ضلع خاران ئٹ گواش روڈ آ سلہہ بند بندغ آک ایف سی نا چوکی ءِ چغلی بمب ئٹ ٹِک کرینو۔
جلہو آن گڈ فورسز تینا مون تہو ئٹ سم کاری کریر ہراڑان بندغ آتیٹ خلیس و بھیم تالان مس۔ واہم عسکری کالخواہ تا پارہ غان جانی نسخان آتا باروٹ ہچو ہیت ئس مونا بتنے۔
ایلو پارہ غان استو بلوچستان نا ضلع ڈھاڈر نا علاقہ سنی سوران ئٹ نا درست آ سلہہ بند بندغ آک ڈیم ءِ جوڑوکا ہند آ کاریم کروک ود و کم 8 پوریا گر ءِ برمتہ کرسہ مشنیری تے خاخر تسر۔
ڈیرہ بگٹی ٹی سلہہ بند بندغ آتا سم کاری آن اِرا بندغ بھاز ٹپی مسر۔ ہرافتے بدحالیت ئٹ پنجاب آ دننگانے۔
حوال آتا رد ئٹ ڈیرہ بگٹی شار ئٹ سلہہ بند بندغ آک سم کاری کرسہ سرکاری مخ تف ٹولی نا اِرا بندغ ءِ بھاز ٹپی کرینو ہرافتا چاہنداری محمد حیات ولد غلام محمد قوم شالوانی و سلیم جان ولد عبدالحق نا پن تیٹ مسنو۔
بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارینے کہ پاکستانی لشکر نا ترجمان آئی ایس پی آر نا دعویٰ غاک دروغ و شکست ءِ ڈھکنگ نا بے سہب کوشست ءُ۔ زمینی گواچنی دادے کہ جنگ دائسکان کیہی محاذ آتیا برجاء ءِ، و دژمن ءِ بھلو جانی و عسکری نسخان ارفوئی تمنگ ءِ۔ کوزہ گیر لشکر نہ جنگ ئنا پڑ ئٹ سرسہبی دوئی کننگ کرے و نئے تینا بندی کارندہ تے رکھنگ ئٹ سرسہب مننگ کرے۔
ترجمان پارے کہ پاکستانی ریاست و اونا پروپیگنڈہ مشینری ہرا بندغ آتے ”یلہ کرفنگ“ نا دعویٰ کننگ ءِ، گواچن ئٹ اوفتے بی ایل اے تینا جنگی اخلاقیات و جہانی اصول آتا ردئٹ تینٹ یلہ کریسس۔ داڑان چپ، پاکستانی لشکر دائسکان ہم تینا کارندہ تے بندی حالیت ئٹ ہلیسہ بیرہ پروپیگنڈہ نا ذریعت ئٹ تینا شکست ءِ ڈھکنگ ئٹ اختہ ءِ۔
او پارے کہ دائسکان جنگ ترندی ئٹ برجاء ءِ، و سرمچار آک ہر محاذ آ دژمن ءِ پدی مننگ آ بیوس کننگ ءُ۔ بائفوکا لشکر زمینی جنگ آتیٹ بے سہبی آن پد ہندی بلوچ آباتی تے ٹک کننگ بنا کرینے، تاکہ تینا عسکری بے وسی نا بیر ءِ دو ہورک شاری تیان ہلنگ کے۔
ترجمان ودیک پارے کہ بی ایل اے جنگی بندی تا معاملہ غا پاکستانی ریاست ءِ وخت تسوسس کہ او سوبری نا درشانی کے و بندی تا ہڷ و تس اکن گام ارفے، ولے کوزہ گیر لشکر تینا ہی سپاہی تا زند ءِ رکھنگ نا جاگہ غا بیرہ جنگی جنون نا گواچی خننگک۔ داسہ اندن کہ ریاست تینا بندی کارندہ تے کہنگ کن ہِلانے، گڑا اوفتا مرگ ئنا ذمہ واری ہم اونا زی آ مرو۔
بی ایل اے زمینی گواچنی تے منّنگ کن پاکستان ءِ چیلنج کیک۔ اگہ کوزہ گیر لشکر راستی نا فتح نا دعویٰ کیک، گڑا آزات صحافی و غیر جانبدار حوالکار تے جنگ زدہ علاقہ تے اسکان کسر ایتے، تاکہ جہان تینٹ خننگ کے کہ پاکستانی لشکر ہرا گواچن نسخان تا گواچی ءِ۔
ایسر ئٹ پارے کہ دا جنگ پاکستانی ریاست نا وس آن تیر مسنے۔ ہر جنگ ئٹ دژمن نا شکست باوری ءِ، و بی ایل اے تینا شڑط آتیا دا جنگ ءِ ایسری اسکان سر کننگ کن طاغت تون مون تننگ ءِ۔
بلوچ لبریشن آرمی نا دیہاڑی گام – ٹی بی پی سرگپ
منہ دے مُست بلوچستان نا مسکوہی وزیر داخلہ ظفراللہ زہری اسمبلی ٹی زمینی گواچنی تے بیان کریسہ پاریسس کہ بلوچستان ئٹ پاکستانی لشکر نا آخہ بلکن بشیر زیب (بلوچ لبریشن آرمی نا سروک) و ڈاکٹر اللہ نظر (بلوچستان لبریشن فرنٹ) نا رٹ ءِ و بلوچستان نا اہم کسرک آجوئی دوست سلہہ بند تنظیم آتا دوٹی ءُ۔ درو بولان ئٹ مشکاف نا ہند آ بلوچ لبریشن آرمی نا جتا کڑدہ تا پاکستان ریلوے نا جعفر ایکسپریس ٹرین آ کوزہ کریسہ پاکستانی لشکر و ملٹری انٹیلی جنس نا دو سد آن زیات کارندہ تے بندی کننگ پاش کیک کہ بلوچ سلہہ بند تنظیم آتا آپریشنل لائخی تیٹ ودکی مریسہ ءِ و بلوچستان ئٹ پاکستانی لشکر نا رٹ ایسر مریسہ ءِ۔
جہان ئٹ آجوئی نا تحریک آتیٹ دنو مثیل بھاز کم رسینگک کہ گوریلا جنگجوک داخس ءُ بھلو کچ اسیٹی اسہ فوج ئسے نا کارندہ تے بندی کیر۔ مشکاف ئٹ بلوچ لبریشن آرمی نا جعفر ایکسپریس ٹرین اتون اوار سد آ پاکستانی فوجی کارندہ تے بندی کننگ اونا جنگی لائخی، بدل مروک حکمت عملی و طاغت نا پاش درشانی ئسے۔ جعفر ایکسپریس ٹرین آ کوزہ کننگ بلوچ سلہہ بند تنظیم آتا سوگو و غنجل جلہو آتے برجاء تخنگ لائخی ءِ پاش کیک۔
بلوچ لبریشن آرمی نا بندی کارندہ تے جنگی قیدی پن کریسہ بلوچ سیاسی بندی تا ہڷ و تس سوبر کوشست و ذمہ وار رویہ نا درشانی ئسے و جہانی جنگی قانود آتے منیسہ ٹرین ئٹ ساڑی زالبول، چنا و شاری تے یلہ کریسہ اسہ ذمہ وار سلہہ بند تنظیم ئ اس مننگ نا کلہو تسنے۔ فوجی مہم جوئی نا سوب آن پاکستانی لشکر و ڈھکوک ادارہ تا بندی کارندہ تا یلہ کننگ نا گمان آک کم ءُ۔ بائدے پاکستان نا اختیار تخوک طاغت آک بلوچ لبریشن آرمی نا فیصلہ نا مثبت ورندی تریسہ فوجی کارندہ تے گپ تران نا ذریعت ئٹ یلہ کننگ کن گام ارفر۔
بلوچستان نا زمینی گواچنی تیان پاش ءِ کہ طاغت نا ذریعت ئٹ بلوچ تحریک آزاتی نا ایسری مننگ کپک۔ سلہہ بند تنظیم آتا پالیسی و گام تیان نتیجہ کشنگ سخت اف کہ بروک وخت ئٹ دا ڈول ئنا ترند و بھیم بش کروک جلہوک پاکستانی لشکر آ برجاء مرور۔
بلوچستان نا متنازعہ حکومت نا وزیر آک و پاکستان نا اقتدار ئٹ تولوک سیاسی بندغ آک و پارٹیک بلوچ ویل ءِ گپ تران نا ذریعت ئٹ ایسر کننگ درشانی ہر وخت کریسہ بسنو، واہم بلوچ لبریشن آرمی نا سوبر آ سَلاہ غا گام ارفنگ نا جاگہ غا بے سوبر رویہ نا درشانی مریسہ ءِ۔ بلوچ لبریشن آرمی نا سوبر کوشست آتا مثبت ورندی ءِ تریسہ بندی مروک ریاستی کارندہ تے رکھنگ مننگ کیک، ولے اگہ طاغت نا ذریعت ئٹ ویل آتے ایسر کننگ نا پالیسی برجاء تخنگا گڑا اُرے اف کہ دانا نتیجہ غاک ریاست کن نسخان تروک پاش مرور۔
