بلوچستان پریوینشن ڈیٹینشن اینڈ ریڈیکلائزیشن رولز 2025 – ٹی بی پی سرگپ

بلوچستان ئٹی اقتدار ئٹ تولوک جماعت پاکستان پیپلز پارٹی نا حکومت نا متنازع وزیر اعلیٰ سرفراز بگٹی نا سروکی ٹی صوبائی کابینہ نا مجلس مس۔ دا مجلس ئٹ زوراکی نا بیگواہی تے قانودی دروشم تننگ و زوراکی ئٹ بیگواہ بندغ آتے دزگیری بنجاہ تیٹ تخنگ نا متنازع فیصلہ ہلنگا، ہراڑے اوفتیان کاؤنٹر ٹیررازم ڈیپارٹمنٹ نا پولیس افسر آتا خیالداری ٹی سر و سوج کننگو۔

پاکستان نا مقتدر طاغت آتا کمک ئٹ ٹہفوک حکومت نا پارہ غان بلوچستان پریوینشن ڈیٹینشن اینڈ ریڈیکلائزیشن رولز 2025 نا موکل تننگ، بلوچستان ئٹ زوراکی نا بیگواہی تے قانودی دروشم تننگ نا اسہ کوشست ئسے تاکہ زوراکی نا بیگواہی و ریاستی تادی تا برخلاف بش مروکا تحریک ایسر کننگ مرے و زوراکی ئٹ بیگواہ بندغ تا خاہوت آتا توار چپ کرفنگ مرے۔ زوراکی ئٹ بیگواہ بندغ آتے شکبر پِن کننگ و اوفتے عدالت آتیٹ ہتنگ نا جاگہ غا دزگیری بنجاہ تیٹ سر و سوج کننگ، پاکستان نا راہبند ئٹ تروک بندغی حق آتیان ہم چپ ءِ۔

بلوچستان آ چَٹی کروک سرفراز بگٹی نا حکومت اولیکو دے آن زوراکی نا بیگواہی کون آ بھلا بندغی ویل ءِ دروغ پاریسہ بسنے و زوراکی نا بیگواہی تا بابت ریاستی بیانیہ ءِ تالان کننگ ئٹ کل آن مونا مسنے۔ بلوچستان ئٹ سیاسی جہدکار آتا زوراکی نا بیگواہی تے دروغ پاننگ ممکن اف، اقوام متحدہ نا بندغی حق آتا ادارہ، ایمنسٹی انٹرنیشنل، ہیومن رائٹس کمیشن پاکستان و ایلو ادارہ غاک بلوچستان ئٹی زوراکی نا بیگواہی تا ویل ءِ بھاز وار ارفینو و پاکستان نا مقتدر طاغت آتے و حکومت ءِ دا بھلا بندغی ویل ءِ ایسر کننگ نا پاریسہ بسنو۔

بلوچستان حکومت نا اسہ پارہ غان زوراکی نا بیگواہی تے رد کننگ و ایلو پارہ غان پریوینشن ڈیٹینشن اینڈ ریڈیکلائزیشن رولز آتا بابت فیصلہ، دا ہیت ئنا شاہدی ءِ کہ بلوچستان ئٹ زوراکی نا بیگواہی تیٹ ریاستی ادارہ غاک اوار ءُ۔ بلوچستان پریوینشن ڈیٹینشن اینڈ ریڈیکلائزیشن رولز آتا منظوری ریاستی ادارہ تے سیاسی جہدکار آتے زوراکی ئٹ بیگواہ کننگ نا تیوہ آزادی تننگ نا برابر ءِ۔ زوراکی نا بیگواہی تے ایسر کننگ نا جاگہ غا اوفتے قانودی دروشم تننگ آن دا ویل گیشتر بھلن مرو۔ زوراکی نا بیگواہیک ہرا ہم دروشم ئٹ مریر، اوفک بیدس آئینی و بندغی حق آتا ترند لتاڑ ءُ۔ طاغت نا زور آ زوراکی نا بیگواہی تے قانودی دروشم تننگ تو مننگ کیک ولے اوفتا برخلاف بش مروکا توار تے چپ کرفنگ مننگ کپک۔

