کیچ ئنا علاقہ کولواہ، رودکان ئٹ شکار کن بروکا عرب آتے رکھ تروک پاکستانی لشکر نا قافلہ غا سلہہ بند بندغ آک جلہو کرینو۔

جلہو ئٹ اسہ بندغ ئسے نا ٹپی مننگ نا احوال ءِ۔

واہم کالخواہ تا پارہ غان جلہو و جانی نسخان نا پک داسکان متنے۔

پاکستان نا اوغانستان تون گنڈوک قبائلی ضلع جاندمی وزیرستان ئٹ پاکستانی لشکر نا پوسٹ ئسے آ جلہو ئٹ ود و کم 16 کارندہ مرگ ئنا گواچی و ہشت ٹپی مسنو۔

پاکستان فوج نا شعبہ تعلقات عامہ آئی ایس پی آر دائسکان دا تدینی آ ہچو بیان ئس شینک کتنے۔ ولے ضلعی بست و بند، پولیس و ایلو ادارہ غاک جاندمی وزیرستان ئٹ ڈیوٹی کروک اوغدہ دار آک تدینی ءِ پک کرینو۔

بست و بند نا اوغدہ دار آتا پاننگے کہ سلہہ بند بندغ آک فورسز نا سیم سری پوسٹ لتا سر ئٹ جمعہ و ہفتہ نا اُرے ننکان جلہو کریر وختس کہ جلہو ئٹ پوسکنا و بھلا سلہہ تے کارمرز کریر۔

پوسٹ آ جلہو ئٹ مرگ ئنا گواچی مروکا تا جون و ٹپی تے خڑک ئنا اسپتال آ سر کننگانے۔

بلوچ وومن فارم نا سروکی ٹی بانک کریمہ بلوچ نا چارمیکو سال دے اڈ تننگا۔ دا مجلس ئٹ زالبول باسک آتیتون اوار زند ئنا جتا تپہ تیان تعلق تخوک بندغ آک بھلو کچ اسیٹی اوار مسر۔

تران کروک آک بانک کریمہ بلوچ نا زند، اونا تعلیم، جہد و قربانی تے درشان کریسہ اونا کڑد ءِ دروت ندر کریر۔

تران کروک آک پاریر کہ شہید کریمہ بلوچ، ہرا بی ایس او آزاد نا اولیکو زالبول سروک مسنے، او تینا جہد ئنا ذریعت ئٹ بلوچ زالبول ءِ بش کرے و بندغی حق آتیکن بھاز خواری کرے۔

مجلس ئٹ تران کروک آک پاریر کہ شہید کریمہ بلوچ نا جہد نہ بیرہ بلوچستان بلکن تیوہ جہان ئٹ مظلوم آ الس کن کسر شونی ئسے۔ اونا قربانیک ننے حق آتیکن جہد ئنا اہمیت نا تعلیم ایترہ۔

یاتی مرے بانک کریمہ بلوچ 2016 ٹی کینیڈا غا ہناسس، ہراڑے جلاوطنی نا وخت آ بندغی حق آتیکن کاریم کرے۔ 2020 ئٹ اونا ناگمان آ مرگ بندغی حق آتا کڑدہ تیٹ اسہ بھلو شرہ اس ودی کرے۔

مجلس نا ایسر ئٹ اوار مروک بندغ آک شہید کریمہ بلوچ نا جہد ءِ برجاء تخنگ نا درشانی کریر۔

دے کہی بلوچستان نا علاقہ راسک ئٹ اُرا ٹی بمب تراک آن زالبول تون اوار مُسہ بندغ کسکر و اسٹ اس ٹپی مس۔

راسک نا علاقہ مرتان ئٹ اُرا ٹی بمب تراک ئٹ سہیلہ آسکانی، زباد آسکانی، عماد الدین و و اوفتا باوہ مراد احمد کسکر۔

حوال تا ردئٹ بمب فوجی خبڑداری آن پد علاقہ ئٹ تما و اودے اسہ اُرا اسیٹی دننگا ہراڑے او ترخا۔

