مستونگ سُم کاری آن اِرا زالبول تو اوار اسہ بندغ اس ٹپی

بلوچستان نا علاقہ مستونگ و کوئٹہ ٹی سُم کاری و روڈ ئنا ویل آن مُسہ زالبول تو اوار 4 نرینا ٹپی مسونو، و اسہ چُناس کذیت کرینے۔

گیشتر حوال تا رد ئٹ مستونگ کھڈکوچہ ٹی انجیری نا علاقہ ٹی سلاء بند بندغ آک موٹر سائیکل آ سوار بندغ تیا سُم کاری کریر ہراڑان عبدالصادق و اِرا زالبول ٹپی مسونو، ٹپی آک دمدستی وڑ ئٹ دوا درمان کننگ کن شہید نواب غوث بخش رئیسانی میموریل ہسپتال آ سر کننگانو۔ ویل مالو نا دژمنی نا سوب آن مسونے و ٹپیک پاوالی پاننگرہ۔

اندن مستونگ ٹی بھلا روڈ آ ایف سی قلعہ نا خڑک اِرا موٹرسائیکل ڈک لگار، رسینگوک حوال تا رد ئٹ ویل ئٹی اِرا بندغ ٹپی مسونو، ٹپی تیٹ اسٹ نا حالیت گڑتی ٹی ءِ۔

اندن پین حوال ئسے نا ردئٹ بختیار آباد و نوتال نا نیام ئٹی روڈ ئنا ویل ئس مسونے۔

گیشتر حوال تا رد ئٹ دا گاڑی لاڑ کانہ آن کوٸٹہ آ ہننگ ئسکہ  بختیار آباد و نوتال نا نیام ئٹی ویل ئنا گواچی مس۔ دا گاڑی ٹی مُسہ بندغ مسوسس ہرا ٹی اسہ چُنکو چُناس کذیت کرینے و اسہ نرینا و نیاڑی ئس ٹپی مسونو۔