بیران مروکا ورنا نا سیاد و وارث آتا بھلا وزیر نا اُرانا خڑک آبرانزی مچی۔
بلوچستان نا دارالحکومت کوئٹہ ٹی استو ننکان ہزارہ ٹاؤن ٹی بندغ آتا اسے بھلو مچی اس مسہ ورنا تیا جلہو کریر ہراڈان اسے ورنا اس بلال نورزئی بیران مس و ایلو ارٹ تا ٹپی مسر۔
ایس ایچ او نا پاننگ ءِ کہ دا ہرمسٹ انگا ورنا تیا دوبہ خلنگانے کہ پیشن آن بسونو ہزارہ ٹاؤن ٹی زالبول آتے تنگ کرینو و وڈیو کرینو ہراڈان علاقہ نا باتیک دافتیا جلہو کریسہ بھاز بے دردی ٹی اوفتے خلکر، داڑاسکان کہ اسے ورنا اس جاگہ غا بیران مس۔
ایس ایچ او مونی پارینے کہ ہرا وخت آ دا واقعہ نا معلومداری مس تو پولیس جاگہ غا تینے سر کرے ولے جلہو کروکا بندغ تا خل کاری آن ڈی ایس پی و ایس ایچ او ام ٹپی مسر۔
بیران مروکا ورنا بلال نورزئی نا سیاد وارث آتا انصاف نا خاطر کن و خونی تے بندی کننگ کن بھلا وزیر نا اُرانا مونا برانزی مچی کننگ ءُ۔ دا برانزی مچی ٹی اے این پی بلوچستان نا کماش و ایم پی اے اصغر اچکزئی تون اوار تاجر آک و پین چندی بندغ آک آوار ءُ۔
اسسٹنٹ کمشنر کوئٹہ ندا کاظمی نا پارہ غان برانزی و مچی کروک آتون ہیت کپ کرے اوفتے باور کریفے کہ نمے انصاف رسینگو۔
وزیر داخلہ ضیاء لانگو دا واقعہ نا حوال ءِ ہلیسہ پارینے کہ ہر حال ٹی دا ورنا تے انصاف رسینگکو۔ ایس ایچ او بروری تھانہ نا نزوری نا سوب آن اودے نوکری آن ماٹو کننگانے۔
ضیاء لانگو مونی پارینے کہ دا وخت اسکان وڈیو و فوٹو تا ردٹ 11 آن گیش بندغ بندی کننگانے ۔