کتاب شاری گوریلہ
جاچ: حمّل بلوچ
( گڈیکو بشخ)
دی بلوچستان پوسٹ
شاری گوریلہ کتاب اِرا ہندن ءُ بندغ اتا لوز اتا مچی کو ہرا تینٹ ہم انقلابی جہان اٹ تینا کڑد ءِ ادا کننگ اٹی ءُ یا کرینو۔ کارلوس مارگیلہ شاری گوریلہ تا بنداؤ ءِ تخا و جہان ءِ پہہ کرے کہ تینا دژمن ءِ امر نزور کبو، ہندن اینو الماس بلوچ عملی پِڑ آ گام گیچ کریسا بلوچ قوم انا ورنا تے دا کتاب نا وسیلہ اٹ کلہؤ ایتک کہ دژمن مَش ئس اف مِش ئسے ہرادے ڈِریفنگ کن دنو چمبازی کبو ہراکہ دا کتاب اٹ نوشتہ ءُ۔
دا کتاب ئس افک بلکن آجوئی کن بلوچ قوم ءِ چسپان کننگ نا اسہ کسر شونی ءُ راہبند ئسے۔
کتاب اٹ مستی نوشتہ کیک کہ اسہ شاری گوریلہ ئسے بائد کہ تینا گڑاس بنائی ترجیحات جوڑ کروئی ءِ دنکہ دژمن ءِ تینا چمبازی تیا ئٹ ہبکہ کننگ، ہرا علاقہ ٹی گوریلہ ہندی ءِ او علاقہ نا ہر کوچہ گلی تے خوڑتی اٹ پہہ مننگ کہ ہرا گلی ہرا کوچہ ٹی پیش تمک، ہرا گلی ہراڑے بند مریک و ہمو علاقہ نا ہرا علاقہ امر و ہراوڑٹ ءِ۔ ہندن گوریلہ تا چسپانی بائد دژمن نا سپاہی تیان تیز مریر، معلومداری ٹی گوریلہ نا مزغ و چم آک بائد زیات مریر کہ اودے ڈیہہ اتون اوار دژمن نا ہر چال آن واخب مروئی ءِ۔
نوشتہ کیک کہ اسہ شاری گوریلہ ئس بائدے ہندن ناگمان جلہؤ کے کہ دژمن ہبکہ فریشان مرے کہ انت مننگ ءِ، دژمن نئے جلہؤ کار ءِ چاہک، نئے جلہو نا وخت ءِ و نئے کہ گوریلہ نا طاغت آن واخب مریک۔ دژمن آ ہندن جلہؤ مریک کہ دژمن ءِ سُرِنگ نا ہم موقع دو بفک انتئے کہ دا بیرہ شاری گوریلہ کو ہراکہ جلہو نا جاگہ، وخت و نوعیت نا فیصلہ ءِ کیرہ۔
جہس منہ پین چمبازی تا زکر کریسا نوشتہ کیک کہ شاری گوریلہ بائدے جلہؤ کننگ آن پد دژمن نا کسر تے تورنگ، جعلی ءُ ٹریفک رش کش جوڑ کننگ تانکہ دژمن نا سپاہی تا لاری تے سلفِنگ مرے یا تو دژمن نا لاری تا ٹئیر آتے سمکاری کریسا ترخفِنگ مرے تانکہ او تینا جاگہ ءِ ہلیر و گوریلاک تینا ہند آ سر مریر۔ داڑکن گڑا گوریلہ تا تینا علاقہ مخلوق کسر و ٹریفک نا بابت معلومداری تخنگ الم ءِ، و دژمن کن رد ءُ معلومات تننگ و اودے سٹی پٹی آ گڑاتیٹی دِکہ تننگ تانکہ او تینا مون نت دو خلے ولے گواچن آ سر مف۔
ہرا شار اٹی کہ گوریلہ ہندی ءِ ہموڑے تینا سنگت و ہم فکر آتے درست کننگ تون اوار غدار و جاسوس ءِ چاہنگ و اوفتا برخلاف گام ارفنگ، مخلوق ءِ اوفتا گواچن آن واخب کننگ و جاسوسی و انٹیلی جنس نا برخلاف گروپ و بندغ جوڑ کننگ مرے کہ دافتا گام تے کم کننگے۔
