امریکہ نا پوسکن گچین مروک ڈیموکریٹخ صدر جوبائیڈن ہفتہ نا نن راج تون تران کریسہ پارینے کہ او خلقت ءِ ونڈ کپرو بلکن سیوت کرو۔
دا ساہت آ پوسکن گچین مروک نائب صدر کاملا ہیرس ہم بائیڈن تون اوار ساڑی ئس۔
تینا تران ئٹ جوبائیڈن پارے کہ او تیوہ غا امریکئی تا صدر ءِ و او امریکہ ءِ اسیکہ وا جہان ئٹ شرفدار کرو۔
او اونا مخ تفی کروک مخلوق ءِ پارے کہ اوفک ہمو ووٹر آتیتون ہم اوڑدئی کیر ہرافک اودے ووٹ تتور۔ اونا پاننگ نا ردئٹ او تینٹ بھاز وار بے سہبی تا گواچی مس ولے داسہ اسٹ ایلو ءِ موقع تننگ نا خواست ءِ۔
بائیڈن مُستی پارے کہ داسہ وخت بسونے کہ بیان بازی تے ایسر کننگے، باسنی ءِ کم کننگے، اسٹ ایلو اسیکہ وا سگنگ مرے و اسٹ ایلو ءِ بننگ مرے۔
یاتی مرے جوبائیڈن داکان مالو ہم ڈیموکریٹک پارٹی نا پارہ غان اِرا وار صدارتی گچین کاری تیکن پارٹی نا پارہ غان پن کننگا ہرافتیٹی بے سہبی اونا بخت مس۔
سہہ شمبے آ مروک امریکئی صدارتی گچین کاری ئٹ دائسکان امریکہ نا 46 ریاست آتا بیدس سرکاری و بیدس ایسری حساب مونا بسونو ہرافتا ردئٹ جوبائیڈن 279 الیکٹورل ووٹ دوئی کرینے۔
اوڑتون مون پہ مون ری پبلکن امیدوار و ساڑی صدر ڈونلڈ ٹرمپ دائسکان 214 الیکٹورل ووٹ دوئی کرینے۔ مُستی چار ریاست نا حساب مونا بروئی ءِ۔
امریکہ نا صدر گچین مننگ کن اسہ امیدوار ئسے کم و ود 270 الیکٹورل ووٹ درکار مریک و جوبائیڈن دا ٹِک اسکان سرمسونے۔
ہفتہ نا دے تینا تران ئٹ جوبائیڈن تینا کٹنگ نا پڑو کریسہ پارے کہ کرونا وائرس نا دین ءِ توننگ کن او دو شمبے نا دے تینا ٹاسک فورس نا پڑو ءِ کرو۔
جو بائیڈن 20 جنوری آ تینا اوغدہ نا سوغند ارفو۔ اوڑتون اوار نائب صدر کاملا ہیرس ہم سوغند ارفو ءِ ہرا امریکئی تاریخ نا اولیکو زالبول نائب صدر مرو ءِ۔ کاملا ہیرس دا وخت ریاست کیلی فورنیا آن گچین مروک سینیٹر ءِ۔
ہفتہ نا نن کاملا ہیرس ہم سرسہبی تران کریسہ پارے کہ او راج ئنا منتوار ءِ ہرا ریکارڈ ووٹ تریسہ پاش کلہو تسونے۔ اونا پاننگ نا ردئٹ خلقت امیت، سیوت و میروانی ءِ گچین ءِ کرینے۔