مزاحمت قلم کن
نوشت: مہر بلوچ
دی بلوچستان پوسٹ
نن کم و وَد ہر جاگہ غا دا گڑا ءِ خواننہ و بننہ کہ اگہ اسہ قوم ئسے غلام تِخوئی ءِ گڑا کل آن مست اودے تعلیم آن مر کر انتئے کہ تعلیم آن بیدس او قوم کُھر ئنا مِسل ءِ و اونا کُھریا کوزہ گیر ءِ۔ کُھریا کُھر ءِ ہرانگ دیک او ہمونگی کائک۔ ہیٹ و میڷ تا کُھر ءِ نہ تو تینا سوچ سمجھ مریک نہ تینا زی آ مروکا ظلم ئنا زیہا سوج ارفنگ کن دوی مریک۔
بلوچستان ٹی ہم ہندا دود جوڑ مسونے کہ ظالم تینا کوزہ و تینا زور ءِ ساندہ بلوچ راج آ تخنگ نا نیت ئٹ بلوچ راج و بلوچ خوانندہ آتیکن تعلیم نا درغ آتے بند کننگ کہ ہر مننگ کروک وڑئٹ نت دو خلنگ ءِ۔ بلوچستان نا نیمہ آباتی مست آن اسکول و اسکول آتے ٹی بنماسی آسراتی تے آن مر ئسر، و دا سختی تے ایسر کننگ نا جاگہ غا کوزہ گیرہمو خوانندہ آتے ہم تعلیم نا کسر آن مر کننگ اوفتیکن تعلیم نا کسر ءِ تنک کننگ نا کوشست کننگ ءِ ہرا کہ ہر وڑ ئنا سختی تیتون مون تریسہ تینے تعلیم نا جہان ئٹ جاغہ ئس سر کننگ نا کوشست ئٹی ءُ۔ کسس دا ہیت ئنا کڑمبی ٹی ہننگ سوچنگ کن تینے خوار کرینے؟ وختس کہ نن پاکستان ءِ ظالم و کوزہ گیر پانہ گڑا ننے آ فرض جوڑ مریک کہ نن کوزہ گیر و اونا ظلم ئنا برخلاف بش مرین۔
بلوچستان نا بھلا بھلا یونیورسٹی تے آن ہلیس پنجاب نا تعلیمی ادارہ تے اسکان اسہ جاگہ اس ام دنو اسہ دے اس گدرینگتنے کہ بلوچ خوانندہ آک تینا تعلیم نا رِد ئٹ یا تو ذہنی بیدادی نا گواچی متنو یا تینتو مروکا نا انصافی و زوراکی تا خلاف روڈ آتا زیہا احتجاج و مزاحمت کتنو۔ وختس پنجاب ٹی بلوچ خوانندہ غاتا برانز آک دتر چر آ بدن آک، وختس بلوچستان یونیورسٹی نا سکینڈل، وختس بی ایم سی ٹی بلوچ خوانندہ غاتا حق آ دو بٹنگ و وختس انٹرنیٹ نا برجا داری کہ برانز و دزگیری، دا کل ریاست نا کنڈ آن اسہ بھلو منصوبہ و چم بازی ئسے نا رد ئٹ مننگ ءُ۔ او ہرا ملک ءِ کہ تینا خوانندہ آتے زندانی کیک دا خاتر آن کہ اوفک تینا خواننگ نا بابت ئٹ آسراتی نا خواست ءِ کیرہ؟ دا وڑ ئنا ظلم اسہ ملک اس تینا مخلوق تون کپک بلکن اسہ کوزہ گیر ئس غلام قوم آ کیک، دا گڑا ءِ ہمو بندغ آتے پوہ مروئی ءِ ہراکہ ظلم ءِ خنار خنتے مچ کیرہ۔
درو کوزہ گیر نا کنڈ آن سیاسی باسک و خوانندہ آتے چُپ کریفنگ و خُلیفنگ کن اوفتے زندان کننگ دوارہ بیگواہ کننگ و لاش آتا ٹیکی تننگ نا لڑ بناء مس، اینو ہندا کارم نا بناء ننا خوانندہ آ نیاڑی تے ہم چپ کرفنگ کن مننگ ء۔ ولے گودی ماہ رنگ نا ہیت راست ءِ کہ اگہ ننا نرینہ آک ننا باوہ ایلمک جیل مننگ کیرہ گڑا نن ہم اوفتان ہچ گِڑا سیٹی زیات افن کہ نن جیل مفن یا تینے پد تورِن۔ ظالم نا مونا ماہ رنگ اسہ مثال ئسے کہ تینا باوہ نا بیگواہی ءِ خنا اونا شہادت ءِ خنا و اینو ہمو باوہ نا بہادری و جوزہ تون ظالم تو مون تننگ ء۔ دا ہمو چُنا ءِ کہ وختس تینا باوہ نا بیگواہی نا وختا اونا یلہ کرفنگ کن ہیت کریکہ، اونا خنتا خڑینک آک اونا ڈکھ ئنا شاہدی ءِ تسرہ و اینو او ظلم ئنا خلاف ہیت کیک اونا ختیٹی خڑینک آتا جاگہ غا خاخر، فکر، شعور و بہادری خننگک۔ چپ تولوکا ہم ہرا وخت اسکان چپ تولور دے نہ دے ئس ہندا چپ تولاکا تینا چپی آ لجی مرور اوفتے ہم شعور برو و ہمو وخت ظالم تینا ایسری زور ءِ نشان ایتو و دا ظلم ایسری ظلم مرو۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک