بلوچستان نا دریابی علاقہ گوادر و پسنی آن پاکستانی لشکر مُسہ بندغ ءِ دزگیر کرسہ بیگواہ کرینے۔

بیگواہ مروکا تا چاہنداری منور ولد قرار، زکریا ولد اللہ بخش و زاہد مصطفیٰ نا پن تیٹ مسنے۔

بیگواہ مروکا تیان منور ءِ ملخدو ننکان پاکستانی لشکر پسنی نا علاقہ ببر شور ئٹ چھاپہ خلسہ دزگیر کرینے۔

ذکریا ءِ تدوکا دے تیٹ دیگر نا وخت آ گوادر نا علاقہ گٹی ڈھور آن دزگیر کننگا ہراڑان گڈ ہڑتوما تا باروٹ سما تمتو کہ اوفک ہراڑے و ہرا حالیت ئٹ ءُ۔

اندن گوادر آن استو پاکستانی لشکر خوانندہ زاہد مصطفیٰ ءِ زوراکی ئٹ بیگواہ کرینے ہرا گوادر یونیورسٹی ٹی ڈیٹا سائنس نا خوانندہ ئسے۔ پن کروک ورنا ءِ استو پنچ گاڑی آ تالان سادہ پُچ و وردی بینوک پاکستانی لشکر نا کارندہ غاک گوادر ئٹ اوفتا اُرا نا چار دیوالی آن درکسہ بیگواہ کرینو۔

خاہوت نا ردئٹ دا وخت آ اُرا نا بندغ آتیا کارندہ غاک بیدادی کریر۔ مزاحمت کننگ آ اُرا والا تے توفک نا بٹ ئٹ خلکر و سم کاری ہم کریر۔

ہندی صحافی عین قادر پارینے کہ تدوکا منہ ہفتہ غان ریاستی ادارہ تا پارہ غان گوادر و ایب کیب نا علاقہ تیٹ بیدس آئینی گام و شاری تا بنماسی حق آتا پاش لتاڑنگ تون اوار زوراکی نا بیگواہی تیٹ ودکی مسنے۔

او خواست کرینے کہ زوراکی نا بیگواہی تا بے بندغی کارروائی تے دمدستی بند کننگہ۔ زاہد مصطفیٰ تون اوار غٹ بیگواہ بندغ تے دمدستی یلہ کننگہ۔

ایلو پارہ غان خضدار نال ئنا علاقہ کوڑاسک فوجی کیمپ آن برجا سال 10 اکتوبر آ بیگواہ مروک مسلم ولد اختر پنی اوس بسیمہ غان یلہ مس۔

وختس کہ 3 جنوری 2024 آ عیسی نگری بروری روڈ کوئٹہ غان زوراکی ئٹ بیگواہ امام جان ولد صوالی ھوشاب نا ہندی، ہرا بی ایم سی نرسنگ ہسپتال ئٹ نرسنگ میل آفیسر ءِ، یلہ مرسہ اُرا غا سر مس۔

بلوچستان نا علاقہ تربت ئٹ نا درست آ سلہہ بند بندغ آک سم کاری کرسہ اسہ بندغ ئسے مرگ ئنا گواچی کرینو۔

مرگ ئنا گواچی مروکا بندغ نا چاہنداری گہرام ولد الہی بشخ نا پن ئٹ مسنے۔

سم کاری نا تدینی تربت نا علاقہ نودز نا ہند آ ا مس۔

دا جلہو نا ذمہ واری بلوچ لبریشن آرمی ارفے۔ بی ایل اے نا ترجمان جیئند بلوچ پارے کہ گہرام پاکستانی لشکر و ڈھکوک ادارہ غاتیکن زَر اکن کاریم کریکہ۔

جیئند بلوچ پارے کہ گہرام مخلوق آ زوراکی نا لشکر کشی تیٹ پاکستانی لشکر تون کمکار ئس اندن نشہ بہا کننگ تون اوار ایلو چاگڑدی بدکڑداری تیٹ اوار ئس۔

بیست و ہشت نومبر نا ننکان نوشکی ٹی بی ایل اے نا چھاپہ مار کاروائی نا وخت آ دزگیر مروکا تعمیراتی کمپنی نا شش کارندہ یلہ مسر۔

لیویز یلہ مننگ ءِ پک کرسہ پارینے کہ شش پوریا گر نوشکی نا علاقہ زرین جنگل آن یلہ مسنو۔

یاتی مرے کہ بلوچ لبریشن آرمی نا سرمچار آک 28 نومبر آ نوشکی ٹی مسہ جتاء کاروائی تیٹ بنجاہی کسر آ سنیپ چیکنگ، لیویز فورس نا سلہہ و تعمیراتی کمپنی نا کارندہ غاتے تینتون اوار دریسر۔

بی ایل اے نا ترجمان میڈیا ءِ پاریسس کہ بی ایل اے نا سرمچار آک زرین جنگل نا ہند آ کسر آ ٹہیفوک قوضہ گیر پاکستان نا لیویز فورس نا اسہ چوکی ئسے قوضہ ٹی ہلسہ چوکی نا کارندہ غاتے دزگیر کریر۔ سرمچار آک لیویز فورس نا سلہہ و ایلو فوجی مڈی تے ہم تینا قوضہ ٹی ہلکر واہم کارندہ غاتے بلوچ مننگ نا سوب آن پدی رکھوک یلہ کننگا۔

او پارے کہ ہندا وخت آ سرمچار آتا اسہ جتاء ءُ ٹولی ئس کسر آ اسہ گھنٹہ غان زیات گاڑی تا سنیپ چیکنگ کرے وختس کہ سرمچار آتا مسٹمیکو ٹولی اسہ لُٹ و پل کروکو کمپنی ئسے نا پروجیکٹ آ کاریم کروکا پنچ کارندہ ءِ دزگیر کریسہ و کمپنی نا مشینری ءِ خاخر ترسہ بھس کریر۔

دے کہی بلوچستان نا علاقہ زاہدان ئٹ ملخدو بیگہ نا نادرست سلہہ بند گاڑی سوار آک سم کاری کریسہ اسہ بلوچ زالبول وکیل ئسے کسفیر۔

شابیتی حوال تا ردئٹ 3 دسمبر 2024 آ ملخدو بیگہ نا زاہدان ئٹ بوزرگ مہر اسٹریٹ آ نادرست سلہہ بند جلہوکار آک سم کاری کریسہ اسہ بلوچ زالبول وکیل ئسے ٹک کریر۔

حوالکار تا دا جلہو ہمو وخت مس ہراتم او تینا گاڑی آن پیشتمنگ ئس و کار گاڑی سوار آک اوڑا سم کاری کریسہ اودے ٹپی کریر۔

سم کاری نا تدینی ٹی زالبول کاٹم ئٹ چار سم لگنگ آن بھاز ٹپی مسوسس و اودے زاہدان نا امام علی اسپتال آ دننگا ہراڑے او دراخ متو و ساہ تس۔

پن کروک زالبول نا چاہنداری ”سمعیہ حسین ملازئی“ نا پن ئٹ مسنے، ہرانا سن کم و ود 37 سال ءِ۔ اصل ئٹ سراوان نا علاقہ گیشگ نا ہندی ئسے ہرا دا وخت زاہدان ئٹ تولوک ئس۔

جلہو ملخدو بیگہ نا شش و نیم نا وخت آ مس، دائسکان جلہو کار تا چاہنداری و تدینی نا سوب آک سماء تمتنو۔

نوشکی ٹی مڈی دروکا گاڑی تیا جلہو، لیویز فورسز ہمو ہند آ سر مس۔

بلوچستان نا ضلع نوشکی ٹی استو یک بجہ نا وخت آ مل ڈیڈار نا ہند آ نا درست آ سلہہ بند بندغ آک مڈی دروکا گاڑی تے جلہو ئٹ ٹِک کرینو۔

ہندی حوالی تا رد ئٹ سلہہ بند بندغ آک اِرا گاڑی نا ٹائر آتے ترخفیر و بے ڈس ءُ ہند ئسے آ نرار۔

اینو سہب ئنا پن کروک جاگہ غا لیویز فورسز سر مس۔ تدینی ٹی ہچ وڑ ئنا نسخان نا احوال اف۔

جلہو نا ذمہ واری ءِ دائسکان کس ارفتنے واہم داکان مالو نوشکی تون اوار مچا بلوچستان ٹی مڈی دروکا گاڑی و کمپنی تے بلوچ آجوئی دوست آتا پارہ غان جلہو آتا مون تروئی تمانے۔

بلوچستان نا علاقہ قلعہ عبداللہ ٹی نا درست آ بندغ آک لیویز فورسز نا گاڑی ءِ بمب جلہو ئٹ ٹِک کرینو۔

احوال آتا رد ئٹ قلعہ عبداللہ ٹی نادرا آفس نا مون آ لیویز فورس نا سونج رونج کروک آفسر نا گاڑی ءِ بمب تراک ئٹ ٹِک کریر۔

سونج رونج کروک آفسر ءِ ہمو وخت آ ٹِک کرینو ہراتم او دفتر آن پیشتمسہ اُرا غا ہننگ ئس۔ سونج رونج کروک آفسر تون اوار اِرا لیویز کارندہ گاڑی ٹی تولوک ئسر۔

ڈی پی او شاید جمیل بازئی نا پاننگ ئس کہ تراک نادرا دفتر نا خڑک آ سلوک موٹر سائکل ئٹ مس۔تراک ئٹ لیوہز آفیسر و گن مین مچھٹ ٹپی مسنو۔

قلات آن پاکستانی لشکر نا دوتیان بیگواہ سید حسین شاہ و اونا مار اختر شاہ نا خاہوت نا برجائی تون 18 گھنٹہ نا برانز آن پد سید حسین شاہ آجو کننگا ۔

کوالخواک استو اختر شاہ ولد سید حسین شاہ نا یلہ کننگ نا یخین تس ہراڑکن اینو قلات بست و بند تون اوار خاہوت نا اوڑدئی مرو ۔

استو بست و بند و خاہوت نا نیام ئٹ ہیت و گپ آن پد برانز ایسر کریسہ آر سی ڈی روڈ ہر وڑ ئنا ہن و بر کن یلہ کننگا ۔

اختر حسین شاہ نا خاہوت نا پاننگ ئس کہ نن قلات نا باشعور الس نا بھاز منتوار ان کہ او دا سخت انگا وخت ئٹ ننا توار جوڑ مریسہ ننتون اوار سلیسر و سید حسین شاہ ءِ آجو کرفیر کہ سید اختر شاہ زوت ننا نیام ئٹ مرو نئے تو مُستی تینا صلہ ءِ کرون۔

پنی آ برطانوی حوالکار ادارہ ’بی بی سی‘ 2024 کن تیوہ جہان نا زہم تخوک 100 زالبول تا سالانہ لڑ ءِ شینک کرینے۔

دا لڑ ئٹ گٹ مروک خلاباز سنیتا ولیمز، بدکاری آن رکھنگوک جیسیل پیلی کوٹ، اداکاری شیرون اسٹون، اولمپک ایتھلیٹس ریبیکا اینڈریڈ و ایلیسن فلیکس، شئر پاروک رے، نوبل امن داد دوئی کروک نادیہ مراد، فنکار ٹریسی ایمن، دیر و تہو نا مہم چلفوک کرسٹا اولیڈو و بندغی حق آتا علمبردار ڈاکٹر ماہ رنگ اوار ءِ۔

بی بی سی زہم تخوک زالبول آتیٹ اوار ڈاکٹر ماہ رنگ بلوچ نا بابت نوشتہ کرے کہ بلوچستان آن تعلق تخوک ماہ رنگ بلوچ اسہ میڈیکل ڈاکٹر و سیاسی باسک ئسے۔

”بلوچستان ئٹ گمانی زوراکی نا بیگواہی تا برخلاف مروک برانز آتیٹ تیوہ پاکستان نا سد آ زالبول تیٹ ماہ رنگ بلوچ ہم اوار ءِ“

”انصاف کن اونا خواست ہمو وخت مونا بس ہراتم اونا باوہ ءِ گمانی وڑئٹ 2009 ئٹی سکیورٹی سروس افسر آک ہلکر ہرا اِرا سال آن پد بیدادی نا نشان آتیتون کہوک خننگا۔“

ودیک نوشتہ کننگا کہ ”2023 نا ایسر ئٹ، بلوچ سد آ بلوچ زالبول تا سروکی ٹی 1,000 میل (1,600 کلو میٹر) مارچ آ بنجاہی شار اسلام آباد نا پارہ غا تینا خاہوت نا بابت معلومداری نا خواست کرے۔ اودے سفر نا وخت آ اِرا وار دزگیر کننگا۔“

”اوکان پد میڈیکل ڈاکٹر تینا بندغی حق آتا گروپ بلوچ یکجہتی کمیٹی BYC نا تلہ غا اسہ پنی ءُ باسک اس جوڑ مسنے۔ بندغی حق آتا شعبہ ئٹ اونا کاریم ءِ بش مروک راہشون تا TIME 100 NEXT 2024 نا لڑ ئٹ منّنگا۔

”اسہ بھلو وخت ئسے آن برجاء راج دوست شورش نا ندارہ ءِ شان تروک بلوچستان نا برانزی تا پاننگ ءِ کہ اوفتا بندغ آتے پاکستان نا سکیورٹی فورسز آک بغاوت نا برخلاف کارروائی نا وخت آ دزگیر کریسہ کسفینو۔ اسلام آباد نا کوالخواک دا دوبہ غاتے منیپسہ۔“

