننگ کیک دیر خلیر۔

آماچ ادبی دیوان مستونگ نا کنڈان آماچ نا دفتر مستونگ ٹی اسہ ادبی ءُ کچاری اس براہوئی بولی نا بزرگ شاعر ادیب شاہ بیگ شیدا نا کماشی ٹی اڈ ہلک۔ دا کچاری ٹی حمید عزیز آبادی، حسن ناصر، بشیر شاد، سعید زوالقرنین، ملک لیاقت سیماب، پروفیسر محسن سحر، نزیر حسرت و ایلو ادب دوست شاعر آک ساڑی ئسر۔

شاہ بیگ شیدا کچاری آن تران کرسا پارے شاعر ادیب تینا وخت نا گچینا ترجمان مریک۔ او ساندہ تینا راج نا ڈکھ ویل آتے تینا فکر و فن نا غالب اٹ شاغسہ راج نا حالیت ءِ تاریخ نا بشخ جوڑ کیک۔

او پارے کہ اگر شاعرے اسہ گچین ءُ تاریخ دان اس ہم پاو تو رد مفرو۔ انتئے کہ ہرا تینا راج و قوم نا ہرا ساڑی آ حالیت آتے قلم نا باہوٹ کیک او پگہ نا تاریخ جوڑ مریرہ۔

او پارے کہ اینو تیوی جہان نا سیاسی و معاشی حالیت آک باز ترندی اٹ بدل مننگ ءُ۔ اندا رد اٹ شاعر و ادیب ہم تینا ڈہہہ و وطن تون اوار تیوی دنیا غا ہم خوڑتی اٹ خن خوک مرے تاکہ بروکا حالیت آتیان تینا راج و قوم ءِ سمائی تخے۔

کچاری نا ایسر اٹ اسہ محفل مشاعرہ اس ہم مس۔

جہانی دین کرونا وائرس نا سوب آن بند انگا خوانندہ جاہ آتے ستمبر نا اولیکو ہفتہ غا ایس او پیز نا ردٹ ملنگ نا فیصلہ کننگا۔

دا فیصلہ بنجائی وزیر تعلیم شفقت محمود نا کماشی ٹی بین الصوبائی وزرائے تعلیم کانفرنس ٹی کننگا۔ ہراٹی غٹ صوبہ غاتا وزیر تعلیم آک اسے جاہ دا فیصلہ کریر کہ ستمبر نا اولیکو ہفتہ غا خوانندہ جاہ آتے ملننگ مریک۔

احوال نا ردٹ کہ اجلاس ٹی دا ام فیصلہ کننگا کہ خوانندہ جاہ آتے ملننگ آن مست کووڈ 19 نا وڑ ڈول و دا ناجوڑی نا جائزہ ہلنگ مریک۔

خوانندہ جاہ آتے ملننگ نا فیصلہ نا موکل تننگ کن پگہ دا فیصلہ ءِ نیشنل کمانڈ اینڈ آپریشن سینٹر (این سی او سی) آ راہی کننگ مریک۔

بنجائی وزیر تعلیم نا پاننگ نا ردٹ کہ ستمبر ٹی خوانندہ جاہ آتے ملننگ آن مست غٹ صوبابہ غاتا وزیر تعلیم آتا ارا مچی پین اڑ ایترہ۔

دا مچی دا گڑا آ ام موکل تننگانے کہ خوانندہ جاہ آتے ایس او پیز نا ردٹ امتحان آتے الننگ نا موکل مروئے۔
 
یاتی مرے خوانندہ جاہ ملننگ نا بابت بنجائی وزیر تعلیم شفقت محمود 2 جولائی آ بین الصوبائی وزراء کانفرنس بٹنگا ولے بنجائی وزیر تعلیم نا باوہ نا کذیت نا سوب آن او پدی مس اینو 7 جولائی آ بنجائی وزیر تعلیم نا کماشی ٹی مس۔ دا مچی ٹی چار انگا صوبہ غا وزیر تعلیم آک و آزاد کشمیر، گلگت بلتستان نا وزیر تعلیم آک ام اوار اسر۔ ہراڑے غٹ آک اسے جہی فیصلہ کریر کہ ستمبر نا اولیکو ہفتہ ٹی ایس او پیز نا ردٹ خوانندہ جاہ آتے ملننگ مریک۔

