نوشکی ٹی دہ سالی ءُ چنا ئس نا درست آ بندغ آک کھسفیر۔
چنک سن آ چنا ءِ مَشی آ علاقہ ٹی کھسفنگانے۔
حوال تا رِد ئٹ محمد عابد ولد محمد حسن سنگبر کیشنگی نا ہندی جمعہ نا دے تینا میڷ تے خوائفنگ کن دریسس ہراڑان گڈ او بیگواہ ئس۔
اینو دہ سالی آ چنا نا جون مش تیان رسینگا ہرادے نا درست آ بندغ آک بے دردی ئٹ خل ئٹ کھسفینو۔
جون ءِ چنا نا باوہ پیرئی آ خلق کلی محمد حسن سنگبر آ سر کننگا، ہراے کڈ کننگا۔
کراچی ٹی استو نا درست آ بندغ آک پولیس ءِ جلہو ئٹ ٹِک کریر۔
پولیس ءِ کراچی نا علاقہ کاٹھور ئٹ ٹِک کننگا۔
پن کروک پولیس کارندہ آک بحریہ ٹاؤن پروجیکٹ نا اِرٹمیکو کسر نا رکھ اکن ئسر کہ سلہہ بند بندغ آک اوفتے ٹِک کریر۔
حوال تا رِد ئٹ جلہو ئٹ پولیس ءِ نسخان رسینگانے واہم دائسکان جوانیکا پِک متنے۔
جلہو نا ذمہ واری ءِ بلوچستان لبریشن فرنٹ ارفے۔
بلوچستان نا ضلع نوشکی ٹی سلہہ بند جلہو ئٹ اسہ بندغ ئس مرگ ئنا گواچی مس۔
سم کاری نا تدینی نوشکی شار آن خڑک مینگل کراس آ مس ہراڑے سلہہ بند بندغ آک گاڑی ئسے جلہو ئٹ ٹِک کریر ہرانا سوب طارق مینگل ولد نیک مینگل کلی قادر آباد نا ہندی ہمو ہند آ مرگ ئنا گواچی مس۔
پولیس تدینی ءِ پک کرسہ پارینے کہ جون ءِ میر گل خان نصیر ٹیچنگ اسپتال سر کننگا۔
تدینی نا سوب آک دائسکان سماء تمتور واہم ہندی حوالی تا رِد ئٹ طارق مینگل حکومتی مُخ تف ءُ بندغ ئسے نا وڑ ئٹ چاننگاکہ۔
افسانہ: باوہ نا اُرا نا کنجی
نوشتہ کار: لیانا ڈسکالووا
براہوئی بدل: سعدیہ بلوچ
دی بلوچستان پوسٹ
ہفت وار کچ کہ، اسہ وار کاٹ کہ، اسہ پنی ءُ روسی وسائت ئسے۔ انتئے کہ اگہ ردی مرے گڑا اونا توننگ مننگ کروک مفک، ایلو لوز آتیٹ اسہ گام ئس ارفنگ آن مالو ہر وڑ ئٹ سوچبو و دا ہیت ءِ یخینی جوڑ کبو کہ نم جوانو عمل ئس کننگ اُرے۔۔۔۔۔ ولے مارکوک؟ انتئے بے صبر آ مارکوک اندن کیرہ؟
اسہ دے پیٹرچو اُرا غان نرنگ نا فیصلہ کرے۔ اودے ارانگ و امر ہنوئی ءِ؟ او سرپند متوکہ۔ او تینا وفادار کچک شارکو ءِ تینتون اوار دننگ خوائتوکہ۔ انتئے کہ شارکو ہرفیکہ: ”پیٹرچو! نی ہرانگ ہننگ اُس؟ نی ہراتم پدا بروس؟ نا جیب ئٹی انت ءُ؟“
دا ہمو ہیت آک ئسر ہرا پیٹرچو سگیتوکہ تا۔ دا پاننگ کہ او ہرانگ ہننگ ءِ؟ او انت کننگ ءِ و ہراتم پدا برو؟ او پِشی ءِ ہم تینتون اوار دننگ خوائتوکہ انتئے کہ پِشی ءِ ہم ہرفوئی ئس: ”نی مون سلانس؟ انت دا خاچنگ نا وخت اف؟ و اسکول؟ ۔۔۔۔۔ ”فلان فلان۔“
اندن کہ پیٹرچو پیشن نا درگہ ءِ ملنگ خوائس۔ پِشی ناگمان جا ئسے آن پاش مس و پارے: ” پیٹرچو! نی ہرانگ ہننگس؟“
”ایلو کاریم تیٹ اوار مفہ۔ اٹاری ٹی ہن و مُشک آتیا نظر تخ“
”ای اوڑے مُشک آتے نہ بلکن استار آتے ہننگ کن کاوہ۔ خیر دا پار نی اسہ چِٹھی ئس الانس؟ “ پِشی ہرفے۔
”امرو چِٹھی؟ “ پیٹرچو گوڑینگسہ ہرفے۔
”رخصتی چٹھی، اراغان نروکا ہر مار ءِ رخصتی چٹھی الوئی ءِ۔“
”او اسہ لکھوک خوانوک ءُ پشی اس ئسک ۔ اسکول، ارانا ماس آ ئسک۔ او ہڑدے بالکونی ٹی لیٹاکہ دے آ غسل کریسہ اسہ خن ئٹ جماعت نا پارہ غا ہُراکہ۔ او لکھنگ ہم چائسکہ۔ ولے لکھنگ اندن ئس کس اڑزانی ئٹ سرپند مسکہ، ولے ای بھاز وار داکان خرابو لکھنگ ئس ہم خنانٹ۔ او ہم پشی نا نہ، بلکن چُنا تا۔
”پیٹرچو! نی تینا لمہ باوہ نا ارا ءِ رخصتی چِٹھی آن بیدس الینگ کپیسہ۔ داکان بیدس دے ئنا رژنائی ٹی نے ہلنگ ہم کیرہ۔ انتئے کہ نیتون چاہنداری نامہ اف، کم و ود تارمئی مننگ اسکان ودار کر۔ دن کر اٹاری ٹی ڈھکے تینے۔“ پشی پارے۔
ایسر ٹی پیٹرچو منّا۔ او دُز و اسہ خن والا داڑیل ئسے نا وڑ دزگیر مننگ خواہتوکہ۔ داکان بیدس اٹاری ٹی بیدس اسہ نیام ئٹ بننگ نا نی دا سوچ کننگ کیسہ کہ ہرا شار یا ڈیھ آ ہنوئی ءِ؟ ہراڑے بیرہ گوازی نا گِڑا و گوازی مرے۔۔۔۔ اٹاری ٹی چھپی و تارمئی ئس۔ او اسہ کنڈ ئسے آ تُوس و شام مننگ نا ودار کننگ بناء کرے۔
اندن کہ او پارہ۔ اسہ بھلو وخت ئس گدرینگا، بلکن نا درست وخت انتئے کہ اٹاری ٹی ہچو گھڑی ئس الو، نا گمان اسٹ ئسے نا توار بس: ”داڑے دیر ءِ؟“
”ای پیٹرچو اٹ۔ ای سفر کن پیشتمنگ اٹ۔“
”مسافر! کنے اراٹی پریشان کپہ۔“ توار پارے۔
”نا اراٹی؟“ مارکو خار ئٹ پارے۔ ”دا کنا اُرا ءِ۔ ای دانا قانودی خواجہ اٹ۔ کنا خاہوت داڑے سد سال آن رہینگک۔ کس ءِ حق اف کہ کنے داکان نرفے۔“
”قانودی خواجہ؟ و نی؟ آہ بد بخت اُرا، ہراڑے دنو مار ئس ودی مسونے ہرا باوہ نا اُرا ءِ الینگ ءِ۔“
”دیر کنتون دا لہجہ ٹی ہیت کننگ ءِ؟“ پیٹرچو تڑی تریسہ انداز ئٹ چیہانٹ خلک۔ ”اٹاری نا مُشک یا پین کس ئس؟ زرس مونا بر! ای نے ہُننگ خواوہ۔“
”ای ہنوکا وخت اٹ۔“ اسٹ ئس ورندی تس۔ ”ای کس ءِ نظر بفرہ۔ اسہ بندغ ئس ہنوکا وخت ئنا تصور کننگ کیک، ولے او کنے ہُننگ کپک۔ ہنوکا وخت ئنا ہچو دروشم ئس مفک۔ نا درست کسر نا مسافر! ہنوکا وخت نا توار سہب اسکان نیتون ہیت کریکہ، ولے نی دانا حقدار افیس۔“
پیٹرچو اولیکو وار ہنوکا وخت ئنا توار ءِ بنگسس؟۔۔۔۔۔۔ آخہ، اولیکو وار آخہ۔ فالن فائٹرز ڈے آ او ڈیوہ ارفوک جلوس ءِ ہننگ کن ہناسس۔ ہراڑے اسہ ترند و مونجا ءُ توار اس ہیرو تا پن تے توار خلیسہ ئس۔۔۔۔ او ہنوکا وخت ئنا توار ئس۔
