ضلع کیچ نا علاقہ تمپ و عبدوئی آن اِرا جون خننگانو۔
تمپ ئنا علاقہ میر آباد روڈ آن اسہ گاڑی ئسے آن اسہ جون اس خننگانے، بست و بند جون ءِ دوئی کریسہ پٹ و پول بناء کرینے۔
اندا وخت ئٹ عبدوئی سیم آن درو بیگہ نا اسہ بندغ ئسے نا جون خننگانے ہراڑا سُم تا نشانک خننگانو۔
واہم دائسکان ہڑتوم آ جون تا چاہنداری مننگ کتنے۔
یاتی مرے منہ دے مالو بلیدہ گلی آن زوراکی ئٹ بیگواہ تینا بندغ تا آجوئی کن کاریم کروک نوید پنی ءُ ورنا ئسے نا جون گاڑی ئسے آن خننگاسس۔
بلوچستان نا ضلع قلات آن پاکستانی لشکر مُسہ ایلم ءِ دزگیر کریسہ بیگواہ کرینے۔ خاہوت اوفتا زوراکی ئٹ بیگواہی نا برخلاف تولوک برانز کریسہ کراچی کوئٹہ بنجاہی کسر ءِ بند کرے۔
شابیتی حوال تا ردئٹ استو سئے بجہ غا پاکستانی لشکر قلات نا علاقہ منگچر ٹی چھاپہ خلیسہ مُسہ بندغ ءِ دزگیر کریسہ بیگواہ کرینے۔
بیگواہ مروک ایلم تا چاہنداری مرید احمد، ارشاد احمد و محبوب احمد ولد محمد اسماعیل نا پِن تیٹ مسنے۔
خاہوت ایلم تا زوراکی ئٹ بیگواہی نا برخلاف تولوک برانز کریسہ کراچی کوئٹہ کسر ءِ منگچر نا ہند آ ہر وڑ ئنا ہن و بر اکن بند کرینے۔
خاہوت نا خواست ءِ کہ اوفتا بندغ آتے آجو کننگہ نئے گڑا تولوک برانز برجاء مرو۔
بلوچستان نا ضلع کیچ آن پاکستانی لشکر اِرا بندغ دزگیر کریسہ بیگواہ کرینے۔
بیگواہ مروک ہڑتوم آتا چاہنداری ابراہیم نا مار وارث و بوھیر نا مار گلاب نا پِن تیٹ مسنے۔
ہڑتوم آتے پاکستانی لشکر تدوکا دے تیٹ ضلع کیچ نا علاقہ دشت باہوٹ چات آن دزگیر کرینے ہراڑان پد ہڑتوم آک بیگواہ ءُ۔
ایلو پارہ غان بلوچستان نا دریابی شار گوادر آن شش دسمبر نا ننکان پاکستانی لشکر نا دو آن بیگواہ خوانندہ زاہد مصطفیٰ یلہ مریسہ تینا اُرا ءِ سر مسنے۔
پن کروک خوانندہ گوادر یونیورسٹی ٹی ڈیٹا سائنس نا خوانندہ ئسے ہرادے پنچ گاڑی آ تالان سادہ و وردی بینوک پاکستانی لشکر نا کارندہ غاک گوادر ئٹ اوفتا اُرا نا چار دیوالی آن درکسہ بیگواہ کریسر۔
خاہوت نا ردئٹ زاہد ءِ ارفنگ وخت آ اونا خن تیا پٹی تفیسہ مُسہ دے اسکان اسہ وڑ اونا زی آ بیدادی کریر۔ اونا خن تا پٹی داسہ نیم گھنٹہ اس مالو ننے تننگ وخت دڑفنگا۔ پگہ یونیورسٹی ٹی اونا پیپر ءِ و اونا حالیت پیپر تننگ نا وڑ ئٹ افٹ۔
ایڑے پنجگور آن حوال رسینگانے کہ تدوکا دے تیٹ بیگواہ کننگوک چار انگا بیگواہ تیان مُسٹ یلہ کننگانو ہرافتیٹ وسیم ہاشم، عبدالشکور صالح، خلیل صدیق اوار ءُ، اندن ارشاد رفیق دائسکان بیگواہ ءِ۔
کالج اسٹوڈنٹس کونسل خاران نا پارہ غان اسہ اہم ادبی مجلس اس اڈ تننگا، مجلس نا مُسہ بشخ ئسر ہرافتیٹ تران، مشاعرہ و کتاب مُچی اوار ئسر۔
مجلس نا اولیکو بشخ ئٹ ڈاکٹر اے آر داد ”ادب انت ئسے“ نا سرحال آ تران کرے و پروفیسر زاہد دشتی خلقی ادب ءِ تینا تران نا سرحال جوڑ کرے۔
تران آتیان پد ڈاکٹر شکور زاہد پن کروک مجلس ءِ مونیٹر کننگ نا ذمہ واری سر تس۔ تران آتیان پد سوج و ورندی نا بشخ بناء کننگا۔
مجلس نا ارٹمیکو بشخ ئٹ مشاعرہ مس ہرانا اسٹیج ذمہ واری ءِ قیوم سادگ سر تس و مشاعرہ ئٹ کالج نا خوانندہ تیتون اوار خاران نا پنی آ غٹ شاعر آک تینا شئر تے خوانار۔
اندن مسٹمیکو بشخ ئٹ خاران کتاب کاروان نا پِن ئٹ اسہ کتاب مُچی اس خلنگاسس ہراٹی ادب، سیاست، دیہاڑ و ایلو سرحال آتیا کتاب آک ساڑی ئسر۔
کالج اسٹوڈنٹس کونسل خاران نا دا مجلس ئٹ خاران نا اسکول و کالج نا خوانندہ تیتون اوار غٹ ادب دوست و علم دوست بندغ آک اوار مسر۔
بلوچ لبریشن آرمی نا ترجمان جیئند بلوچ میڈیا غا شنگ کروک تینا بیان ئٹی پارے کہ ننا سرمچاراک دکی ٹی کوزہ گیر پاکستانی لشکر نا اسہ پوسٹ ئسے جلہو ئٹ ٹک کریر۔
ترجمان پارے کہ سرمچارک استو ننکان دکی ٹی کوزہ گیر پاکستانی لشکر ءِ اسہ جلہو ئسیٹی ٹک کریر، ہرا نا وختا دشمن لشکر نا پوزیشن آ گرنیڈ لانچر ئٹ کیہی گولہ خسنگا۔ جلہو ئٹ پاکستانی لشکر نا چار کارندہ مرگ ئنا گواچی و کم آن کم شش ٹپی مسر۔ کہوکا کارندہ غا تیان اِرٹ نا چاہنداری سپاہی ابوسفیان سکنہ بہاولپور و سپاہی احسان اللہ سکنہ رحیم یار خان نا پن تیٹ مسنے۔
او پارے کہ جلہو آن گڈ ایل اے نا سرمچارک ڈٹ بندی نا رد ئٹ تینا رکھوک جہہ تیا سر مسر و سار آن ہنوک دشمن لشکر جتا کنڈ آتیا تینا مون سمکاری کرے و مارٹر گولہ خسا۔
جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک۔
بلوچستان نا ضلع کیچ آن پاکستانی لشکر چھار بندغ دزگیر کننگ آن گڈ بیگواہ کرینے۔
شابیتی حوال تا رد ئٹ دشت ئنا علاقہ شولیگ ئٹی ننکان یک بجہ نا وختا پاکستانی لشکر چھاپہ خلِسہ چھار بندغ دزگیر کرسا بےڈس ءُ ہند ئسے آ درے۔
دزگیری آن گڈ بیگواہ مروکا تا چاہنداری حاجی حاصل، عبدالسلام ولد حاجی حاصل، یاسر ولد عبداللہ و سالم ولد قادربخش نا پن تیٹ مسنے۔
حوال تروکا تا رد ئٹ پاکستانی لشکر اُرا تا دروازہ غا تے پرغِسہ اوفتے بیدادی نا گواچی کرے۔
سوگو فوجی کاروائیک – ٹی بی پی سرگپ