بلوچ سلہہ بند تنظیم آتا جلہو آتیٹ سال 2022 آن 2025 نا نیام ئٹ 63 درسد ودکی مس، ہرافتیٹ 4,515 پاکستانی فوجی کارندہ مرگ ئنا گواچی مسر، دافتیٹ کم و ود 50 درسد مرگ آک بلوچ لبریشن آرمی و 50 درسد ایلو بلوچ سلہہ بند تنظیم آتیتون تفوک ءُ۔ دا چار سال ئٹ 331 بلوچ سرمچار شہید مسر اندن جلہو تا جغرافیائی گڑد ترندی ئٹ تالان مس و 1,079 ہند آتیا جلہو آک ریکارڈ کننگار، ہراڑان بلوچ سلہہ بند تنظیم آتا کاروائی کننگ نا وس ئٹ ترندی و پاش ودکی خننگا۔

تدوکا چار سال ئٹ پاکستانی لشکر نا مرگ آتیٹ چرجوئی ئٹ ودکی مسنے و بلوچ لبریشن آرمی (بی ایل اے) نا کاریم تیٹ ترندی خننگانے۔ پاکستانی لشکر نا مرگ آک چار پوائنٹ نا کچ اسکان سر مسر۔ دا وخت ئٹ بی ایل اے نا کاروائی تیتون تفوک پاکستانی لشکر نا مرگ آتیٹ 44 درسد ودکی مس، اندن 2022 آن 2025 نا نیام ئٹ جلہو آتیٹی 40 درسد نا (سی اے جی آر) نا کچ آن ودکی مس۔ خدو کلا آتیان بھیم بش کروکا جلہو تیٹ جعفر ایکسپریس نا ہائی جیکنگ و نوشکے ٹی فوجی بس آتا قافلہ غا جلہو، ہرافتیٹ جمعی وڑئٹ 450 پاکستانی فوجی خلنگار، اوار ءُ اندن تیوہ بلوچستان ئٹ سلہہ بند جلہوک ریکارڈ کننگار۔ خدو بی ایل اے نا 72 جنگجو شہید مسر، ہرافتیٹ 10 ”جند ندر“ اوار ءُ، دا جنگجوک بنداوی وڑئٹ جھڑپ و ڈرون جلہو تیٹ شہید مسر۔

تدوکا چار سال ئٹ، بلوچستان لبریشن فرنٹ (بی ایل ایف) نا کاریم تیٹ چرجوئی ئٹ ودکی مسنے، جلہو آتیٹ کم و ود 49 درسد (سی اے جی آر) نا ودکی مسنے و اندا وخت ئٹ بی ایل ایف نا پارہ غان 38 درسد مرگ آتا گمان کننگانے۔ ہنوکا سال بی ایل ایف کن اہم ئس، ہراٹی اونا پوسکن جوڑ مروکا کڑدہ ”سوب“ نوکنڈی ٹی ”جند ندری“ جلہو سر تس ہرا تنظیم نا دیہاڑ نا اولیکو بھیم بش کروکا جلہو ئس و آپریشن بام نا پِن ئٹ سلہہ بند مہم ہم سر تننگا۔ او سال بی ایل ایف نا 42 جنگجو شہید مسر، ہرافتیٹ شش جند ندر اوار ءُ، بی ایل ایف نا جنگجوک سلہہ بند جھڑپ و ٹِک کننگوک کاروائی تیٹ شہید کننگار۔

2022 آن 2025 نا نیام ئٹ، براس (بلوچ سلہہ بند تنظیم آتا سیوت) تون تفوک جلہو تیٹ کم و ود 342 درسد ودکی مس، اندن پاکستانی لشکر ءِ رسینگوک نسخان آتیٹ کم و ود 307 درسد نا ودکی مس، ہرا براس نا آپریشنل ترندی ٹی پاش ودکی ءِ درشان کیرہ۔ 2025 ئٹ براس شابیت لائخی تا درشانی کرے، ہرافتیٹ خضدار نا زہری ٹاؤن آ اسہ توہ ئسے آن زیات کنٹرول دوئی کننگ اوار ءِ۔ دا وخت آ براس نا سرمچار آتے مخلوق تون تران کریسہ خلق ئٹ پیری کننگ آ خننگ مس۔ براس مارچ و اگست ئٹ ہم لڑ بند ءُ جلہو کرے و پنجگور نا علاقہ گوران ئٹ فوجی کیمپ آ کوزہ کرے۔

ایلو آجوئی دوست سلہہ بند تنظیم بی آر جی، بی آر اے، و یو بی اے نا جلہو تیٹ 25 درسد ودکی ریکارڈ کننگا و پاکستانی لشکر نا مرگ آتیٹ 13 درسد ودکی مس۔ دا تنظیم آک بنداوی وڑئٹ انفراسٹرکچر و ریاستی مڈی تیا جلہو کریر، و تنظیم آک سندھ و پنجاب تون اوار 34 ضلع تیٹ کاریم کریر۔

بلوچستان نا ضلع پنجگور ئٹ درو بیگواہ مروک اسہ ورنا ئسے نا بیدادی مروک جون خننگانے۔

پولیس نا رد ئٹ کہوک بندغ نا چاہنداری زوہیب ولد احمد اعظم نا پن ئٹ مسونے ہرا پنجگور نا علاقہ وشبود نا ہندی اس ئس۔

پولیس کالخواہ تا پاننگ ءِ کہ زوہیب ولد احمد ءِ چار شمبے نا دے وشبود ئٹ ٹہفوک میونسپل کمیٹی نا دفتر ئٹ برجا اسہ انٹرویو نا نیام آن نادرست سلہہ بند بندغ آک برمتہ کریسر۔

خن خنوک شاہد آتا رد ئٹ برمتہ کروک آک گاڑی اسیٹی سوار مسنو و زوہیب ءِ زوراکی ئٹ تینتو اوار درینو۔

پنجگور پولیس نا رد ئٹ چار شمبے نا سہب زوہیب نا جون بونستان مرگو ڈن نا علاقہ غان خننگا۔ جون آ بیدادی نا نشان آک پاش ساڑی ئسر، پولیس نا پاننگ ءِ کہ جون ءِ المی قانودی کاروائی آن گڈ ضلعی اسپتال سر کننگا۔

بلوچستان نا صنعتی شار حب آن پاکستانی لشکر اسہ پین بلوچ زالبول ئسے دزگیر کریسہ زوراکی ئٹ بیگواہ کرینے۔

شابیتی حوال آتا رد ئٹ نوروز اسلام نا زائیفہ فاطمہ ہند پنجگور، ءِ پاکستانی لشکر اکرم کالونی ئٹ  اُرا غان دزگیر کریسہ نادرست ہند آ دریر۔

یاتی مرے کہ زالبول نا ارے نوروز اسلام داکان مالو مُسہ وار پاکستانی لشکر نا دو آن زوراکی ئٹ بیگواہی نا گواچی مسونے، ہراڑان خاہوت ءِ تہ اسہ وڑ ریاستی زوراکی و ذہنی بیدادی نا مون تس ءِ۔

یاتی مرے کہ بیست و دو نومبر و دسمبر 2025 آ ہم آواران نا ہندی نسرینہ بلوچ بندت دلاور و ہاجرہ پنی زالبول ئسے حب چوکی آن پاکستانی لشکر زوراکی ئٹ بیگواہ کریسس۔