پدا اسہ گچینو توار ئس پیٹرچو ءِ ہجم تس۔ ” نی دیر اس؟ “ او ہرفے۔
”ای بروکا وخت اٹ۔“
”نی داڑے ہنوکا وخت ئتون اوار انت کیسہ؟“
”او گچینا پیٹرچو! انتئے بروکا وخت ایسر ئٹ ہنوکا وخت جوڑ مننگ کپک؟ نن مُست ئنا سنگت ان۔“
”کنے اوڑان ہرفوئی ءِ۔“ او تینتون تینٹ ہیت کرے۔ ”روشن انگا بروکا وخت ای نیتون مشفرہ کننگ خواوہ۔ نا انت خیال ءِ، کنے اُرا ءِ الوئی ءِ؟“
”اوہ، کنے دننگا سوج آتا ورندی تننگ نا اختیار اف۔ ہرکس تینا بروکا وخت ئنا زمہ وار تینٹ ءِ۔ ہر اسٹ ءِ تینا خوئشی ءِ تینٹ کھٹوئی ءِ۔ دا ریاضی نا ڈول ءِ او نے اسہ مسئلہ ئس ایتک، و نی اودے حل کیسہ۔ اگہ نی ردی کریس گڑا نے خرابو نشان ئس رسینگک۔ بلکن ہنوکا وخت نے سَلاہ ئس تننگ کے؟“
”جواننگا ہنوکا وخت! کنے سَلاہ بکار ءِ۔“ مارکو پارے۔
” ای سلاہ تفرہ۔“ ہنوکا وخت ورندی تس۔ ”ای بیرہ کسہ بنفیوہ۔ بس ہرکس خوائس سبخ دوئی کے۔“
وخت ہنیسہ ءِ۔ اندن کہ دے کہی ہلینگا، تارمئی و مونجائی زیات مس۔ پدا اسٹ ئس ہوغنگ ءِ بناء کرے۔
”دیر اس ہرا تارمئی ٹی ہوغنگ ءِ؟ پیٹرچو پارے۔
”ای، مونجا غا بومب اٹ۔“
”نی انتکن ہوغنگس؟“
”کنے کنا اُرا یات بننگ ءِ۔“
”نا اُرا ءِ انت مس؟ انت او ہشنگیسہ بھس مس؟ اودے دیر خاخر تس؟“
”آخہ آخہ۔۔۔۔ ای بھلو وخت ئسے آن اُرا ءِ الاسٹ۔ ہموتم آن ای ڈکھ ہفیسہ اٹ۔ اسہ برجاء ءُ یات ئسے، اسہ ہنوکو وخت ئنا ئسے دڑد۔ ای سد سال آن تینا اُرانا پٹ و پول ٹی اٹ۔ ہر جا آ کاوہ۔ ہر درز و شگاف ءِ ہوریوہ۔ ولے افسوز او کنے دسکان رسینگتو۔ ولے ای نا امیت افٹ۔“ بومب مونجا مریسہ پارے۔
”بِن! دے ئٹ اُرا نا پٹ و پول کننگ جوان اف؟ ننکان کل اُراک اسہ وڑ نظر بریرہ۔ انداخس کہ گلی و اُرانا نمبر نا چاننگ آن پد ہم سخت مریک۔“
”آہ ۔۔۔۔۔ زیبا! ای دے آن نا وخت کس ئنا مونا ہمپرہ۔ ای شکی اٹ، کنٹی ہمت اف۔۔۔ اُراغان نرنگ شکی مروکو ہیت ئسے۔ نی اسہ اڑزانو زند ئس خواسہ۔ اسہ میگپی ئسے نا ڈول، اسہ دروغ ئسے نا گروشک، ہورک ءُ کینڈی ریپر ئسے نا ڈول ریفنگ۔۔۔۔۔“
نَن پین ہم ترند مریسہ ئس۔۔۔۔ پشی دسکان بتویسس۔ پیٹرچو نا ماس آ رخصتی چٹھی لکھوکو کس الو و او سرپند متوکہ کہ چٹھی امر لکھوئی ءِ۔
ہراتم شار ئنا گھنٹی خلوک اُرا دوانزدہ پارے گڑا پیٹرچو بھلو دم ئس ہلک و بُر بُٹا۔ ”ہننگ نا وخت بسونے۔“
اندا وخت آ بومب ترند آن چیہانٹ خلک و پارے: ”ہراتم نن ئنا دوانزدہ مریک گڑا ای مونجا مریوہ۔ ای اندا وخت اراغان نراسٹ۔ ای اینو اسکان توبہ کیوہ۔ مار! نن ئٹ اسل پیشن مفیس۔“
”عجیب ءُ معاملہ ئسے۔ کنتون اسہ ریزر ئس ارے۔ اگہ اسہ ردی ئس مرے گڑا ای تینا نوٹ بک آن ڈھرفیوہ تا۔ اوڑا اسہ بومب ئس جوڑ کروک ءِ استانی پائک نی اسہ عقلمند ءُ چُک ئسے اس۔ بلکن او نا دا کسہ ءِ بنتنے۔“
”مار! دا عقل کنٹی زوت بتو، ہراتم ای اراغان نراسٹ گڑا ای بھاز گنوک ءُ حرکت کریٹ۔۔۔۔ ای بھاز بے پرواہ ءُ چُک اس ئسٹ۔ قدرت کنے رنگ رنگی ءُ پرہ نا ٹیکی تتویسس۔ ای رنگ آتا پٹ و پول ٹی جہان ئٹ ہناٹ۔ ولے ای جوانو پرہ دوئی کننگ کتوٹ، ہان ای گم مروکا کُتو کن ابدی آڑزو الم دوئی کریٹ۔ بھاز وخت کُبین بھاز کُبین مریرہ۔“
”نی کنے اُرا ءِ وے الینگ نا سَلاہ تننگس یا پین؟“
”ای نے آ جادو کرینٹ۔“ بومب پارے۔
پیٹر چو کنڈ آ توس کڑمبو سوچ اسیٹی ٹبینگا، ناگمان اٹاری نا درگہ مدان مدان آن کھڑکارہ کرے و خوانوک و لکھوک پشی بس۔
”مُشک ہلوئی ءِ نے؟“ پیٹرچو ہرفے۔
ولے پشی ہچو ورندی ئس تتو۔ او چھپی ئٹ کھڑکی ٹی لگوک تینا اسپائی گلاس نا خڑک ہنا و تینا خنتے آسمان آ کریسہ بُر بُٹا۔ ”استار آک۔۔۔۔۔۔ استار آک ہُننگ نا وخت بس۔“
”بھاز گچین!“ پیٹرچو ہم بر بٹا۔ ”ای اسل سوچتویسٹ کہ نی مُشک ہلنگ کن نہ بلکن استار آتے کچ کننگ کن اٹاری آ بریسہ۔“
”انتئے کنے تینا تیز انگا خنتیٹ سائنس نا خذمت ءِ کروئی اف؟ بھاز وخت چنکا چنکا مخلوق ہم فطرت نا کڑمبا راز آتیٹ ہُننگ نا لائخ مریرہ۔“ پشی پارے۔
”ای نے تینا ڈکھ ءِ پارینٹ۔“ بومب پارے۔ ”ای خواست کیوہ کہ نن ئٹ فیصلہ کپہ۔ سہب اسکان ودار کر۔ سہب، نن آن زیات روشن مریک۔“
”ای تیوہ نن داڑے انت کیو؟“ او تینتون تینٹ ہیت کرے۔
”ای نے اسہ کسہ ئس بنفیوہ۔“ ہنوکا وخت ئنا توار پارے۔ ”ای مُست ئنا یات آتیٹ گم مریوہ۔ کنے یات ءِ کہ دا اُرا ٹی اسہ پین مارکو ئس رہینگاکہ۔ ہراتم او شانزدہ سال ئناس مس گڑا اودے ہم اسہ سفر ئس کروئی تما۔ اسہ سہب۔۔۔۔“
بومب ترند آن چیہانٹ ئس خلک۔ ”نی بیرہ سہب ئٹ سفر کن پیشتمنگ کیسہ!“
”ہتم نا اسہ روشن ءُ سہب ئس باوہ تینا مار ءِ رخصت کرے۔ جنگلی گل شمعدانی نا اسہ چنکو ٹول ئس جوانو بخت ئسیکن مارکو نا باسن انگا ٹوپ آ تفنگاسس و اونا کوپہ غا اُرا ٹی کھاس ئٹ جوڑ کروک اسہ تھیلہ ئس ٹنگوک ئس۔۔۔“
”دا مُست ئنا وخت ئنا ہیت ئسے۔“ پیٹرچو اوار تما۔ ”اینو پگہ گل شمعدانی و اسہ تھیلہ اسیتون کسر آ دیر کائک؟ داسا سفری بیگ و سوٹ کیس ارے، ولے کنکن اسہ پین گڑاس اہم ءِ۔ انتئے مارکو مہالو آن ہم تینا کُتو ءِ الاسس؟“
”آخہ، دا بیرہ خواننگ آن نرنگ ءِ۔“ خوانوک و لکھوک پشی اوار تما۔
ہنوکا وخت دا ہیت ءِ برجاء تخا ”مارکو سمندر نا پارہ غا سفر کریسہ اسہ مُر و رش شار ئسیٹی رسینگا و اسہ جوانو و پنی ءُ اسکول ئسیٹ داخل مس۔ او خنا کہ بھاز آ خوانندہ غاک، امیر آتا چناک خراب مسونو۔ او ننکان گیس والا چراغ نا مونا تولیسہ تاش گوازی کیرہ۔“
”آہ، ای سرپند مسٹ کہ نی انت پاننگ خواسہ۔ دا ہمو مارکو تون مریک ہرا تینا اُراتیان نریسہ بھلو صحبت ئسیٹی تمیرہ، او تینا باوہ نا پیسہ غاتے زوال کیرہ و بھاز وار کہرہ ہم۔ نی اندن پاننگ خواسہ کہ ای ہمپر۔“ پیٹرچو پارے۔
”سگ ئٹ بن۔۔۔۔۔ ولے ننا مارکو گیس والا چراغ نا ماس آ تولوک آتیتون سنگتی کتو۔ او ننکان خوانوک آتیتون سنگتی کرے ہرا بندغ آتا ڈکھ آتے گیرام کننگ خواتوکہ۔۔۔۔ زوت ئٹ مارکو المی کتاب آتے ہلنگ کن تینا باسن انگا پچ آتے بہا کرے۔ پدا ڈیھ ئنا آزاتی کن اسہ توفک ئس ہلک۔ نی سرپند مننگس؟ او ترک جوۓ نا وخت ئس۔ مارکو تینا شار آ پدا ہنا، او بیرہ بغاوت نا تغ خنتو بلکن او ایلوفتے تیار کرے۔ ولے اسہ نن ئس احمد آغا نا سروکی ٹی ترک آک نا گمان آن ہمو اُراغا ٹک ٹک کریر ہراڑے اونا سنگت آک مچ ئسر۔ مارکو اندریکا گلی آ نظر ئس شاغا و پد ئنا کسر آن سنگت آتے ہمسایہ تا مونغی نا کسر ئٹ پیشن کشا و خف خف ئٹی ہیت کریر، رمب کبو۔ و پدا تینٹ اراغا بس پد ئنا درگہ ءِ ملا و احمد آغا ءِ وتاخ ٹی ہیسک۔ او اسہ بھلو کوٹی اس ئسک ہرانا چھت آ عکس کشنگاسس۔ او وخت ءِ تیر کننگ کن ہیت ءِ بناء کرے، ولے موڷ کروکا کافی و نئے کہ جواننگا ہیت احمد آغا ءِ زہمی کرے۔ او پستول ءِ کشیسہ مارکو نا سینہ ٹی سم ئس خلک۔“
”آہ بد بختی ئسے۔ انت ننا مارکو کسک؟ بومب پارے۔
احمد آغا نا سم مارکو نا سینہ غا لگا و پدا ہڑسینگسہ ایلو ترک نا دُو آ لگا۔ غٹ ترک آتے خلیس ہلک۔ ”خدا نا حکمت!“ او چیہانٹ خلکر۔ ”اللہ دا بندغ آ سم خلنگ آن منع کیک۔“ ”نی چاسہ۔ او توہم پرست مریرہ۔“
”آ، سم پدا امر ہڑسینگاسس؟“
پیٹر چو ہرفے۔
”انتئے کہ مارکو نا سینہ غا اونا باوہ نا اُرانا کنجی ٹنگوک ئس۔ اینو ہم چناک اندا وڑ کنجی بینرہ، تانکہ او گم مفس۔ اسہ چنکو مارکوس سٹ ئس خلیک گڑا اونا لخ ئنا کنجی ہم سٹ ئس خلیک۔ او اوڑتون ڈھکوئی کا و خن تفوکی گوازی کیک، او چھپی ئٹ چنا نا است آ بریک۔ اودے یات ایتک کہ اونا اُرا ئس ارے۔۔۔ دا سما تمک کہ اونا باوہ نا ارانا کنجی اسہ باغی ئسے بچفے۔ کنجی ہر جا آ اوڑتون اوار ئس۔ او سمندر آن ہیپار مس، مش تیا لگا و آزادی نا جنگ کرے۔“
ای ہم اسہ کنجی اس، زمزیر ئٹ بینوک اٹ، تینا است آن اسل خڑک۔۔۔۔“ پیٹرچو مدان مدان پارے۔
”او کنجی نا است ءِ انت پائک؟“ ہنوکا وخت ہرفے۔
”وخ کہ ای ہم اراغان نرنگ نا وخت تینتون کنجی ئس تخاٹہ، ولے چُک آتیتون کنجی مفک۔ اوفتون بیرہ جبلت مریک۔“ بومب پارے۔
”ہُرے تمانے۔“ لکھوک خوانوک پشی پارے۔
”ہرے تمتنے، دائسکان مہالو ءِ۔“ بومب ترند آ پارے ”سہب مننگ ءِ۔ اہم انگا فیصلہ غاک سہب تون مریرہ۔ نی انت فیصلہ کریس گچینا مار؟“
”ای ہنوکا وخت ئنا کسہ ءِ سرپند مسٹ۔ او پنت تفک بلکن بندغ ءِ تینا کسہ ئٹ سرپدی ایتک۔ ای اراٹی رہینگوٹ، ای ہنوکا وخت ئنا، بروکا وخت ئنا و تینا باوہ نا ارانا کنجی نا بابت سوچ کروٹ۔ نمے کل ءِ سلام!“ پیٹرچو پارے۔
مارکو ہرا وڑ ئٹ ورندی تس کنے گوڑیفے۔
”نی دیر اس؟“ پیٹرچو نا وڑو چناس ہرفو۔
”ای کسہ بنفیوہ۔ کس ئس اوفتے پائے۔ دا پری تا کسہ آتیٹ غٹ راست مریرہ و اگہ نی کنا خیال ءِ چاننگ خواسہ گڑا دا کسہ ٹی کنے لکھوک و خوانوک پشی نا کڑدار غٹ آن زیات دوست بس۔ او اخس سوبری ئٹ پیٹرچو ءِ متکنا ارانا اٹاری آ درے۔ (تانکہ اودے سوچنگ و سرپند مننگ و درست فیصلہ کننگ کن وخت رسینگے)“
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
چنک سن مار ئنا زوراکی ئٹ بیگواہی نا برخلاف خاہوت و ہندی بندغ آک برانز کریسہ اودے یلہ کننگ نا خواست کننگ ءُ۔
بلوچستان نا ضلع خضدار آن رسینگوک حوال تا ردئٹ سلہہ بند بندغ آک اسہ پانزدہ سالی چنک سن مار ئسے زوراکی ئٹ بیگواہ کرینو، ہرانا چاہنداری احمد نا مار انس ہند گزگی خضدار نا پن ئٹ مسنے۔
تدینی نا برخلاف خاہوت و ہندی بندغ آک گزگی آن خڑک کوئٹہ کراچی بنجاہی کسر آ تولوک برانز کریسہ کسر ءِ ہن و بر اکن بند کرینو۔
بلوچ یکجہتی کمیٹی خضدار نا ردئٹ، چنک سن مار ءِ برمتہ کروک آک پاکستانی ڈھکوک ادارہ تا کارندہ غاک ئسر و اوفک سلہہ بند ئسر، ورنا ءِ تینتون اوار دریر ہراڑان پد او بیگواہ ءِ۔
بلوچ یکجہتی کمیٹی خضدار نا مخلوق آن خواست کرینے کہ اوفک انس نا خاہوت نا برانز ئٹ اوار مریسہ اونا آجوئی کن توار ارفر۔
خاہوت پڑو کرینے کہ اگہ انس ءِ دمدستی مونا ہتیسہ آجو کننگتو گڑا اوفتا تولوک برانز پین ترند مرو۔
بلوچستان نا ضلع کیچ نا علاقہ زامران ئٹ پاکستانی فوج لشکر کشی کننگ ءِ، دا وخت آ گن شپ ہیلی کاپٹر آک جتا ہند آتیا شیلنگ کرینے۔
حوال تا ردئٹ تدوکا مُسہ دے آن پاکستانی لشکر زامران جتا علاقہ تیٹ لشکر کشی ٹی اختہ ءِ، اینو سہب ئنا تربت ہیڈکوارٹر آن ہیلی کاپٹر آتا بال خننگ ئٹ بسنے۔
