دتر چُر کوئٹہ
ٹی بی پی اداریہ
کوئٹہ ٹی برانزی تیا سمکاری کرسا چُنک سن و ورنا تے شہید کننگ و کیہی سیاسی باسک آتے دزگیر کننگ بلوچستان ئٹی پاکستان نا گواچن آ پالیسی تا دروشم ءِ۔ ریاستی ادارہ غاک ساندہ نا وڑ ہمو روشت ءِ تینائی کریر ہرا بھلا جنگی تدینی تیان گڈ تینائی گننگانے۔ سخت ریاست نا تصور آ عمل
کروک پاکستان نا بلوچستان ئٹی روشت اسُل نرم متنے، و ہر دور ئٹی زوراکی ئٹ ہی راجی آجوئی ءِ توننگ نا پالیسی آ عمل کننگ مسنے۔
پاکستان نا آرمی چیف عاصم منیر سخت ریاست جوڑ مننگ نا پڑو کرینے، واہم بلوچستان ئٹی ریاست نا روشت بلوچ راج تون اسُل ہم نرم الوکہ۔ آغا عبدالکریم تون گپ تران نا پن آ سیاسی باسک آتے دزگیر کننگ و جیل کننگ، نیشنل عوامی پارٹی آ رکھ خلنگ، و حیدرآباد سازش کیس ئٹی بلوچ و پشتون سروک آتے بندی کننگ، بلوچ نیشنل موومنٹ و بلوچ اسٹوڈنٹس آرگنائزیشن نا سروک آتا زوراکی نا بیگواہی و دزگیری ٹی خون، دا غُٹ ریاستی زوراکی ئٹ سیاسی مزاحمت ءِ توننگ نا چرجوئی ءِ، ہرا پاکستان نا دیہاڑی پالیسیوں نا بشخ مسنے۔
بلوچستان ئٹی ذمہ وار تاغت آتا معتمدِ خاص، متنازعہ وزیر اعلیٰ سرفراز بگٹی و انوارالحق کاکڑ کون آ مصنوعی سیاسی کڑد آک سخت انگا حالیت آتے پین خراب کننگ نا سوب جوڑ مننگ ءُ، انتئے کہ جنگ زدگی و بیدادی ہی اوفتے اقتدار ئٹ رہینگ نا وارخواہی ایتک۔
ریاست نا کنڈ آن بلوچ جیڑہ ءِ فوج و پولیس نا محکمہ انسدادِ دہشت گردی نا ذریعت ئٹ تاغت نا زور آ ایسر کننگ نا پالیسی کوئٹہ ءِ دتر چُڑ کرینے۔ بلوچ چُنا تا شہیدی و ماہ رنگ بلوچ تون اوار ایلو نیاڑی تا دزگیری بلوچستان ئٹی لگوک خاخر آ سی شاغنگ نا بریبر ءِ۔ ماہ رنگ بلوچ، بیبو، بیبگر بلوچ و ایلو سیاسی باسک آتا دزگیری آن مزاحمتی تحریک سلوف بلکہ دا نا پہناد پین بھلن مرو۔
بلوچستان نا گلی گلی، کوچہ کوچہ ٹی مزاحمت نا بیرک بُڑز کننگو و شہیدی و دزگیری تا بھرم ئٹ مزاحمتی تحریک ئٹ ترندی بننگ ءِ۔ ریاستی زوراکی نا ذریعت ئٹ بلوچ تحریک ءِ توننگ نا پالیسی نہ ہنوکاتم ئٹ سرسہب مسونے و نئے داسا مننگ نا آثار ارے، بلکہ شہیدی و دزگیری تا سوب آن بلوچ مزاحمتی سیاست پین سوگو مرسا مونا برو۔
