بلوچ آتا خواننگ کن پند
ٹی بی پی سرگپ
پاکستان پیپلز پارٹی نا حکومت سنہ 2009 ئٹ بھلو بیرفنگ اسیتون بلوچستان نا “احساس محرومی” تے مُر کننگ کن “آغاز حقوق بلوچستان” پیکج نا پڑو کریسس۔ دا پیکج ئٹ جنگ زدہ ڈیہہ بلوچستان کن سیاسی، معاشی، بست بندی و تعلیمی منصوبہ غاک اوار ئسر۔ نغدکار آک دا پیکج ءِ ریاست نا اسہ پین “کاونٹر انسرجنسی” چم اس پاریسہ دا پیش گوئی کریر کہ دا ہم اندا ڈول نا ایلو پالیسی تیانبار بے سہب مرو۔ دا پیکج اٹ بھاز سوغند آتیتون اوار دا سوغند ہم ارفنگا کہ بلوچستان نا خوانندہ تے ہائیر ایجوکیشن کمیشن آن اسکالرشپس ئٹ اسہ گچین ءُ کوٹہ اس تننگو، ہرانا ردئٹ او علاقئی و پیشن ملک بڑز تعلیمی ادارہ غاتیٹی تعلیم دوئی کننگ کرور۔
دا سوغند ءِ عملی وڑئٹ ٹہیفنگ ئٹ پین مُسہ سال لگا و سنہ 2012 ئٹ دود آتا ردئٹ اسکالر شپس نا پڑو کننگا، و پنجاب نا یونیورسٹی تے پاننگا کہ او بلوچ خواننگہ تیکن گچین ہند تخر۔ بنائی وڑئٹ دا سیٹ آتا کچ 600 ئس، ولے 2013 ئٹ مسکوئی سر وزیر بلوچستان ڈاکٹر عبدالمالک و مسکوئی وزیر اعلیٰ پنجاب شہباز شریف نا نیامٹ اوڑدئی ئٹ اوفتے زیات کننگا۔ شڑط آک آسرات ءُ ئسر کہ کس بلوچ خوانندہ اس پنجاب نا یونیورسٹی اسیٹی اوپن میرٹ آ سیٹ دوئی کیک گڑا اوڑان ہچو فیس ہلنگپرو، اوڑتون اوار ہاسٹل نا خڑچ ہلنگپرو۔
دا منصوبہ بلوچستان نا خوانندہ تیٹ بھاز پن کرے، ہرافتیتون بلوچستان ئٹ گچین تعلیم دوئی کننگ نا گچین کننگ مفرنگ نا کچ ءِ۔ ہزار آ خوانندہ غاک نن و دے خواری آن گڈ پنجاب نا جتا یونیورسٹی تیٹ داخلہ دوئی کریر، ولے ایلو منصوبہ تیانبار دا منصوبہ نا زند ہم چنک مونا بس۔
تدوک اِرا سال ئنا نیامٹ جتا وڑتیٹ دا خوانندہ تے دوئی آسراتی و وظیفہ تیٹ کمبوتی ہتنگسہ ءِ۔ بنائی وڑئٹ ہاسٹل ئٹ مفت ہندی مننگ نا آسراتی ایسر کریسہ، اوفتے حکم تننگا کہ تیوہ غا خوانندہ غاک ہاسٹل نا فیس ایتر۔ واہم بہاوالدین ذکریا یونیورسٹی نا خوالخواک اسہ گام اس مونی ہنیسہ دا پڑو ءِ کرینو کہ 2020 نا داخلہ سال آن بلوچ خوانندہ تیکن تیوی اسکالر شپس آک ایسر کننگور۔ یونیورسٹی کوالخواک دانا سوب حکومت پنجاب و بلوچستان نا پارہ غان فنڈز نا بند مننگ ءِ پارہ، ایلو پارہ غان پن کروک ہڑتوم آ حکومت آک اسٹ ایلو غا دوبہ خلکنو۔
دا یونیورسٹی تا بلوچ و پشتون خوانندہ غاک تدوکا اِرا تُوہ آن برجاء برانز کننگو۔ برانز نا اولیکو بشخ ئٹ دا خوانندہ غاک بہاوالدین یونیورسٹی نا بنجائی درغ نا مونا اسہ برانزی کیمپ اس خلکر، ہرا اسہ تُوہ ئسے آن زیات لگوک مس۔ برانز آن بیدس ہم خواست آتا پورو مفرنگ نا سوب دا خوانندہ غاک 800 کلومیٹر مرغن لانگ مارچ ءِ بناء کرینو، ہرا ملتان آن لاہور نا پارہ غا گام خلنگ ءِ، ہرانا مِزل پاکستان نا دارالحکومت اسلام آباد ءِ۔
برانز کروک بلوچ خوانندہ غاک دوبہ خلنگو کہ اسکالرشپس آتا ایسری نسلی ہڈ ئنا فرخ کننگ نا لڑ ءِ ہراڑتون اوفتے پنجاب اٹ مون تروئی تمنگ ءِ۔ دا دوبہ غاک ہند ہم تخرہ انتیکہ پنجاب یونیورسٹی، قائد اعظم یونیورسٹی اسلام آباد، بہاوالدین ذکریا یونیورسٹی ملتان و ایلو تیٹ خوانوک بلوچ خوانندہ غاک جتا وخت آتیٹ پاکستان نا بنجائی جماعت آتا خوانندہ گل آتا دو آن بیدادی تا گواچی مریسہ کرینو۔
دا اسکالرشپس آتے اسیکہ وا تننگ نا دمدرستی تون خواست ارے کہ جہان نا پدتموک ڈیہہ آتیان اسٹ بلوچستان نا خوانندہ غاک گچین تعلیم دوئی کننگ کیر و تینا ڈیہہ نا دیمروی و خوشحالی ئٹ کڑد اس ایسری تننگ کیر۔ دا بھاز بھلو خواست اس اف اگہ دا گڑا غا خوڑتی اٹ اوننگے کہ پنجاب نا فیکٹریک بلوچستان نا مڈی تیان چلینگرہ و او جاگہ نا دیمروی بلوچستان نا ڈغار نا مڈی تا منتواری ءِ۔ برانز آ بیوس خوانندہ غاک خواننگ آ حق خوارہ، اوفک نسلی شیف بڑزی سلوک نا گواچی کننگپس۔