علاقائی حوالکار تا ردئٹ زامران نا جتا علاقہ تیٹ ہیلی کاپٹر آک شیلنگ کرینو اندن فوج ئنا بھلو کچ اس علاقہ ئٹ بننگ ءِ۔
واہم دائسکان ہچ وڑ نا دزگیری یا جانی نسخان تا بابت حوال رسینگتنے اندن کوالخواہ تا پارہ غان ہم دا بابت ہچو ہیت اس مونا ہتنگتنے۔a
راجی مُچی – ٹی بی پی سرگپ
چاغی، بلوچستان نا ہمو پدماندہ ضلع ءِ ہرانا ڈغار نہادی مڈی تیان پُر ءِ، ولے او جاگہ نا ہندی بندغ آک دائسکان ہم زند ئنا بنماسی آسراتی تیان پدماندہ ءُ۔ چاغی عرب بادشاہ تیکن چڑز نا شکار و چین و ایلو جہانی سرمایہ کار آتیکن خیسن نا کانکنی نا بنجاہ جوڑ مسنے، ولے دانا گواچنی نہاد ءِ او جاگہ نا مخلوق تننگ ءِ۔
بلوچ زنک ایسری نا یاتگاری دے ئنا وخت آ 25 جنوری آ بلوچ یکجہتی کمیٹی چاغی نا علاقہ دالبندین ئٹ اسہ راجی مُچی اس اڈ تس، ہراٹی ہزار آ بندغ آک اوار مسر۔ دا مُچی ریاستی مقتدر طاغت آتے اسہ پاش ءُ کلہو اس تس کہ بلوچ زنک ایسری نا پالیسیک ہچ دروشم اسیٹ منّنگ نا لائخ افس۔ تران کروک آک دا پک ارادہ کریر کہ بلوچ راہشون تا رند آتیٹ ہنیسہ ریاستی تادی نا برخلاف مزاحمت برجاء تخنگو و راجی حق آتیکن جہد گیشتر سوگو کننگو۔
چین نا کمیونسٹ حکومت و کینیڈا نا کمپنی بیرک گولڈ چاغی نا علاقہ سیندک و ریکوڈک ئٹ خیسن و چاندی نا کانکنی ٹی اختہ ءُ، اندن سعودی حکومت ہم ریکوڈک ڈٹ بندی ٹی سرمایہ کاری نا ارادہ تخک۔ بلوچ راجی ادارہ غاک دا ڈٹ آتے لٹ و پل کروک گوندرہ، انتیکہ دافتا سواد آک بلوچ الس نا جاگہ غا پیشن ملکی حکومت و کمپنی تے رسینگنگ ءُ۔ سال آتیان برجاء دا مڈی تا لٹ و پل چاغی نا الس ءِ بدحالی ٹی دھکہ تسنے۔
بلوچ یکجہتی کمیٹی بلوچ الس ءِ نئے بیرہ زوراکی نا بیگواہی و ریاستی تادی تا برخلاف اوار کرینے، بلکن دالبندین نا دا راجی مُچی ٹی بلوچ مڈی تا رکھ و پیشن نا سرمایہ کار آتا لٹ و پل کروک ڈٹ بندی تا برخلاف السی مزاحمت نا بیرک ءِ ہم بڑز کرینے۔
دالبندین ئٹ تیوہ بلوچستان آن بندغ آتا اوار مننگ دا پاش کرینے کہ بلوچ راج تینا جہد ئٹ نئے بیرہ ہمکوپہ ءِ بلکن سیاسی مزاحمت نا دا لڑ گیشتر سوگو مریسہ بش مرو۔ داسہ نا مروکا راجی مُچی تا زہم آک بلوچ راجی تحریک آ مُر اسکان تمور و دا جہد ریاستی تادی نا برخلاف اسہ سوگو سیاسی تحریک ئسے نا دروشم دوئی کرو۔
سفرنامہ
عمیر مہرُل
سفر ٹی دا روانُن نن
تہاری ئے سفر ٹی دا
ہننگن منزلا تینا
اُمیدئٹ پگہ سے نا نن
امیدئٹ سُہب ئسے نا وا
امیدئٹ آگہی سے نا
اُمید ئٹ روشنی سے نا
اُمید ئٹ زندگی سے نا
اوارے چنگ بروت ئس ہم