بلوچ لبریشن آرمی نا ترجمان جیئند بلوچ میڈیا آ شینک کروک اسہ بیان ئسیٹ پارے کہ قابض پاکستانی لشکر نا پارہ غان تروک وارننگ و جنگی بندی تا ہڷ و تِس نا آپشن ءِ نمن کریسہ لشکری زوراکی نا ترند ورندی تسونے ۔ دشمن لشکر اینو توپ و بھلا سلہہ تیٹ مونی ہننگ نا کوشست کرے ، ہرانا سوب آن گیشتر جھڑپ آک مسر ۔ بی ایل اے نا سرمچار آک لائخی لشکری اٹکل آتے تینا کریسہ دشمن نا عزم آتے مِش ئٹ غرک کریر و فوج ءِ بھلو شکست ئس تریسہ پدی مننگ آ بے وس کرے ۔ واہم ، دا مُچی ٹی بی ایل اے نا مُسہ سرمچار لمہ وطن نا کسر ئٹ ندر مسر ، ہرا بلوچ راجی جنگِ آزادی ٹی اسہ پوسکنو دیہاڑ ئس جوڑ کریر ۔
ترجمان پارے کہ پاکستانی لشکر نا دا زوراکی ، ضد و بندی تا ہل و تس آ بے سوبری نا ورندی ٹی بی ایل اے نا سرمچار آک اسہ گھنٹہ ئس مالو پین 50 بندی لشکری کارندی آتے مرگ ئنا گواچی کرینو ، ہرا بلوچ عدالت ئٹ بلوچ زنک ایسری ، زوراکی ئٹ بیگواہی ، مڈی تا لٹ و پل ، ریاستی دہشت گردی و جنگی ڈوہ تیٹ مون پہ مون اوار مسوسر ۔
او پارے کہ داکان مالو ، ہنوکا نن پاکستانی ڈرون جلہو تا ورندی ٹی 10 بندی کارندہ تے مرگ ئنا گواچی کننگاسس ۔ داکان بیدس ، جھڑپ آتا وخت اینو پین 10 اندن ہنوکا دے 30 پاکستانی لشکر کسفنگار ، ہراڑان گڈ دشمن فوج نا کہوک آ کارندہ آتا جمعی کچ 100 آن زیات مسونے ۔ واہم دا وخت 150 نا خڑک پین بندی بی ایل اے نا دزگیر ٹی ءُ ۔
گیشتر پارے کہ بی ایل اے دشمن ءِ اسہ المی و پاش کُلہو اس تننگ ءِ کہ اگہ قابض لشکر دوارہ اسہ ہم وڑ ئنا عسکری کاروائی نا کوشست اس کرے ، گڑا غٹ بندی کارندہ آتے زوت ئس مرگ ئنا گواچی کننگو ۔
اونا پاننگ ئس کہ بی ایل اے تینا غٹ فیصلہ آتیا تیوہ عملدرآمد کننگ نا طاغٹ ، لائخی و عزم تخیک۔ دا مزاحمت اسہ مُچی ئسے اسکان سلوک اف ، بلکن بلوچ راجی جنگ آزادی کوزہ کننگ نا لڑ ئسے ۔ قابض دشمن کن ہر ساعت کُبین آن کُبین مریسہ کرو ، بی ایل اے بلوچ راجی مزاحمت کن دا مرحلہ ءِ منطقی ایسر اسکان سر تننگ کن ہر مننگ کروک گام ارفو ۔
بیان نا ایسر ٹی پارے کہ پاکستانی لشکر نا فون ئتون داسا بیرہ 20 گھنٹہ پین ارے ۔ اگہ دا نیام ئٹ سوبرو گام ارفتو ، گڑا ہر گدرینگوکا گھنٹہ تون گیشتر بندی تے بلوچ راجی عدالت نا فیصلہ نا ردئٹ سزا تننگو ۔
جعفر ایکسپریس آ بی ایل اے نا کوزہ ءِ بیست و دو گھنٹہ پورو مسنے، دائسکان ریل بی ایل اے نا سرمچار آتا کوزہ ٹی ءِ۔
