بلوچستان نا ضلع قلات ئٹ محمود بلوچ نا زوراکی ئٹ بیگواہی نا برخلاف اونا خاہوت ریلی اس کشا اندن برانز ئٹ کوئٹہ کراچی بنجاہی کسر ءِ بند کریر۔

شابیتی حوال تا ردئٹ قلات نا علاقہ منگچر نا ہند آ بیگواہ محمود بلوچ نا زوراکی ئٹ بیگواہی نا برخلاف اونا خاہوت ریلی اس کشا، ہراٹی زالبول و چنا تا بھلو کچ اس اوار ئس، و اوفک زوراکی نا بیگواہی تا برخلاف ترند نعرہ خلکر۔

ریلی آن پد زالبول آک کوئٹہ کراچی کسر ءِ تولوک برانز کریسہ بند کرینو۔

خاہوت نا ردئٹ محمود ءِ ہژدہ جون 2024 آ پاکستانی لشکر دزگیر کریسہ بیگواہ کرینے ہراڑان پد او گم و گار ءِ۔

خاہوت پارے کہ محمود نا آجوئی اسکان تولوک برانز برجاء مرو۔

بلوچستان نا دریابی علاقہ گوادر آن پاکستانی لشکر اسہ بندغ ئسے دزگیر کریسہ بیگواہ کرینے۔

شابیتی حوال تا ردئٹ دریابی علاقہ گوادر نا علاقہ کوچو کلانچ آن پاکستانی فورسز آک محمد علی نا مار خیر محمد ءِ دزگیر کریسہ نادرست ہند آ درینو۔

پن کروک بندغ ءِ پاکستانی لشکر مُسہ دے مُست دزگیر کرینے۔

علاقائی حوالکار تا ردئٹ مُسہ دے مُست اُرا غا چھاپہ خلیسہ خیر محمد ءِ دزگیر کرینو۔ ہراڑان پد اونا بابت ہچ سماء اف کہ ہراڑے و انت حالیت ئٹی ءِ۔

بلوچستان ئٹ زوراکی نا بیگواہی تا ویل اسہ بھلو ویل ئسے۔ ہڑدے زوراکی نا بیگواہی تا تدینیک رپورٹ مریسہ ءُ۔

بدل مروک اسلامی ریاست

ڈاکٹر مبارک علی | مٹ: برناز بلوچ

دی بلوچستان پوسٹ

مِس ئنا دور ئٹ ریاست جوڑ مس و پدان ریاستی ادارہ غاک جوڑ مسر۔ ریاست اسہ پارہ غان حکمران تپہ ءِ ودی کرے، ہراڑتون طاغت و کالخواہی ئس و ایلو پارہ غان لس بندغ و الس ئس، ہرافتا ٹیکس آتیان ریاست نا پوریاگری تُدنگ ئس۔

دیہاڑ ئٹ ریاست نا ادارہ کیہی راج و تہذیب آتیٹی جتا ءُ دروشم ہلیسہ بسنے۔ دیہاڑ ئٹ اِرا وڑ ئنا ریاست آک مسرہ۔ اسہ ریاست ہمو ئس کہ ہرا تینا جغرافیائی حد اسکان مسکہ و ہمو کچ اٹ ئنگا دائرہ ٹی تینا تہذیب و دود ربیدہ ءِ ودی کریکہ۔ ارٹمیکو ریاست ہمو ئس ہرا فوجی حوالہ ئٹ و تینا ڈیہہ ئنا مڈی (وسائل) تا سوب آن طاغتور مسکہ، و جلہو کرسا ایلو ریاست آتیا قوضہ کریکہ، اوفتا مچ کروکا مال و مڈی تے لٹ و پل کریکہ و اوفتا بندغ تے غلام جوڑ کریکہ۔ مسٹمیکو خانہ بدوش نا لشکر ئس ہرافتا ہچو ریاست اس متوکہ۔ دا تینا دود ربیدہ و قانود نا تہٹی سوگو مسرہ۔ ہراتم دا تپہ غاک یکجاہ مسرہ گڑا تہذیب یافتہ و سوگو ئنگا ریاست آتیا جلہو کرسا اوفتے بھس کریرہ یا ایلو دروشم ئٹ ہندا ریاست آتیٹی آباد مرسا اوفتا تہذیب و تمدن ءِ تینا کریرہ۔ دا رِدئٹ ہراتم نن اسلامی ریاست و اوٹی مروکا مٹی تے ہرینہ گڑا ریاست آتا جنگ و جدل و اوفتا تہذیب آتا اسٹ ایلوڑتون سیالی خننگ ٹی بریک۔

مثیل ئسے نا خاہوت ہراتم اقدار ئٹی بس گڑا ریاست نا کڑدار عربی پجار آ ئس۔ ہرادے ابنِ خلدون ‘Asabia’ نا پن تس۔ داڑان بیدس کہ دا وخت ئٹ بھلو کچ ئسیٹ ایران نا بندغ آک مسلمان جوڑ مسوسر ولے عرب چاگڑد ئٹ اوفتا ہند برابری نا الو۔ ہندا خاطران ہراتم عباسی انقلاب بس گڑا دادے ہتوکاک ایرانی ئسر و عباسی خلافت ئٹ انقلاب نا سوب آن ایرانی و عرب آتا درجہ برابر مس۔ ایرانی تے عرب آتیا دا ارزشت دوئی ئس کہ اوفتے ساسانی عہد نا روایت آتا سما ئس۔ اوفک ریاست نا بست و بند و اونا جتا ئنگا شعبہ آتا کاریم تیان پہہ ئسر۔ ہندا خاطران عباسی دربار ئٹ بیوروکریسی آ اوفتا کالخواہی بس۔ اوکان پد ایرانی اوغدہ دار آک دربار ئٹ ساسانی رواج آتے مونا ہیسر درستی راستی کرفیر و خلیفہ ءِ ساسانی شہنشاہ اس جوڑ کریر۔ (ساسانی سلطنت چارمیکو ایرانی و ارٹمیکو فارسی سلطنت ئس ہرا 226ء آن 651ء اسکان برجا ئس)۔ ایران بھلا دے تے پوسکن زند اس رسینگا ہرافتیٹی خاص وڑئٹ نوروز نا بھلا دے ئس، ہرا ہتم نا مد ئٹی اڈ ترفنگاکہ۔ دا وخت آ مجلس آتا لڑ بناء مسکہ، ساز و زیمل نا محفل آک مسورہ۔ شاعر آتا شعر خوانی مسکہ، محفل آک مسورہ و قصہ پاروک آک ایران نا مست ئنا قصہ آتے بنفیرہ۔ عباسی دور نا اہم ئنگا سفت آک دا ئسر کہ خلیفہ المنصور دارالخلافہ ءِ دَمشق آن بغداد اسکان سر کرے ہرادے دجلہ و فرات نا کرّک آ آباد کننگاسس۔ دانا سوب آن خلافت نا زی آ ایرانی تا طاغت پین گیشتر مس۔ داڑان بیدس کہ عُلماک ایرانی تا برخلاف ئسر ولے اوفتے دائرہ کار تنیا مذہب اسکان ئس و سیاست ٹی اوفتے اوار مننگ کن موقع ہچ وڑئٹ تننگ متو۔ عباسی سلطنت ٹی ہمو وخت ہم مٹی بس ہراتم عرب آک بسر ایران ئٹی آباد مسر۔ داڑے سانگ برامی آ اواری نا سوب اسہ پوسکنو دود ربیدہ اس وجود ٹی بس۔ داسا عباسی دربار ئٹ شاعر و قصہ پاروک آتا مُخ تفی بناء مس۔ ایران نا پنی آ خاہوت بَرمق ٹی ہرا مست بدھ مت ئسر و پدان مسلمان جوڑ مسوسر، دافک عباسی دربار ئٹ ایرانی دود ربیدہ ءِ منّیفیر۔ عباسی ریاست کیہی ڈیہہ تیا جلہو کرسا اوفتے فتح کرے و اوکان ہرا مالِ غنیمت دُو بس او حکمران تپہ نا نیامٹ بشخ مس، ہرانا سوب اوفتا زند آسراتی تیان پر مس۔ ریاست نا خرچہ آتے پورو کننگ کن الس نا زی آ کیہی وڑ ئنا ڈنڈ خلنگا۔ دنڈ نا دا زر خلیفہ نا شان و شوکت آ خڑچ کننگا۔ ولے ہچو ریاست اس ہمو وخت ئسکان سیاسی و زرگزرانی ردئٹ سوگو مفک ہراتم اسکان اونا کھٹیا کن جند ئنا وسیلہ مف۔ مالِ غنیمت و لٹ پلی آ مڈی آن ریاست نا ودّوکا خڑچہ آک وختس ہم پورو متنو۔ داہم دیہاڑ نا اصول ءِ کہ ہراتم حکمران و حکمران تپہ غاک بیدس خواری آن سرمایہ مچ کیرہ، گڑا اوفتا کڑدار ئٹی اخلاقی اقدار پین مفک رہینگپک و اوفک نزور مرسا کارہ۔ ہندا خاطران ہراتم اُمراء تا چم بازی مرے گڑا تینا دژمن آتے مراعات آتیان پدماندہ کننگک یا اوفتا جائیداد آتے ضبط کننگک و اختلاف آک ہنداخس ودّیرہ کہ ریاست نا رکھ ءِ کننگ کن کس رہینگپک۔ ہراتم عباسی ریاست ئٹ دا حالیت ودی مس گڑا دانا توجیل دا کشنگ مس کہ نیام ایشیاء غان تُرک غلام آتے ہتیسہ خلیفہ اوفتے تینا محافظ جوڑ کرے۔ دا ہندا گڑا ءِ پاش کرے کہ خلیفہ ءِ تینا اُمراء تیا باور الو۔ ولے مریک دا کہ اسہ لشکر طاغتور جوڑ مریک گڑا اود ریاست نا ادارہ آتیا قوضہ کرسا سیاسی تسلط ءِ ہتیک۔ داڑ اسکان کہ بھاز وخت او پوسکنا خلیفہ نا تقرر ءِ ہم تینا منشا ئٹ کیک ۔ نوزدہ میکو کرن ئٹ عباسی سلطنت زوال نا گواچی مننگ بناء مس و خلیفہ پوسکنا سیاسی طاغت آتا بُت جوڑ مس ہنا۔ اول آلِ بودیہ غاک بسر و عباسی ریاست آ قوضہ کریر۔ پدان سلجوق آک بسر و حکومت آ قوضہ کریر۔ ترک غلام کہ ہرافک مملوک پاننگارہ دافک مصر ٹی تینا حکومت جوڑ کریر۔ نتیجہ دا مس کہ اسلامی ریاست یا خلافت داسا بشخ و چانٹ مننگ نا گواچی مس۔ نیامی ایشیا ٹی ترک آتا حکومت بس۔ ہندوستان ئٹ ہم ترک سلاطین آک حکمران مسر۔ دے ٹک افریقہ ٹی کیہی آزات مسلمان ریاست آک جوڑ مسر۔ اَندلس ہم کیہی چنکا مسلمان ریاست آتیٹی بشخ مس۔ ریاست آتا دا بشخ مننگ خلیفہ نا حیثیت ءِ بیرہ پن ئناس کریر۔ اونا پن خطبہ ٹی تو بسکہ ولے اونا سیاسی حیثیت بیرہ پن ئنا ئس۔ 1258ء ئٹ ہلاکو خان مغل حکومت ءِ ایسر کرے۔ اوکان پد عالمِ اسلام کیہی ریاست آتیٹی بشخ مس ہرافتیا شاہی خاہوت آک حکمران ئسر۔ داسا دافک جلہو کننگ نا حالیت ئٹی تو الّور۔ ہندا خاطران یورپ نا راج آک اوفتے تینا کالونی جوڑ کریر و ہرا مالِ غنیمت ءِ اوفک دا وخت اسکان مچ کریسر اوفتے یورپین آک لٹ و پل کریر دریر۔ داسا اسلامی ریاست نئے جمہوری ءِ ، نئے شہنشاہی و نئیکہ آمرانہ۔ دا ریاست آتا الس آک نیستی و بینگنی نا گواچی ءُ و تینا بنداوی حق آتیان ہم پدماندہ ءُ ۔