داستان ءِ عرب، براہوئی مزحمتی ادب نا پنہ غا

نوشت: محبوب شاہ

دی بلوچستان پوسٹ

مُست آن  برجاء۔۔۔۔۔۔۔۔۔۔۔۔۔

اسے وار اسیتون جلہو اسے نا توار مس دنکے نا گمان اسے مَست او سانڈ اس پاش کے تلار نا زی آن خلیغا آمبار جپ اس خلک او پد آن اسے تیز او کاٹار اس کنا لخ آ تخا ولے ای فلسطین نا تحریک اٹ اوار تمنگ نا وخت تینا لمہ جیجا نا کاٹم نا سوغندء ارفیسٹ کہ دشمن نا مونا ای سلہہ بٹپرہ ایلو کماش مدام کنے سماٹی مننگ نا پنت تسسس۔ دیسکہ ای فیصلہ کتویس اٹ کہ ہرا وڑ اوڑتون مون ایتیو کہ تیز انگا کاٹار کنا گٹ آن ارفنگا او اسے گونڈو توار اس کنا خف تیٹی پنا، سنگت مش اٹ خنکے پٹہ گڑا چرینگ نی امر ءُ جانباز اسے اس پدان چک خلکٹ اُراٹ خوش او توار اسے ٹی پاریٹ اڑے ابو داؤد نی اس ولے او زو تینا جوڑ تیا تینا ہںورءِ تخا پارے کرار سنگت کرار، اشارہ ٹی ہیت کریسہ کنا خفٹ اٹ باہ ءِ تینا تس پارے بہ خیرٹ سنگت خدا اتینے، کنے کنا خن تیا یخین الو وڑ وڑ انا سوال ارفنگ کن کنا جوڑک ملاس اسور او کنے تینا رند اٹ اسے تنک او غار اسیٹی بننگ کن کتی کرے۔ غار آنا تہٹی برف انا رند اٹ دے ٹک نا روشنائی، چانڑدہ نا طوبے نا ڈیک ءِ تسکہ۔ ہیت ہیت آن توار مش تیٹی پناکہ۔ ابو داؤد کرار آ کنا خف اٹ پارے سنگت دشمن نا مثال گند کشوکا کچک و اڑی آ خرما نا ءِ، ہیت ہیت آن خفک تے شِک مریرہ اونا اسے خف دے ٹک ایلو خف تے دیکی ہلنگ آ مریک او ہڑتوما خف تا نیام اٹ اونا خونی آ ملیءِ۔ او کنا سینہ غا تینا مُچ ءِ خلیسہ پارے داڑے ننا حالیت دا وڑ اٹی نا سینہ ٹی نا ساہ انا توار او کنا سینہ ٹی کنا سینہ ناتوار ننا اُست انا حوال ءِ دشمن آ سر کننگ کیک۔ دتر کنوکا دشمن ننا رندے گند کشوکا نہار آمبار ہلیک۔ او اودے مہمان نا خیال بس، اسے پدین ءُ آسڑدہ اس کشسا پارے ابوئے ابوئے ایلم داڑے تو نیکن پیالہ اس چاہ انا ہم کننگ کپرہ انتئے کہ درو و دیوال نا خف تیامبار مول ننا جاسوسی کیک۔ گپ گپ آ اونا مہر اٹ اونا خن تا روشنائی اٹی تینا اسے متکنو سنگت اسے نا عکسء ِ خناٹ خیسن آ خن تا ڈلگا غیرتی آ خڑینک آتیٹی اونا بشخندہ کنا مونا بس ولے بھاز زو تہار آ غار اٹ خن تیان اودیم مس، بے تیل آ ڈیوہ غامبار پڑکیسہ دم تس اونا باہ آن اسے دم دروکو ڈوکھیا او توار اس کنا خف تیٹی پنا پارے ابوئے قسمت اونا گپءِ کپیس، شیخ باسط نا پاسہ اونا بخت اونا کڑد اونا شہادت ایہن ہم شہادت نا ٹیکی وطن نا مہروان آ نیک بخت آ کے دو بریک ولدا ابو داؤد تینا خن تیان یلہ مروکا خڑینکءِ تینا ہور اٹ صفا کریسہ دنکے اودے اسے گیرام کروکو ہیت اس یات برے، اونا ڈکھی آ توار زوراک مس، بروت آکے تینا ول تریسہ پارے او اخس دشمن آتا کاٹمء ِ کنگ اخسے مِش تا گواچی کرے اخس ظالم آتا سنگر آکے اخس دشمن نا پول آکے دنز تس اخس لاری تباہ کرے، اللہ کریس تو اسے دے شہادت ننا۔۔۔۔ ولے زو چپ کرے دوتے تینا پیشانی ٹی خلک انت کہ اللہ ءِ منظور۔ خنک وطن نا شہادت آ ولدا پالسر ڈکھی و توار آسیٹی اے وطن نصیب ننے نا ہرا تل اٹ آسودہ ءِ خاک کے ءِ۔ او بندا سنگت نا یات اٹ تینا ہیتء گیرام کرے اونا ڈلگا خن تا چاگرڈ اٹ چولا غا کرنچ آتیٹی دے ٹک نا باسنی مخیسہ پاریکہ شہادت نا مزل مُر اف ابو داؤد جک سلیس پارے بشخس سنگت بش مس غار اٹ ٹنگوکا لوت آن کنے چنک اس بگوڑا مکھی نا دانہ گڑاس اِلار گڑ انا اسے ڈک اس کنا کٹ اٹ شاغا پارے سنگت دا مڈی ءِ مش تیٹی اسے میل خوافوکو ایڑ اس مدام توں اِرا توں آن پد ایتک، او تینا راستی کو دو انا پارہ غا اشارہ کرے پارے دا تاویتء کنکے بُزرگ اسیان ہلکونے، ای دشمن نا سم تیان بچیو۔ اونا ہیت آتیان سما تما کہ او دشمن نا لشکر نا چاری ءِ ہراکہ توفک او جنگی ساز و سامان آن پُر ٹرک آک شیف سڑک آ بننگ نا گمان اسکہ ہمو پول ہم ہندا سڑک نا زی آ جوڑ اس ہرات دنز تننگ نا اودے پاننگاسس اس۔ مقصد ہڑتوماتا اسٹ اس داسہ ہڑتوماک فیصلہ کریر کہ دشمن نا لشکرے او پول اے اسہ جاہ اسے وار اٹ بس کروئی ءِ۔