20 جون آ کوئٹہ پریس کلب نا مون آ برانزی مچی ئس مرو – بی ایس او

کرونا وائرس نا سوب آن غٹ خوانندہ جاہ آک بند ءُ۔ گڑا ہائیر ایجوکیشن کمیشن بھلا خوانندہ جاہ ( یونیورسٹی) تیٹی آن لائن خوانفنگ نا بناء کننگ نا پڑو کرینے او چندی یونیورسٹی تیٹی آن لائن کلاس آک برجاء ءُ۔

ایچ ای سی نا دا فیصلہ نا خلاف تیوی پاکستان خاص کر بلوچستان نا خوانندہ غاتا تنظیم آک برانزی مچی تا بناء کرینو۔ اوفتا ذمہ وار آتا پاننگ نا ردٹ کہ دا وختا تیوی بلوچستان ٹی کہی شار آ تیٹی انٹرنیٹ نا آسراتی اف، اوڑتون اوار اوار بجلی، لیپ ٹاپ نا آسراتی ام اف۔ دا آسراتی تیان ابید آن لائن کلاس آتا بنا کننگ ایچ ای سی نا تعلیمی دشمنی ءِ و بلوچستان نا خوانندہ غاتے اہمیت تفرنگ۔

اندن بلوچ اسٹوڈنٹس الائنس نا پارہ غان کہی شار کراچی، اسلام آباد، خضدار، گوادر، خاران ٹی برانزی کیمپ خلنگسہ مسونو۔ اینو ام اسلام آباد ٹی ہائیر ایجوکیشن کمیشن نا دفتر نا مونا اسے برانزی مچی اس اڈ تننگانے۔

اندا آن لائن کلاس آتا فیصلہ نا خلاف فیڈریشن آف آل پاکستان یونیورسٹیز اکیڈمک اسٹاف ایسوسی ایشن (فپواسا) نا پارہ غان ام کلاس آتے  ہلپننگ نا پڑو کننگانے۔

ایلو پارہ غان بی ایس او نا ترجمان تینا اسے بیان اسیٹی پارینے کہ ایچ ای سی نا تعلیم دشمنی و آن لائن کلاس آتا خلاف پگہ 20 جون آ بیگہ نا 3 بجہ غا کوئٹہ پریس کلب نا مون آ اسے برانزی و مچی اس مرو۔

ورنا سما کرک

ایلمء گوہان ے ایڑس
دترام اوغان ے ایڑس
چٹ پریشان ے ایڑس
ورنا سما کرک

اُرا تیٹی خاخر لگفینے
خڑینک بازننے شولفینے
گوڑخ آتے درینےارفینے
ورنا سما کرک

لمہ پَٹک اینو مار اس
طوبے گوہا استار اس
مونجائے ہُر وابہار اس
ورنا سما کرک

کشکان ے ظالم گلابس
زنداٹ ایسو نے زرابس
اتوئ نے۔ ورنا انقلابس
ورنا سما کرک

بش مہ ورنا سما کرک
ایلم ے پند رند خلک
دوشمن نا لِخ ے تڑک
ورنا سما کرک

تُغان بیدار مرک ورنا
نی سرمچارمرک ورنا
جان و نثار مرک ورنا
ورنا سما کرک

چُپ مفک بن بادؤی دا
ندر صدخہء شاکری دا
قصہء غُٹ خڑینکی دا

سمیع شاکر

بلوچستان نیشنل پارٹی نا بنجائی راہشون و مسکوئی سینیٹر نوابزادہ حاجی لشکری رئیسانی پارینے کہ صوبائی حکومت مصنوعی بجٹ اس ہتیسہ صوبہ نا بحران ئٹ پین ودکی کریفنگ خوائک ہرانا نن ہچبر موکل تفرون۔

او پارے کہ جام کمال خان بے اختیار و سلیکٹڈ ءِ اودے ہیت کننگ نا موکل اف، پارٹی نا پارہ غان بھروکا لائحہ عمل کن تیاریک مننگ ءُ۔ جام صاحب و اونا نقلی ٹولہ غاتے سبخ ایتون، مننگ کیک نن صوبائی حکومت ءِ دو ارفنگ اٹ سرسوب مرین۔

دا ہیت آتے او اپوزیشن جماعت آتا اسمبلی باسک آتون ہم کوپئی نا وخت صحافی تیتون گپ کریسہ کرے۔

نوابزادہ میر لشکری رئیسانی مُستی پارے کہ جام کمال خان و اونا دروغ نا حکومت صوبہ نا حق آتا سودائی نا بدل ئٹ ہتنگانو۔ زو تیٹ بنجائی پی ایس ڈی پی و این ایف سی ایوارڈ ئٹ بلوچستان نا حق آتے سودا کننگا۔ اینو اگہ صوبہ ٹی حکومت اس مسکہ گڑا دا وخت صوبائی اسمبلی نا اپوزیشن جماعت آتون اوار تولسہ ہیت گپ کریسہ کسر اس کشارہ ولے بے اختیار و دروغ نا حکومت، دروغ نا بجٹ ہتنگ خوائک ہرانا کسر ءِ نن توننگ خوانہ کہ صوبہ ئٹ بے روز گاری و بے جاراتی ءِ ایسر کننگ مرے۔

او پارے کہ دروغ نا بجٹ نا برخلاف اپوزیشن جماعت آک تولوک ءُ۔ جام کمال خان و اونا حکومت تون اختیار اف کہ او ننتون ہیت کننگ کے و اندا اونا تینے ڈھکنگ نا سوب ءِ کہ بے اُلس و ویل آتیٹ ودکی کروکا بجٹ ءِ ہتنگہ۔

لشکری رئیسانی پارے کہ اپوزیشن آ مفاد پرستی نا دوبہ ءِ خلیسہ جام صاحب رد ءُ ہیت اس کننگ ءِ۔ بی این پی شش ٹِک ئنا ہیت کرے دا صوبہ نا گواچنی ویل آک ءُ، اندا ویل ویل آتیکن ن بنجائی حکومت تون سیوت ءِ ایسر کرین۔ جام صاحب ٹوئٹ نا جاگہ غا مون پہ مون بروس ہیت کروس گڑا سما تماکہ کہ او صوبہ نا اخس خیرخواہ ئسے۔

بلوچستان اسمبلی ٹی اپوزیشن نا باسک آک ہراٹی بلوچستان نیشنل پارٹی، جمعیت علماء اسلام، پشتونخوامیپ و آزات امیدوار نواب اسلم رئیسانی اوار ءُ۔ پولیس اپوزیشن باسک آتے ریڈ زون ئٹ پیہنگ کن ہلیتو ہرانا سوب اوفک فیاض سمبل چوک آ دھرنا تسونو۔

برانزی تولنگ وختا بلوچستان اسمبلی ٹی آزات امیدوار اپوزیشن نا باسک نواب اسلم رئیسانی احوال کار آتون ہیت و گپ کریسہ پارے  کہ بروکا بجٹ ہرا 20 جون آ مونا ہتنگو، دا بجٹ ٹی بلوچستان نا اُلس کن ہچس ام اف دا اسے اُلس دشمن ءُ بجٹ ئسے۔ دا اسے الس دوست ءُ بجٹ اس مننگ کپک اندا سوب آن نن دا بجٹ ءِ منیپنہ و دانا بشخ جوڑ مفنہ۔

او مونی پارے کہ جام کمال حکومت اولی دے آن اُلس ءِ نوکری نا پنٹ ریفسہ  ءِ ولے اینو اسکان ہچو ام بھرتی ئس متنے ہرانا سوب آن بے روزگاری دے پہ دے آن زیات مننگے۔

ایلو پارہ غان بلوچستان نا بھلا وزیر جام کمال خان بیان تریسہ پارینے کہ بائدے اپوزیشن نا دا برانزی مچی بلوچستان شرحالی کن مروس ولے اپوزیشن نا دا دھرنا اُلس نا خاطر کن اف بلکن پی ایس ڈی پی فنڈ آتیکن ءِ۔

او مونی پارے کہ اپوزیشن نا گڑاس باسک آک گواچن ءِ سرپد مسر اوفتا جوانی ءِ۔ ولے اپوزیشن نا ایلو باسک کرونا نا ناجوڑی ءِ سرپد مریسہ ایلو مخلوق نا ساہ ءِ نا خیالداری کیر۔

یاتی مرے منہ دے مست اپوزیشن نا پارہ غان جام کمال حکومت نا خلاف برانزی مچی کننگا ہرانا سوب آن حکومت و اپوزیشن نا پارہ غان کمیٹی جوڑنگا اندا فیصلہ مس کہ دا ہرتوما کمیٹی تا باسک آک تولیرہ و اپوزیشن نا  ویل آتے ایسر کیرہ۔۔ ولے اِرا دیوان نا مننگ آن ابید ام اپوزیشن و حکومت نا نیام اسہ جہی متو اندا سوب آن اینو اسے وار ولدا اپوزیشن دھرنا تسونے۔

صوبہ سندھ نا مالی سال 21-2020 نا کم و ود 12 کھرب 40 ارب رپئی آن زیات بجٹ سندھ اسمبلی ٹی تننگانے۔

سندھ اسمبلی نا اجلاس اسپیکر آغا سراج درانی نا زیر صدارت مس ہراڑے سر وزیر سندھ مراد علی شاہ بجٹ ءِ مونا ایس۔

اندا نیام ئٹی اپوزیشن نا کنڈان ترند برانز کننگا، ہراٹی سر وزیر نا تقریر برجاء ئس۔

تینا ہشتمی بجٹ تران نا وختا سروزیر ملخ تا توننگ کن 44 کروڑ رپئی تخنگ نا پڑو ءِ کرے و کشت و کشار نا شعبہ نا نسخان آتے اُریسہ کشت و کشار نا بجٹ ٹی 15 ارب رپئی ودکی نا سلہ مونا ہتنگانے۔

او پارے کہ کورونا نا بابت جانجوڑی نا بجٹ 16 فیصد ودکی تون 139.8 ارب رپئی کننگ نا سلہ تننگانے، اندن کورونا ایمرجنسی فنڈ 3 ارب رپئی نا مرو۔

مالی سال 20-2019 محکمہ جانجوڑی کن بجٹ حساب 120.486 ارب روپئی ئس۔

بجٹ تران ٹی پاننگا کہ تعلیم نا بجٹ 10 فیصد ودکی تون 244.5 ارب رپئی کننگسہ ءِ اندن مالی سال 20-2019  ٹی تعلیم نا بجٹ 212.4 ارب رپئی ئس۔

صوبہ سندھ ٹی صوبائی دیمروی بجٹ 155 ارب اندن ضلعی دیمروی بجٹ 15 ارب رپئی نا مرو۔

بجٹ ٹی بلدیات کن گرانٹ ٹی 5 فیصد ودکی کریسہ دادے 78 ارب رپئی کننگا اندن تدوکا مالی سال ٹی بلدیات کن 74 ارب تخنگاسس۔ 

صوبائی بجٹ ٹی ڈامبر و دیر سرکننگ تون اوار دیر ئنا پین جتا منصوبہ غاک اوار کننگانو، ماس ٹرانزٹ و ٹرانسپورٹ کن 3 ارب 11 کروڑ رپئی تخنگانے۔

سندھ بجٹ ٹی ملیر ایکسپریس وے کن 2 ارب 7 کروڑ رپئی اندن کراچی ٹھٹہ شاہراہ کن اسہ ارب 86 کروڑ رپئی تخنگ نا پڑو کننگانے۔

بنجائی بجٹ ٹی کارندہ آتا تنخواتے زیات کتوس ولے صوبہ سندھ نا بجٹ ٹی سرکاری ملازمین تا تنخوا آتیٹ 10 فیصد اسکان ودکی نا پڑو کننگا۔

وزیراعلی سندھ مراد علی شاہ پارے کہ سندھ حکومت نا گریڈ اسٹ آن شانزدہ نا ملازم آتا تنخوا تیٹ 10 فیصد ودکی نا سلہ تننگانے اندن گریڈ 17 آن 21 نا افسر آتا تنخوا ٹی 5 فیصد ودکی کننگ ءُ۔  تنخوا تیٹ ودکی نا اطلاق صوبائی وزراء و کابینہ نا باسک آ مروف۔