مستی جہس شاری گوریلہ تا جلہو و کاریم تا گڑاس گچینو مسخت نوشتہ کریسا لکھک کہ دافتا ہر ہر گام و عمل نا پد اٹی اسہ راجی و انقلابی ءُ فکر ئس مریک۔ دنکہ دژمن کن اسہ خطرہ ہس جوڑ مننگ، دژمن نا سیکورٹی ءِ نزور کننگ، دژمن نا سپاہی تے اوار و منظم مننگ کن ہلیپننگ، ہندن ءُ تجربہ ہلنگ کہ بروکا ہر انقلابی دافتا پد اٹ کائے، راجی تحریک ءِ موقع تننگ کے نزوری ٹی جلہؤ اتیان بچے و دژمن نا ہوش ءِ گوریلاک تینا چنکا بھلا جلہو تیٹی چھپ کیر و داکان بیدس مش تیٹی ہندی گوریلہ تے کمک کننگ کہ اوفتے منظم و سوگؤ مننگ کن وخت رسینگے۔
ہندن شاری گوریلاک ہرا مشن آ کاریم کیرہ اوفتا چندی وڑ ڈول اریر دنکہ بھسکاری، چھاپہ خلنگ، کوزہ گیری، جَپ کریسا جلہو کننگ، گلی کوچہ تیکن مہاڑو و چمبازی، برانز و حکومتی کاریم تیٹی اڑند مننگ، نرنگ، سلہہ ڈوہنگ و سلہہ تے کوزہ کننگ پلنگ، کوزہ گیری، تینا سنگت اسیر آتے آجو کننگ، دژمن نا سپاہی تے ضرورت مس تو پاہو تننگ، زراعت، ٹرانسپورٹ سرکاری گودام و دفتر تیتون اوار استحصالی کمپنی و دائے تا بھسکاری، اغواء کننگ، ضرورت نا وخت آ دہشت تالان کننگ، سلہہ بند جہد اتے تالان کننگ کن ڈہ تننگ تون اوار اسہ شاری گوریلہ ئسے نا زمواری ءِ کہ فکر فلسفہ و اعصاب اتا جنگ ہم کے۔
اسہ شاری گوریلہ ئسے نا کل آن گچین انگا کاریم بینک آتا سفائی کننگ و تینا ضرورت آتے ہمو زر اتیان پورؤ کننگ مرے تانکہ حکومت نا زرگرانی ادارہ غاتے بھلو نسخان رسینگے۔ دا ہم دژمن نا اعصاب آ بھلو زیم ئس تخو۔
اعصابی جنگ اسہ بھلو اہمیت والو گڑاسے ہراٹی شاری گوریلاک دژمن نا مزغ اتیٹی تینا خلیس ءِ شاغسا اودے ہندن ہبکہ کیرہ کہ اودے سوچ خلنگ نا وار رسینگپ۔ اعصابی جنگ اٹی میڈیا، ٹیلی فون و ہمو وخت انا سہولت اتے بکار کریسا تینا کاروائی تا اعلان کننگ یا بھاز وخت دروغ نا معلومات شینک کننگ تانکہ دژمن نا ہوش ءِ پین جاگہ چھپ کریسا گوریلہ تینا گواچن آ کاریم ءِ کے۔ حکومت و ادارہ تے بے جارات کننگ کن دروغ نا ہوکا شاغنگ و حکومتی کارندہ تا ردینک و کرپشن آتے مخلوق نا مون آ چرچا کننگ و اوفتے بے سہب کننگ مرے۔
دا کل آن پک مریک کہ اسہ شاری گوریلہ ئسے بھاز چست و چالاخ مروئی ءِ کہ اونا مزغ دژمن آن کیہی گناہ زیات مستی کاریم کے۔ اوڑتون بھاز آ مہارت آک مریر کہ اوفتے ضرورت نا وخت آ بکار کے۔ او تینا ٹپی آ سنگت آتے بچفنگ کن ڈاکٹر ہم مرے و اوفتے درمان کروک آ جاہ اسکان سر کننگ کن ڈریور و ایمبولینس ہم مروئی تمک تو مننگ کے۔ ہندن ہر گوریلہ نا زمواری مریک کہ حکومتی بے لیمجاڑی تے وسیلہ جوڑ کریسا مخلوق نا حمایت ءِ تینتو ہلنگ۔ او بائد کوشست کے و مخلوق ءِ حکومت آن بدبیسہ کریسا تینے آن خڑک کیتہ۔
داسا اسہ شاری گوریلہ ئسے نا کاریم کننگ نا چم آک انت مننگ کیرہ اوفتے بیان کینہ ہرافتیان گڑاس داواڑ ءُ۔
