ضلع خضدار نا تحصیل زہری نا جتا علاقہ تیٹ استو پاکستانی لشکر نا چھاپہ و کیہی بندغ آتے زوراکی ئٹ بیگواہ کننگ نا برخلاف زہری بازار ئٹ شٹرڈاؤن ہڑتال مننگ ءِ اندن تھانہ نا مونا تولوک برانز ہم مریسہ ءِ، داڑان بیدس انجیرہ کراس آ بنجاہی کسر ہم بند کننگانے۔
بنجاہی کسر آ برانز کروک آتیٹ زالبول آک ہم اوار ءُ داڑان بیدس حوال آک اریر کہ سوراب کراس آ ہم سی پیک کسر برانز ئٹ بند کننگانے۔
برانز کروک آتا پاننگ ءِ کہ پاکستانی لشکر عبدالصمد نا مار خالد، علی اکبر نا مار شبیر، محمد اسحاق نا مار زبیر، علی اکبر نا مار فیض، اکبر نا مار عمران، علی نا مار بلال، سرور نا مار اکبر نادر، عبدالخالق لوٹانی نا مار جہانزیب، کریم نا مار فردین، و فہد علی اکبر ءِ دزگیر کریسہ بیگواہ کرینے۔
برانز کروک آک غٹ بندغ آتا آجوئی اسکان برانز برجاء تخنگ نا فیصلہ کرینو۔
اندن بلوچ یکجہتی کمیٹی سوراب پارے کہ زہری آن بھلو کچ اسیٹ بندغ آتے زوراکی ئٹ بیگواہ کننگانے۔ ہرانا سوب آن الس و اوفتا خاہوت آتا پارہ غان زہری ٹی شٹرڈاؤن ہڑتال و کوئٹہ ٹو کراچی سی پیک کسر ءِ سوراب آن خڑک بند کریسہ تولوک برانز مریسہ ءِ۔
او پارے کہ بیگواہ بندغ آتا ویل دے پہ دے آن بھلن مریسہ ءِ۔ نن بندغی حق آتا ادارہ تیان خواست کینہ کہ اوفک بیگواہ بندغ تا آجوئی کن تینا کڑد ءِ سر ایتر و دا بھلا ویل ءِ جہانی تلہ غا پاش کیر۔ نن زہمی مروک خاہوت آتیتون ہمکوپئی نا درشانی کینہ و اوفتا جہد ئٹ اوفتا ہر مننگ کروک کمک ءِ کرون۔
ترجمان پارے کہ سوراب نا الس آن خواست کینہ کہ اوفک بیگواہ بندغ آتا خاہوت آتیتون ہمکوپئی نا درشانی کیر۔