اندا سال اندا ڈول نا اسہ بمب تراک اسیٹی ہرمند ئٹ امین اللہ سالارزئی کسکوسس۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارے کہ ننا سرمچار آک نوشکے و کوئٹہ ئٹ اِرا جتا جلہو تیٹ کوزہ گیر پاکستانی لشکر نا اِرا مخبر تے ٹک کریر۔

ترجمان پارے کہ استو بی ایل اے نا سرمچار آک نوشکے بس اڈہ نا خڑک کوزہ گیر پاکستانی لشکر نا اسہ مخبر ئسے سم کاری کریسہ ٹک کریر۔ پن کروک مخبر گنوک نا دروشم ئٹ نوشکے بازار و ایب کیب ئٹ دژمن لشکر کن مخبری نا کاریم کننگ ئس۔ بی ایل اے نا انٹیلی جنس کڑدہ ’زراب‘ پن کروک مخبر و کمکار آ نظر تخوک ئس ہرا ننکان بج ئنا دیوال آن دژمن لشکر نا بنجاہی کیمپ آ بننگ ہِننگ آ خننگاسس۔

او پارے کہ اسہ پین کارروائی اسیٹی درو شام نماز نا وخت آ بلوچ لبریشن آرمی نا سرمچار آک کوئٹہ ئٹ فیض آباد نا ہند آ گنوک نا دروشم ئٹ مروک پاکستانی لشکر نا اسہ پین مخبر ئسے سم کاری کریسہ ٹک کریر۔ پن کروک مخبر فیض آباد و اوڑتون گنڈوک علاقہ تیٹ دروشم بدل کریسہ دژمن لشکر کن مخبری نا کاریم سر تننگ ئس۔

جیئند بلوچ پارے کہ بلوچ لبریشن آرمی پن کروک ہڑتوم آ کارروائی تا ذمہ واری ءِ ارفک۔

کنا اُست پنّک دا گہوش آن سنگت
اراوخت سنگت کہ شال آن رخصت

ہجم تیرہ یاداک کشکیرہ اُست ءِ
بَرے اُست آ دلبر نما مہر ءُ مابت

اگہ کسّ بے مہر مزاج اٹ خرین ءِ
ننا کٹّپک عاجزی اِنگا عادت

منہ بے خدو پل سلر مون آ سم تا
امو تان بیدس اَرے دیرِ حاجت

ملی ٹی سم ئس تینا تینٹ خلوسک
اَسے وار ورنا تو تَمِؔے نے دا لت

ورنا طلحہ بلوچ

تربت ریلی ٹی بھلو کچ اسیٹ شار و بیگواہ بندغ تا خاہوت آک اوار مریسہ بیگواہ بندغ تا آجوئی نا خواست کریر۔

بلوچستان نا ضلع کیچ نا بنجاہی شار تربت ئٹ اینو اسہ ریلی اس کشنگا، ہراٹی زالبول، چنا و ورنا تا بھلو کچ اس اوار مس، ریلی نا مسخت کماش آ بلوچ آجوئی دوست بندغ، استاد واحد کمبر بلوچ نا یلہ مفننگ، اودے عدالت ئٹ ہتپننگ و منصفانہ ٹرائل تفننگ نا برخلاف اونا خاہوت نا پارہ غان برانز ریکارڈ کننگ ئس۔

ریلی ٹی تربت نا ہندی شاریک، بیگواہ بندغ تا خاہوت آک، واحد کمبر نا خاہوت، و سیاسی تنظیم آتا راہشون و باسک آک اوار مسر۔ برانز کروک آک واحد کمبر تون اوار ایلو بیگواہ بندغ تا عکس آتے ارفیسر و زوراکی نا بیگواہی تا برخلاف نعرہ خلکر۔

واحد کمبر، ہرا بلوچ آجوئی نا تحریک ئٹ اسہ متحرک و شرف مند ءُ شخصیت ئسے نا دروشم ئٹ چائنگک، ءِ 19 جولائی آ ایران نا علاقہ کرمان آن برمتہ کننگا۔ اونا خاہوت و بلوچ آجوئی دوست تنظیم آتا دوبہ ءِ کہ اودے پاکستانی ایجنٹ آتا ذریعت ئٹ برمتہ کریسہ پاکستان آ سر کننگا و داسہ او پاکستانی لشکر نا دزگیر ئٹی ءِ۔

تربت ریلی ٹی واحد کمبر نا مسڑ، مہلب کمبر بلوچ تران کریسہ پارے کہ کنا باوہ بلوچ سیاسی جہد ئنا بشخ مسنے و ساندہ بلوچ حق آتا ہیت ءِ کرینے۔ پاکستان اودے برمتہ کریسہ بیدس قانود بندی کرینے۔

او پارے کہ نن خواست کینہ کہ اودے مونا ہتنگہ و منصفانہ ٹرائل نا وار تننگہ۔

مہلب کمبر بندغی حق آتا تنظیم آتیان خاص وڑئٹ ریڈ کراس آن خواست کرے کہ او دا معاملہ ئٹ اوار تمے و واحد کمبر ءِ سیاسی بندی ئسے نا دروشم ئٹ رکھ فراوان کے۔

دا وخت آ برانز ئٹ اوار مروک آک زوراکی نا بیگواہی تا ایسری و واحد کمبر نا دمدستی یلہ کننگ نا خواست کریر اوفتا پاننگ ئس کہ ریاست نا پارہ غان آجوئی دوست بندغ آتے بیدادی و زوراکی نا ذریعت ئٹ چپ کرفنگ نا کوشست آک حالیت آتے گیشتر خراب کرینو۔

ریلی ٹی ساڑی ایلو بیگواہ بندغ تا خاہوت آک ہم تینا بندغ تا آجوئی نا خواست کریر و دوبہ خلکر کہ عدالت و کمیشن آتا ذریعت ئٹ انصاف تننگ نا جاگہ غا ریاستی بیانیہ ءِ طاغت تننگک۔

ریلی ٹی تران کروک آک پاریر کہ بلوچستان ئٹ برجاء تحریک ءِ ایسر کننگ کن ریاست نا پالیسیک ویل آتے گیشتر ودفینو ریاستی بیدادی نا سوب بندغ آک سلہہ بندغ تنظیم آتا پارہ غا پام کننگ ءُ، ہراڑان ڈیہہ ئٹ گیشتر بد امنی ودی مریسہ ءِ۔

برانز کروک آک ایسر ئٹ واحد کمبر تون اوار ایلو بلوچ سیاسی و وے سیاسی زوراکی ئٹ بیگواہ بندغ تے مونا ہتنگ دمدستی یلہ کننگ نا خواست کریر۔

بلوچستان نا علاقہ قلات، تربت و تمپ ئٹ مروک پاکستانی لشکر و ریاستی کمکار آتیا مروک جتا جلہو تا ذمہ واری ءِ بلوچ آجوئی دوست سلہہ بند گل بلوچ لبریشن آرمی و بلوچستان لبریشن فرنٹ ارفیر۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارے کہ بی ایل اے نا سرمچار آک تربت و قلات ئٹ اِرا جتا کارروائی تیٹ کوزہ گیر پاکستانی لشکر و ڈھکوک ادارہ تا اِرا مخبر و کمکار تے مرگ ئنا گواچی کریر۔

ترجمان پارے کہ بی ایل اے نا سرمچار آک اینو یک بجہ نا وخت آ تربت نا علاقہ میری ٹی کوزہ گیر پاکستانی لشکر نا کمکار عمر نا مار کامران ہند میری ءِ سم کاری کریسہ مرگ ئنا گواچی کریر و اونا سلہہ تے ہم ہلکر۔

او پارے کہ مخبر کامران کوزہ گیر لشکر نا پاننگ آ تدوکا کیہی وخت آن کاریم کننگ ئس و دژمن لشکر نا سروکی ٹی سلہہ بند ٹولی اس جوڑ کریسہ اونا سروکی ءِ کننگ ئس۔ پن کروک سلہہ بند ٹولی میری و ایب کیب ئنا علاقہ ئٹ اُرا تیا چھاپہ، چادر و چار دیوالی نا لتاڑنگ، ورنا تا زوراکی ئٹ بیگواہی تیٹ کوزہ گیر لشکر تون اوار پاش خننگانے۔

ترجمان پارے کہ پن کروک سلہہ بند ٹولی علاقہ ئٹ لشکر کشی و کسر تا تفنگ تیٹ دژمن لشکر نا کمک ءِ کریسہ کرینے اندن دانا بدل ئٹ کوزہ گیر لشکر نا پارہ غان دا ٹولی ءِ نشہ بہا کننگ، داڑیلی و زر ہلنگ نا تیوہ آزاتی تننگانے۔

او پارے کہ بی ایل اے نا انٹیلی جنس کڑدہ ’زراب‘ ریاستی کمکار نا ٹولی تون تفوک ایلو غٹ بندغ آتا چاہنداری و معلومداری تے فراوان کرینے، ہرافتے زوت کامران آنبار اوفتا ایسری اسکان سر کننگو۔

او پارے کہ بلوچ لبریشن آرمی نا سرمچار آک 30 نومبر 2024 آ قلات شار نا سبزی منڈی ٹی اسہ کارروائی اسیٹی پاکستانی لشکر نا ڈھکوک ادارہ ملٹری انٹیلی جنس نا کمکار و مخبر ہدایت اللہ عرف جڑی بوٹی ءِ سم کاری کریسہ مرگ ئنا گواچی کریر۔

ترجمان پارے کہ ہدایت اللہ کوزہ گیر لشکر نا ایم آئی کن بھلو وخت ئسے آن مخبری و کمکاری نا کاریم کننگ ئس اندن قلات ئٹ بی ایل اے نا اسہ جلہو اسیٹی مرگ ئنا گواچی مروک محمود آفریدی نا نیٹورک تون تفوک ئس و بیرہ پِن ئنا ڈیتھ اسکواڈ تون تفوک ئس۔

او پارے کہ ریاستی کمکار ہدایت اللہ قلات شار ئٹ مخبری و کوزہ گیر لشکر کن بندغ بھرتی کننگ تون اوار اُرا تیا چھاپہ و زوراکی نا بیگواہی تیٹ دژمن تون کمک کننگ ئٹ اوار ئس۔ بلوچ کش کاریم تیٹ اوار مننگ آ ہدایت اللہ عرف جڑی بوٹی ءِ بی ایل اے نا سرمچار آک مرگ ئنا گواچی کریسہ اودے ایسری اسکان سر کریر۔

ترجمان پارے کہ بلوچ لبریشن آرمی پن کروک ہڑتوم آ جلہو تا ذمہ واری ءِ ارفک۔

ایلو پارہ غان بلوچستان لبریشن فرنٹ نا ترجمان میجر گہرام بلوچ تمپ ئٹ پاکستانی لشکر آ جلہو نا ذمہ واری ءِ ارفسہ پارینے کہ سرمچار آک اینو بیگہ نا چار بجہ نا وخت آ حمزہی تمپ ئٹ ٹہفوک کوزہ گیر پاکستانی لشکر نا چوکی ءِ پوسکن و بھلا سلہہ تیٹ ٹک کریر ہرانا سوب آن دژمن لشکر ءِ جانی و مالی نسخان تیتون مون تروئی تما۔

او پارے کہ کوزہ گیر لشکر طاغت نا گمان ئٹ مریسہ تینا ایجنسی تیتون اوار لس مخلوق ءِ ٹک کریسہ زوراکی ئٹ بیگواہی نا گواچی کیک، لس آباتی آ جلہو کریسہ مخلوق نا اُرا تے ہُشیک ولے ہراتم وطن نا گواچن آ مڷ آک اونا کیمپ و چوکی تیٹ اوفتیا جلہو کیرہ گڑا دژمن لشکر تون نرّنگ آن بیدس ہچو کسر مفک۔

ترجمان پارے کہ بی ایل ایف دا جلہو نا ذمہ واری ءِ ارفک و آزات بلوچستان نا دوئی کننگ اسکان کوزہ گیر لشکر ءِ ٹک کریسہ کرو۔

بلوچستان نا دریابی علاقہ گوادر آن پاکستانی لشکر اسہ بندغ ئسے دزگیر کریسہ بیگواہ کرینے۔ اندن ضلع کیچ نا بنجاہی شار تربت آپسر آن 10 دسمبر نا نن پاکستانی لشکر نا دو آن مُسہ ایلم آتیان اِرٹ حامد منظور و احسان منظور استو آجو مریسہ اُرا ءِ مسر۔

بلوچستان نا دریابی علاقہ گوادر نا ہند دو بیست پنجاہ نا ہند آن پاکستانی لشکر اسہ بندغ ئسے دزگیر کریسہ بیگواہ کرینے ہرانا چاہنداری پشمبے نا مار ندیم نا پن ئٹ مسنے ہرا دشت کلیرو نا ہندی ئسے۔

حوالکار تا پاننگ ءِ کہ پن کروک بندغ ءِ اینو پیشیم نا سئے بجہ نا وخت آ پاکستانی لشکر جاوید ٹرانسپورٹ نا خڑک آن دزگیر کرینے۔

ایلو پارہ غان ضلع کیچ نا بنجاہی شار تربت آپسر آن 10 دسمبر نا نن پاکستانی لشکر نا دو آن زوراکی ئٹ بیگواہ کننگوک مُسہ ایلم آتیان اِرٹ حامد منظور و احسان منظور استو آجو مریسہ تینا اُرا ءِ سر مسر اندن اوفتا مسٹمیکو ایلم افضل منظور دائسکان بیگواہ ءِ۔

یاتی مرے ہر مُسہ ایلم تے ننکان اسہ وخت آ اُرا غا چھاپہ خلیسہ دزگیری آن پد بیگواہ کننگاسس۔

خاہوت کمشنر مکران ڈویژن، ڈپٹی کمشنر کیچ و بندغی حق آتا تنظیم آتیان افضل منظور نا آجوئی کن کمک نا خواست کرینے۔

بلوچستان ئٹ ادبی مجلس آک و نوآبادیاتی ذہنیت

نوشت: مہر جان
مٹ: مزدک بلوچ

دی بلوچستان پوسٹ

”اگہ نم خیالداری کپرورے گڑا میڈیا ظالم ءِ مظلوم و مظلوم ءِ ظالم پیش کریسہ نمے مظلوم آن خار کننگ ہیل ترو۔“ میلکم ایکس

”ای ہچو قومداری ئسے آ یقین تخپرہ“
”ای ہچو نظریہ ئسے آ یقین تخپرہ“
”انسانیت آن بیدس نہ اسہ قومیت ئس ارے و نہ اسہ نظریہ ئس“ دا ہمو چار لکھوک لوز ءُ ہرافتے اکیڈیمیا نا پن آ بھلا بھلا جامعہ درسگاہ تیٹی بھلا بھلا دانشور آک خوانفرہ، دم دم آ ہیل ایترہ، دا جملہ تا پد ئٹ ڈھکوک مصنوعی خیال آتے رٹہ نا ذریعت ئٹ ذہن آتیٹی تولیفسہ خوانوک آتے اسہ ڈسکورس ئسے نا بشخ جوڑ کیرہ۔ انتئے کہ اسہ کنڈان اوفتا پہہ مننگ نا کچ انداخس مریک، و اوفتیان اُمیت ہم گیشتر کننگ مفک ایلو پارہ غا بطور آلہ پاور پولیٹکس نا ایجنڈا غاتا بشخ جوڑ مریرہ۔ بے شک اوفتا انگریزی نثر گچین مروئے و دن انگا نثر نگاری اشرافیہ تا کنڈ ئنا اخبار آتا زیبائی ہم جوڑ مروک مرو ہرا ہر اسہ ”سی ایس ایس“ امیت وار نا امتحان نا تیاری نا سوب جوڑ مریک، ولے نثر نا تہٹی ڈھکوک ”پاکستانیت“ اسٹ اسٹ نا مون آ پاش مروک مرو۔ کہ کائناتی شاری نا ڈھول ءِ ٹپوکا و امن نا پروپیگنڈہ ءِ کروکا اکیڈیمیا ٹی “قومیت، نظریہ ءِ پد بٹیسہ ”دو قومی نظریہ“ غا اخس سوگو سلوک مریک دا اوفتا یا اوفتیانبار انگا تا نثر نگاری نا کمال ءِ۔

بلوچستان نا اسہ ادبی مجلس اسیٹی پرویز ہود بائی ءِ مہمان خاص خواہفیسہ ہرا وڑ ئٹ خوشی نا چاگڑد ئس جوڑ کننگا دا اسہ نوآبادیاتی ذہن ئنا پاش مثیل ئسے، انتئے کہ او بھاز زو انگریزی نثر، انگریزی پاروڑ، ٹائی پینٹ و داڑان مستی قائد اعظم یونیورسٹی نا مسکوہی پروفیسر و داسا نا ”کائناتی شاری“ آن زو زہمی مریرہ، اندن ایلو پارہ غا پروفیسر ہود بائی سما اف ہرا نیت ئٹ دا فیسٹیول ئٹ ساڑی مننگ کن ہئو کرے۔ دا بابت اونا ذہن ئٹ انت مرو، ولے دا ادبی فیسٹیول آن پد ہرا وڑ ئٹ او اسہ مون ئٹ اسہ کالم ئس ”ریاستی طرح خوانی“ ٹی نوشتہ کرے۔ داڑان، اونا قومیت، نظریہ و بندغ دژمنی صاف مون آ بس، ای مدام ہر وخت داڑے دن انگا تا علمیت و بندغ دوستی نا اصلیت ءِ مون آ ہتیسہ کیوہ اندا سوب آن کنے اسہ دے ئس ہم اسہ ”مولوی“ ئسے نا پارہ غان بے شرفی تون مون تروئی تمتو، بلکہ مدام اندا ”خوانوک لکھوک“ پروفیسرز، لبرلز، روشن خیال تعلیم کروک مخلوق نا کنڈان مکالمہ نا جاگہ غا بے شرفی تون مون تروئی تمانے۔

پروفیسر صاحب ادبی مجلس آن پد ہراتم ففتھ جنریشن وار نا سپاہی جوڑ مریسہ ہرا وڑ بلوچستان نا زی آ کالم ئس نوشتہ کیک (اونا کالم نا اردو بدل ٹی ترمیم کننگانے) صاف صاف تنظیم آتا پن ءِ ہلیسہ اوفتے دہشت گرد تنظیم پاریسہ اصل ئٹ باقی ماندہ بلوچستان ءِ دا تاثر ایتک کہ بلوچستان ٹی ساڑی بلوچ خوانندہ غاک ”دہشتگرد تنظیم“ آتا حق ئٹی افس۔ اولیکو ہیت داڑے نا ”آزادی خواہوکا تنظیم“ آتے پروفیسر صاحب ہرا کھاتہ ٹی دہشتگرد تنظیم پاننگ ءِ؟ انت او ”دو قومی نظریہ“ نا منوک ئسے؟ انت او ”پاکستانیت“ ءِ منّیک؟ انت او ”بندغ دژمنی“ ءِ منیک؟ ہراتم او اسہ پارہ غان دا دعوی ءِ کیک کہ او ہچو نظریہ ئسے نا منوک اف، او ہچو قومیت ئسے منیپک، او بیرہ انسانیت آ یقین تخک گڑا پدا اسہ ہم تنظیم ئسے ہرا اسہ کالونائزر ئسے نا برخلاف مزاحمت کننگ ءِ او امر اودے دہشت گرد تنظیم آتا لڑ ئٹی ایس؟ اندن دانا مدمقابل ٹی کوزہ گیر نا اسہ فوجی افسر اسیتون تینا اوڑدہی نا احوال ءِ اندن تننگ کہ او ”کاکول گریجویٹ“ و ذہین ءُ بندغ اسیتون اوڑدہی کرے“، انت اسہ دھرتی نا نرمزار ئسے دہشت گرد پاننگ و اسہ کوزہ گیر ئسے بیرہ دا خاطران ذہین پاننگ کہ او کاکول گریجویٹ ئسے دانشورانہ بد نیتی ئس اف؟ ففتھ جنریشن وار نا سپاہی پرویز ہود بائی ہرا انسانیت نا داخس بھلو دعوی دار ئسے انت اودے اوڑے چیک پوسٹ آتیا بندغ آتا بے شرفی نظر بتو؟ یا بلوچ آک اوڑکن جوجک ءُ؟ انت اودے اوڑے کالونائزیشن و ریاست نا لوچ ناچ کروکا بیدادی نظر بتو؟ یا بیرہ اسہ گیسٹ روم اسیٹی ٹی بریک نا زیبائیک نظر بسر؟ ولے ریاستی کوری نا داد تو جوڑ مریک کہ دا تیوہ غا حالیت ئٹی اودے اوڑے دھرتی نا نرمزار آتا  ”دہشت گردی“ نظر بس، اندا وڑ صولت ناگی تون ہم دا بابت اسہ وار نا ہیت و گپ مس ہراتم اونا قلم ہم زمین زاد آتیکن ”دہشت گردی“ نا لوز ءِ جاگہ ئسے آن پَٹا کشا، کنے سما اف دافک داخس کتاب و اصطلاح تا باریم ءِ انتئے ارفرہ پیری کیرہ ہرافتا خیال پاکستانی بندغ آتا کامن سینس ئتون وہیک و اوفک ففتھ جنریشن وار نا بشخ جوڑ مریرہ۔ اندا وڑ ئنا اسہ پین بھلو پنی ءُ پروفیسر عاصم سجاد آن ہراتم ای اندا سوج ءِ اسہ ادبی مجلس اسیٹی ہیت و گپ نا وخت آ کریٹ کہ نا کتاب ہرا کامن سینس نا زی آ لکھنگانے اوٹی مخلوق نا کامن سینس نا زی آ تو ہیت مسنے ولے ننا سوال مخلوق نا کامن سینس آن بڑزا پاکستانی اکیڈیمیا نا کامن سینس آ جوڑ مریک ہرافتا پاننگ یا ایلو لوز آتیٹی  اکیڈیمیا و پٹ و پول تون تعلقدار نا بنیاد عقل صریح نا دعوی کیرہ اوفتا کامن سینس ریاستی پروپیگنڈہ آن انتئے پیشن پیشتمپک؟ او شعوری یا لاشعوری وڑ ئٹ ففتھ جنریشن وار ئٹ سپائی نا کڑد ءِ انتئے سر ایترہ؟ انتئے کہ اونا تینا اسہ پیراگراف ئسے نا حوالہ ہم اندا باروئٹ ارے۔ ہراتم او بلوچ قوم نا بابت اسہ کتاب ئسے آ تبصرہ کریسہ اندا ہیت ءِ پین ڈول اسیٹ پاہک کہ ریاست معاملہ غاتے حل کے نہ گڑا داڑان ”دہشت گردی“ ودیک۔
‎
دا ہیت ءِ یات تخنگ نا بکار ءِ کہ اکیڈیمیا ٹی اصطلاح غاک بھاز اہم مریرہ نی اسہ قوم ئسے اسہ قوم ئسے نا دروشم ئٹ امر ہُریسہ اوفتا مزاحمت ہرا وڑ ہُننگک۔ داڑکن نی انت اصطلاح کاریم ئٹ ہتیسہ و او اصطلاح غاک ریاستی بیانیہ ءِ اخس طاغت ایترہ! دا کل نہ بیرہ اکیڈیمیا نا بشخ مریرہ بلکہ ففتھ جنریشن وار ئٹی ریاستی بیدادی کن کاریم تروک ثابت مریرہ۔ ہرا وڑ ہر توفک ارفپروکا پارسا پاننگپک اندا وڑ نی ہر توفک ارفوکا ءِ دہشت گرد ہم پاننگ کپیسہ، خاص وڑئٹ ہمو وخت ہراتم اسہ مزاحمتی تحریک ئس تینا ”پجار، اقدار و آجوئی“ و انسانیت نا بقاء کن تینا مُخ ءِ تفینے۔ ولے اکیڈیمیا ٹی اسہ اندنو ریاستی ڈسکورس ئس جوڑ کننگک ہراڑے راجی جنگ ءِ نسل پرستی و رجعت پرستی تون گنڈنگک یعنی اگہ کس ئس تینا پجار، اقدار و آجوئی نا ہیت کے او ریاستی ڈسکورس نا دائرہ ٹی نسل پرست، رجعت پرست، و دہشت گرد مرو و اندا ڈسکورس ئٹی اگہ کس ئس نا پجار اقدار و آجوئی ءِ توفک نا زور آ پُلے، نا جون تے جشوک کے، نے گوانتا موبے آنبار تینا بیداد جاہ تیٹی ٹارچر کریسہ بندی کے، نا مخلوق ءِ سما مف کہ نی ہراڑکن اُس؟ ہمو بندغ آک ”کاکول گریجویٹ“ و ”ذہین بندغ“ مریرہ۔ دا مُچا ریاستی بیدادی ”اسٹرکچرڈ وائلینس“ نا ردئٹ مریسہ کیک ہراٹی بھلا بھلا دانشور، اہل قلم، پروفیسرز، نوشتہ کار و ایلوفک تینا کڑد ءِ سر تننگ ءُ، ہرا بقول میلکم ایکس نا ”ہرافتا کاریم مظلوم آتیان خار ہیل تننگ ءِ۔“

بلوچستان ٹی ادبی مجلس آک ریاستی ففتھ جنریشن وار اکن جوان ثابت مننگ ءُ۔ ادبی مجلس آک ہرافتیٹ کم و ود شغل میلہ نا ماحول مریک۔ تاکہ پڑھا لکھا پنجاب نا وڑ پڑھا لکھا بلوچستان ودی کننگ مرے السی سیالداری (پبلک ریلیشن شپ) کن اشرافیہ نا اندنو کوالخواہ بَٹنگنگ، یا ریاست نا ہم پیالہ و ہم باخو بیوروکریٹس آتے دعوت تننگ داڑاسکان کہ ”بندغی حق“ آتا بھاز نازرک آ سرحال آتیا ریاست نا وکالت ءِ کروکا وکیل آتے دعوت تننگ اصل ئٹ کوزہ گیر نا ذہنیت نا پلویڑ ئٹی مننگ نا شاہدیک ءُ۔ دا نوآبادیاتی ذہنیت آن جان خلاسی تننگ دا جاگہ نا ادیب و دانشور آتا کاریم ئس ولے داڑے نا ادیب و دانشور آک تینٹ فکری حوالہ ئٹ انداخس سنٹ ءُ کہ او انگریزی نثر، پاکستانیت، ٹائی پینٹ، و بیوروکریٹک ذہنیت ئٹی کالونائزیشن کون آ ساہ کشوک ناجوڑی نا درمان ءِ کننگ خوائرہ۔ غلامی نا داڑان گندہ انگا دروشم پین انت مرو کہ دا جاگہ نا ادیب و دانشور آک ریاستی اشرافیہ نا ساڑی مننگ ءِ تینکن شرف ئس تکرہ۔