کنا ونڈ
نوشت: ناز بلوچ
دی بلوچستان پوسٹ
اگہ نن جہان نا مظلوم آ قوم آتا و اوفتا مزاحمت نا تاریخ ءِ خوانن ہرا وختا ظلم تینا ہد آن مُستی ہنیسہ قوم ئنا ربیدگ، اونا بولی و اونا بقاء کن خلیس اس ودی کرینے ہمو قوم ئنا زنک ءِ کاٹم ارفینے، مزاحمت کرینے و اسہ نوکاپ ئسے نا وڑ ظلم و ظالم نا رند آتے ڈھیرفسہ بروکا وخت ئٹ اسہ دیمروی کروک راج اس جوڑ مسونے۔ مزاحمت آن بناء مروکا اسہ دیمروی کروک و آجو قوم ئسے نا دا کسر، دا انقلاب ہچ ہڑزان متنے، نہ کہ اے وخت آ ہڑزان مسنے و نہ داسہ ہڑزان ارے۔
ظالم تینا زور ئنا زیہا اسہ مظلوم راج ئسے غلام تخہ، اونا حق ءِ کنے، اودے دا ترندی تون مُستی ہنوک جہان ئٹ پد تمنگ کن بیوس کے، تیل، گیس، کولا و چندی مڈی تا خواجہ آ قوم دیر، بجلی و زند ئنا بنماسی آ خواست آتیان ہورک مرے، اودے خدا نا پارہ غان تروکو وحی سے نا خواست اف کہ نی دو خلاس اُس، نی مظلوم اُس و تینا بقاء کن نے تینا زور آن زیات نت دُو خلوئی ءِ۔
مزاحمت نا کسر برجاء مریک ولے بے نتیجہ مفک۔ و مزاحمت نا دا کسر آ نیاڑیک ہر وخت نرینہ تون اوار سلوک مسونو۔ ہچو انقلاب اس نیاڑی نا کمک و اونا ہمکوپئی آن بیدس مننگ کتنے۔ چاگرد ٹی اسہ نیاڑی ئسے نا بھلو کڑدار اس مریک۔ اونا اسہ چنکو کمک اس ہم بھلو ہند اس تخک۔ نیاڑی ساندہ بدن نا سوب آن نرینہ آن نزور گوندنگسہ بے پام کننگانے۔ و دا سوب آن اوڑان ٹَک خلنگ، سرپد مننگ نا ہر حق پُلنگانے ولے ہرا وخت مزاحمت نا ہیت مریک یا انقلاب نا کسر نا گچین کننگ مریک نیاڑی نا جہد ہم ہنداخس اہمیت تخک اخس کہ نرینہ نا۔ نیاڑی اسہ چاگرد ئسے نا نیمہ آباتی مریک و نیمہ آباتی ءِ بے شعور تخنگ آن و بے تعلیم کننگان اودے پد بٹیسہ انقلاب و انقلابی تحریک اخس نسخان نا گواچی مریرہ دانا گمان ءِ نن جوان کننگ کینہ۔
نیاڑی ماہ رنگ، کریمہ و فرزانہ مجید نا دروشم ئٹ مزاحمت نا دیوال جوڑ مرے۔ اسہ زائیفہ ئسے نا دروشم ئٹ نرینہ نا حوصلہ و ہمت مرے یا کہ لمہ ئسے نا دروشم اٹ اسہ باشعور’ و زَنک ئسے نا رکھوک مرے اونا خواست ہر وڑ ئٹ ہر دروشم ئٹ انقلاب ارے۔ بلوچ نیاڑیک دا وخت آ ہرا وڑ تینا راجی ذمہ واری تے پورو کننگ ءُ، ہرا وڑ مزاحمت نا کسر آ نت تخانو دا ہیت اٹ ہچو شک اس اف کہ بلوچ راج ترند آ گام تیتون تینا مِزل نا پارہ غا روان ءِ۔ گڑاس بندغ دا پارہ کہ بلوچستان ٹی اسہ دے اس ہم دنو اف کہ نما نیاڑیک روڈ آتیا برانز کپسہ ولے داڑان گڈ ہم ننا حالیت ہمودے ہرا درو اس و پگہ ہم اندا حالیت مرو ہرا اینو ارے۔ داڑان جوانے ہرکس چُپ کہ انتئے تینے خوار کے دا ہمو بندغ آکو ہرافتے اگہ انصاف، برابری، حق و آجوئی تاس ئٹ تیار ہم رسینگے وا پارہ نن پنڈوخی ارفپنہ و تینٹ ہم گڑاس کننگ نا لائخ افس۔ ننا حال درو انت اس یا اینو انت ءِ، اگہ نن چُپ توسُن ننا حال پگہ داکان ہم بد مرو۔
ننا نیاڑی تا حوصلہ اوفتا جہد’ و ننا مزاحمت اسہ گچینو پگہ سینا ترجمانی تے کیک۔ بلوچ نیاڑیک ظلم ئنا مون ئٹ دا جہد ئٹ چُنک ذہنیت آتا ہم اثر انداز مننگ و اوفک ظلم کہ ہم خاخر نا وڑ ثابت مننگ ءُ ہرا کہ ظالم نا دسوکا دا ظلم ئنا کشت و کشار ءِ ہشیسہ ہننگ ءُ۔
فیڈرل کاسترو تینا کتاب “مائی لائف” ئٹ نیاری تا گوریلا تنظیم نا بارہ ئٹ نوشتہ کیک کہ انقلابی عمل ذہن آتے آجو کیک۔ او پائک کہ 4 ستمبر 1958 ئٹی “ماریانا” پنی نیاڑی تا گوریلا فوج اڈ تننگا۔ کاسترو دا فوج ءِ تینٹ ٹریننگ تس۔ ہرا وخت کیوبانا نرینہ غاک تینٹ خنارکہ نیاڑی تو جنگ ہم کننگ کیک، ٹپی ہم مننگ کیک و شہادت کن ہم تیار ءِ گڑا اوفتا نیاڑی تا بارو ئٹ سوچ مٹ مس۔ بلوچ نیاری تا جہد، حوصلہ و عملی مزاحمت ہندا وڑ ذہنیت آتا اثر انداز مننگ ءِ۔
بلوچستان ٹی مروکا آپریشن تیٹی بلوچ نیاڑیک ہردے بے دادی تا گواچی مریرہ، بیگواہ کننگرہ ولے اوفتا حوصلہ نزور مننگ اف بلکن ملک ناز نا وڑ او مزاحمت کننگ ءُ و اوفتا دا مزاحمت تیوہ غا بلوچستان، نیاڑی و نرینہ تے چُپ تولنگا آ لجی کننگ ءِ، او دئے سال آن ڈیتھ اسکواڈ آتا خلیس و دہشت آن چُپ تولوکا خضدار ءِ سوج و توار ارفنگ کن بیوس کرے۔ بائدے اندا وڑ نیاڑی و نرینہ غاک عملی مزاحمت نا بشخ جوڑ مریر و ظالم نا ظلم ئنا مونا سلیر ۔ نن اسہ اندنو ڈیہہ ئسے نا بندغ اُن ہرا نا دود مزاحمت مسنے، ننے آن کس دا کسر آن نا بلد اف۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک
