ڈرامہ | آجوئی نا کسر
(ارٹمیکو بشخ)
نوشت: حکمت یار بلوچ
(گدرینگوکا قسط ئتو گنڈوک)
پروگرام اَٹ آ بناء مرو؟ (اسد حیرانی ئٹ زُبیر آن ارّفے)
زُبیر: بس گھنٹہ، نیم ئسے ٹی بناء مرو۔
اسد: اُرے اف؟
زبیر: (بشخندہ کرسا پارے) داسکا زوراک نا میت نا سامان ءِ تیار کیر اخر۔
اسد: (گوڑینگسہ) امرو میت ئسے۔ خیر تو ارے نیا یا کسفینوتا؟
زبیر: جی آو کنے آ خیرے۔
اسد: نہ تو نی پا امرو میّت ئسے؟
زبیر: زوراک نا غیرت نا میّت آ شغان آتا چٹکار مرو۔
اسد: یار زبیر بندغ تینے آن سٹّی ہیت کپّک خلینے۔
زبیر: دا ریاست نا کرتوت آتا کنے سما ءِ۔
اسد: اخّس کہ مرے۔۔۔۔۔ یار
زبیر: انت مرے؟
(اسد جیب آن بنوں ناس تے کشّا۔ گولہ ئس خلک باٹی کرے۔ ہنداڑتون اسد مدان آ پارے “جُوان مس” اسد جیب آن سگریٹ تے کشّا۔ لیٹَر ئٹ لگفے تا۔ اِرا مُسہ کش خلک ولدا پارے):
زبیر: یار اسد انت ہیت ئس کرینہ؟
اسد: یار۔۔۔ انت۔۔۔۔ انت۔۔۔۔ آو ریاست نا کرتوت آتا پاریسہ۔
زبیر: آو۔۔۔۔ نی اُر داڑے اولیکو دے آن بندغ آتے زند ئنا حق متنے۔
اسد: ہرا بندغ آتے؟
زبیر: نی ننے اِلّے اوفتے اُر۔ شاعر “جوش ملیح آبادی” نا پنے بنوس!
اسد: آو ۔۔۔۔ ننا اردو نا کتاب ئٹ ارے۔
زبیر: جوش ءِ ہندا ریاست کسفے۔ منٹو نا گُٹ ئٹ ہلکر ساہ ءِ تا کشّار۔ قراۃ العین حیدر ہندافتا کرتوت آتیان نرّا انڈیا غا ہنا۔
اسد: آخر ہندنو کاریم کرور!
زبیر: اسے شاعر ئسے نا یا ادیب ئسے نا کاریم انت مرو؟ نے تینٹ معلوم ءِ۔ سلہ تینا پاؤ نے۔
اسد: پا انت پاسہ
زُبیر: گیس ہراکا پیش تمّک؟
اسد: سوئی۔۔۔ ڈیرہ بُگٹی آن۔
زُبیر: ہراتم گیس پیش تمّا۔
اسد: تقریباً 1952
زبیر: سہی۔ 1952 ئٹ گیس پیش تمّا۔ اوکان اسے سال اس گُڈ ڈیرہ بگٹی نا منہ وڈّیرہ اسلام آباد آ ہنار۔۔۔ اوفتے پاریر ننا علاقہ نا گیس ءِ۔ بائدے ننے ہم رسینگے۔
اسد: گُڑا
زبیر: سرکاری افسر آک میٹنگ کریر ولدا ورندی تسر پاریر کہ بلوچ اسے جاہل ءُ قوم ئسے۔ اوفتے دا وجہ غان گیس تفنہ۔ دُن نہ کہ ہُراتے تینا ہشُور۔
اسد: نہ بابا۔۔۔۔۔ قران خلے دا بڑوا تے۔
زبیر: کان چاوہ پروگرام بناء مریک داسہ۔
اسد: آو یار کنے ہم ہندُن لگک۔ کرنل ہم برو۔۔۔ رش کش زیات ءِ۔
زبیر: ( سگریٹ نا مُنڈ ءِ لتاڑسا) کان۔
(پردہ شیف مریک)
(برجاء)
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