ارٹمی پارہ غان بلوچ یکجہتی کمیٹی (BYC) نا پارہ غان درو شینک مروک آ رپورٹ نا رد ئٹ، سال 2025 نا وخت بلوچستان نا جتا انگا ضلع آتیٹ کم و ود دوآنزدہ بلوچ زالبول و چنا ءِ زوراکی ئٹ بیگواہ کننگانے۔

بی وائی سی نا رد ئٹ دا تدینی اسہ بندغ یا ناگمان نوعیت نا اس اف بلکن اسہ سوگو ریاستی زوراکی ئسے نا نشاندہی ءِ کیک، ہراٹی زوراکی ئٹ بیگواہی ءِ اشتماعی سزا نا ڈول کاریم ئٹ ہتنگسہ ءِ۔

بلوچستان نا علاقہ قلات ئٹ پاکستانی لشکر نا پارہ غان اسہ ڈرون جلہو اس کننگانے۔

قلات نا علاقہ شورپارود ئٹ دوشمبے نا بیگہ نا وخت پاکستانی لشکر نا ڈرون طیارہ ئٹ جلہو کننگا، اسہ ترند تراک ئسے نا توار مُر اسکان بِننگ ئٹ بس۔

تراک نا جاگہ درست متنے و نئے کہ نسخان آتا بابت ئٹ شابیتی حوال اس مون آ بسونے۔ ہندی احوال کار آتا رد ئٹ درو سہب ئکن ہم ڈرون طیارہ آتا ہن و بر خننگ ئٹ بسونے۔

فوج ئنا شعبہ تعلقات عامہ (آئی ایس پی آر) نا رد ئٹ سلہہ بند بندغ آتا ساڑی مننگ نا احوال آ سیکیورٹی فورسز آپریشن کرے، ہرا نا وخت چار سلہہ بند بندغ خلنگار۔

آئی ایس پی آر نا پاننگ ءِ کہ خلنگوک سلہہ بند بندغ آتا کوزہ غان سِلاہ و گولہ بارود خننگانے۔

پاکستانی لشکر نا بیان نا رد ئٹ خلنگوک سلہہ بند بندغ آک دہشتگردی تیٹ اوار مسنو، ہندن قلات ئٹ سیکیورٹی فورسز نا آپریشن دسکان برجا ءِ۔

بلوچ یکجہتی کمیٹی میڈیا ءِ شینک کروک بیان ئٹ پارینے کہ محمد عصا نا چھانڑدہ سالہ مار و خوانندہ راہی عصا ءِ ریاستی مخ تفی ئٹ کاریم کروک آ ڈیتھ اسکواڈ نا کارندہ غاک ٹارگٹڈ جلہو ئٹ سم کاری کریسہ کسفینو۔

ہندی احوال کار آتا رد ئٹ راہی عصا ءِ ہوشاپ، کیچ نا بنجائی بازار ئٹ ٹک کننگا۔ خن خنوک شاہد آتا پاننگ ءِ کہ ملٹری انٹیلیجنس تو تفوک اسہ ڈیتھ اسکواڈ ئسے نا سلہہ بند بندغ آک چنک سن چنا آ سم کاری کریر، ہرا نا سوب آن چنا ہمو وخت مرگ ئنا گواچی مس۔ جلہو کروک آک سم کاری آن گڈ جاگہ غان دمدستی نرار۔

بی وائی سی پارے کہ راہی عصا اسہ خوانندہ اس ئس، و جہانی قانود نا رد ئٹ چناتے خاص وڑ ئٹ رکھ دوئی ءِ و اوفتے اسہ ہم دروشم اسیٹ بیدادی نا گواچی کننگ مفک۔ واہم دا ریاست ئٹی کس اس ہم رکھوک اف۔ اسہ چنا ئسے نا عدالت آن چَپ خون بندغی حق و جہانی قانود آتا ترند برخلافی ءِ، ہراٹی ‘کنونشن برائے حقوقِ طفل’ ہم اوار ءِ، ہرا چنا تا زند ئنا حق، رکھ و سلامتی نا ضمانت ءِ تیک۔