ننا زیبا غا لشکر ٹی
اونا زیبا ؤ ہاٹی سے
کلک ئے ٹک ئسے اونا
عجب مخنگ ءِ صد شوق ئک
ننے وا ترسہ ئے جوزہ
او مثل ئٹ اینو باؔلی نا
ننا او ملسہ ئے خنتے
ننا عقلا تا لوپ آتے
عجب او ملسہ ئے مہر ئٹ
ننا دم راست مننگ ئے
امر نن خلسہ اُن ٹاکو
دا چاغی نا کہ مش تیٹی
دا موّن ئنگا سڑک آتے
امر سینگار کننگ اُن
امر تہو خلسہ ئے پیری
ننا خف ماس ئنا خوڑکا
ننے او کرسہ ئے شاید
بخیر احوال ، ماندہ او
ولے ای تپرہ لوّز ئے
کہ انت پاننگ ءِ تہو دیچا
منہ زیبا او ورنا او
کنا تولوکو پانادا
منّٹ ئس چاپ خلنگو
منّٹ ئس کرسہ او آرام
منّٹ ئس کرسہ او پیری
کے دے بیدار ءِ دا وختا
عجب شوخو ندارہ سے
عجیبو کیفیت او دا
وا دُن محسوس مننگ اے
کہ نن حنام ئسے ٹی اُن
دچہ دا ڈہیہ نہ حنام ئے
دچہ نن جّن ئسے ٹی اُن
دچہ حنام آ ڈیہہ تینا
بٹنگانے اینو راج ئے؟
اُرک کُل شار ئنا مارتے
بٹنگانے او جینا تے
اُرک خارانی آ خنتے
دا مستوُنگی آ گلشن تے
دا بولانی آ ورناتے
دا خضداری آ تینا تے
دا نوشکل نا او زیباتے
اُرک نی مند ؤ سیاجی آن
اُرک رخشان ؤ ڈی جی آن
اوارو قافلّہک ننتو
خبر تمپک ننے دسکا
روانُن انت ئسے کن نن
دچہ نن پگہ نا رژن ئے
خننگُن دا تہاری ٹی
دچہ نن سہب ئنا سوب آن
تولوک انتظاری ٹی
دچہ اندا سبب تے آن
دونو بشخندہ مننگ ئے
دچہ اندا امیداتون
روانُن قافلہ ٹی دا
دچہ اندا اُمید ئٹ کے
خنن وا پوسکُنو سُہب ئس
دچہ اندا امید ئٹ کے
سکون ئس نن خنون داڑئے
دچہ اندا امید ئٹ نن
دونواُر گام خننگ اُن
دچہ اندا امیدٹ نن
روانُن مہرل آ تیتون
دچہ اندا امیدٹ نن
روانُن مہرل آ تیتون
خضدار ئٹی پاکستانی لشکر اُرا تیا چھاپہ تیٹ اختہ ءِ، دا وختا اُرا تے پٹنگ ءِ و لیڈیز کارندہ غا تا بھلو کچ ئس اوفتتون اوار ءِ۔
حوال تا رد ئٹ خضدار نا علاقہ نیامجو، کھٹان و ارباب کمپلیس نا علاقہ غا تیٹ آپریشن برجاء ءِ۔
حوال تروکا تا رد ئٹ 250 آن زیات لیڈیز کارندہ ہم دا آپریشن ئٹ تُد ءُ و اُرا تے پٹنگ ءُ۔
دائسکان ہچ وڑ ئنا دزگیری تا حوال رسینگتنے و نئے کوالخواک دا رد ئٹ شابیت حوال تسنو۔
تربت ئٹی استو پاکستانی لشکر اُرا ئسے آ چھاپہ خلِسہ اسہ بندغ ئس دزگیر کرسا بیگواہ کرینے۔
شابیتی حوال تا رد ئٹ تربت نا علاقہ چاہ سر ئٹی کاؤنٹر ٹیررازم ڈیپارٹمنٹ (سی ٹی ڈی) چھاپہ خلِسہ ضمیر سرور پنی ءُ ورنا ئسے دزگیر کننگ آن گڈ بیگواہ کرینے۔
بیگواہ کننگوک ورنا نا خاہوت نا پاننگ ءِ کہ نن ئنا 2 بجہ غا سی ٹی ڈی نا کارندہ غاک اُرا ٹی پیہار، اُرا ءِ پٹار و ضمیر سرور ئے دزگیر کرسا بیگواہ کریر۔
