گمانی ڈودار تینا اہیڑ و اسہ بندغ ئسے غیرت نا پن آ کسفینگ آن گُڈ نرا۔
بلوچستان نا ضلع نصیر آباد نا تحصیل تمبو نا علاقہ مگسی شاخ نا ایب کیب نا خلق ئٹی عظمت خان پنی ورناس تینا ہژدہ سالہ ہیڑ خورشید بی بی و بیست و دو سالہ ورنا عبدالصمد ءِ غیرت نا پن آ خاخری سلاء ئٹ سُم کاری کریسہ کسفے و نرا۔
خان کوٹ پولیس تھانہ نا عملہ کہوکاتا جون تے ڈویژنل ہسپتال ڈیرہ مراد جمالی آ سرکرے، المی کارروائی آن گُڈ اوفتے خاہوت نا دوٹی تریسہ خون ئنا ڈودار نا دزگیری کن کوشست ءِ بناء کرے۔
یاتی مرے تدوکا 24 سائت ئنا نیام ئٹی بلوچستان ٹی غیرت نا پن آ اِرا ویل ئٹی چار بندغ کسفینگانو۔
تدوکا دے دکی نا سب ڈویژن لونی ٹی کلی بختیار خان نا علاقہ ٹی سلاء بند بندغ آک غیرت نا پن آ زالبول تو اوار اِرا بندغ ءِ کسفیر نرار۔
لیویز کوالخواہ تا ردئٹ سُم کاری آن کہوک آتیٹ اسٹ نا چاہنداری مراد محمد نا پن ئٹ مسونے اندن زالبول نا چاہنداری متنے۔
لیویز رسالدار اسرار احمد ترین نا پاننگ ءِ جون آتے سول ہسپتال دکی آ سرکننگا و المی کاروائی آن گُڈ خاہوت نا دوٹی تننگار، لیویز ویل ئنا مقدمہ ءِ نوشت کریسہ سر و سوج ءِ بناء کرینے۔
یاتی مرے بلوچستان نا جتا علاقہ آتیٹ غیرت نا پن آ خون ئنا ویل آک برجاہ مریسہ مسونو، اندن دا ویل آتیٹ بھازی ڈودار آک ویل آن گُڈ نرانو۔
سیاسی و راجی مخلوق نا رد ئٹ بھازی ذاتی دژمنی ٹی غیرت نا پن آ بندغ آتے ٹک کننگک، اندن دا ویل آتا توننگ اٹ انتظامیہ بے سہب خننگک۔
مخلوق نا پاننگ ءِ کہ غیرت نا پن آ خون آتے توننگ کن انتظامیہ ءِ دمدستی کاریم کننگ تون اوار بندغ آتے سرپد کننگ نا ہم خواست ارے۔