پاکستانی آرمی چیف جنرل عاصم منیر نا سروکی ٹی اسلام آباد ئٹ پاکستانی لشکر نا ہشتاد و چار میکو فارمیشن کمانڈرز کانفرنس اڈ تننگا و بلوچستان ئٹ برجاء لشکر کشی تا پامداری ئٹ جاچ ہلنگا۔ میڈیا حوالکار تا ردئٹ عاصم منیر کانفرنس ئٹ فوج ئنا کور کمانڈر آتے بلوچ لبریشن آرمی و اونا جند ندر کڑدہ مجید بریگیڈ نا برخلاف سوگو کارروائی تا فرمان تسنے۔
بلوچستان ئٹ لشکر کشی اِرا دہائی آن زیات وخت آن برجاء ءِ، پاکستانی لشکر ”انسداد انسرجنسی“ پالیسی نا ردئٹ بلوچ چاگڑد نا ہر شعبہ غان تعلق تخوک بندغ آک خاص وڑئٹ سیاسی باسک و خوانندہ غاک ہزار آتا کچ ئٹ زوراکی ئٹ بیگواہ و کسفنگانو و جنگی حالیت آتا سوب آن تیوہ بلوچستان آن لکھ آتیٹی بندغ آک باہوٹی زند گداریفنگ آ بیوس ءُ۔
اِرا دہائی ئٹ سد آ لشکر کشیک کننگار ولے اوفتا دنو نتیجہ پیشتمتور و بلوچ آجوئی کن کاریم کروک سلہہ بند گل آک سوگو مریسہ پاکستان و پیشن ملکی سرمایہ کاری نا ڈٹ بندی تے خاص وڑئٹ چین ئنا مفاد، ہرافتے او استعماری ڈٹ بندی گوندرہ، آتیا بھلو جلہو کننگ ئٹ سرسہب مسنو۔ بلوچ آجوئی نا جنگ ئتون تفوک سلہہ بند گل آک جدت ئٹ بریسہ کمپلیکس جلہو تا دروشم ئٹ بلوچستان ئٹ پاکستانی لشکر نا رٹ ءِ ایسر کننگ نا پارہ غا روان ءُ۔
بلوچستان ئٹ سوگو لشکر کشی تیان زوراکی نا بیگواہی و بیدس عدالت خون تا تدینی تیٹ ودکی مرو و ریاستی تادی نا برخلاف برجاء مزاحمت ئٹ ہم ترندی برو۔ اِرا دہائی تدینگ آن پد ہم پاکستان نا مقتدر طاغت آک دا پہہ مفسہ کہ لشکر کشی تیان بلوچ آجوئی نا جنگ ایسر مننگ کپک، اندن دا لشکر کشی تیٹ بھازی لس بندغ آک زہمی مریرہ، ہرا اوفتا اُست آتیٹ خار و ریاست مخالف جوزہ غاتے بش کیک و اوفک گیشتر آجوئی دوست گل آتا پارہ غا پامدار مریرہ۔ اندا خاطران ہر بھلا پاکستانی لشکر کشی آن پد جنگ سلنگ آن پد گیشتر ترند مریک۔
خوانندہ غاک اوتھل ئٹ زوراکی نا بیگواہی و کوئٹہ ئٹ جامعہ ٹی فورسز آتا ساڑی گری نا برخلاف تولوک برانز کننگ ءُ۔
لسبیلہ یونیورسٹی آف ایگریکلچر، واٹر اینڈ میرین سائنسز اوتھل نا خوانندہ تا تینا سنگت بیان دُر بلوچ نا آجوئی کن برانز اینو ششمیکو دے ہم برجاء مس برانزیک یونیورسٹی آن پیشن تولوک برانز کننگ ءُ ہراٹی بیان در بلوچ نا باوہ ہم اوار ءُ و مار ئنا دمدستی آجوئی نا خواست کننگ ءِ۔
اوتھل برانز کروک خوانندہ غاک دا وخت آ کلاس و امتحان آتیان بائیکاٹ کرینو اوفتا پاننگ ءِ کہ یونیورسٹی بست و بند برانز آن پد ہم اوفتے زور ئٹ امتحان تننگ کن بیوس کننگ ءِ۔
برانزیک تدوکا دے تیٹ سیمینار اس ہم اڈ تسر ہراٹی بلوچستان ئٹ زوراکی نا بیگواہی تا ویل ءِ پاش کننگا۔
