عئید نا مسہ دے ٹی 34 کرونا نا کیس رپورٹ مسونو ۔ لیاقت شاہوانی

کرونا نا دا وخت اسکان حالیت است جمی ئسے ۔ ترجمان بلوچستان حکومت

بلوچستان حکومت نا ترجمان لیاقت شاہوانی احوال کار آتون ہیت و گپ کریسی پارے کہ عئید آن مست تیوی ملک اٹی کرونا نا ناجوڑی تالان مننگ نا خلیس اس ولے بلوچستان حکومت دا ناجوڑی ءِ توننگ کن بھاز کبین ءُ فیصلہ ارفےـ مال تا پڑی تیٹی ایس او پیز نا زیہا عمل کننگا ہرانا سوب آن دا وخت اسکان کرونا نا ہرا حالیت ءُ او است جمی ئسےـ

لیاقت شاہوانی مونی پارے کہ دا ناجوڑی نا دا وخت نا حالیت ءِ اریسہ اندا سوب آن سمارٹ لاک ڈاؤن ٹی پانزدہ دے نا ودکی کرین. گدرینگوک آ پانزدہ دے اسکان کرونا نا ناجوڑی ءِ مونا تخیسہ خوانندہ جاہ اسکول و کالج آتے ملنگ نا فیصلہ کرون۔

او پارے کرونا نا کیس آتا بابت ہیت کریسہ پارے کہ عئید نا مسے دے ٹی تیوی بلوچستان ٹی 34 کیس رپورٹ مسونو۔ غٹ آن زیادہ کیس یعنی 51% کیس جون نا توہ ٹی رپورٹ مسونوـ

اندن او کرونا نا ناجوڑی ءِ دا وخت اسکان است جمی پاریسہ پارے کہ 22 آن اینو نا دے اسکان بلوچستان ٹی ہچو بندغ اس کرونا نا سوب آن بیران متنے ہرا جوانو ہیت اسےـ
گدرینگوک آ پنچ دے ٹی بلوچستان نا 26 ضلع ٹی ہچو کیس اس مونا بتنےـ

بلوچستان حکومت نا ترجمان پارے کرونا نا بابت است جمی آن ابید ام شاری تیان خواست کہ او ایس او پیز آ عمل کیر انتیکہ دائسکان دا ناجوڑی تیوی ایسر متنےـ