بی بی سی نا 100 زہم تخوک زالبول تا لڑ ئٹ اوار مننگ آ ڈاکٹر ماہ رنگ بلوچ تینا خیال آتے درشان کریسہ پارے کہ کنے بی بی سی نا 100 زالبول تا لڑ ئٹ اوار مننگ آ بھاز خوشی و شرف محسوس مننگ ءِ دا نہ بیرہ کنا بلکن بلوچ زالبول، بیگواہ بندغ تا خاہوت، و بلوچ حق آتا باسک آتا اشتماعی جہد ئنا چاہنداری ءِ۔

او پارے کہ بلوچ الس بھاز انگا تادی تیان پد ہم انصاف و بندغی حق آتیکن تینا جہد ءِ برجاء تخانے دا ہیت مظلوم تپہ تیکن امیت نا ڈیوا ءِ روشن کرینے و دا ہیت ءِ پاش کرینے کہ ظلم ئنا برخلاف مزاحمت ہی طاغت ءِ۔

ماہ رنگ بلوچ دا داد ءِ بیگواہ بندغ تا لمہ غاتا و بلوچ الس نا پِن آ کرے، ہرا زوراکی نا بیگواہی، بیدس عدالت خون، و ایلو ظلم آتیتون مون تننگ آن پد ہم چپی نا جاگہ غا جہد ءِ اہمیت تننگ ءُ۔

اونا ردئٹ دا بلوچ لمہ غاتا حوصلہ و مزاحمت بندغی حق آتیکن برجاء سفر ئٹ کل آتیکن گمر نا ہیت ئسے۔

او پین پارے کہ بی بی سی نا منتوار، ہرا ننا توار ءِ طاغت تس و ننا جہد ءِ منّا۔

بلیدہ نا ہندی ورنا ئسے پاکستانی لشکر دزگیر کریسہ تینتون اوار درینے ۔

بیگواہ کننگوک بندغ نا چاہنداری امتیاز ولد نذیر بلوچ نا پن آن مسونے ۔

خاہوت نا ردئٹ پن کروک ورنا ءِ پاکستانی لشکر تدوکا دے تیٹ کوئٹہ آن بلیدہ آ بریسہ بیگواہ کریر و نا درست ہند آ دریر ۔

خاہوت امتیاز بلوچ نا یلہ کننگ نا خواست کریسہ پارے کہ اودے آجو کننگے ۔

بلوچ اسٹوڈنٹس ایکشن کمیٹی نا پارہ غان تربت ئٹ اڈ تروک اِرا دے ئی صباء دشتیاری لٹریری فیسٹول ایسر مس۔

اِرا دے ئی مجلس نا ارٹمیکو دے بساک نا مسکوہی سروک ڈاکٹر صبیحہ بلوچ، چیئرمین شبیر بلوچ و ایلوفک تران کریر اندن صحافت نا سرحال آ صحافی کیّا بلوچ ہم ویڈیو لنک نا وسیلہ ئٹ تران کرے۔

مجلس نا ارٹمیکو دے جدیدیت و بلوچی ادب نا سرحال آ پینل ڈسکشن اس ہم اڈ تننگا ہراٹی ورنا غا نوشتہ کار راشد حسرت، سالم مجید، رضوان فاخر و ایلوفک تینا خیال آتا درشانی کریر۔

مجلس ئٹ بلوچی بولی نا پنی آ فلمی اداکار احسان دانش عرف ماسی دلیان گروپ جوان وڑئٹ اداکاری نا درشانی کریسہ مجلس ئٹ اوار مروکا تا داد ءِ ہلکر۔

مجلس ئٹی مشاعرہ و شئر و باگل نا بشخ آک ہم اوار ئسر ہراڑے بلوچی بولی نا پنی آ شاعر آک تینا شئر تے پاریر اندن شئر و باگل نا بشخ ئٹ پنی آ کلاسیکل شئر پاروک شاکر زامرانی، بلوچی و براہوئی نا شئر پاروک عبدالخالق فرہاد، وہاب بلوچ، نوشین قمبرانی و ایلوفک تینا فن ئنا درشانی کریر۔

مجلس ئٹ ورنا تیان بیدس جتا خواننگ جاہ تا خوانندہ غاک و جتا تپہ تیان تعلقداری تخوک بندغ آک بھلو کچ اسیٹی اوار مسر۔