نوشتہ کیک کہ ہندن کہ اسہ دیؤ ئس تینا نت انا بھلا ہور انا سوب آن چاہنگک ہندن اسہ شاری گوریلہ ئس تینا مہارت، اصول و چمبازی تیتنون وفاداری نا بنیات آ چاہنگک۔
شاری گوریلہ نا کروک آ چمبازی و طریقہ غاک دنکہ پٹ و پول کریسا معلومات اسہ جاہ کننگ، غور فکر کریسا چسپان مننگ، ہندی جاہ ءِ تینا اسہ فوجی ئسے نا وڑٹ غور فکر کریسا پہہ مننگ، دژمن نا ہِن و بر نا کسر، جاہ و وخت اتا معلومداری تخنگ، نقشہ جوڑ کننگ، مشین و ایلو سلہہ تا بکار و استعمال ہیل کننگ، جلہؤ و کاروائی ئسے کن تینا ہم کوپہ غا سنگت آتے ہشاری اٹ اوار کننگ، سرسہبی آن پد مطالعہ و کاریم کننگ، ضرورت نا وخت پدی ہننگ، چٹ ہلنگ مُچ مننگ، کاروائی آن گڈ تینا کروک آ شاھدی تے ایسر کننگ، ٹپی سنگت آتا خیالداری و درمان کن گام گیچ کننگ
ایسر، اسہ شاری گوریلہ ئسے نا ہفت ہندنو ردینک کہ کتاب ئٹ ہم ساڑی ءُ وا دا ردینک آک بیرہ شاری گوریلہ اخا کہ تیوہ غا تحریک و سنگت آتے نسخان تننگ کیرہ، ہموفتا زکر ءِ کینہ تانکہ بلوچستان نا جتا جتا ہند اتیا ساڑی شاری گوریلاک دا ردینک آتے پہہ مریسا دافتیان پدی مریر و تینا و راجی تحریک نا رکھ ءِ کیر۔
ہمو ہفت انگا ردینک آک دا وڑ ءُ۔
1) تجربہ مفننگ و ہندا سوب آن تینے تونگر و دژمن ءِ نزور تکیسا سٹی ءُ گام ارفنگ
2) اسہ شاری گوریلہ ئسے نا ارٹمیکو بھلا ردینک تینا کاریم جلہؤ و سرسہبی تیا لاف خلیسا ہر جاگہ اوفتا ڈہ تننگ کہ ای دن کریٹ
3) مسٹمیکو ردینک خودنمائی و تینے زورآور و ایلوفتے نزور و کم سمجھنگ ءِ کہ تینا کاریم تا طاغت نا سوب آن کور مریسا اسہ شاری گوریلہ ئس دژمن نا طاغت و چم آتے گیرام کیک
4) چارمیکو دا کہ تینا طاغت ءِ وس آن گیشتر تکیسا ہندن ءُ کاریم کننگ ہرا اونا وس اٹ افس گڑا دا اودے بھاز بھلو نسخان ایتنگ کیرہ
5) شاری گوریلہ ئسے نا پنچمیکو ردینک جلد بازی و گڑاتے زوت آن زوت کننگ نا ءِ کہ وخت و حالیت نا اندازہ خلپرنگ و تینے نسخان تننگ
6) ششمیکو ردینک کہ شاری گوریلہ ئس کیک کہ دژمن و اونا سپاہیک ہبکہ ہلاہوش و بھاز خار اٹی مریرہ گڑا ہمووخت اوفتیا جلہو کیک۔ دا خار بازی نا سوب آن گوریلہ وا اونا کمکار آتے نسخان ایتک
7) گڈیکو ردینک دا کہ منصوبہ بندی و چمبازی ٹی بے سہب مننگ و بیدس منصوبہ غان عمل کننگ ہراکہ سفا نلہ نسخان تا باٹی بِٹنگ کیک۔
باور کیس، جہان اٹ ہر جاگہ غا جنگ آک جنگی چم آک اسہ وڑٹ مسنو و مرور ہم ولے جغرافیا و ڈغاری گواچن اتا بابت ہر ڈیہہ انا تینا تینا وڑ ڈول و گواچن اریر ہندن آن دا کتاب ءِ خواننگ وخت بلوچستان نا ڈغا و جغرفیا، مِشک و جبل اک مون ا تخنگیسا کاریم و عمل کننگ مرے۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
