ینگ ڈاکٹرز ایسوسی ایشن بلوچستان نا صدر ڈاکٹر یاسر اچکزئی خدمت آتا ایسری نا وختا تینٹ کورونا وائرس نا گواچی مس۔
ڈاکٹر یاسر اچکزئی مسہ دے اسکان سنڈیمن پراونشل کوئٹہ نا ٹراما و ایمرجنسی سینٹر، و نیوروسرجری یونٹ ئٹ ایمرجنسی ٹی کاریم کننگ ئس۔
کورونا وائرس آن ودی مروک اشتاف کار حالیت ئٹ ڈاکٹر یاسر اچکزئی بنا دے آن کورونا تون مون تس ئٹ تینا بھاز آ کوشست آتیتون اولیکو چِر ئٹ بلوچستان نا ڈاکٹر آتا راہشونی کننگ ئس۔
ڈاکٹر یاسر صوبہ نا ڈاکٹر، پیرا میڈیکل اسٹاف و نرس آتیکن رکھنگ نا کٹس آتا خواست آتیکن مروک برانز آتیٹ مون ئٹ مریسہ ہیلتھ کیئر پروووائیڈرز آتا ہم راہشونی کریسہ مسونے۔
اونا راہشونی ئٹ بلوچستان نا ورنا ڈاکٹر آک سرکاری ہسپتال آتا او-پی-ڈیز نا بند مننگ آن گڈ صوبہ نا غریب خلقت نا سختی تے اریسہ ٹیلی فون نا کمک ئٹ اراٹی تولوک ناجوڑ آتا چنک وڑ نا ناجوڑی تیان دراخی و کورونا وائرس نا بابت معلومداری کن تیوی لائخی تیا تالان ڈاکٹر آتا اسہ ٹولی اس ٹہیفسہ صوبہ نا ٹیلی میڈیسن سروس نا بنا کرے، ہراڑان ہردے صوبہ نا مخلوق فائدہ ارفنگ ءِ۔
یاتی مرے بلوچستان ئٹ درو کورونا وائرس نا 101 پین کیس مونا بسر، جمعی وڑ ئٹ کورونا وائرس آن ناجوڑ آتا کچ 3407 مسونے۔
محکمہ جانجوڑی نا رپورٹ ئٹ پاننگان ءِ کہ کورونا وائرس نا 875 ناجوڑ دراخ مسونو اندن کورونا وائرس نا دا وخت اسکان 40 ناجوڑ کذیت کرینو۔