بلوچستان نا سر وزیر جام کمال خان نا صدارت ئٹ لاک ڈاؤن نا بابت ٹِک آتیا چمشانک شاغوک کمیٹی نا اجلاس ئٹ لاک ڈاؤن ءِ سمارٹ لاک ڈاؤن ئٹ مَٹ کریسہ بھازا گڑاتا کاروبار ءِ خیالداری تون ملنگ نا موکل تننگ نا فیصلہ کننگانے۔
صوبائی وزیر میر سلیم احمد کھوسہ، باسک صوبائی اسمبلی اصغر اچکزئی، بلال کاکڑ، آئی جی پولیس، ایڈیشنل آئی جی پولیس، کمشنر و ڈپٹی کمشنر اجلاس اٹ اوار ئسر۔
اجلاس ئٹ سوداگر و دکاندار آتا زرگزرانی ویل آتے اُریسہ لاک ڈاؤن ئٹ کمبوتی نا امنائی تریسہ کمیٹی ءِ سوداگر گَل آتا عہدادار آتون اجلاس اس کریسہ سمارٹ لاک ڈاؤن و خیالداری نا بابت ایس او پیز نا کاریم تے ایسری دروشم تننگا امنائی مس۔
اجلاس ئٹ فیصلہ کننگا کہ دکاندار‘ سوداگر و تاجر گَل آک خیالداری کننگ ئٹ ایس او پیز ءِ برجاء تخنگ نا پابند مرور۔ دکان آتیٹ ماسک و سینٹیلائزر ءِ کاریم اٹ اتنگ الّمی مرو، و شابنگ مالز آتیٹ بروک بندغ آتا سکریننگ کننگ الّمی مرو ہرانا ذمہ وار مالز آتا بست و بند ءِ سنبھالوک آتیا مرو۔ ایس او پیر آن چَپ ہننگ آ دکان و مالز آتے سیل کننگو۔ شار ئٹ رکھوک گام گیج آتیٹ پین زیات ترندی کننگو۔
اجلاس ئٹ امیت نا درشانی کننگا کہ خلقت و سرپدی تخوک شاریک خیالداری تے برجاء تخیسہ تینے و تینا خاہوت ءِ کورونا وائرس آن رکھنگ کن تینا کڑد ءِ ایسری ایتور۔
اجلاس اٹ دا گڑا غا اُست جمی نا درشانی کننگا کہ مسیت آتیٹ خیالداری کن ایس او پیز آتے برجاء تخنگانے و دا بابت عالم آتا کڑدسفت نا لائخ ءِ۔