بلوچ لبریشن آرمی اینو نوشکی ٹی پاکستانی فوجی تے دروک بس آتیا جلہو نا ویڈیو ءِ شینک کرینے، ویڈیو ٹی خننگ مریک کہ اِرا یا اِرٹ آن زیات بس آک کسر آ سفر کننگ ءُ اندن اسہ بس ئسے جند ندری تراک اسیٹ ٹک کننگک۔

دا وخت آ بلوچ لبریشن آرمی نا کیہی باسک آک خڑک آن تیوہ غا تدینی نا فلم بندی ءِ کریسہ خننگرہ و ویڈیو ٹی منہ ساہت آن پد اسہ عکس اس خننگک ہراٹی اسہ جنگجو اس “اے کے 47“ ارفسہ اسہ پاکستانی فوجی ئسے نا جون ئنا رہی آ سلوک ءِ۔

یاتی مرے اینو سہب ئنا نوشکی آن خڑک پاکستانی لشکر نا کارندہ تے دروک اِرا بس ٹک کننگاسر، پاکستانی کوالخواہ تا ردئٹ جلہو نا ہدف پاکستانی فوجیک ئسر۔

بلوچ آجوئی دوست تنظیم بلوچ لبریشن آرمی دا جلہو نا ذمہ واری ارفسہ پارے کہ دا جلہو ءِ اونا جند ندری یونٹ و خاص کڑدہ فتح اسکواڈ سر تسنو۔

بی ایل اے نا ترجمان تینا بیان ئٹ پارے کہ جلہو آن پد زو بی ایل اے فتح اسکواڈ گام خلک و ایلو بس ءِ تیوہ وڑئٹ گھیڑ کرے و اوٹی ساڑی غٹ کارندہ تے اسٹ اسٹ کریسہ مرگ ئنا گواچی کرے۔

تنظیم نا ردئٹ نوشکی جلہو ئٹی جمعی وڑئٹ 90 پاکستانی کارندہ مرگ ئنا گواچی کننگانو۔

نوشکی تراک آن پد پاکستانی لشکر نو بندغ ءِ دزگیر کریسہ بیگواہ کرینے۔

شابیتی حوال تا ردئٹ ایس بی کے یونیورسٹی، اسٹیشن نا ہند آ پاکستانی لشکر نو بندغ ءِ دزگیر کریسہ بیگواہ کرینے۔

واہم بیگواہ مروک آتا چاہنداری دائسکان مننگ کتنے۔

خیال ئٹ مرے اینو سہب ئنا نوشکی ٹی پاکستانی لشکر نا قافلہ ئسے جلہو ئٹ ٹک کننگا۔ ہراٹی بھلو کچ اسیٹ پاکستانی لشکر نا کارندہ تا مرگ ئنا گواچی مننگ نا حوال آک رسینگانو۔

‎بلوچستان نا شار نوشکی ٹی پاکستانی لشکر نا قافلہ ءِ ترند ءُ تراک اسیٹ ٹِک کننگا تراک ئٹ 90 فوجی کارندہ مرگ ئنا گواچی مسر، ہرانا ذمہ واری ءِ بی ایل ءِ ارفے۔

‎ہندی حوالی تا رد ئٹ لشکر نا قافلہ غا آر سی ڈی کسر آ مِل ئنا ہند آ جلہو مس ہراڑے اسہ ترند ءُ تراک ئسے آن گڈ پین کیہی تراک و سم کاری تا توار بننگا۔

‎ہندی حوالی تا پاننگے کہ تراک آن مچا شار لڑزا و بندغ آک تینا اُرا تیان پیشن بسر۔

‎حوال آتا رد ئٹ فورسز ءِ بھلو جلہو اسیٹ ٹک کننگانے ہراڑان بھلو کچ اسیٹ لشکر ءِ جانی نسخان ارفوئی تمانے۔

‎تدینی آن گڈ پن کروک ہند آ کیہی ایمبولینس و فورسز نا نفری تے ہننگ آ خنانو، وختس کہ اسپتال آتیٹ ایمرجنسی نافذ کننگانے۔

‎ایلو پارہ غان بی ایل اے نا ترجمان جیئند بلوچ تینا شینک کروک بیان ئٹ پارینے کہ بلوچ لبریشن آرمی نا جند ندر کڑدہ مجید برگیڈ منہ گھنٹہ مست نوشکی ٹی آر سی ڈی کسر آ رخشان مل نا خڑک آ قوضہ گیر پاکستانی لشکر نا اسہ قافلہ ئسے جند ندر وی بی آئی ڈی جلہو ئٹ ٹِک کرے۔ قافلہ ہشت کوچ آتیا تالان ئس، ہرافتیان اسہ کوچ ئس جند ندر جلہو ئٹ تیوہ بھس مس۔

‎جلہو آن گڈ زو، بی ایل اے نا فتح اسکواڈ سر پر کرسہ ایلو بس ءِ تیوہ گھیڑ ئٹ ہلسہ اوٹی ساڑی غٹ فوجی کارندہ غاتے اسٹ اسٹ آ مرگ ئنا گواچی کرے۔ ہرانا سوب جمعی وڑ ئٹ 90 دژمن کارندہ مرگ ئنا گواچی مسر۔

‎جیئند بلوچ مستی پارے کہ دا جلہو نا ذمہ واری ءِ ارفنہ و شابیت حوال زوت میڈیا غا شینگ کننگو۔

بلوچستان نا علاقہ بولان ئٹ بھلو کچ ئسے آ لشکر کشی برجاء ءِ۔

علاقائی حوالکار تا ردئٹ دا وخت آ بولان نا علاقہ کھمبڑی، ریکمی، کیرتہ و ایب کیب ئٹ بھلو کچ ئسے آ لشکر کشی برجاء ءِ۔

حوالکار تا ردئٹ لشکر کشی نا وخت آ پاکستانی لشکر لس آباتی ءِ ٹک کننگ ءِ، کیہی ہند آتیا ہیلی کاپٹر آتیٹ شیلنگ و بمباری کننگانے۔

حوالکار تا پاننگ ءِ کہ تدوکا دے تیٹ بلوچ لبریشن آرمی نا پارہ غان جعفر ایکسپریس آ جلہو کریسہ اودے کوزہ کننگاسس۔

کوزہ نا وخت آ بی ایل اے غٹ شاری تے اِلاسس و ریل ئٹ سوار پاکستانی لشکر نا 214 کارندہ تے بندی کریسس۔

بی ایل اے بندی تا یلہ کننگ ءِ قیدی تا ہڷ و تس اتون گنڈاسس و بی ایل اے پاکستانی لشکر ءِ 48 گھنٹہ نا وخت تسوسس اندن دا نیام ئٹ پاکستانی فورسز آک لشکر کشی بنا کریر و بی ایل اے غٹ بندی تے مرگ ئنا گواچی کرے۔

ضلع خضدار نا تحصیل آن رسینوکا حوال آتا رد ئٹ سرکاری مخ تف ٹولی تا سلہہ بند بندغ آک سم کاری کریسہ شاہ جان پنی ءُ ورنا ئس کھسفیر۔

پن کروک ورنا بلوچ اسٹوڈنٹس آرگنائزیشن آزاد نا بیگواہ مروکا راہشون زاہد کرد نا ایلم ئس۔ یاتی مرے کہ زاہد کرد ءِ مارچ 2014 ئٹ پاکستانی لشکر کوئٹہ غان دزگیر کریسہ بیگواہ کرینے۔

بلوچستان نا ضلع کیچ ئنا بنجاہی شار تربت ئٹ پاکستانی لشکر نا قافلہ غا تراک ئس مسونے۔

اینو سہب ئنا نو بجہ نا وخت آ تربت ئٹ ڈی بلوچ نا خڑک آ سی پیک روٹ آ پاکستانی لشکر نا قافلہ ٹی ساڑی اسہ گاڑی ئسے آ تراک ئس مسونے۔

حوال آتا رد ئٹ تراک ئٹ پاکستانی لشکر ءِ جانی نسخان ارفوئی تمانے واہم کالخواک دا باروٹ دائسکان ہچو حوال ئس تتنو۔

بلوچستان ئٹ تدوکا بیست و چار گھنٹہ ٹی پاکستانی لشکر آ مروکا دا ارٹمیکو بھلا تراک ءِ۔

داڑان مست درو ہرنائی ٹی فورسز نا بمب ڈسپوزل اسکواڈ نا پندی کارندہ تے ہمو وخت آ تراک ئٹ ٹِک کننگا ہراتم اوفک ریلوے ٹریک نا کلئیرنس ئٹ اختہ ئسر۔

برجا ہفتہ ٹی بلوچ لبریشن آرمی نا پارہ غان اسہ بھلو جلہو اسیٹ جعفر ایکسپریس ءِ بولان ئٹ قوضہ ٹی ہلنگا ہراٹی تولوک پاکستانی لشکر نا اِرا سد آن زیات کارندہ تے بندی کننگا۔

بلوچ لبریشن آرمی کارندہ تا یلہ کننگ ءِ بندی تا ہڷ و تس ئتون گنڈا۔

بولان ئٹ اینو چارمی دے ہم پاکستانی لشکر بھلو کچ اسیٹ ہن و بر ئٹ آختہ ءِ وختس کہ بلوچ لبریشن آرمی استو تینا بیان ئٹ پارے کہ پاکستانی لشکر تون جنگ برجا ءِ۔

بلوچستان نا بنجاہی شار کوئٹہ آن پاکستانی لشکر اِرا بندغ بیگواہ کرینے۔ خاہوت آک قلات نا علاقہ منگچر ئٹ تولوک برانز کریسہ کسر ءِ بند کرینو اندن برانز آن اسہ پین بندغ اس ہم بیگواہ کننگانے۔

شابیتی حوال تا ردئٹ پاکستانی لشکر استو کوئٹہ سعید احمد نا مار فہیم احمد و علی احمد نا مار خادم علی ہڑتوم آ ورنا تے بلوچستان بورڈ آفس جناح ٹاؤن آن دزگیر کریسہ بیگواہ کرینے۔

بیگواہ کننگوک ہڑتوم آ ورناک ایف ایس سی نا خوانندہ ءُ۔

ورنا تا زوراکی ئٹ بیگواہی نا برخلاف خاہوت آک کوئٹہ کراچی بنجاہی کسر ءِ جوہان کراس بازار آن خڑک باب ہند ئٹ بند کریسہ تولوک برانز کننگ ءُ۔ برانز نا سوب ہڑتوم آ پارہ غاتیا سد آ گاڑیک و مسافر آک گٹ مسنو۔

خاہوت آتا پاننگ ءِ کہ اینو سہب ئنا ایف سی تولوک برانز ءِ طاغت نا زور آ ایسر کننگ نا کوشست کرے، مزاحمت کننگ نا سوب پاکستانی لشکر اسہ برانز کروک قدرت اللہ ءِ دزگیر کریسہ بیگواہ کرینے۔

برانز کروک آتا پاننگ ءِ کہ ہراتم اسکان ننا بندغ آک آجو متنو ننا برانز برجاء مرو۔

بلوچستان نا بنجاہی شار، خضدار و پنجگور ئٹ مسہ جتا حالیت نا جلہو رپورٹ مسونے۔

حوال آتا رد ئٹ کوئٹہ کیچی بیگ تھانہ ءِ نا درست آ بندغ آک اِستو چغلی بمب جلہو ئٹ ٹِک کریر ہرا ترند تراک ئٹ ترغا۔

تراک نا سوب تھانہ نا تہٹی سلوک گاڑی تیٹ خاخر لگا واہم جانی نسخان آتا حوال آک رسینگتنو۔

ایلو پارہ غان خضدار سنی نا ہند آ استو کسر جوڑ کروک کمپنی تا کیہی گاڑی و مشینری تے نا درست آ بندغ آک جلہو آن گڈ خاخر تسر۔

حوالی تا رد ئٹ نا درست آ بندغ آک ہموڑے ساڑی کاریم تا پن تے نوشت کریر و ہننگ آن مست پٹرول چٹ ترسہ کیہی گاڑی و کسر جوڑ کروک مشینری تے خاخر تسر۔

ایلو پارہ غان پنجگور آن حوال ءِ کہ سی پیک کسر این 85 آ ٹہیفوک کسٹم چیک پوسٹ آ سلہہ بند بندغ آک کسٹم کارندہ غاتے بندی کرسہ ملازم تا شناختی کارڈ آتے اُرار و کوٹی تیٹ تخوک پیٹی تا کلف آتے پرغار۔

حوال آتا رد ئٹ جلہو کار آک کارندہ تا سلہہ تے کوزہ کریر واہم تدینی ٹی ہچ وڑ ئنا جانی نسخان ئسے نا حوال اف۔

نیشنل پارٹی نا سروک، مسکوہی وزیر اعلیٰ بلوچستان ڈاکٹر مالک بلوچ پارینے کہ داسا نا گچین کاری تا ہچو فائدہ ئس متو، و اگہ ولدا گچین کاریک مسر گڑا بلوچ راج اوفتیٹ بشخ ہلپرو۔

او پارے کہ ویل آتا ایسری سُم ئٹ مننگ کپک، او پارے کہ بے گناہ آ بندغ آتا کھسفنگ نا مذمت ءِ کینہ، ویل آتا ایسری ہیت و گپ ئنا وسیلہ ئٹ مننگ کیک ولے اوفتے لگک کہ داسا سلاہ مفرو۔

عبدالمالک بلوچ مستی پارینے کہ سلہہ بند ٹولی تیتون اسہ بیانیہ ئسے، ولے حکومت تون ہچو پک ءُ بیانیہ ئس اف، او دا ہیت آ زور تسنے کہ ویل آتا ایسری کن سوبر ءُ گام ہرفنگ و سلاہ نا گرج ءِ۔