میڈیکل خوانوک آتا ویل آک – ٹی بی پی اداریہ

میڈیکل خوانوک آتا ویل آک – ٹی بی پی اداریہ

بولان یونیورسٹی آف ہیلتھ اینڈ میڈیکل سائنسز(بی یو ایچ ایم ایس) نا ہڈ تس دسمبر 2017 ٹی مس۔ اوکان گڈ بولان یونیورسٹی ءِ بلوچستان نا تیوی میڈیکل کالج آ تیٹی خوانندہ تا داخلہ تا ذمہ واری ہم تننگا، دا کالج آتیٹی مکران یونیورسٹی، جھالاوان میڈیکل کالج، لورلائی میڈیکل کالج، و بولان میڈیکل کالج اوار ءُ۔ اندن اسٹ انگا یونیورسٹی بی یو ایچ ایم ایس ءِ۔

ولے دا ادارہ غاتیٹ تعلیم جوان وڑ اٹ برجا اف۔ میڈیکل کالج آتا خوانندہ آک خاص وڑ اٹ بولان میڈیکل کالج نا خوانندہ آک تدینگوکا اِرا تو آن برانز ارفنگو۔ دا برانز آتا پد اٹ خوانندہ آتا گَل بلوچ اسٹوڈنٹس ایکشن کمیٹی (بیساک) نا اسے بیان اسے نا رداٹ بولان یونیورسٹی ناہڈتس آن پد ٹیوشن فیس دہ ہزار آن زیات مریسہ مریسہ ہشتادوہشت ہزار کننگانے و ہاسٹل نا فیس پنچ ہزار آن ودیسہ بیست وشش ہزار کننگانے۔ اندن ایلو کنڈا تدینگوکا اسے سال ئسے آن خوانندہ آ تا اسکالرشپ آتے ہم توننگانے۔

چَپ دو ئنا قوم پرست طالب علم آتا جماعت بلوچ اسٹوڈنٹس آرگنائزیشن دا دوبہ ءِ خلکونے کہ مدان مدان یونیورسٹی نا نجکاری نا عمل برجا کننگانے۔

تدوک دے 12 فروری آ بولان میڈیکل کالج نا تیوہ غا خوانندہ گَل آک، ملازم آتون اوار تینا خواست آتا حق اٹ برانز ارفنگ کن بلوچستان اسمبلی نا مونا توسر پدا اندا خننگ اٹ بس کہ اوتا خواست آتے بننگ نا جاگہ غا اوتا برانز ءِ حکومت طاغت نا زور اٹ توننگ نا کوشست ءِ کرے و باز آ خوانندہ آتے دزگیر کننگا و مسڑ خوانندہ آتے بیم نا گواچی کنننگا۔

کالج نا اسے خوانندہ اس ماہ رنگ بلوچ ہرا ہمو نن بلوچستان نا صوبائی وزیر تعلیم تون اوڑدہی کرے او دا دوبہ خلک کہ وزیر تعلیم اودے تینا دفتر آن دا پاریسہ کشا کہ نی اسے نیاڑی اسے اُس و بلوچستان نا نیاڑیک روڈ آتیا بفسہ بلکہ تینا اُرا تیٹی تولیرہ۔

دا اسے گڑتی کروکو ویل ئسے کہ اسے وزیر تعلیم اس ہرانا بنماسی کاریم اندا دے کہ او تعلیم کن کاریم کے و خوانندہ آتا ویل آتے ایسر کے۔ او گمانی وڑ اٹ مسڑ خوانندہ آتا بے شرفی ءِ کیک و حکومت ہرانا کاریم مخلوق نا زند ءِ آسرات کننگ ءِ، او ہموفتا زی آ طاغت ءِ کاریم اٹ ہتیک۔ دا شعبہ تون تفوک کوالخواک بلوچستان نا خوانندہ ورنا و خاص وڑ اٹ میڈیکل نا خوانندہ تا ویل آتے اُست خواہی تون ایسر کننگ نا کوشست کیر۔