بیروت مرکز نا خڑک اسہ ترندو تراک اسیٹ 78 بندغ بیران و مُسہ ہزار آن زیات ٹپی مسونو۔ حوال تروکا ادارہ رائیٹرز اسہ رپورٹ اسیٹ پارینے کہ لبنان نا دارالحکومت بیروت ٹی مروکا دا تراک نا توار مر مر اسکان بننگانے۔
تراک آن ماڑیک تے نسخان مسونے و بھاز آ اپارٹمنٹس تلہ و کھڑکی تا شیشہ آک پنانو۔
بھاز آ وخت آتیان گُڈ مروکا دا طاغتور تراک آن ڈغار لڑزہ ٹی بس ہراڑان بھاز بندغ آتے دا گمان مس کہ زمین جمب مس۔
تراک آن بندغ آتیٹ بیم و خلیس تالان مس، و بھاز آ بندغ آک کوک خلیسہ اُرا تیان پیشن مسر۔
بیروت آن بروکا حوال آتیٹ پاننگانے کہ تراک ٹی ٹپی مروکا تا کچ سد آتیٹ ءِ۔ بھاز آ بندغ آک اُرا آن پیشن مسونو تینا بندغ آتے پٹینگ آ خننگانو۔
ایسوسی ایٹڈ پریس نا رد ئٹ لبنان نا سیکیورٹی نا راہشون عباس ابراہیم پارینے کہ طاغتور تراک نا سوب آن گمان ءِ کہ اسہ اندن ءُ مواد اس، ہرا منہ وخت مالو دیری جہاز ئسے آن شیف کننگان گڈ بندرگاہ غا مچ کننگانو۔
ہندی ٹیلی وژن چینل ایل بی سی پارینے کہ تراک سوڈیم نائٹریٹ نا مسونے۔
اسرائیلی حکومت نا عہدے دار پارینے کہ اسرائیل نا دا تراک تون ہچ ءُ ہڷ و تس اس اف۔ او تینا پن ءِ ڈھکوک تخنگ نا شڑط آ پارینے کہ اودے میڈیا آ دا ویل اکن ہیت کننگ نا موکل اف۔ اسرائیلی عہدے دار آک لس وڑئٹ پیشن نا رپورٹس آ چمشانک شاغپسہ۔
تراک اندن ءُ وخت ئسے آ مس، ہرا وخت رفیق حریری نا خون نا کیس ئنا فیصلہ مونا بننگ ئس۔
اقوام متحدہ نا عدالت ٹی حزب اللہ نا چار باسک آ تدوکا وزیراعظم رفیق حریری نا خون نا تُمت ٹی مقدمہ برجاہ مسونے۔
دا مقدمہ نا فیصلہ ءِ جمعہ نا دے تننگو۔