یاتی مرے بیان دُر بلوچ، ہرا پن کروک یونیورسٹی نا زرعی شعبہ نا خوانندہ ئسے، منہ دے مُست اوتھل بازار آن تینا پین مُسہ سنگت تون اوار پاکستانی لشکر نا دو آن زوراکی ئٹ بیگواہی نا گواچی کننگاس پدان اونا سنگت آک یلہ کننگار ولے بیان در دائسکان بیگواہ ءِ۔
بیان در نا باوہ و خوانندہ سنگت آک اونا زوراکی ئٹ بیگواہی و زند ئنا بابت خُلیس نا درشانی کریسہ خواست کرینو کہ اودے یا گڑا یلہ کننگہ یا عدالت ئٹ ہتنگہ۔
اوفک پاریر کہ ہراتم اسکان اوفتا خواست پورہ متنے، اوفتا تولوک برانز و بائیکاٹ نا لڑ برجاء مرو۔
ایلو پارہ غان بولان میڈیکل کالج نا خوانندہ تا برانز دہمیکو دے ہم جامعہ نا بنجاہی در ئنا مونا برجاء ءِ، برانزیک کالج و ہاسٹل آتا دوارہ ملنگ و دزگیر خوانندہ تا یلہ کننگ نا خواست کننگ ءُ۔
خوانندہ غاک دوبہ خلکنو کہ ہاسٹل آتیا سکیورٹی فورسز آتا بے قانودی کوزہ ئٹ پولیس و کالج نا بست و بند اوار ءُ۔
بولان میڈیکل کالج نا خوانندہ غاک پارینو کہ اوفتا برانز حق آتا جہد ئسے، و اوفک اسہ زور اسیٹی بریسہ پدی مروفس خوانندہ غاک خبڑدار کریر کہ اگہ اوفتا خواست آک پورہ کننگتور گڑا برانز ءِ تیوہ بلوچستان اسکان تالان کننگو۔
برانزی تا پاننگ ئس کہ دا برانز ہمو وخت اسکان برجاء مرو ہراتم اسکان ہاسٹلز و کالج آن فورسز آتے مُر کریسہ اوفتے ملنگتنے و دزگیر خوانندہ تے یلہ کننگتنے۔
برانزیک کوئٹہ کراچی کسر ءِ تفسہ کسر ءِ ہر وڑ ئنا ہن و بر کن بند کرینو۔
مستونگ کلی کاریزسور و کاریزنو تھ نا زالبول و چناک گیس و بجلی نا لوڈ شیڈینگ آن تنگ مرسہ ڈی سی چوک آ زالبول آک کوئٹہ کراچی کسر ءِ ہر وڑ ئنا ٹریفک کن بند کرینو۔
تولوک برانز نا سوب کسر نا ہڑتوما پارہ غا گاڑی تا بھلو چر ئس لگوک ءِ ہراڑان کہیی گاڑی و مسافرک گٹ مسونو، مسافر آتے ہم سختی تا مون تس ءِ۔
برازیک خواست کرینو کہ علاقہ ٹی گیس و بجلی نا بحالی کن دمدستی گام ارفنگے آخہ گڑا اوفک تینا تولوک برانز ءِ بنجاہی کسر آ برجاء تخور ہرانا غٹ ذمہ واریک مستونگ کالخواہ تیا مرور۔
بلوچستان نا ضلع پنجگور آن پاکستانی لشکر چار بندغ دزگیر کریسہ بیگواہ کرینے۔
بیگواہ مروکا تا چاہنداری خلیل صدیق،عبدالشکور صالح،ارشد رفیق و وسیم ولد محمد ہاشم نا پن تیٹ مسنو۔
پن کروک بندغ آتے درو پاکستانی لشکر پنجگور نا تحصیل پروم آن دزگیر کرینے۔ ہراڑان گڈ اوفک بیگواہ ءُ۔
ہندی حوالی تا رد ئٹ بیگواہ مروکا غٹ بندغ آک پوریا گر ءُ و تیل ئنا کاروبار تون تفوک زمیاد نا ڈرائیور ءُ۔