یاتی مرے کہ وفاق و پنجاب ہم مالی سال 21-2020  نا بجٹ مونا ہتنگانے، ہراڑا بحث برجاہ ءِ۔

پاکستان نا تدوکا صدر آصف زرداری و سردار اختر مینگل نا نیام اٹی کرونا وائرس تو مون تننگ کن حکومت نا ڈوہدار آ بے پامی آ ہیت و گپ، تدوکا صدر آصف زرداری و سردار اختر مینگل ملخ نا جلہو تے توننگ ٹی حکومتی نا بے سوبی و ودوکا غریبی آ ہم گپ کریر۔

سردار اختر جان مینگل پارے ملک ءِ دا حالیت ٹی صدرزرداری نا وڑ ءُ سیاست دان ئسے نا زیات خواست ءِ کہ ہرا وخت حکمران تا بے پامی نا سوب حالیت دے پہ دے خراب مننگ ءِ۔

دا وخت آصف زرداری نا پاننگ ئس کہ پاکستان پیپلزپارٹی ہر وخت سخت انگا وخت ٹی زرگزرانی ءِ سیبو تسونے۔ پاکستان پیپلزپارٹی یکو ملک، جمہوریت و غریب آتے کمک کرینے۔ پاکستان پیپلزپارٹی ملک ءِ ویل آتیان کشنگ کن تینا راہشونی آ کڑد ءِ ایسری تریسہ کرے۔

یاتی مرے بلوچستان نیشنل پارٹی-مینگل ٹولی نا صدر سردار اختر مینگل حکمران جماعت پاکستان تحریک انصاف نا سیوتی آن تینا جماعت نا جتائی نا پڑو ءِ کرینے۔

چار شمبے نا دے بنجائی اسمبلی نا اجلاس نا وختا سردار اختر مینگل پارے کہ ای تینا جماعت نا تحریک انصاف حکومت تون جتائی نا باضابطہ وڑ ئٹ پڑو کیوا، نن پارلیمنٹ ٹی مرون و ویل آتیا گپ کریسہ کرون۔

اگست 2018 ٹی بلوچستان نیشنل پارٹی-مینگل و تحریک انصاف مرکز ٹی حکومت تون سیوت کن مفاہمتی یادداشت آ دستخط کریسوسر۔

دا یاد داشت نا شش ٹکی ایجنڈہ آ امنائی کننگا ہرا ٹی بیگواہ بندغ آتا یلہ کننگ، نیشنل ایکشن پلان آ عملدرآمد، بنجائی حکومت ٹی بلوچستان کن 6 فیصد کوٹہ غا عملدرآمد، افغان مہاجرین نا دمدستی تون واپسی و صوبہ ٹی دیر بحران نا ایسری کن ڈیم ئنا ہڈ تس اوار ئس۔

بلوچستان نیشنل پارٹی-مینگل بیرہ مرکز ٹی تحریک انصاف نا حکومت تون سیوت کریسوس اندن صوبائی پِڑ آ پارٹی نا جمعیت علمائے اسلام (فضل) تون سیوت برجاہ مسوسس۔

سرداراختر مینگل نا یکہ مننگ آن حکومت ءِ خلیس نا لائخ اپوزیشن جماعت آتا بیست جون آن اجلاس تخنگ نا گمان ارے۔

بلوچستان ٹی سمارٹ لاک ڈاؤن 30 جون اسکان برجاء۔

بلوچستان نا شار لسبیلہ ٹی کرونا وائرس نا کیس آتیٹی گیشتری مننگ نا سوب آن حب ٹی ضلعی انتظامیہ سمارٹ لاک ڈاؤن آ سختی کننگ نا بنا کرے۔

ڈی ایچ او (ڈسٹرکٹ ہیلتھ آفیسر) نا پاننگ آن پد حب نا پنچ علاقہ جام کالونی، زہری اسٹریٹ، ہندو محلہ لاسی اسٹریٹ، اکرم کالونی، محمود آباد روڈ ءِ سمارٹ لاک ڈاؤن نا ردئٹ سیل کننگا۔

