بلوچ آتا زند معنہ تخک
دی بلوچستان پوسٹ – سرگپ
بوسٹن، بلیدہ، نیویارک، خاران، سیئٹل، کوئٹہ، مینیسوٹا، تربت، ڈینور، خضدار دا لڑ مرغن مریسہ کائک۔ دا شار و اوفتا پن تا نیامٹ دا جہان تا مُری ءِ، ہرافتیٹ اسٹ ایلو آن جتا رنگ، نسل و راج ئنا مخلوق آبات ءِ ولے واہم دافتیٹ گڑا سینا اسٹی ارے کہ دا تیوہ غاک اسہ منظم بیدادی آ برانز ارفنگو۔
ہراتم تاریخ امریکی شار مینی پولِس ئٹ 25 ئس، گڑا بلوچستان نا ضلع تربت نا خلق ڈھنک ئٹ وخت مونی سُریسہ ایلو دے مسوسس۔ نن نا 2 بجہ اسہ لمہ ملک ناز ءِ بلوچستان ئٹ اسہ داڑیلی ئسے نا وختا کسفنگاسسس و ایلو پارہ اسہ باوہ جارج فلائیڈ ءِ صوب ہفت بجہ غا امریکی پولیس کسفے۔ برمش بلوچ و جینا فلائیڈ اسہ وخت آ چوری کننگار۔
ہڑتوما ملک آتیٹ برانز آتا لڑ اس برجاء مس، اسہ پارہ غان اسہ سیاہ فام امریکی و ایلو پارہ غا اسہ ٹپی چوری بلوچ مسڑ چنا اسیکن انصاف خوائنگا۔ ولے خوڑتی تون چمشانک اس شاغنگہ گڑا دا ہڑتوم آ برانز آتا روتہ غاک مروک واقعہ غاتیان زیات کڑمب ءُ۔ امریکہ ٹی سیاہ فام مخلوق 1960 نا وختا ”سول رائٹس موؤمنٹ” آن گڈ ہم پورو برابری دوئی کننگ کتو، و اوفک چاگڑد و، بست و بند ئٹ ہر پارہ غا نسلی بد دننگ و زیادتی تون مون تننگ ءُ۔ جارج فلائیڈ نا خون آ سوختئی نا آتش فشاں ٹکا کرے ہرا مرغنو وخت ئسے آن تعصب تخوک بست و بند نا سوب آن لاڑکننگ ئس۔
اندن بلوچ تدوکا ہفتاد سال آن ریاست نا منظم و برجاء بے دادی تون مون تننگ ءُ، دا بے دادی و تعصب پیہنا تا پارہ غان مننگ اف، بلکن پاکستانی تا پارہ غان گڈو کننگانے۔ ہمو پاکستانی ہرا امریکہ نا سیاہ فام آتا تحریک ”بلیک لائیوز میٹر” تون ہمدڑدی نشان تریسہ تینا پروفائل عکس آتے مَون کیرہ، ولے اوفتے بلوچستان ئٹ برجاء خون و بدکاری آن ہچو فرخ اس تمپک، اوفک زیمی مفسہ اگہ اوفتا ریاست نا سلاء بند کروک ڈیتھ اسکواڈ اسہ معصوم زالبول ئسے کسفے۔
ڈیتھ اسکواڈ تیوہ غا بلوچستان ئٹ تالان ہمو سلاء بند ٹولی تے پاننگک، ہرافتے گمانی وڑ ئٹ پاکستان فوج و ڈھکوک ادارہ غاک سلاء بند کریسہ دا ذمہ واری تسونو کہ او ہر آجوئی دوست تخوک بلوچ ءِ ٹِک کیر۔ بدل ئٹ اوفتے موکل ءِ کہ او داڑیلی کیر، نشہ ڈوہر یا سلاء نا سوداگری کیر، قانود برجاہ تخوک ادارہ غاک اوفتے دو خلپسہ۔
پاکستان نا میڈیا ملک ناز، و بلوچستان ئٹ ہفت دے آن برجاء مروک برانزی مچی تیا اسہ حوال اس ہم شینک کتو۔ بلوچستان نا تیوہ غا زیات بلوچ ضلع غاتیٹ یانزدہ سال آن گڈ داخس بھلو کچ ئسے نا برانز، و دپ درشانی خننگ اٹ بس۔ برانز ارفوک آک نعرہ خلنگ ئسر کہ ”داسہ بھاز مس” و دا خواست کننگ ئسر کہ ریاست تینا ٹہیفوک ڈیتھ اسکواڈ آتے ایسر کے، و اوفتے تروک لُٹ و پُل، و خون و بدکاری تا موکل ءِ واپس ہلیسہ دزگیر کے۔
دا سانحہ ءِ تینا حوال آتیٹ جاگہ تننگ آن چپ پاکستان نا اسہ پنی نیوز چینل اس ملک ناز نا ٹپی مسڑکو برمش بلوچ نا عکس ءِ ارفیسہ ”زہرہ شاہ” نشان تس، اسہ پین مسڑ چنا اس ہرادے پاکستان نا شار راولپنڈی ئٹ بے دادی کریسہ کسفنگاسس۔
بلوچ آتا بابت دا ہد ئسے اسکان بے پامی و بے حسی دا سوج ءِ ارفک کہ انت گواچنی اوفتیکن بلوچ آتا زند اسہ معنہ اس تخک؟