بلوچستان نا ضلع بارکھان ئٹ پاکستانی لشکر نا بمباری و تینا مون شیلنگ نا سوب آن زالبول و چُنا تیتون اوار کیہی بندغ آتا کہنگ و ٹپی مننگ نا حوال آک مونا بسنو۔
حوال تا ردئٹ، نادرست سلہہ بند بندغ آتا پارہ غان کروکا جلہو ئٹ پاکستانی لشکر نا 12 کارندہ مرگ ئنا گواچی مسر۔ پن کروک جلہو آن پد پاکستانی لشکر علاقہ ٹی بھلو کچ ئسے آ کاروائی بناء کرے۔
ہندی حوالکار تا ردئٹ و خن خنوک شاہد آتا پاننگ ءِ کہ فورسز آتا پارہ غان کروک بمباری ٹی لس شاریک ٹک مسر، ہرافتیٹ زالبول و چُنا ہم اوار ءِ۔ دا کاروائی نا سوب آن کم آن کم 12 بندغ کسکر اندن 3 بندغ ٹپی مسر۔
کہوک آتیٹی سلطان عمیر نا مار علی (40 سال)، گلزار نا مسڑ بیبل (30 سال)، علی نا مار میر جان (2 سال)، بھنگان نا مسڑ سومری (35 سال)، سبزو نا مار بالاچ (70 سال)، شاری (22 سال)، بالاچ نا مار رحمان (18 سال)، جمالان نا مسڑ نائخو (17 سال)، بالاچ نا مار اللہ بخش (6 سال)، بالاچ نا مسڑ سادو (13 سال)، بالاچ نا مسڑ ہاپو (8 سال)، و بالاچ نا مسڑ مہرنگ (2 سال) اوار ءُ۔
ٹپی مروک آتیٹ شیر نا مسڑ زر بی بی (55 سال)، بالاچ نا مار ہزار خان (9 سال) و بالاچ نا مار اسرار (15 سال) اوار ءُ۔
ہندی حوالکار تا دا ہم دعویٰ ءِ کہ اسہ گاڑی اسیٹ ساڑی کیہی بندغ تا جون تے خاخر تننگا۔ واہم دا بابت سرکاری تلہ غا دمدستی وڑئٹ ہچو پک یا رد کننگ مونا بتنے۔
واہم دا بابت کوالخواہ تا ہچو ہیت اس ہم مونا بتنے۔