پوسکنا روشنائی
نوشت: انور ساجدی | مٹ: سمیہ بلوچ
دی بلوچستان پوسٹ
بلوچستان ٹی دا وخت چار فیکٹر کاریم کننگ ءُ؛ بے وسی، خلیس، بیم و جوفہ۔
بی بی ملک ناز نا کذیت و دا ویل ئنا خن خنوک شاہد معصوم برمش مچ ءِ ضمیر آتے سریفے و بھاز وخت آن گُڈ تربت ٹی بھلو برانز ارفنگانے ولے ویل ئنا ہرا نوعیت ءِ، ہر شار و ہر جاگہ غا پریاد، احتجاج مروئی ئس، دا ہیت منوئی ءِ کہ دا ریاست ٹی بلوچ آتا کچ کم ءِ ولے ایلم قوم آتا مون ئٹی دا ہر وخت برانز و مون تس نا کسر ءِ ارفینو۔
2006 ٹی مش آ ہننگ آن مالو ڈیرہ بگٹی ٹی ہرا وخت نواب صاحب بگٹی اکابرین نا نیام ئٹی تولوک ئس گڑا ای سوج کریٹ کہ نی ایسری قربانی کن تیار اُس۔ نواب صاحب پارے کہ آہو ای تیار اٹ، کنتو داڑان بیدس پین ہچ کسر اف، انتیکہ ہرا وخت دا کنے دزگیر کرور گڑا پنجرہ ٹی شاغور ہر شار ٹی نشان ایتور و تینا بندغ آتے پارور دا دے بلوچ۔ او وخت ای پاریٹ کہ نا ایسری آن گُڈ نا فکر ٹی انت مرو؟ گڑا او پارے کہ دا ای تپرہ ولے ای تینا جند اکن ندر مننگ افٹ ای تینا ڈیہہ اکن تینا چنکو ونڈ اس شاغنگ اٹ، دا ورناتا کاریم ءِ کہ او کنا مرگ آن گُڈ انت ردعمل نشان ایتور و دادے اسہ تحریک ئسے نا دروشم تننگ کرور یا نہ، ولے دا ہیت المی مرو کہ اسہ پیر ءُ بلوچ اس تینا ساحل، تینا ڈغار نا مڈی و تینا ڈیہہ ءِ خن تے تفیسہ زوراک آتا دو ٹی تتو۔
اینو 14 سال آن گُڈ نواب صاحب نا شہادت نا ردعمل برجاہ ءِ۔ دیخہ سلینگ آن گُڈ واجہ غلام محمد، لالہ منیر و شیر جان نا قربانیک ویل ئنا حالیت ءِ مہمیز کرے و اسہ کنڈان روایتی بلوچ مزاحمت بناء مس گڑا ایلو کنڈان ماما قدیر گاندھی جوڑ مس۔ برانز نا پرامن وڑ ءِ کاریم اٹ ایس۔ او کوئٹہ آن اسلام آباد اسکان زالبول تیتون اوار لانگ مارچ کرے، دانا مسخت طاغت تخوک پنجاب نا مخلوق نا ضمیر آتے بش کننگ ئس کہ ننا ڈیہہ نُما ریاست نا بھلو بشخ ئسے نن ہم دانا شاری اُن ولے ماما نا دا برانز پنجاب نا ہد اسکان سلیس و حکمران آک بد دریر، ماما نا دا پرامن تحریک ہمو ہزار آ ورنا بندی تا یلہ کننگ کہ ئس ہرا نہ کروکا گنا تا بدل ئٹ تارمہ انگا شام تیٹ ارفنگاسر و ہرافتا ہچ ءُ حوال اس الو، اینو ہم بھاز آ لمہ آک تینا جغر نا ٹُکر آتیکن کسر اُروک خڑینک خلیسہ کور مسونو۔ تارمہ انگا کسر آتیٹ خلینگوکا دا بندغ آتا چناک بدحالی و بیوسی نا زند گدریفنگ آ بے وس مسر۔
دا جہانی اصول ءِ، کہ اگہ ریاست تینا شاری تیا ہیت اس ارفک گڑا ءُ دانا جواب ءِ ایتے، اگہ او گناہ اس کرینے تو او قانودی کارروائی کیر ولے بدبختی آن دا کسر ءِ ارفتوس اندا نیام اٹی اسہ مرغنو پلان اس جوڑ کننگا ہرانا رد ئٹ سیاسی چاگڑدی و معاشی بدلی تا ٹِک آک ٹہیفنگار، ولے ویل ئنا سیاسی ایسری کن ہچو کسر ہلنگتو بلکن دن کننگا کہ 2008،2013 و 2018 نا گچین کاری تے انجنیئرڈ کننگا و اندن انگا بندغ آتے سرسوب کریفیر ہرافتا ہچو سیاسی پد و جدوجہد اس الو یعنی دا عمل نا وڑئٹ بلوچستان نا چاگرد ءِ ڈی پولیٹیکلائز کننگا اندن ءُ نمائندہ ارفنگا مخلوق پو مسک کہ دا ننا ووٹ آتیان بتنو۔ اندا نیام ئٹی بھازا آزموندہ آک کننگار 2008 ٹی نواب رئیسانی ءِ ہم اُرار او تینا سیاسی زند نا بناء ءِ میر صاحب نا جماعت پاکستان نیشنل پارٹی آن کریسوس، او وزیر اعلیٰ مننگ آن گُڈ وفاداری نا سوغند تو ارفے ولے 4 سال نا نیام اٹی جوان انگا مواقع تیا او نیمون ئٹ کاریم ہلنگ ءِ بناء کرے وارس ناجوڑ مسکہ، وارس اسٹیج آ بے سما مسکہ ولے ہرا وخت بھاز زور تخار ایہاتا گڑا اودے سما کروئی تما۔ اسہ آزموندہ اس ڈاکٹر مالک و حاصل نا کننگا۔ گمان اس کہ آہن آہن ءِ تڑیک۔ دا آزموندہ ہم نیمہ سرسوب مس واہم دا نیام ئٹی تحریک نا زمین جمب ءِ کچ کروک مرکز دے ٹکی بلوچستان آن کیچ ءِ سرمس انتیکہ دا نیام اٹی سی پیک نا خونی آ معاہدہ کننگا ہرانا مسخت آواران آن گوادر اسکان تینا رِٹ ءِ برجاء تخنگ نا ئس۔ تحریک نا لڈنگ دانا سوب ئس انتیکہ بروکا وخت نا سیاسی و مزاحمتی میدان ہمو ئس اندا نیام ئٹی بھاز غیر سیاسی ٹولی تیار کننگار ہرافک چاگرد ٹی خلیس و بیم ودی کریر۔ دا ٹولیک شابیتی اسیتون کسفینگ و بد کاری اس بش کریر ہرا نا سوب آن مخلوق بیوسی آن خلیس تون اوار زند گدریفنگ بناء کرے۔
ہیومن رائٹس نا ادارہ آک دا وڑ ڈول ءِ بھاز بد پاریر و دا انسانیت نا بابت ڈو اس پاننگا۔ چاگرد نا طاغت تخوک تپہ غاک ہرافتیٹ سردار آتا اسہ بھلو کچ اس اوار ئس، منظم کننگار کہ او زندہ باد، مردہ باد کن کاریم ٹی بریر و بندغ آتے جوفہ ایتر، تینا کنڈا کیر۔ دافتے پاننگانے کہ ہرا تحریک برجاہ ءِ، او لس مخلوق نا دوٹی ہنانے، او سردار آتے ہم ایسری اسکان دریسہ ساہ ہلو، طاغت نا دا پوسکنا سیوت ظلم نا ترندی ٹی ودکی کرینے ولے دا سردار آک، طاغت تخوک تپہ غاک اشرفدار مننگ نا جاگہ غا مخبر جوڑ مسونو ہرا وخت ورناک تحریک نا راہشونی ءِ دوٹی ہلکر گڑا بلوچستان نا تیوہ آتیان بھلا سردار میر خیر بخش مری پڑو کرے کہ کنے آن گُڈ بلوچ اسہ سردار ئسے ہم منوف یا کنے آن گُڈ سرداری سسٹم نا ہچو گنجائش اس مروف، او پارے ای ایسری سردار اُٹ۔
ہرا کریم ءِ ڈاکٹر مالک و میر حاصل خان کریر ای اوڑا ہچو تبصرہ کروفٹ ولے دافتان کنا خواست ءِ کہ اگہ دافتان ردی اس مسونے گڑا اوفتا حق مریک سرپدی یا بے سرپدی ٹی او مخلوق آن دانا معافی ءِ ہلیر۔ جوان مسکہ ہرا وخت ڈاکٹر مالک ءِ پاننگاسس کہ نی سوئیٹزرلینڈ آ ہنک میر براہمدغ بگٹی تون مذاکرات کر و پدا کنے حوال ایت کہ ڈائیلاگ نا وڑ اس ودی مننگ کے۔ ڈاکٹر سوئیٹزر لینڈ آ ہنا ہیت کرے پدا بس وزیراعظم ءِ رپورٹ تس ولے زوت پاننگا کہ ہرا دے نن کننگن او گچین آ حکمت عملی ءِ، نی پین وختس خوار کپیس تینے، دا جاگہ غا ڈاکٹر مالک ءِ وزیر اعلیٰ مننگ آن بائدے استعفیٰ تروئی ئس ولے او جیرت نشان تننگ ئٹ بے سوب مسر اندا وڑ بی این پی مینگل نا سیاست و کردار آ ہر وخت تبصرہ کننگان تینے توریوہ ولے سانحہ ڈنک آن گُڈ داڑاسکان 20 سال ٹی داڑان ہم بھلو سانحہ غاک مسونو بی این پی مینگل ءِ غور فکر کروئی ءِ اگہ دانا آئینی خواست آک پورو متوس گڑا اودے حکومت نا ہم کوپئی آن دو ارفوئی ءِ انتیکہ دانا پد ہم نیشنل پارٹی آن بھار مرو۔
دا اڑتوما جماعت آک بھلو سیاسی ادارہ ءُ اگہ دافتے سلامت سلوئی ءِ، گڑا حکمت عملی ٹی بدلی ہتنگ المی ءِ۔
زوراک آک فنڈ و دیمروی اسکیم آتا ہرا فائدہ تروک چم بازی نا لڑ ءِ بناء کرینو، اگہ کس اس تینے داٹی لُڑد کیک، گڑا اودے سیاست نا پن ہچ تننگپک، اسہ محکوم راج ئسے نا سیاست ندر مننگ خوائکک، ہڑتوم آ جماعت آتا حق مریک کہ برمش نا ویل امیت و روشنائی نا دروشم ئٹ و گدروکا وخت آن مر مننگ ءِ تینائی کریسہ اسہ پوسکنو و جتا ءُ جدوجہد ئسے نا پڑو ءِ کیر، دا عمل دافتا سلامت مننگ کہ ہم المی ءِ، و بلوچستان ءِ ہم دانا بھاز خواست ارے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک
