اسہ بیگواہ ئسے نا دزگیری نا وارنٹ
دی بلوچستان پوسٹ سرگپ

پاکستان نا دہشت گردی نا برخلاف ٹہینگوک اسہ عدالت اس 16 اپریل نا تاریخ آ پانزدہ بندغ ءِ نروک پاریسہ اوفتا خلاف بیدس ضمانت دزگیری نا وارنٹ کشانے۔ دا بندغ غاتیا دوبہ خلنگانے کہ مننگ کروک وڑئٹ کالعدم تنظیم بلوچ لبریشن آرمی تون تعلقداری تخرہ، ہرا 23 نومبر 2018 ئٹ کراچی ٹی چینی قونصل خانہ آ جلہو نا ذمہ واری ارفیسس۔

اے ٹی سی دا مقدمہ نا بننگ ءِ سینٹرل جیل کراچی نا انٹری ٹیررزم کمپلیکس ئٹی کننگے۔ گوڑیفوک وڑٹ عدالت راشد حسین پنی بندغ ءِ ہم ایلو بندغ آتیتون اوار نروک گوندان ءِ۔ دا پِن کروک بندغ یک و نیم سال آن بیگواہ ءِ و اونا خاہوت دا نوشت نا وخت اسکان کراچی پریس کلب نا مونا برانز کننگے۔

راشد حسین نا خاہوت نا پاننگ نا رِد ئٹ 26 دسمبر 2018 غا اودے متحدہ عرب امارات ئٹ اماراتی ڈھکوک ادارہ غاک بیگواہ کریسہ دریسر، ہرانا اوفک ہمو وختا پولیس ئٹ رپورٹ ہم کریسر۔ راشد اگست 2017 آن امارات ئٹ بے وطنی زند گدریفنگ ئس۔

دا دعویٰ نا امنائی ءِ ایمنسٹی انٹرنیشنل نا یو اے ای بشخ ہم کرینے۔ ہرافک تینا کاغذ ایم ڈی ای نمبر 25/9880/2019 ئٹ اماراتی حکومت نا دفتر خارجہ ءِ پِن کریسہ خواست کریسر کہ راشد حسین نا بابت اونا خاہوت ءِ پاننگے و اونا خاہوت تون اوڑہی کن ہلنگے۔ ایمنسٹی انٹرنیشنل راشد حسین ءِ تینا کاغذ آتیٹ ”راجکاری باسک“ پاریسہ پِن کیک۔

واہم راشد حسین نا بیگواہی آن شش توُ آن گڈ پاکستان نا بھلا نیوز چینل آک حوال شینک کریسہ دعویٰ کریر کہ پاکستانی کوالخواہ تا خواست آ راشد حسین ءِ یو اے ای آن دزگیر کننگانے و انٹر پول نا کمک ئٹ اودے پاکستان ڈیپورٹ کننگانے۔

راشد حسین ءِ ہچو عدالت اسینا مونا ہتنگتن ءِ، اندن یک و نیم سال آن گڈ 16 اپریل 2020 آ پاکستان نا اسہ عدالت اس اودے نروک پائک۔ گوڑیفوک وڑ ئٹ پاکستانی میڈیا تینٹ اونا بابت اسہ سال اس مالو دعویٰ کریسس کہ او پاکستانی کوالخواہ تا دوٹی تننگانے۔

دی بلوچستان پوسٹ ءِ اماراتی ”فیڈرل اتھارٹی فارآڈینٹٹی اینڈ سٹیزن شپ“ نا پارہ غان شینک کروک اسہ ”ایگزٹ سرٹیفیکٹ“ اس رسینگاسس ہراٹی پاش خننگ مریک کہ راشد حسین امارات نا البتین بالی پَٹ آن 22 جون 2019 آ نوشکی پاکستان کن رخصت مسوسس۔ داڑان پاش مریک کہ راشد حسین ءِ اسہ چارٹرڈ جانز اسیٹی ڈی پورٹ کننگاسس۔ البتین بالی پَٹ گچین وڑٹ چارٹر جانز تیکن کاریم اٹ ہتنگک۔ پِن کروک بالی پَٹ اماراتی حکومت نا فضائیہ، نیوی و پولیس نا ایوایشن و ائیر ونگ ڈیپارٹمنٹ کن ہم کاریم اٹ ہتنگک۔ ایلو پارہ غا نوشکی ئٹ ہچو بالی پَٹ اس ساڑی اَف، خڑک ئنا بالی پَٹ دالبندین نا ءِ، ہرا تیوی وڑئٹ پاکستانی فوج نا دوٹی ءِ۔

راشد حسین نا خاہوت و وائس فار بلوچ مسنگ پرسنز نا وائس چیئرمین ماما قدیر بلوچ اِرا جتا پریس کانفرنس آتیٹ دعویٰ کریسہ پارینو کہ اوفتیتون اندنو پَک ءُ شاہدی ساڑی ءُ ہرافتیان دا پَک مریک کہ راشد حسین پاکستانی ادارہ غاتیتون ءِ و اودے نروک پاننگ، راشد نا زند ءِ مروک خطرہ آتیٹ ودکی نا سوب مرو۔

دا تیوی حالیت آتیان پاکستان نا عدلیہ نا بست و بند آ بھازا سوج آک ارفنگسہ ءُ۔ و امر کہ پاکستانی و اماراتی کوالخواک اسہ جاہ مریسہ دا ویل ءِ ایسر کننگ نا کوشست کریر دا بندغی حق آتے بھاز لڑنگ ءِ پاش کیک۔

پاکستانی کوالخواک دائسکان دا دعویٰ غان نمن متنو کہ راشد حسین ءِ متحدہ عرب امارات آن انٹرپول نا کمک ئٹ پاکستان ڈی پورٹ کننگانے۔ کورٹ نا دزگیری نا وارنٹ آتیان گڈ ہم ہچو ردعمل اس نشان تننگتنے۔ واہم سندھ رینجرز و کراچی ایوی ایشن اتھارٹی راشد نا دزگیری آن نمن مسونے۔

اسہ ویب سائیٹ اس ٹہیفنگانے ہرا راشد حسین نا بے گواہی نا دے تے حساب کننگ ءِ۔ دا ویب سائیٹ آ اینو خننگ مریک کہ راشد حسین ءِ بے گواہ مروک اسہ سال، مسہ تُوہ، مسہ ہفتہ و اِرا دے مسونے۔ دا امیت کننگسہ ءِ کہ دا نمبر آتا تسبیح بھاز اُرے اسکان دن بٹگنسہ مفرو، و بھاز زوت راشد حسین ءِ عدالت نا مونا ہتنگو، ہراڑے او تینا بے گناہی ءِ پَک کننگ کے۔

بلوچستان ئٹ کووڈ-19 (کرونا وائرس) نا کیس آک ترندی تون زیات مننگو، پین 41 بندغ ئٹ کرونا وائرس پَک مس۔

بلوچستن نا ہشت زیمی ضلع غاتیٹ جمعی وڑئٹ کرونا وائرس نا کیس آتا کچ 376 مس۔ کرونا وائرس آن زیمی اِرا بندغ نا جانجوڑی آند گڈ جمعی کچ 144 مسونے، 415 بندغ نا ٹیسٹ آتا حوال بروئی ءِ۔

محکمہ جانجوڑی بلوچستان نا پاننگ نا رِدئٹ بلوچستان ئٹ دائسکان 1351 بندغ نا اسکریننگ کننگانے ہرافیٹ 5485 شکی بندغ آتے ٹیسٹ کننگانے ہرافیٹ 4709 بندغ نا ٹیسٹ نفی اندن 41 پوسکنو کیس تون 376 بندغ نا رزلٹ مثبت بسونو ہرافتیٹ 227 کیس برجاء ءُ۔

محکمہ جانجوڑی نا مستی پاننگے کہ 144 زیمی بندغ آک جانجوڑ، اندن پنچ بندغ کذیت کرینو۔

محکمہ صحت نا رِدئٹ بلوچستان نا جتا قرنطینہ سینٹر آتیٹ ساڑی بندغ آتا کچ 357 ءِ۔ 148 بندغ نا ٹیسٹ نفی اٹ بننگ آ اوفتے اُراتیٹ رادہ کننگانے۔

اینو بلوچستان نا ضلع مستونگ آن چار کیس مونا بسر ہرافک اسہ خاہوت ئسے آن تعلقداری تخرہ اندن چاغی آن تبلیغی جماعت نا بندغ آتیان ہفت ئٹ کرونا وائرس پک مسونے۔

بلوچستان ئٹ کرونا وائرس آن زیمی ضلع غاتیٹ ودکی بسونے ہرافتیان گڈ زیمی ضلع غاک ہشست مسونو۔ وائرس آ زیمی پوسکنا ضلع غاتیٹ مستونگ، پشین و خاران اوار ءُ۔

بلوچستان نا جتا جتا علاقہ نوشکے، کیچ و ہرنائی ٹی جلہو تیٹ پاکستانی لشکر ءِ ٹِک کننگانے۔ ہرافتیٹ پاکستانی لشکر ءِ جانی و مالی نسخان ارفوئی تمانے۔ جلہو تا ذمہ واری تے جتا بلوچ آجوئی خواہوک سلاء بند گَل آک ارفیر۔

حوال آتا رِد ئٹ نوشکے نا علاقہ ریکو ٹی پاکستانی لشکر نا گاڑی ءِ بارود نا دھماکہ ٹی ٹک کننگا ہرا نا سوب آن لشکر نا کارندہ غاتے جانی نسخان ارفوئی تمانے۔ ضلعی انتظامیہ نا کنڈان دہسکان دا بابت ہچ ءُ حوال رہسینگتنے۔

نوشکے جلہو نا ذمہ واری ءِ بلوچ سلاء بند گَل بلوچ یونائیٹڈ آرمی ارفینے۔ گَل نا ترجمان مزار بلوچ نا پاننگے کہ  ننا سرمچارک پاکستانی لشکر نا گاڑی ءِ ریموٹ کنٹرول بمب اسیٹی ہمووخت ٹِک کریر ہراتم اوفک تینا ایلو چوکی آ ہننگ ئسر۔

مزار بلوچ نا مُستی پاننگے کہ جلہو ئٹ گاڑی تباہ مس و گاڑی ٹی سوار تیوہ غا کارندہ غاک جاگہ غا کسکر۔

پین حوال ئسے نا رِد اٹ ضلع کیچ نا علاقہ مند ٹی پاکستانی لشکر نا چوکی ءِ سلاء بند بندغ آک ٹک کرینو۔

رہسنگوکا حوال تا رِد ئٹ مند نا علاقہ گوک ٹی دیر تروکا ہند آ جوڑ مروکا فوج نا چوکی ءِ نا درست بندغاک راکٹ و ایلو سلاء تیٹ ٹک کرینو۔

جلہو نا ذمہ واری ءِ اسہ پین سلاء بند بلوچ گَل بلوچستان لبریشن فرنٹ ارفینے۔ بی ایل ایف نا ترجمان نا پاننگے کہ گوک ٹی چیک پوسٹ آتیا راکٹ و خود کار سلاء تیٹ جلہو کرین۔ جلہو ٹی اِرا کارندہ کسکر و اِرٹ ٹپی مسر، اندن چیک پوسٹ ءِ بھاز نسخان رسینگا۔

میجر گہرام بلو نا پاننگے کہ ہفت اپریل آ مند گوک ئٹ رودان نا مَش آ ہڈ تروک پاکستانی لشکر نا چوکی آ اسہ دے ئٹ اِرا جلہو کرین، ہراڑے سنائپر توفک ئٹ اِرا فوجی کارندہ ٹِک کریسہ کسفین۔

اندن ہرنائی نا علاقہ شاہرگ ٹی پاکستانی لشکر نا اسہ چیک پوسٹ ئسے آ نادرست سلاء بند بندغ آک جلہو کریر۔ جلہو کروک و فورس نا کارندہ غاتا نیامٹ اُرے اسکان سم کاری برجا مسونے، دوارہ جلہو کروک آک ہلانو ہنانو۔

دا جلہو نا ذمہ واری ءِ بلوچ آجوئی خواہوک سلاء بند گَل بلوچ لبریشن آرمی ارفینے۔ گَل نا ترجمان جیئند بلوچ نا پاننگے کہ شاہرگ نا علاقہ زردآلو نا ہند آ پاکستانی لشکر نا چیک پوسٹ آ بی ایل اے نا سرمچارک چنکا بھلا سلاء تیٹ جلہو کریر ہراڑان اِرا کارندہ کسکر و بھازاک ٹپی مسر۔

بلوچستان نا جتا علاقہ تیٹ بلوچ سلاء بند گل تا پارہ غا برجاء وڑٹ پاکستانی لشکر آ جلہوک مریسہ کرینو۔ دا جلہو تیٹ پاکستانی لشکر آ ترندو ہم جلہو مسونو ہرافتیٹ اوفتے بھلو جانی نسخان و مالی ارفوئی تمانے۔ ایلو پارہ غان پاکستانی لشکر بلوچستان نا ہرکنڈ آ تینا کیمپ و چوکی تے ہڈ تسونے، و اندن ہردے جتا علاقہ تیان لشکر کشی تا ہم حوال رسینگرہ۔

کرونا وائرس نا سوب آن اسہ دے ٹی 2108 بندغ مرگ نا گواچی مروکا تان گُڈ امریکہ جہان ٹی ہمو اولیکو ملک جوڑ مسونے ہراڑے دا دین آن اسہ دے ٹی 2000 بندغ کسکُنو ۔

جان ہاپکنز یونیورسٹی نا پاننگے جُما نا دے آ تیوی امریکہ ٹی کورونا وائرس آن کہوکا بندغاتا جمعی مُچ 2108 ئس ۔

حوال رسیفوکا ادارا اے ایف پی نا پاننگے امریکہ ٹی دہسکان کورونا آن 18 ہزار 586 بندغ کسکُنو ولے کرونا آن دہسکان کُل آن بھاز کہوک آک اٹلی ٹی بھاز مسُنو ہراڑے کہوک آک مُچ 18849 ءُ۔

امریکہ ٹی کورونا آن بیمار مروکا تا ہساب ہم جہان ٹی کُل آن بھاز 496535 مسونے و ہنوکا 24 گھنٹا نا تیٹی 35098 پوسکُنو کیس پک مسونے ۔

بلوچستان نا ضلع قلعہ عبداللہ ٹی نادرست بندغاک آک پاکستان فوج نا گاڑی ءِ بارود نا دھماکا ئٹ ٹک کرینو۔

رسینگوک آ حوال تا رد ئٹ چمن نا علاقہ دوبندی نا خڑک پاکستان افغانستان نا سیم آ باڑ خلینگ نا وختا پاکستان فوج نا پٹرولنگ گاڑی کَڈ کروک ءُ بمب سیٹ لگّا۔

حوال تا رد ئٹ دھماکا ٹی پاکستان فوج نا اِرا کارندہ کسکر و اِرئٹ ٹپی ءُ۔

حوال آتا رِد ئٹ شمالی وزیراستان ئٹ سلا بند جھڑپ اسیٹی ہفت بندغ تون پاکستان فوج نا اِرا کارندہ کسکنو۔

پاکستان فوج نا ادارہ آئی ایس پی آر نا پاننگے کہ جھڑپ اٹ سپاہی مومن شاہ و محمد ساجد کسکنو۔

آئی ایس پی آر نا مُستی پاننگے کہ سپاہی مومن شاہ نا تعلقداری ڈی آئی خان و سپاہی ساجد نا تعلقداری ایبٹ آباد آن ئس۔

آئی ایس پی آر ایلو پارہ غا کہوک ہفت بندغ نا بابت شابیتی اٹ حوال تتنے۔

بنگلا دیش نا جوڑ کروک راہشون شیخ مجیب الرحمان نا کسفینگ ٹی اوار نروک بنگلہ دیشی فوجی کیپٹن ءِ 25 سال آن گُڈ دزگیر کریر، اوکا گُڈ اونا سزائے مرگ ءِ ایسر تننگ نا بناء کننگانے۔

پیشن ملکی خبر ایجنسی نا پاننگے نروک فوجی کیپٹن عبدالمجید ءِ بنگلا دیش نا دارالحکومت ڈھاکا ٹی رکشا ٹی سفر نا وختا دزگیر کننگا۔

پیشن ملکی خبرایجنسی نا پاننگے شیخ مجیب الرحمان نا کسفینگ نا گُنا ٹى عبدالمجید ءِ ایلو فوجی افسر تون اوار مرگ نا سزا بنفنگاسس، پدا او نرا و بھارت ءِ ہنا۔

عبدالمجید منہ دے مُست بنگلا دیش آ واپس بسوسس و حوال رسینگ آ ہلنگا، شیخ مجیب الرحمان نا کسفینگ نا تومت ڈو اٹ اونا ایلو سنگت آتا سزائے مرگ تننگانے۔

بنگلا دیشی وزیرِ انصاف نا پاننگے نروک کیپٹن عبدالمجید نا سزائے مرگ ءِ ایسری تننگ نا تیاریک بناء کننگانو۔

بنگلا دیشی وزیرِ انصاف نا دُن ہم پاننگے کہ نروک کیپٹن بنگلا دیشی صدر عبدالحمید آن رحم نا خواست ءِ کننگ کیک ۔

بنگلا دیش نا صدر عبدالحمید دنکہ کسفنگوکا راہشون شیخ مجیب الرحمان نا مسڑ و ساڑی آ وزیرِ اعظم بنگلا دیش شیخ حسینہ واجد نا خوڑک ءِ اندا خاتر اومیت کننگسہ ءِ کہ رحم نا خواست واپس مرو و سزائے مرگ ءِ زوت اس ایسری تننگو۔

یاتی مرے بنگلا دیشی وزیرِ اعظم شیخ حسینہ واجد نا باوا شیخ مجیب الرحمان و اونا ایلو اُرا والاک 15 اگست 1975 ٹی مروکا اسہ فوجی جلہو نا وختا کسفنگار۔

حسینہ واجد او وختا یورپ ٹی مننگ نا سوب آن دا کسیفوکا جلہو ٹی بچّاسس ۔

بلوچستان نا ضلع خضدار نا علاقہ وڈھ آن تعلقدار براہوئی نا پنی آ شئر پاروک عبدالرحمٰن بلوچ یک شمبے نا دے تینا علاقہ وڈھ ئٹ کذیت کرے.

عبدالرحمٰن براہوئی بولی نا بھازا خلقی شئر تے زیبدارو دروشم اس تریسہ پارینے. او نہ بیدس وڈھ و جھالاوان اٹ پنی اس بلکن تیوی بلوچستان ئٹ مخلوق نا بھلو کچ اس اودے بنگوکا۔

اندن اونا توار اٹ زلکو، غازی نورا مینگل، شہید علی محمد مینگل نا پن تیا کروک شاعریک بھاز خوش کننگانو۔

عبدالرحمٰن بلوچ تینا تیوی زند ءِ براہوئی بولی کن تسوسن و اندا حالیت اٹ کوڑی ءِ یلہ کرے۔

بلوچستان نا ضلع واشک آن سرکاری کمکار ٹولی نا بندغاک برام آن برامی ءِ تینتون دریسہ بیگواہ کریر۔

حوالکار آک ٹی بی پی ءِ پاریر واشک نا علاقہ راغے شنگر آن سرکاری کمکار ٹولی آن تعلقدار زین جان‘ نور جان نا مار برام نا مجلس نا وختا برامی شبانہ عبدالاحد نا مسڑ ءِ بیگواہ کرے تینتون اوار درے اوڑان گُڈ اوفتا ہچ ءُحوال اس رسینگتنے۔

یاتی مرے بلوچستان نا ایلو علاقہ تیٹ پاکستانی لشکر و ڈھکوک ادارہ تیکن کاریم کروک سلاء بند ٹولیک کاریم کننگو ہرافک ڈیتھ اسکواڈ پن ئٹ چاہنگرہ۔ اندن بلوچ سیاسی و چاگڑدی مخلوق نا پاننگے کہ اندا سلاء بند ٹولیک پاکستانی فوج و ڈھکوک ادارہ غاتا وارِسی نا دو آن ایلو ڈو تیٹ ہم اوار ءُ۔

اِرا دے مُست مشکے نا علاقہ قلات چیر آن پاکستانی لشکر نا کارندہ آک اُرا غا چھاپا ٹی اسہ بلوچ آزاتی دوست بندغ ئسے نا لمّہ ناز بی بی‘ پیر داد نا مسڑ ءِ دزگیر کریر۔

اندا دے ضلع کیچ ٹی بلوچ نیشنل موومنٹ نا راہشون ئسے نا اُراغا چھاپا نا وختا پاکستانی فوج نا کارندہ آک چنا زالبول تیتون بے دادی کریسر۔

تدوکا تُو اٹ ہم مشکے آن اسہ نیاڑی ئسے بیگواہ کننگا۔ ہمو نیاڑی نا اُرا والاک پک کریر کہ سرکاری کمکار ٹولی یعنی ڈیتھ اسکواڈ نا بندغ آک، شہباز خان نا مسڑ ءِ تینتون دریسہ بیگواہ کرینو۔

اُرا والاک خلیس نا درشانی کریسہ پاریر کہ ڈیتھ سکواڈ والاک ننا مسڑ نا برام ءِ زورٹ تینا کارندہ سیتون کرور۔

دا واقعہ غاتا بابت سرکار نا کنڈان ہچ اس پاننگتنے۔ اندن داڑان مست ہم  دننگا واقعہ آتیٹ بلوچ سیاسی و سماجی مخلوق ڈیتھ اسکواڈ نا اوار مننگ نا تومت خلکُنو۔

حوال آتا رِد ئٹ اندا دے آ کیچ بلنگور نا کیبنگا علاقہ دشت جتانی بازار آن پاکستانی لشکر و ڈھکوک ادارہ تا کارندہ آک چھاپہ خلیسہ 9 بندغ ءِ دزگیر کرینو۔

فوج نا دو آن بیگواہ مروکا بندغا تیٹ رحمت‘ خدا داد نا مار، صدام‘ رحمت نا مار، چاکر‘ عبدالصمد نا مار ، عبدالحمید‘ محمد اسحاق نا مار، بخشی‘ سید نا مار، جمعہ‘ احمد نا مار، نیاز‘ شمبے نا مار ، رحم دل‘ شاہ مراد نا مار و مختار‘ خان محمد نا مار اوار ءُ۔

یاتی مرے بلوچستان ٹی بیگواہ بندغ تا ویل دے پہ دے خراب ءُ دروشم اسیٹی بننگے۔ سیاسی گل تا کنڈان بیگواہ بندغا تا یلہ کننگ کہ بلوچستان و پیشن مُلک آتیٹ برانز ہم ارفنگسہ مسونے۔ اندن بیگواہ بندغ تا مخلوق نا کنڈان ہنوکا 10 سال ءِ پرامن برانز ہم برجاہ ءِ۔

بیگواہ بلوچ صحافی

دی بلوچستان پوسٹ سرگپ

بیست و ہشت مارچ جمعہ نا دے آن لائن اخبار بلوچستان ٹائمز دا ہیت مونا ایس کہ اوفتا چیف ایڈیٹر ساجد حسین 2 مارچ 2020 آن بیگواہ ءِ۔ 39 سالہ بلوچ صحافی تون گڈیکو وار‘ دو مارچ نا دے یانزدہ بجہ غا سویڈن نا شار اوپسلہ ئٹ حوال مسوسس۔

انٹرنیشنل فیڈریشن آف جرنلسٹس نا دا بابت پاننگے کہ ”ساجد حسین ءِ کسیفنگ نا تڑی رسینگ، اُرا غا چھاپہ، خاہوت و جند آ بھاز اوننگ و سروسوج آتا سوب آن 2012 ئٹ پاکستان آن نراسس۔ ساجد 2012 آن 2017 نا نیامٹ اومان، متحدہ عرب امارات و یوگنڈا ٹی زند گدریفینے و ایسری ئٹ او سویڈن اٹ باہوٹ نا خواست تس۔

خیال آتا درشانی نا آزاتی و معلومداری تے اسکان سرمننگ نا حق ئنا رکنگ نا منوک جہانی ادارہ ”رپورٹرز ود آؤٹ بارڈرز“ ساجد حسین نا بیگواہی نا دوبہ ءِ پاکستان نا ڈھکوک ادارہ انٹر سروسز انٹیلیجنس (آئی ایس آئی) آ خلکنے۔

بڑز پن کروک تنظیم ہرا جہانی وڑٹ ”رپورٹرز ساں فرنٹیئرز“ نا پن آن ہم چائنگک، دوبہ خلیسہ پارینے کہ اوفتا ڈھکوک ذرائع آن دوئی مروک معلومداری تا رِدئٹ پاکستان تون اختلاف تخوک مخلوق نا اسہ لَڑ اس ہرا داسہ جتا ملک آتیٹ باہوٹ ہلوک زند گدریفنگ ءُ، آئی ایس آئی نا تہہ ئٹ پیری کننگے۔

اندنو واقعہ اس 2018 اٹ ہم مونا بسوسس، ہراتم بندغی حق آتیکن کاریم کروک راشد حسین متحدہ عرب امارات آن اماراتی ڈھکوک پولیس نا دو آن دزگیری آن گڈ بیگواہ مسوسس۔ جتا پَک ذریعہ تیان رسینگوک حوال تا رِد ئٹ اودے اسہ پرائیویٹ جاز اسیٹی پاکستان ڈی پورٹ کننگاسس ولے اسہ سال ئسے آن زیات گدرینگ آن گڈ دائسکان پاکستانی کوالخواک اودے مونا آ ہتنو۔

واہم سویڈن ئٹ دائسکان سویڈش پولیس ءِ تینا گڈیکو سرسوجی رپورٹ ءِ ساجد حسین نا بابت تروئی ءِ۔ اگہ ساجد حسین نا بیگواہی ئٹ پاکستانی کوالخواتا اواری نا شاہدیک رسینگرہ، دنکہ صحافی گَل آک دوبہ خلنگو گڑا اسہ ہیت اس پاش مریک کہ بلوچستان نا حالیت آتے نشان تروک بلوچ صحافی و بندغی حق آتیکن کاریم کروک آتیکن جہان نا ہچو کنڈ اس رکھوک اَف۔

اسہ پنی ءُ کردش وساہت اس”مَش تیان بیدس ہچو سنگتس اَف“ کرد آتا ہمو بد آ حالیت و مہذب آ راج آتا پارہ غان نا امیتی نا درشانی ءِ کیک ہراتم سخت حالیت آتیٹی اوفک مہذب آ راج آتیٹ ہچو سنگتس خنتور گڑا اوفک تینا مَش تیتون سنگتی کریر۔ دنکہ بلوچستان تون اوار تیوی جہان ئٹ بلوچ نشان مننگے، دا ہیت ئنا خلیس ءِ کہ بلوچ ہم اندا ایسری آ سرمرو کہ ”مش تیان بیدس ہچو سنگتس اَف۔“