پین پارینے کہ دا تدینی آن گڈ علاقہ ئٹ ترند خلیس تالان مسونے۔ ہندی بندغ آتا رد ئٹ دا خون بلوچستان ئٹ برجا ہندا لڑ ئنا درشانی ءِ کیک ہراڑے ریاستی مخ تفی ئٹ سلہہ بند ٹولیک تیوہ موکل تون اوار کاریم کریسہ ءُ۔ جہانی بندغی حق آتا تنظیم آتے گرج ءِ کہ او دا تدینی آ دمدستی، صاف و غیر جانبدار پٹ و پول نا خواست ءِ کے، ذمہ وار آتا نشاندہی و اوفتا برخلاف قانودی کاروائی ءِ یخینی جوڑ کے، و بلوچستان ئٹ ڈیتھ اسکواڈ آتا کاروائی تے ایسر کننگ کہ زور شاغے۔

بلوچستان نا ساحلی شار گوادر نا علاقہ جیونی ئٹ زوراکی ئٹ بیگواہی تا لڑ اسہ وڑ برجا ءِ۔ پوسکن آ حوال آتا رد ئٹ دسمبر 2025 و جنوری 2026 نا وخت کم و ود چار ورنا مچی ہلوک آتے جتا انگا ہند آتیان پاکستانی لشکر زوراکی ئٹ بیگواہ کرینے۔

دو بروک حوال آتا رد ئٹ پانوان جیونی نا ہندی بیست و دو سالہ مچی ہلوک نور بخش نا مار اسراج  ءِ 5 جنوری 2026 نا نن کم و ود سئے بجہ غا او نا اُرا غا چھاپہ خلیسہ پاکستانی لشکر دزگیر کرے و نادرست ہند آ سر کرے۔

ہندا وڑ بیست و پنچ سالہ مچی ہلوک مراد بلوچ نا مار جہانگیر ءِ 27 دسمبر 2025 آ پیشیم نا دوانزدہ بجہ غا جیونی نا اسہ ہوٹل (گوادر ہوٹل) آن پاکستانی لشکر زوراکی ئٹ بیگواہ کرے۔

اندن رستم بلوچ نا ہژدہ سالہ مار شمس الدین ءِ 25 دسمبر 2025 نا سہب دہ بجہ غا آئی ایس آئی نا دفتر، گوادر آن دزگیر کننگ آن گڈ بیگواہ کننگا۔ و عبداللہ بلوچ نا بیست و پنچ سالہ مار شبیر ءِ 5 جنوری 2026 نا نن دوانزدہ بجہ غا جیونی، گوادر آن برمتہ کننگا، ہرافتیٹی ایف سی و آئی ایس آئی نا کارندہ غاک اوار مننگ نا احوال آک ءُ۔

یاتی مرے کہ زوراکی ئٹ بیگواہ مروک بندغ آک تعلقداری اسہ علاقہ پانوان، جیونی آن ءِ، و اوفتا کاریم مچی ہلنگ ءِ۔ ہندی بندغ آتا رد ئٹ مچی ہلوک تپہ مالو آن ترند زرگزرانی بدحالیت نا گواچی ءِ، ہندن زوراکی ئٹ بیگواہیک علاقہ ئٹ خلیس اس تالان کرینو۔

بندغی حق آتا کارندہ غاک اقوام متحدہ، ایمنسٹی انٹرنیشنل و ایلو جہانی ادارہ غاتان خواست ءِ کہ او بلوچستان ئٹ برجا زوراکی نا بیگواہی تیا دمدستی نوٹس ہلیر و پاکستان آ زور شاغر کہ او جہانی بندغی حق آتا قانود آ سلیر۔