پوسکنا حوال تا رد ئٹ مچھٹ مالو بی ایل اے نا پارہ غان جلہو کار ئسے نا آڈیو کلہو ءِ شینگ کننگانے۔ ہرا دائسکان ریل ئٹی بندی تیتون اوار ءِ۔
دا وخت آ ریل ئٹی ود و کم اِرا سد و چانڑدہ بندغ ءِ بی ایل اے نا پارہ غان بندی جوڑ کننگانے۔ہرافتا بھازیک پاکستانی لشکر نا کارندہ ءُ۔
ایلو پارہ غان ریلوے بست و بند نا پارہ غان ٹہیفوک انفارمیشن ڈیسک شاری تے معلومداری تننگ کننگ اف۔
خاہوت نا پاننگ ء کہ کوئٹہ ریلوے اسٹیشن آ 10 تابوت ہترنگا، اسٹیشن بست و بند نا رد ئٹ ننتو تابوت آتا باروٹ ہچو معلومداری اف، انفارمیشن ڈیسک ننے ہچو معلومداری ئس تننگ اف، سہب ئنا سے ننے انفارمیشن ڈیسک و کنٹرول روم آ پیری ترفنگو۔
یاتی مرے کہ درو بی ایل اے بولان نا علاقہ مشکاف نا ہند آ جعفر ایکسپریس آ جلہو کرسہ بھلو کچ اسیٹی ریل ئٹ ساڑی پاکستانی لشکر نا کارندہ غاتے بندی کرے، وختس کہ ریل ئٹی ساڑی چنا و نیاڑی تیتون اوار پیر انگا تے یلہ کننگا۔
بی ایل اے نا پارہ غان بندی تے جنگی قیدی نا درجہ تننگانے، بی ایل اے پاکستانی لشکر ءِ 48 گھنٹہ نا وخت تسنے کہ بلوچ بندی تا ہل و تس ئٹ او یرغمالی تے ہلنگ آ امنا ءِ۔
بی ایل اے نا ترجمان جیئند بلوچ فورسز کالخواہ تے وارننگ ترسہ پارینے کہ پاکستانی لشکر نا ہر دتر چر گام آ 10 برمتہ کروک آتا کھسفنگ نا سوب مرو۔
و اگہ کالخواک خواست آتے منتور گڑا الٹی میٹم نا ایسری آ ہر گھنٹہ غا 5 بندی ءِ مرگ ئنا گواچی کرون۔
ایلو پارہ غان، پاکستانی لشکر نا پارہ غان بی ایل اے نا خواست آتا باروٹ دائسکان ہچو سرکاری بیان مونا بتنے۔
ضلع کیچ نا تحصیل بلیدہ بٹ ئٹ سم تا گواچی مروک اسہ جون اس خننگانے ہرانا دائسکان چاہنداری مننگ کتنے۔
لیویز فورس جون ءِ دوئی مریسہ المی کاروائی کن ہندی ہسپتال آ سر کرینے۔
یاتی مرے کہ بلوچستان ئٹ بے چاہندار و جشوک جون تا خننگ بندغی حق آتیکن بھلو ویل اس جوڑ مسونے، ولے حکومتی ادارہ آتا پارہ غان اسہ پاش ءُ ہیت اس مونا بتنے۔
بلوچستان نیشنل پارٹی نا سروک سردار اختر مینگل بولان نا خڑک آ بلوچ لبریشن آرمی نا پارہ غان ٹرین آ جلہو و کوزہ نا تدینی نا بابت ئٹ بیان ئس شینگ کرسہ پارینے کہ بلوچستان نا اسہ انچ ئسے آ ہم حکومت نا کنٹرول اف۔
اختر مینگل تینا بیان ئٹ پارینے کہ بلوچستان نا اسہ ہم ہندنو علاقہ ئس سلتنے ہراڑے حکومت دا دعویٰ ءِ کننگ کے کہ اونا کنٹرول ءِ، او دا جنگ ءِ با تسونے دا کسہ ایسر مسنے۔
اختر مینگل پارے نن خبڑدار کریسن ننے آن مالو ناک ہم خبڑدار کریسر ولے او ہیت آتیا پام کننگ نا جاگہ غا بندغ آتیا نئے بیرہ ٹوک تننگا بلکن لٹ و پل و لس خون نا جو وئیفنگا غٹ حکومت آک بلوچ زنک ایسری ٹی تینا بریبر ونڈ ءِ شاغار، و دا ہمو اسٹ انگا ویل ئس ہراڑا غٹ ادارہ غاک و غٹ حکومت آک اسہ چر ئٹ مسنو و تینا ردی تے مننگ نا جاہ ہڑدے نا وڑ ایلوفتیا ڈوہ خلنگ اوفتا دود مسونے۔
بلوچستان نیشنل پارٹی نا سروک پارے اینو ای دا وخت ءِ کاریم اٹ ہتیسہ کرسہ ہمو غٹ ءِ پامدار کننگ خواوہ وفاقی حکومت، سیاسی پارٹیک، عدلیہ، اسٹیبلشمنٹ ہرافک تینا ظلم و تادی تیان بلوچستان ءِ دا ہند آ ایسر سر کریر ولے دا وار نئے دا ننا اختیار ئٹے و نئے کہ نما۔
یاتی مرے کہ بلوچستان نیشنل پارٹی نا سروک نا دا بیان ءِ اسہ ہندنو وخت ئسے آ بس ہراتم بلوچستان ئٹ بلوچ آجوئی دوست آتا جلہو آتیٹ ترندی بس وختس کہ تدوکا بیست و چار گھنٹہ آن بولان آن خڑک بی ایل اے اسہ ریل ئسے 214 سواری تون اوار کوزہ کرینے۔
داڑان مست تدوکا دے بی این پی عوامی و مسکوہی وزیر داخلہ بلوچستان میر ظفر زہری ہم پارلیمنٹ ئٹ تینا تران ئٹ دا دعوی ءِ کریسر کہ بلوچستان آ داسا بلوچ آجوئی دوست آتا کنٹرول ءِ۔
کوئٹہ ریلوے اسٹیشن آ بندی تا خاہوت آتا رش ، انفارمیشن ڈیسک جوڑ بندی تا خاہوت آتیٹ نا امیتی تالان ۔
کوئٹہ ریلوے اسٹیشن آ ہمو وخت آ بندغ آتا اربشی نا حالیت خننگا ہراتم کوالخواک 10 تابوت اسٹیشن آ ہیس، ریلوے بست و بند نا جوڑ کروک انفارمیشن ڈیسک نا بندغ آتون اوار تابوت آتا بابت ئٹ ہچو معلومات رسینگتنے ، ہرانا سوب آن خاہوت آک زیات نا امیتی نا گواچی ءُ ۔
بندی تا خاہوت آتا پاننگ ءِ کہ او سہب آن تینا بندغ تا بابت ئٹ احوال دوئی کننگ کن انفارمیشن ڈیسک و کنٹرول روم نا چکر خلیسہ ءُ ولے اوفتے ہچو تسلی تروکو ورندی ئس ملنگ اف ۔
اوفتا پاننگ ءِ کہ ننے سما اف کہ ننا بندغ آک ہرا حالیت ٹی ءُ ۔
ایلو پارہ غان اسٹیشن آ دئے تابوت ساڑی ءُ اسٹیشن بست و بند نا پاننگ ءِ کہ اوفتے تابوت آتا بابت ئٹ ہچو احوال دوئی متنے و دا ہم سما اف کہ تابوت آتے دیر گدرانے ۔
خاہوت آک سوج کریر کہ اگہ بست و بند تون ہچو احوال اف گڑا نن تینا بندغ تا معلومات دیر آن دوئی کین ۔
یات مرے کہ ڈھاڈر نا خڑک جعفر ایکسپریس آ جلہو کروک بی ایل اے نا کوزہ ءِ بیست گھنٹہ گدرینگنگ آن گد ہم دائسکان برجاء ءِ ہراڑے بی ایل اے دائسکان 80 بندی تے یلہ و 214 فورسز کارندہ آتے بندی جوڑ کننگ نا پڑو کرینے ۔
گیشتر علاقہ ٹی زیات لشکر کشی و جھڑپ آتا احوال آک ہم بریسہ ءُ ۔
ننکان بی ایل اے نا پارہ غان یلہ کننگوک درزن آ زالبول، چنا و پیر انگاک کوئٹہ ءِ سر مسر۔ شابیتی حوال تا ردئٹ بلوچ لبریشن آرمی نا پارہ غان یلہ مروک آک میڈیا تون ہیت کریسہ پاریر کہ اوفک تدینی نا وخت آ قیامت آنبارو حالیت گدارار، جلہوکار آک ننے اِلار و نن تینا ساہ تے رکھان۔
برطانوی حوال شینک کروک ادارہ بی بی سی اردو نا ردئٹ 80 نا کچ بندیک یلہ مسنو ہرافتیٹ بھازی زالبول، چنا و پیر انگاک اوار ءُ۔
یلہ مروک بندیک بی بی سی تون ہیت کریسہ تدینی نا بابت پاریر کہ جلہو نا بنا اسہ ترند تراک اسیٹ مس و اسہ گھنٹہ اس سم کاری نا لڑ برجاء مس ہموتم سلہہ بند بندغ آک ٹرین ئنا بوگی ٹی پیہسہ بندغ آتا چاہنداری بنا کریر۔
یلہ مروک اسہ بندی مشتاق احمد بی بی سی ءِ پارے کہ ننا بوگی تا در آتیا مُسہ مُسہ سلہہ بند بندغ گھاٹ تننگ ئسر، اوفک بندغ آتے پاریر کہ او شاری، زالبول، چنا، پیر انگا و بلوچ آتے ہچ پاروفس۔
اونا پاننگ ئس کہ اوفک تین پہ تین بلوچی ئٹ ہیت کننگ ئسر و اوفتا سروک اوفتے وار وار پاریسہ ئس کہ سکیورٹی کارندہ تیا خاص نظر تخرے دافک دو آن پیشتمپس۔
اسہ پین بندی اسحاق نور تدینی نا بابت ہیت کریسہ پارینے کہ اوفک ننا بوگی آن کنا خیال کم آن کم یانزدہ بندغ شیف دڑفیر و پاریر کہ دا سکیورٹی کارندہ ءُ، دا وخت آ اسہ بندغ اس مزاحمت کننگ نا کوشست کرے گڑا اوڑا بیدادی کریسہ شیف دڑفیر و پدا سم تا توار بس اوڑان پد بوگی ٹی ساڑی غٹ بندغ آک جلہوکار آتا پنت آتیا عمل کریسہ کریر۔
اسحاق نور نا پاننگ ئس کہ بیگہ نا وخت آ اوفک پاریر کہ نن بلوچ، زالبول، چنا و بھلن سن ئنا بندغ آتے یلہ کننگ اُن او کنے اِلنگ الور ولے ہراتم اوفتے پاریٹ کہ ای تربت نا ہندی ئسے اُٹ و کنتون چنا نیاڑیک ءُ گڑا اوفک کنے ہم الار۔
یلہ مروک مسٹمیکو بندی محمد اشرف بی بی سی ءِ پارے کہ سلہہ بند آک پیر انگا تے، لس شاری، زالبول و چنا تے اِلار و اوفتا پنیر اسٹیشن نا مرغنا پند آ سفر بیگہ نا وخت آ بنا مس۔
او پارے کہ نن پنیر اسٹیشن اسکان مُسٹ آن مُسہ نیم گھنٹہ ٹی بھاز سختی ئٹ سر مسون، انتیکہ دم دری ہم ئس و ورنا غا مسنک، زالبول، چنا و پیر انگاک ہم ئسر۔
بی بی سی صحافی ءِ انٹرویو ٹی محمد اشرف پارے کہ بھازی بندغ آک تینا سامان تے اِلیسہ بسوسر، اندن گڑاس تینا سامان تے ہتنگ ئسر، ہراڑا ای اوفتے پاریٹ کہ داڑے تینا ساہ ءِ رکھنگ سخت مننگ ءِ، منہ پیر ءُ بندغ ئسر ہرافتے نن تینا کوپہ تیا ارفین و خلسہ پرغسہ داڑاسکان سر مسون۔
او پارے کہ مسافر آک بھاز خُلیسرہ، قیامت نا ندارہ ئس۔
اندا وڑ بہاولپور آ ہنوک مسافر بشیر تینا زائیفہ و اِرا چنا تون سفر کننگ ئس، او بی بی سی ءِ پارے کہ سلہہ بند بندغ آک بسر و ننے پاریر کہ نم شیف دڑنگبو، اوفک نہ کنے توریر و نئے کنا چنا تے۔
سلہہ بند بندغ آک ننے پاریر کہ نم پدی چک خلپیرے اوکان پد نن سخت انگا کسر تیٹ مریسہ پنیر ریلوے اسٹیشن ءِ سر مسون۔
