پاکستان نا ویل غیر آئینی حکمرانی و سیاست ٹی ادارہ غاتا اواری ءِ ۔ محمود خان اچکزئی

پشتون آتے تینا صوبہ و تینا اسمبلی ئس مروئی ءِ ۔ محمود خان اچکزئی

پشتونخواہ ملی عوامی پارٹی نا کماش محمود خان اچکزئی پارینے کہ پاکستان نا ویل عمران خان اف بلکن غیر آئینی حکمرانی و سیاست ٹی ادارہ غاتا آواری ءِ۔ پاکستان افغانستان سیم سر 15 مارچ آن مست نا وڑ اگہ ملنگتو داڑان بغاوت نا خلیس مریک۔ چمن ٹی انتس کہ مس او بیم بش کروک حالیت ئسے۔

اونا پاننگ ئس کہ آئین نا بھلنی و اُلس نا گچین کاری آن گچین مروکا پارلیمنٹ نا سوگوی آن ابید پاکستان مُستی ہننگ کپک۔ داسنا بست بند ڈُب ہلیسہ ءِ۔ اے پی سی ٹی آئین نا بھلنی نا ایجنڈا شاغنگ متو گڑا نن اے پی سی ٹی اوار مفرون۔

محمود خان اچکزئی تینا اُراٹی احوال کار آتون ہیت و گپ کریسہ مونی پارے کہ چمن نا واقعہ بھاز اُست اسون ءُ واقعہ ئسے ۔ ڈیورنڈ لائن آ ہرا زیر آتے خلنگسہ ءُ داڑان 1893 آن الیس 2015 اسکان ہرا ہننگ بننگ مسونے او بند مریک۔ دا لائن پشتون آتے بحیثیت راج اِرا بشخ کیک۔

مونی پارے کہ پاکستان افغانستان سیم سر آ چندی بندغ آتا ڈغار آکو۔ بندغ آک زمینداری کیرہ، تینا مال تے خواہفرہ، غریب انگا بندغ آک سہب آن شام اسکان سیم نا داپار ایپار پوریا گری کیرہ تینا اُراتے چلیفرہ۔ 122 سال آن ہننگ بننگ برجا ءِ۔ گڑا داسہ سیم ءِ بند کننگ نا انت گرجاک ءُ۔ بیست و یکمی کرن ٹی ساہدار آتے ام حق ارے اوفتے سیم آن داپار ایپار توننگ مفک ولے انسان آتے زوراکی ئٹ توننگ مریک۔

پشتونخواہ میپ نا کماش پارے کہ کنتون اوار پین چندی بندغ آک انصاف کن جہانی عدالت آ اِننگ کن تیار ءُ۔ دا وختا سیم آ ہرا علاقہ غاتیٹی زیر آک خلوک ءُ ولے داکان ابید ام بندغ آتا اسمنگلنگ برجاء ءِ۔ 10 ہزار 12 ہزار الس اٹ بندغ آتے داپار ایپار کیرہ ہرا بھاز غلط ءِ و غیر انسانی ءُ عمل ئسے۔ ادارہ غاک ویل ءِ خراب کپس نہ تو بندغ آک بغاوت کیرہ۔ اسے لس ءُ بندغ اسے زبردستی توننگ نا بھاز خراب ءُ زیم تموئے۔

محمود خان اچکزئی پارے کہ پاکستان و ہندوستان نا تین پتینی بندات آن خراب ءِ۔ ولے اوکان ابید ام واہگہ آن ہلیس لاہور اسکان ہچو چیک پوسٹ اس نظر بفک ولے چمن آن ہلیس بلیلی اسکان ہر جاگہ بندغ آتے ہرا وڑ کہ بے شرف کیرہ او غٹ نا مون ٹی ءِ۔ ننتون جزمادر آ لمہ آمبار سلوک کننگ ننے ہچ وڑ قبول اف۔ نن دا ملک ٹی مسٹمیکو شاری نا حیثیت ٹی رہینگ کن ہچو وڑسیٹی تیار افن۔