حب ٹی دا وختا 93 کرونا وائرس نا کیس رپورٹ مسونے۔

ایلو پارہ غان محکمہ داخلہ نا اسے نوٹیفکیشن نا ردئٹ بلوچستان ٹی سمارٹ لاک ڈاؤن ءِ 30 جون اسکان برجاء کننگ نا پڑو کننگانے۔ داڑان مست سمارٹ لاک ڈاؤن 15 جون اسکان اس۔ داسہ داٹی 15 دے نا ودکی کریسہ 30 جون اسکان برجاء کننگانے۔

محکمہ داخلہ نا نوٹفیکیشن نا ردئٹ سمارٹ لاک ڈاؤن ٹی ایس او پیز تیا سختی ٹی عمل کننگ مرو۔ لاک ڈاؤن نا وختا غٹ مارکیٹ، دکان، شاپنگ مال آک صوب نا 9 بجہ غان شام نا 7 بجہ اسکان ملننگور۔

اندن غٹ خوانندہ جاہ آک 15 جولائی اسکان بند مریرہ۔ سیل و سوات نا جاگہ غاک، گوازی نا میدانک، سینیما، برام تا ہال آک مُست نا وڑ بند مرور۔

یاداک

 نوشت: حفیظ شہزاد

دی بلوچستان پوسٹ

یاداک۔۔۔ ہمو یاداک ہرا کنتون پند خلیسہ کنا چُنکا امیت آتے اسے چنکو جاگہ ئسے آ سر کریرہ۔ اندن سرپد مہ ہمو جاگہ نہ مون ئٹ مورینک نا کونڈ ہم چُنک مرو۔ ہمو یاداک ہرا کنے بے خودی تیان کشسہ مزل نا ڈس ءِ تسورہ و اگہ ای ہمو ڈس نا پارہ غا ہنوسُٹ ساہت اسیٹی تہار کنا خنتے قید کریکہ ولدا تینا وجود ءِ ہم اُستان دریٹہ، تینے گیرام کریٹہ کہ ہرا منزل، امرو ڈس، تارمئی، ہرا  تارمئی!

مگہ ای مالہ روشنائی اسیٹی ئسوٹہ کہ داسا تارمئی نا ہیت کننگ اٹ! ہمو یاداک ہرا کنے چُنکا خوشی تے ہم نصیب کتورہ۔ اگہ وختس برام یا سانگ نا گلوبالی ئس مروس ای ساڈی مننگ کن سر ہلوسٹ ہمو کوٹور آ یاداک کنا اُست ءِ سیلہ خلیسہ دتر چُر کریرہ ولدا ہمو اُست نا دترک تہٹی جسم جان ءِ کُل ءِ بیزار کریرہ امو تم اسکان کہ ای تُغی ءُ سیلہ اس تینا جسم اٹی خلپر۔۔۔۔۔۔۔۔

ہمو یاداک ہرا چُنکی نا دوٹی ہلیسہ اودے بلُنی نا پارہ غا اندُن زو دیرہ دُنکے دے تینا روشنائی ءِ کہی ہلنگ نا پارہ غا اخسو وخت ئسے ٹی سر کیک۔ ہمو یاداک کُل پریشانی تے اُست ئنا تہٹی اسے جا کریسہ اُست ءِ فولاد نا وڑ سخت کریرہ ہرا جوڑتے بے معنی ءُ تبسم اس بشخارہ۔۔۔۔

ہمو یاداک نما دائسکا کنتو اوار ءُ ہرا کنے تینا جند آن گیرام کرفینو کہ مسخت و مزل ئسے نا پارہ غا گام خلنگ ئٹی اٹ۔ سماہ اف ساہت اسے ٹی ایسر مریو یا منہ وخت نُما یادا تون پین گون مریسہ تینا ذات ءِ تینتو اوار تینٹ درگور کیو۔

داستان ءِ عرب، براہوئی مزحمتی ادب نا پنہ غا

نوشت: محبوب شاہ

دی بلوچستان پوسٹ

مُست آن  برجاء۔۔۔۔۔۔۔۔۔۔۔۔۔

ولر آک غلامی نا زند ءِ گدریفنگ نا خلاف آجو وطن آتیا بال کننگ کن ہنینو گٹ اسیٹ قومی ترانہ ءِ ظالم و جبر انا داستان ءِ، بنیفسہ خوشی کریرہ انتئے کہ طاقت نا خواجہ غاک خن تیان کور حاکم سلہہ نا زور اٹ بے وس آ مظلوم آتا وطن آ، وطن اٹ ڈھکوک وسائل آتیا سور دیر نا مڈی تیا پٹ و دامان تیا، وہوکا چکل آتا زخیرہ غاتیا کوزہ کنگاسس ۔

دا پارہ غا شوان بزگر آن بیدس ہر ہمو بندغ آ رکھ خلنگاسس ہراک دا مال و مڈی نا خواجہ پاننگارہ، خلق و شار آتیٹ اننگ بننگء رکھ خلنگ کن آہن نا پائپ تفیسر، خوانندہ غا ادارہ غاتیٹی ریک انا گونی تا کمک اٹ سنگر جوڑ کننگاس اس گند کشوکا شکاریک جاگہ اس توفک نا نل اٹ جاگہ اس دام تفیسر، جاگہ اس لنگڑ ملاس بے روزگار آ ورنا کے زندہ زیان گم و گار کننگاکہ ایلو پارہ غا شکاری تا دا کوشست ہم برجاء اس کہ دام اٹ الوکا ہر ہمو شکار نا پرہ غاکے کشکوئی ءِ ولے اوکے بدر ملک آتیا بال کننگ کن اِلوئی اف ولے شکاری کے دا سما اف کہ مظلوم آتیا ظلم او جبر کننگ دے ئنا دے اس اوتا طاقت جوڑ مریک دنکہ دوشہ ہلوکائے وخت ئنا وخت اس تینٹ دوشہ ڈنگ خلیک، مظلوم آتا بے زبان و بے وس انسان تیتو امون مننگے۔

میڷ خوافوکا شوانک، لنگار کروکا بزگر، خولم و پالیز دسوکاک، لاب و لائی گر آک، کاس و درسم اٹ شفی و کونٹ گفوکا کاریگر آک، ہمپ و لڈ کروکا بے وس آک خلقی شاعراک، خسی و خاسن اٹ، کرنو کنوک آ بندغ آک سیل و تیرمہ گدان تیٹی ریہونگوکا مظلوم آک صبر کروکا قوم کاٹم تننگ و کاٹم کُننگ نا شونک ءِ بناء کریر۔ شکرا و شکاری تا خوراک جوڑ مروکاک آخر مونگی نا کتامپ جوڑ کریر، کاٹم ءِ تلف آ تخوک آک دشمن نا سنگر آتیان گولہ و بارود نا مشین کے بڈ آ دریر تینا رند اٹ بروکا دشمن تا طاقتے پرغنگ کن اوتا کسر آ کمک اٹ الوکو ڈب تفیر۔ داسہ بے وس آتیٹی ہم شکاری ودی مس ہراکے ہر وڑ آن نہار نا شکارءِ شروع کریر، لاری تیان پُر ولر تا ولرآکے اندن ڈب اٹ ہلکرہ دنکہ باڑو ککو ءِ دام ات ہلیس۔

یخ و گوریچ، پر و برف ئنا موسم اٹ بدر آ وطن آ سر خلوک آ چنڑز آک، کُنجریفوک آ پرہ غا تیتون سوتڑوکا گوریج اٹ دے ٹک نا گمان مسکہ۔ ہر اسٹے مرغن آ کسر تا ویل آتا ڈکھ ئس، نہ زندہ و سلامت پدی بننگ نا غم، جوانو و کاج اسے نا خواہش نہ جوانوں دیوان اسے نا فکر، مدام اوتا زند ئنا مقصد اسٹ اس اوتا خن تا روشنائی ٹی زند او مرک ئنا پاناد اسٹ خننگاکہ اوتا دین و دنیا اوتا غم و شادی اوتا جہد انا توار اسٹ اس آجوئی ٹی، آجو ءُ بال اس۔ ایمان تا جوزہ غاک غیرت نا خف اٹ داپاریرہ کہ ظلم انا دیک زو کٹیرہ، تفوکا چکل آتا با زو ملنگو ءِ، جل تا زیباغا توار دیرک ہنینو گٹ اسیتو سرونز خلور، بھاز زو نما کمب آتا مچھیک نما کندوری تا شان جوڑ مرور، بھاز زو نما گدان تا مہمان نوازی پٹ بیوانکے آباد کروئے۔

ھاز زو نما دون تا یخ انگا دیرک انسان و ساہدار تا ملاسی ءِ مر کروے۔ بھاز زو پٹ و دامانک خرن مرور، بھاز زو کہوک آ خاخر تا ہس تیان چڑینگ اس بش مرو ءِ، مست انگا لوک آمبار بے سدا گنوک آمبار قدرت نا تروزون نا کیرغ آن شمشان گاٹ نا خاخر ءِ، لگیفسہ برانز ہتوئے۔ دا رنگی آ دیوانک دا گٹ و تلار تا سیخاک دا خرسی دا خوانا دیرک ایزک نا خاسنک زِک ئنا خریش آک، خشکاوہ نا تندور نا باسن آ اِرغ بوئے مادران نا داروک بدر آ وطن نا شاد آن ہنین او بدر آ وطن نا انگور و اناک خشک میوہ غاک دا زی پہ زی آ گچین آ ماڑیک رنگ رنگی بھلا گاڑی تیان کنا وطن نا اُچ آک کنا گدانک کنا دانکوک زیات چس کیرہ ، ابوئے ابوئے وطن دا اف وطن ہمودے ہراڑے کنا شوانک کنا بزغراک بٹ اسے نا زی آ شول و بانسری ٹی وطن کن لیلڑی پار

برجاء ءِ۔۔۔۔۔۔۔۔۔۔۔۔۔

برطانیہ ٹی محققین تا پاننگ ءِ کہ اوفتے اندن ءُ شاہدی رسینگانے کہ درمان اس کووڈ نوزدہ نا زیمی بندغ آتا زند ءِ بچفنگ نا بھاز اہم ءُ کڑد ئس ایسری تننگ کیک۔

برطانوی پٹ و پول کروکا تا پاننگ ءِ ‘ڈیکسامیتھاسون’ پنی ءُ اسہ سٹیرؤڈ کروکو مست آن اسہ ترند ناجوڑ آ بندغ تا زند آتے بچفنگ ٹی سرسوب مسونے، پٹ و پول نا نتیجہ تا پڑو کننگانے۔ و پاننگانے کہ پُورو پٹ و پول زوت شینک کننگو۔ و سر و سوج ئنا نیام اٹی اِرا ہزار 104 ناجوڑ آتے دوا درمان نا نیام اٹی دا درمان تننگاسس و دا ناجوڑ آتے ہمو چار ہزار آن زیات ناجوڑ تا مون آ اوننگاسس ہرافتے ہڑدے ئی ڈول درمان کننگسہ ئس۔

پٹ و پول نا نتیجہ غاک پارہ دا دا اندن انگا مرک آتے سی و پنچ فیصد کم کریسوس ہرافتے ساہ ہلنگ کن مشین نا کمک نا خواست ئس و دن انگا بندغ آتیٹ بیست فیصد کہنگ کم مسوسس ہرافتے پین آکسیجن نا خواست ئس۔ دا دارو ہمو ناجوڑ آتا کمک کتو ہرا زیات ناجوڑ الوئس۔

 پٹ و پول نا سروک بیٹر ہوربی نا پاننگ ءِ کہ ”دا پاش مسونے کہ امو ناجوڑ آک ارافتے آکسیجن نا المی خواست مریک، اوفتا زندہ مننگ نا کچ بھاز زیات ءِ ۔ گڑا ‘ڈیکسامیتھاسون’ ءِ دوا درمان نا بشخ جوڑ کروئی تمو۔ دا کبین ءُ درمان ئس اف و دادے مچ جہان ئٹ زند آتے بچفینگ نا دم دستی تون داڑان کاریم الینگ ءِ بناء  کننگہ۔

منتواری: ڈی ڈبلیو