بلوچستان نا علاقہ کوئٹہ مستونگ و پنجگور ٹی سُم کاری و روڈ ئنا ویل آتیٹ چار بندغ ٹپی و اِرا بندغ بیران مسر۔
شابیتی حوال تا ردئٹ کوئٹہ ٹی سُم کاری آن اسہ بندغ ئس بیران مس۔ پولیس نا پاننگ ءِ سہ شمبے نا دے کوئٹہ نا علاقہ نواں کلی آخری اسٹاپ آ نادرست بندغ ئسے نا سُم کاری آن حفیظ الرحمٰن پنی ءُ بندغ اس مرگ نا گواچی مسونے۔
پولیس جون ءِ دوٹی الیسہ ہسپتال آ سر کرینے ہراڑے المی کاروائی آن گُڈ جون خاہوت نا دوٹی تننگا، پولیسں نا رد ئٹ ویل مالو نا دژمنی نا سوب آن مسونے، پین کاروائی برجاہ ءِ۔
اندن پنجگور ٹی روڈ ئنا ویل ئٹی اسہ بندغ اس بیران مسونے و مُسہ بندغ ٹپی مسر۔
،رسینگوک حوال تا رد ئٹ پنجگور نا تحصیل گوارگو ٹی موٹر سائیکل و اِرا ہزار ایرانی ماڈل گاڑی ڈک لگار ہراڑان گاڑی کلٹی مس ہرانا سوب آن گاڑی نا ڈرائیور رسول جان مرگ نا گواچی مس و موٹر سائیکل آ سوار عبدالصمد، حاجی معراج، محمد ادریس ٹپی مسونو۔ ٹپی آک دارو درمان کننگ کن پنجگور سول ہسپتال آ رادہ کننگار۔
پین احوال ئسے نا رد ئٹ مستونگ ٹی سُم کاری آن اسہ بندغ اس ٹپی مس۔
مستونگ نا علاقہ درینگڑھ ٹی موٹر سائیکل آ سوار بندغ آ نادرست ءُ بندغ اس سُم کاری کرے۔ حوال تا رد ئٹ سُم کاری آن محمد مراد پنی ءُ بندغ ئسے نا نت ئٹی سُم لگانے، ٹپی ءِ نواب غوث بخش رئیسانی ہسپتال آ سر کننگا۔