بلوچ یکجہتی کمیٹی نا پارہ غان بلوچ زنک ایسری نا یاتگاری دے آ دالبندین ئٹ راجی مُچی سر سہبی ئٹ ایسر مس۔ دا مُچی ٹی رخشان تون اوار تیوہ بلوچستان آن کیہی ہزار بندغ آک اوار مسر۔
راجی مُچی ٹی بلوچ یکجہتی کمیٹی نا سروک، بنجاہی آرگنائزر ڈاکٹر ماہ رنگ بلوچ، صبغت اللہ شاہ جی، ڈاکٹر صبیحہ، لالا وہاب، سمی دین و ایلوفک تران کریر۔
بلوچ راجی مُچی نا بناء بلوچی راجی شئیر ئٹ بناء مس۔ مچی ٹی بلوچستان نا جتا ہند آتیٹ بلوچ زنک ایسری نا بابت رپورٹس آک مونا ہتنگار۔
ریاست نا پارہ غان دا مُچی ءِ بے سہب کننگ کن تدوکا مُسہ دے آن انٹرنیٹ سروس بند کننگاسس۔ اینو سہب ئنا موبائل نیٹورک تون اوار پی ٹی سی ایل سروس آتے ہم بند کریسہ تیوہ بلیک آؤٹ کننگا۔
داڑان بیدس، تیوہ رخشان ڈویژن ئٹ ہزار آتا کچ ئٹ فورسز آک خوائفنگار، اندن دالبندین و تیوہ چاغی ٹی بندغ آتے جتا ڈول تیٹ بھیم نا گواچی کننگا و تڑی کننگا۔
بی وائی سی پارے کہ غٹ منفی چم آتیان پد ہم تیوہ بلوچستان آن قافلہ تا دروشم ئٹ کیہی ہزار بندغ آتا اوار مننگ ریاست نا بلوچ زنک ایسری پالیسی نا برخلاف بلوچ راجی ریفرینڈم ئس و بلوچ راجی سیوت و ہمکوپئی نا دیہاڑی مثیل اس جوڑ کرے۔