بلوچستان نا ضلع کیچ ئٹ پاکستانی لشکر نا لشکر کشی برجاء ءِ۔

شابیتی حوال تا ردئٹ ضلع کیچ نا علاقہ دشت ئنا مشی آ لڑ سیاہجی و ایب کیب ئٹ لشکر کشی برجاء ءِ اندن جتا ہند آتیا فوجی ٹولیک ہیلی کاپٹر نا ذریعت ئٹ دڑفنگانو۔

ہندی حوالکار آک پاریر کہ علاقہ ئٹ فوجی تا ہن و بر ئتون اوار اوار ہیلی کاپٹر آتا بال ہم برجاء ءِ۔

واہم دا لشکر کشی ٹی دائسکان ہچ وڑ ئنا دزگیری یا جانی نسخان تا حوال رسینگتنے۔

امر بشخندہ کیسہ ۔۔۔۔

عتیق مزار بلوچ

سہب شام دڑد سہیسہ
جغر باٹی است لڑزک
خنک پُر خڑینکان
جوڑک باروک گٹ ہلیسہ
نسخل ئٹ نُسِسا ئُس تینے
دوک کاٹم ٹی سیخا ٹی لڑزسا

امر بشخندہ کیسہ۔۔۔۔۔۔

زرس مل نے بائے دڑد آتہ
شئوگیر کرینوس داخس
تیسہ دلاسہ گنوکا اُستے
بائے تفینس تیسہ لار ملیء
کیدسا ارمانتے شیشپہ شیشپہ
وا تینے تینٹ خن و باہ کرسا
خڑینک شولسہ

امر بشخندہ کیسہ۔۔۔

دیسہ استان وجودے
مُر مڑسا و مُرمٹسا رد ہلیسہ
دا عمر ئٹ سد سال ئنا غم بڈ کیسہ
ورنائی ٹی ریش ءِ پہین کریس
ایکہ
پُٹ کریسہ تینے کُنِسا۔

امر بشخندہ کیسہ۔۔۔

دیر کن دن بے سار اوس
وطن نا مہر ئٹی رد ہلکس مزار،
دیر مسس یاد ئٹی
چونڈسا تینا ہڈاتے کنسا تینا ملی ءِ
تینے دن پُتک ترسا

امر بشخندہ کیسہ۔۔۔

بلوچستان نا ضلع تربت نا علاقہ آپسر آن پاکستانی لشکر مُسہ ایلم بیگواہ کرینے۔

شابیتی حوال تا ردئٹ دہ دسمبر نا نن آپسر ئٹ سکیورٹی فورسز آک چھاپہ خلیسہ مُسہ حقی ءُ ایلم احسان منظور، افضل منظور و حامد منظور ءِ بیگواہ کریر۔

خاہوت اوفتا بیگواہی ءِ پک کریسہ پارے کہ دہ دسمبر آ ننکان فورسز آتا بھلو کچ اس اُرا ءِ گھیرہ کریسہ ہموکان مُسہ ایلم دزگیر کننگ آن پد بیگواہ کریر۔ اوفتا بابت ننے ہچو معلومداری رسینگنگ اف۔

اوفک کمشنر مکران ڈویژن ڈپٹی کمشنر کیچ و بندغی حق آتا تنظیم آتیان پن کروک بیگواہ ایلم تا آجوئی کن کمک نا خواست کرینو۔

پولیس نا ردئٹ کوئٹہ نا علاقہ کلی دیبہ ٹی اراٹی گیس ہننگ نا سوب آن تراک آن پنچ بندغ ٹپی مسونو ہرافتیٹ زالبول و چنا ہم اوار ءُ ۔

ٹپی مروک آتے جانجوڑی کمک کن اسپتال آ درینو ۔

کوئٹہ ٹی یخ ئنا مُد ئنا نیام ئٹ درجہ حرارت منفی 7 اسکان تمنگ کیک ہرانا سوب بندغ آتے گیس سلنڈر نا کمک ہلوئی تمیک۔

کوئٹہ یخ ئنا مُد ئنا بننگ تون گیس لیکج نا تدینیک مونا بننگ ءِ بناء مریسہ کیرہ۔ ہر سال ئٹی سد آتا کچ بندغ آک گیس لیکج آن زیمی مریرہ ۔

ڈیرہ غازی خان ٹی پولیس نا گاڑی تے ارا جتاء بمب تراک آتیٹ ٹک کننگانے۔

اینو سہب ڈیری غازی خان نا علاقہ خان پور ٹی عاظم چوک نا ہند آ نا درست بندغ آک پولیس نا اسہ گاڑی ئسے چغلی بمب جلہو ئٹ ٹک کریر و نرار ۔

کوالخواہ نا ردئٹ تراک ئٹ ارا پولیس کارندہ ٹپی مسونو ۔

ہمو وخت روجھان ٹی زاہد روڈ نا ہند آ پولیس نا گاڑی ءِ بمب تراک ئٹ ٹک کننگا۔

احوال تا ردئٹ پولیس نا گاڑی ءِ ریموٹ کنٹرول آئی ای ڈی تراک ٹی ہمو وخت ٹک کننگا ہراتم او کچائی نا کنڈ آ ہننگ ئس ۔

کوالخواک ہمو ہند ءِ بند کرینو اندن نسخان آتا بابت دائسکان ہچو شابیتی احوال ئس فراوان کتنو  ۔

مگہ راج آتے تدوک وخت نا باروٹ چاننگ نا ضرورت ارے؟

نوشٹ: ڈاکٹر مبارک علی

مَٹ:برناز بلوچ

دا شرہ ہم دیہاڑ آن بس راج آتے تینا تدوک وخت نا باروٹ سرپند مننگ نا خواست ارے یا اف ۔ بھاز آ مورخین آتا خیال ئٹ ہندنکہ تدوک وخت بدل کننگ مفک ہندا سوب آن اودا غور ءُ فکر کننگ نا ہم سواد اف ۔

مورخین آتے ٹی دا شرہ بھلو وخت ئسے آن ساڑی ءِ کہ آیا تدوک وخت راج آتے کن سواد تروک ءِ نسخان تروک۔ دانا فیصلہ تو مننگ کتو ولے دا استدلال ءِ نا ہڑتوما فریقین آک تینا موقف ءِ ثابت کننگ نا تیوہ کوشست کریسہ ءُ۔ لس وڑ ئٹ تدوک نا باروٹ پاننگ مریک کہ اگہ کس اودان سبخ ہلنگ خوائک گڑا او تدوک وخت نا ردی تے وار وار دوہرائفپ۔ دانا مطلب دادے کہ تدوک وخت نا دا سبخ حکمران و صاحب اقتدار تپہ کن ءِ انتئے کہ ہمو ارزشت والو فیصلہ کیرہ۔ دانا سیالی الس تون اف۔ ہندا سوب آن پاننگ مریک کہ الس کن اسہ تاریخی سبخ ئسے نا خواست مریک۔ ولے حکمران تپہ آتیکن ہم دا وارننگ آن گڈ او دیہاڑ آن ہچ ہیل کپسہ و وار وار تدوکا ردی تے دہرائفیسہ کیرہ ۔ مثیال کن سویڈن زار پیٹر نا زمانہ ٹی روس آ جلہو کریسس، ہرا برفباری نا سوب آن بے سہب مس۔ 1812 عیسوی ئٹی نپولین روس آ جلہو کرے و دا ہم ہندا سوب آن بے سہب مس کہ روس ئنا برفباری اودے سرسہب مننگ کن الیتو۔ ارٹمیکو جہانی جنگ ئٹی جرمنی ہم روس آ تینا فوجی گدرا ولے جرمن لشکر ہم روسی برفباری ٹی شکست نا گواچی مس۔ گڑا تاریخ ٹی ہندنو گیشتر تدینی ارے کہ ہرافتان راج آک سبخ ہلتئور و اوفتے وار وار دہرائفسہ کریر۔ حکمران تپہ ہروخت دیہاڑ ٹی ہیرو تیان زہمی مریک و اوفتا رند آتے ارفنگ نا کوشست کیک۔ اسکندر انتئے کہ ورنائی ٹی سرسہبی تے دوئی کریسس، ہندا سوب آن ہر جنرل تینے اسکندر نا دروشم ئٹ بدلنگ خواہاکہ ۔

جولیس سیزر پاریکہ کہ اونا عمر گیشتر مریسہ ءِ و اود اسکندر نا وڑ ہچو کارنامہ کتنے۔ ہرا وخت سیزر اسکندریہ ءِ فتح کرے گڑا اود خاص وڑ ئٹ اسکندر نا قبر آ زیارت کن ہناسس۔ ہندوستان ئٹ علاؤالدین خلجی تینے اسکندر ثانی پاریفیسہ تینا سیالی ءِ اسکندر تون جوڑنگ نا کوشست کریسس۔ ایرانی دیہاڑ ئٹ نوشیرواں عادل بھلو ہیرو ئس مسونے۔ اونا تقلید ئٹی بھاز آ مسلمان حکمران آک عدال نا خطاب تینائی کرینو ۔ دیہاڑ ئٹ ہندنو بھاز حکمران ہم تدینگانو، ہرا تینا ظلم و ستم و بدعنوانی تا سوب آن بدنام مسنو۔ ہمر کہ رومی شہنشاہ کلی گُلا و نیرو۔ گڑا دیہاڑ ئٹ دننگا حکمران آتا مذمت کننگ مریک و اوفا پن خرابی تون جوڑنگ مریک ۔ یورپ نا عہدے وسطیٰ ٹی ہرا وخت چرچ طاغتور مس گڑا دیہاڑ ءِ دین نا روژنائی ئٹ ہُرنگسہ مس ۔ داسا بادشاہ تا جاگہ ءِ مسیح اولیا ہلک۔ ولی فرانسیسی و اگناشیس لوٹے لا نا تقلید کننگ مس۔ دیہاڑ حکمران تپہ آتیکن ہمو پنت آتا اسہ ارزشت والا زریعت اس مس، ہرافتے ٹی پاننگ مس کہ حکمران آتے نیک و پرہیزگار مروئی ءِ۔ رعایا نا فلاح و بہبود کن اصلاحات کننگ مرے تاکہ آخرت ئٹی اوفتے دانا اجر رسینگے۔

ریناساں نا عہد ئٹی دیہاڑ نا باروٹ مورخ و سیاست دان آتا چمشانک بدل مس۔ مثیال کن میکاولی دیہاڑ ءِ اخلاقی قدر آتان آجو کرے و دیہاڑ ٹی ہمو بندغ آتے ہیرو جوڑ کریسہ پیش کرے، ہرا تینا سرسہبی کن مذہبی و اخلاقی قدر آتے لتاڑار۔ روشن خیالی نا دور ئٹی دانشور آک چرچ آتا طاغت و تسلط ءِ پرغار و دیہاڑ ءِ دین آن کشیسہ سیکولر جوڑ کریر۔ ہرانا سوب آن دیہاڑ نا کاریم ئٹ ہتنگ ءِ حکمران تپہ آن بیدس الس ہم کرے ۔ اسہ ارزشت والو سوج اس دا ہم ودی مس کہ مگہ راج آتے تدوک وخت نا خواست ارے یا آخہ؟ مورخ آتا اسہ ٹولی ئسے نا پاننگ ئسک کہ تدوک وخت ایسر مسونے داسا نہ اوٹی ودکی مننگ کیک و نہ اوٹی اسی پوسکنو فکر ئس بننگ کیک۔ ہندا سوب آن راج آتیکن دا المی ءِ کہ او تدوک وخت ءِ است آن دیر انتئے کہ او بیکار مسونے۔ داسا اوفتے تینا پام ءِ ساڑی آ عہد و بروک وخت آ تننگ مرے ۔ ہندا چمشانک نا مخالفت ءِ کریسہ ایلو مورخ آتا پاننگ ئس کہ تدوک وخت آن خنک تر کننگ مفسہ انتئے کہ تاریخی عمل اسہ تسلسل ئسے آن برجا ءِ ۔ داڑان بیدس ساڑی آ وخت ءِ ہم سرپند مننگ مفک انتئے کہ دانا روتہ غاک تدوک وخت تون گنڈوک ءُ۔

ساڑی آ عہد ئٹ ہرا وخت پوسکن آ نظریات آک ودی مسُر گڑا تاریخ ءِ ہم اوفتے ٹی شاغنگ مس ۔ مثیال کن یورپی کالونیل ازم ایشیا و افریقہ نا دیہاڑ ءِ رد کریسہ اوفتا دیہاڑ ءِ تینا چمشانک تون نوشتہ کرے ۔ دا اسہ مسخ کروک ءُ دیہاڑ اس ئسک۔ ہراٹی یورپ نا بھلُنی ثابت کننگا۔ ایشیا و افریقہ نا تہذیب و دیہاڑ ءِ کم قرار تریسہ اوفتے ٹی دا احساس ودی کننگ مس کہ او آزات مننگ ئٹ ہچ دوئی کننگ کپسہ۔ اوفتا سرسہبی کن الّمی ءِ کہ او یورپ نا دیہاڑ و تہذیب نا بشخ مریر۔ وخت ئتو اوار دا نقطہ نظر نا ورندی ٹی ایشیا و افریکہ نا راج آتے ٹی راج پرستی نا جوزہ غاک ودی مسر و اوفک پوسکنو بناء ئسے آن تینا دیہاڑ نا تشکیل ءِ کریر۔ گڑا نن اُرینہ کہ دیہاڑ نا سواد و نسخان آک اریر۔ ولے دیہاڑ راج آتے ٹی شعور ودی کریسہ اوفتے ٹی دا جوزہ ءِ ودی کیک کہ تینا ویل آتا ایسری ءِ تینٹ پٹبو۔ ساڑی آ دور ئٹ دیہاڑ نا بیانیہ بدل مسونے و داسا لس مخلوق نہ یکہ دیہاڑ نا بشخ ءِ بلکن دیہاڑ جوڑ کروکا ہم اریر ۔