دیر کے چولی
حفیظ شہزاد
دی بلوچستان پوسٹ
کنے ہچ گڑا نا سما الو انتئے کہ کنا زند کل شار اٹی تدیسوس شار نا آسراتی تے خناسوٹ ای اندا سرپد مسوسٹ کہ مچ جہان اندن خوش ءِ دُنکہ ننا شار والاک خوش ا ءُ، ننا شار اٹی سُوب ئنا ملخوق ہناکہ تینا کاریم آ، تیوہ غاک سرکاری نوکر ئسر۔
کس ڈی سی اس تو کس اے سی و کس ڈاکسر و ماشٹر اس، دیہاڑی کروک بندغ بھاز کم بلکن ہچ دا شار اٹی الو۔ انتئے کہ دا شار ءِ کُل پیسہ والاک تیناہی کریسر۔
اسے کوٹی نا کرایہ بیست ہزار نا کچ ئس اندا سوب آن کس نا وارہ الو دا شار اٹی رہینگ کن۔
شار نا دود اندن جوڑ اس اگہ چُنا ودی مروس اودے بھلن اندن کریرہ کہ او دا خیال کپ، دا جہان اٹ اندنو بندغ مرو ہرا اِرغ ءِ دیر کن سِکرہ۔ چُنا بھلن مریسہ اونا مڈول بِسسکہ کہ جہان اندادے لاری، پیسہ، شونق، پُچ ہر گڑا ارے۔ دافتیان بیدس پین امرو جہان اس مرو!
ای ہم ہمو شار نا باتی اس ئسوٹ۔ کنا مڈول ہم اندن جوڑنگاسس کنے ہم اندُن لگاکہ کہ ننا جہان آن بیدس پین امرو جہان مرو؟
اندا گلوبالی تیٹی اسے دے اخبار اٹ خناٹ کہ میرٹ لسٹ اٹ کنا پِن بسونے۔ بیست و ہشت دے مُست نن کلرک کہ امتحان تسوسن ہمونا ورندی اس خناٹ تا بھاز خوش ئسوٹ۔ اخبار خوانسہ ئسوٹ خناٹ کہ کنا پِن ننا شار اَن پیشن اسے خلق نا اسکول اسیٹی بسونے خوشی انداخہ پین زیات مس انتئے کہ کنا اولیکو وار اس دا شار آن پیشن مننگ نا۔
مُسے چار دے ٹی ہناٹ تینا کاغذ آتے ہلکوٹ و تیاری ءِ کریٹ ہمو خلق آ اِننگ کن، خیر ہمو خلق نا منی اسٹاپ آ رسینگاٹ منی ہم تیار اس سوار مسوٹ، منی ٹی سر ہلکن۔ اسے گھنٹہ سے نا کچ سفر مسوسس منی مچے ہڈ کرے، خناٹ کہ زرس ایپار نلکہ سے آ منہ چُنا مُچو دیر کشنگ کن بسونو۔ ای ملاس ئسوٹ اِناٹ دیر کُننگ کن خناٹ چُناک نلکہ ءِ گڑیرہ، اسٹ اس بائے تورینے نلکہ غا مِنٹ اسے آن پد اسے گُلم اس دیر نا بریک اودے ہمو چُنا گُلم کیک و ایلو چُنا بریک، ندارہ ءِ خننگ تو جان سیم سیم مس۔ اولی وار خننگ ئسوٹ کہ بندغاک مُچی سیٹی دیر کے چولی مسوسُر۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک
