بلوچستان نا ضلع قلات ئٹ مُسہ ایلم نا زوراکی ئٹ بیگواہی و اوفتا یلہ مفننگ نا برخلاف خاہوت اسہ وار پدا برانز کریسہ کراچی کوئٹہ کسر ءِ بند کرے۔

شابیتی حوال تا ردئٹ 8 و 7 دسمبر نا نیامئی نن پاکستانی لشکر کلی زکریازئی منگچر ئٹ ماسٹر محمد اسماعیل نا اُرا غا چھاپہ خلیسہ اونا مُسہ مار محبوب علی، ارشاد احمد و مرید احمد ءِ زوراکی ئٹ بیگواہ کرے۔

زوراکی ئٹ بیگواہی نا برخلاف خاہوت داڑان مالو نو دسمبر آ کوئٹہ کراچی کسر ءِ منگچر نا ہند آ بند کرے۔ بست و بند ئتون گپ و تران و باوری ترفنگ آن پد برانز ایسر کننگا۔

خاہوت نا ردئٹ اسسٹنٹ کمشنر و ڈپٹی کمشنر قلات 2 دے نا وخت خواہاسر کہ اوفتا بندغ آتے یلہ کننگو 2 دے تدینگ آن پد ہم اوفتے یلہ کننگتو۔

خاہوت نا ردئٹ بیگواہ مرید احمد بلوچ نا دماخی حالیت جوان اف۔ او اسہ توہ ئسے آن زیات وخت اسکان اسپتال ئٹ دارو درمان مننگ آن پد منہ دے مُست اسپتال آن پیشتماسس۔

خاہوت نا پاننگ ءِ کہ اوفتا یلہ مننگ کن بیوس مریسہ برانز ئٹ کوئٹہ کراچی کسر ءِ بند کرینن۔

اوفک پاریر کہ تینا بندغ آتا یلہ مننگ اسکان برانز برجاء تخون۔ بلوچ راج خاص وڑئٹ منگچر نا الس آن خواست ءِ کہ سختی نا دا ساہت ئٹ خاہوت تون اوار مریر۔

بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پارینے کہ ننا سرمچار آک گوادر ئٹ اینو سہب ئنا اسہ جلہو اسیٹی قوضہ گیر پاکستانی لشکر ءِ ٹِک کرسہ اِرا دژمن کارندہ مرگ ئنا گواچی کریر۔

ترجمان پارے کہ سرمچار آک گوادر نا علاقہ دڑامب ئٹ اکاڈہ نا ہند آ سنگر ہلسہ دژمن لشکر نا اسہ پندی ٹولی ئسے نا کارندہ غاتے ہمو وخت آ ٹِک کریر، ہراتم اوفک قوضہ گیر لشکر نا قافلہ ءِ سیکورٹی تننگ کن سنگر غاتا پارہ غا ہننگ ئسر، جلہو ئٹ اِرا دژمن کارندہ ہمو ہند آ مرگ ئنا گواچی و مسٹ ٹپی مسر۔

او پارے کہ سرمچار آتا اسہ پین ٹولی ئس اربشی مروک دژمن لشکر نا کارندہ غاتے ٹِک کریر، ہراڑان دژمن ءِ پین نسخان ہرفوئی تما۔ بلوچ لبریشن آرمی دا جلہو آتا ذمہ واری ءِ ارفک۔

بلوچستان نا ضلع خضدار ئٹ سلہہ بند بندغ آک سم کاری کرسہ لیوہز رسالدار ءِ مرگ ئنا گواچی کریر۔

احوال آتا رد ئٹ خضدار ئٹ نا درست آ سلہہ بند بندغ آک سم کاری کرسہ لیویز رسالدار حفیظ کرد ءِ مرگ ئنا گواچی کریر۔

پولیس تدینی ءِ پک کریسہ پارینے کہ جلہو کار آک اونا گاڑی ءِ ٹِک کریر ہراڑان او ساہ ءِ توننگ کتو۔

جلہو آن گڈ جلہو کار آک نرنگ ئٹ سرسہب مسر۔

ایلو پارہ غان خاران نا علاقہ گواش ٹوہ ملک نا رہی آ نا درست آ سلہہ بند بندغ آتا سم کاری آن لیویز ملازم بھاز ٹپی مس ہرادے ڈی ایج کیو ہسپتال خاران آ سر کننگا ہراڑے اودے بناہی جان جوڑی کننگ آن گڈ کوئٹہ غا سر کننگا۔

ٹپی آ لیویز ملازم نا چاہنداری ءِ نصیر نا پن ئٹ پاننگو ہرانا ڈیوٹی واشک ئٹ ئس۔

واہم ہڑتوما تدینی تا سوب آک دائسکان سما تمتور نئے کہ جلہو آتا ذمہ واری ءِ دائسکان کس ئس ارفینے۔

بلوچستان نا ضلع پنجگور آن نادرست سلہہ بند گاڑی سوار آک اسہ بندغ ئسے دزگیر کریسہ بیگواہ کرینو۔

شابیتی حوال تا ردئٹ دہ دے مُست نادرست سلہہ بند گاڑی سوار آک اسہ بندغ ئسے دزگیر کریسہ بیگواہ کرینو۔

بیگواہ مروک بندغ نا چاہنداری حیر محمد نا مار عنایت نا پِن ئٹ مسنے۔

ہندی حوالکار آتا ردئٹ پن کروک بندغ ءِ دہ دے مُست نادرست سلہہ بند بندغ آک برمتہ کریسہ دریر ہراڑان پد او بیگواہ ءِ۔

حوالکار تا ردئٹ برمتہ کروک آتا تعلق سرکاری مُخ تف سلہہ بند ٹولی ڈیتھ اسکواڈ آن ءِ۔

خیال ئٹ مرے درو ہم پروم آن اندا وڑ گاڑی سوار آک طاہر نا مار فدا ءِ برمتہ کریسہ دریر۔

بلوچستان نا دریابی علاقہ گوادر ٹی پاکستانی لشکر نا کارندہ آتے سلہہ بند بندغ آک اسہ جلہو اسیٹ ٹک کرینو۔

جلہو اینو سہب دئے بجہ نا وخت گوادر نا علاقہ دڑامب ٹی اکاڈہ نا ہند آ مسونے ۔

ذرائع ٹی بی پی ءِ پارے کہ جلہو ئٹ لشکر نا پند آ مروک کارندہ آتے ہمو وخت ٹک کننگا ہرا وخت او قافلہ تا رکھ اکن تینا ہورک انگا سنگر آتا پارہ غا ہننگ ئسر ۔

جلہو ٹی کارندہ آتا جانی نسخان ارفنگ نا بابت دائسکان کوالخواک شابیتی احوال فراوان کتنو۔

یات مرے کہ بلوچستان نا گیشتر علاقہ آتا ڈول گوادر شار و ایب کیب ئٹ بلوچ سلہہ بند گل آک کاروائی کریسہ کرینو۔

برجاء سال گوادر شار ئٹ پاکستانی ڈھکوک ادارہ آتا دفتر ءِ بلوچ لبریشن آرمی اسہ بھلو جلہو اسیٹ ٹک کرے۔

پن کروک جلہو بی ایل اے نا مجید بریگیڈ کرے ہراٹی ہشت ”جندندر“ بشخ ہلکر اندن بی ایل اے نا ترجمان جیئند بلوچ نا پاننگ ئس کہ دا جلہو تنظیم نا ” آپریشن زرپہازگ “ نا چارمیکو بشخ ئنا رِدئٹ کننگا ۔

پاش مرے کہ آپریشن زرپہازگ نا ردئٹ بی ایل اے نا مجید برگیڈ داکان مالو گوادر ٹی مسہ جلہو کرینے ہرافتیٹ سی پیک و گیشتر پروجیکٹس آتون تفوک چینی سرمایہ کار ، انجینیئر آتے ٹک کننگانے ۔

بلوچستان و کراچی آن زوراکی ئٹ بیگواہی نا گواچی 9 بندغ یلہ مسنو۔

حوال آتا رد ئٹ اِرا دے مست کراچی آن زوراکی ئٹ بیگواہی نا گواچی مروکا چار بلوچ خوانندہ دودا الٰہی، گمشاد مرید، معراج بلوچ، مزمل بلوچ و اسماعیل و ابراہیم اِرا دے پد یلہ مسنو۔

اوفتا یلہ مننگ ءِ اوفتا خاہوت پَک کرینے۔

پن کروک خوانندہ غاتے 8 دسمبر آ کراچی آن اسہ فلیٹ ئسے آن دزگیر کرسہ زوراکی ئٹ بیگواہ کننگاسس۔ اوفتا زوراکی ئٹ بیگواہی ءِ بلوچ یکجہتی کمیٹی تون اوار خوانندہ غاتا خاہوت آک کریسر۔

داڑان بیدس، تدوکا جمعہ نا ننکان بلوچستان نا ضلع کیچ آن پاکستانی لشکر نا دو آن زوراکی ئٹ بیگواہی نا گواچی چار بندغ آن مسہ بندغ ءِ یلہ کننگانے۔

کیچ آن رسینگوکا احوال آتا رد ئٹ زوراکی ئٹ بیگواہ عبدالسلام، یاسر و سالم یلہ مسنو، واہم حاجی حاصل دائسکان یلہ متو۔

ایلو پارہ غان بلیدہ غان زوراکی ئٹ بیگواہی ازیر امید و عبد الرحمان قدیر درو یلہ مرسہ تینا اُرا تیا سر مسر، ورنا تے تدوکا تو ئنا 18 تاریخ آ پاکستانی لشکر پٹانی زامران امید نا اُرا غان ہرفیسس۔

بلوچستان نا ضلع پنجگور ئٹ گاڑی سوار سلہہ بند بندغ آک اسہ بندغ ئسے دزگیر کریسہ بیگواہ کرینو۔

احوال آتا رد ئٹ درو پنجگور نا علاقہ پروم دز گومازی نا ہند آ صرف گاڑی اسیٹی تولوک سلہہ بند بندغ آک فدا ولد طاہر ءِ اسہ باغ ئسے آن برمتہ کرسہ نا درست ءُ ہند ئسے آ دریر۔

ہندی حوالی تا رد ئٹ پن کروک بندغ ہمو باغ ئٹ مزوری کننگ ئس کہ سلہہ بند بندغ آک اودے برمتہ کریر۔

ہندی حوالی تا مستی پاننگے کہ برمتہ کروک آتا تعلقداری سرکاری مخ تف سلہہ بند ٹولی تیان ءِ۔ ہرافتے بلوچ راج دوست آک لس وڑ ئٹ ڈیتھ اسکواڈ پارہ۔

یاتی مرے کہ بلوچستان ئٹ راج دوست آتا دوبہ ءِ کہ پاکستانی فورسز راجی جنز ءِ کاؤنٹر کننگ کن سلہہ بند ٹولی جوڑ کرینے ہرا بلوچ آتے برمتہ و کھسفنگ تون اوار جتاء وڑ ئنا چاگڑدی گندئی تیٹ ڈوہ دار ءُ۔ وختس کہ پاکستانی لشکر اوفتے بسٹ موکل تسنے۔

بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پارینے کہ ننا سرمچار آک کوہلو ٹی قوضہ گیر پاکستانی لشکر نا اسہ پوسٹ ئسے جلہو ئٹ ٹِک کریر۔ دا جلہو ملخدو ننکان نوئے شم ئٹ لونڈ نا ہند آ ٹہیفوک قوضہ گیر لشکر نا اسہ پوسٹ ئسے آن کننگا۔

ترجمان پارے کہ سرمچار آک راکٹ و ایلو بھلا سلہہ تیٹ دژمن لشکر ءِ ٹِک کریر، اِرا دژمن کارندہ مرگ ئنا گواچی و ود و کم چار ٹپی کریر۔ بلوچ لبریشن آرمی دا جلہو نا ذمہ واری ءِ ارفک۔

بیگواہ ماسٹر احمد بادینی نا مسڑ لبابہ بادینی، زائیفہ ثمینہ بادینی، مار صفوان بادینی و مروان بادینی نوشکی پریس کلب ئٹ پریس کانفرنس کرسہ تران پاریر کہ ماسٹر فرید احمد بادینی اسہ شرفدار ءُ شاری اسیتون اوار اوار فرض پورو کروک ءُ استاد ئسے ہرادے 13 اکتوبر 2024 آ ننا اُرا کلی بدل کاریز آن ننکان دو بجہ نا وخت آ درزن آ سلہہ بند وردی و سادہ پج بینوک آ بندغ آک ہرفسہ تینتون اوار دریر ہرا دائسکان بیگواہ ءِ۔

او پارے کہ ماسٹر فرید احمد بادینی گورنمنٹ مڈل اسکول کلی بدل کاریز ئٹ ایس ایس ٹی انچارج نا وڑ خذمت سر تننگ ئس ہرانا ہچو سیاسی و مذہبی پارٹی ئسے آن ہچو تعلقداری ئس اف و نئے کہ متنازعہ انگا کاریم تیٹ ڈوہ دار ءِ بلکن او اسہ کماش ءُ بندغ و شوگر و آئی بلڈ پریشر نا مرض ئنا گواچی ءِ درمان رسینگپننگ و خیالداری نہ کننگ نا سوب آن اونا زند ءِ بھاز بھیم ئنا مون تس ءِ۔

او پاریر کہ نن ماسٹر فرید احمد بادینی نا خاہوت اونا رکھوک یلہ مننگ کن تینا فراد ءِ جتاء ادارہ و شخصیت آتے اسکان سر کرینن ولے دائسکان ننا فریاد ءِ بننگتو ننا دے و نن نا کوشست و منت آک سواد تتوس و نئے کہ ننا باوہ ماسٹر فرید احمد نا دُراخی نا باروٹ ننے معلومداری تننگا ہراڑان نن اُرا نا غٹ بندغ آک بھاز فریشانی و ذہنی بیدادی نا گواچی ان۔

او پاریر کہ اینو نن میڈیا نا وسیلہ ئٹ اختیار دار و بندغی حق آتا علمبردار تنظیم آتیان دڑد ئٹ خواست کینہ کہ اوفک ماسٹر فرید احمد بادینی نا دمدستی یلہ مننگ کن کڑد سر ایتر اگہ خدا کپ اوڑان ردی ئس مسنے گڑا انصاف نا خواست آتے پورو کرسہ اودے عدالت آ ہتتنگے اگہ او ہچو ردی ئس کتنے گڑا ننا گندہ غا حالیت آ ترس کنیسہ ماسٹر فرید احمد بادینی ءِ مونا ہتنگے تانکہ ننا اُرا نا خوشیک شرفدار آ کماش نا سروکی ٹی اسہ وار ئس ولدا بحال مریر و کماش اسہ استاد ئسے نا وڑ اسہ وار ئس ولدا ڈیوٹی و فرض سر تننگ کہ۔

بلوچستان نا ضلع کیچ و حب چوکی آن پاکستانی لشکر کہیی بندغ آتے دزگیر کرسہ بیگواہ کرینے۔

احوال آتا رد ئٹ ضلع کیچ ئنا علاقہ تمپ بالیچہ نا ہند آ اینو سہب ئنا ترند ءُ تراک ئسے نا توار بِننگا ہراڑان گڈ فورسز علاقہ ءِ گھیڑ ئٹ ہلسہ کہیی بندغ آتے دزگیر کرے۔

دائسکان بیگواہ مروک آتیان اسٹ نا چاہنداری ماسٹر استاد داؤد نا پن ئٹ مسنے۔ ہندی حوالی تا پاننگے کہ فورسز کہیی بندغ آتے دزگیر کرے ایلوفتا چاہنداری دائسکان مننگ کتنے۔

ایلو پارہ غان حب چوکی آن احوال ءِ کہ درو دیگر نا وخت آ حب چوکی آن تربت ڈنڈار نا ہندی وسیم بلوچ ولد مراد بخش ءِ پاکستانی لشکر دزگیر کرسہ بیگواہ کرینے۔

داڑے ناصر آباد آن احوال ءِ کہ درو ننکان فورسز سراج ولد رحیم بخش پنی ءُ بندغ ئسے بیگواہ کرینے۔