ملا عمر دیر ئس؟
دی بلوچستان پوسٹ تیدری
دے کہی و دے ٹکی بلوچستان نا اسے متنازعہ کڑدار اس ملا عمر بلوچ ءِ 17 نومبر آ بلوچستان نا ضلع کیچ ٹی پاکستانی فورسز سم کاری کریسہ کسفے۔ ملا عمر نا زی آ بلوچ آجوئی خواہوک آک پاکستانی فوج نا اسے کارندہ و مذہبی شدت پسند اس مننگ نا دوبہ خلیرہ، و کہی جاگہ تیٹی اوفتا تین پتین جلہو آک ام مسونو۔ ارٹیمیکو پارہ غان ملا عمر دا دوبہ غاتے رد پاریسہ دا دعویٰ کریکہ کہ او بلوچ حریت پسند ئسے و ایران نا برخلاف بلوچ آتا آجوئی کن جنگ کننگے۔ ملا عمر نا پن اٹ پنی مننگ آن ابید ام او تینا پن ٹی لوز “ملا” شاغنگ نا بارہ ٹی پائک کہ دا بیرہ چاہنداری ئسے۔ اونا مذہبی شدت پسندی تون ہچو تعلقداری اس اف۔
ملا عمر ءِ 17 نومبر سہہ شمبے نا نن آ بلوچستان نا علاقہ کیچ ٹی پولیس سم کاری کریسہ کسفے، دا تدینی ٹی ملا عمر نا ارا مار حسن و حسین ام پولیس نا سم کاری آن بیران مسر۔
ملا عمر نا کسفنگ نا تدینی ضلع کیچ نا بھلا شار تربت نا پوش علاقہ سیٹلائیٹ ٹاون ٹی تربت انٹرنیشنل ایئرپورٹ نا خڑک ایف سی چیک پوسٹ آن منہ گام مر آ مس۔ دا تدینی آن پد ایف سی ام اموڑے بسونے ملا عمر نا گاڑی آ سم کاری کرے، یعنی پولیس و ایف سی ہڑتوماتا کارندہ غاتا دا اسہ جہی کاروائی آن ملا عمر کسفنگانے۔
علاقائی شاہد آتا پاننگ نا ردئٹ سہہ شمبے آ پولیس سیٹلائیٹ ٹاون نا کہی جاگہ غاتیٹی تینا گشت ءِ گیش کریسس و خاص انگا جاگہ غاتیٹی پولیس و ایف سی نا کارندہ غاک پوزیشن ہلیسہ سلوک ئسر۔ علاقائی ذرائع دا دعویٰ کیرہ کہ اسے ڈھکوک ءُ ڈیل اسینا ردئٹ بھاز وخت آن ڈھکوئی پاکستانی خفیہ ادارہ غاتا مہمان مروکا ملا عمر ءِ کسفنگ نا باقاعدہ منصوبہ جوڑ کننگاسس۔
باخبر ذرائع غاتا پاننگ نا ردئٹ سہہ شمبے نا دے اسے خفیہ ادارہ اس ملا عمر ءِ اِرا وار بٹنگاسس ولے او انتئو پیش متو۔ بیگہ آ ایف سی اودے تربت ہیڈکواٹر آ بٹنگا ولے ملا ہننگ آن نمن مس۔ پاروک آتا ردئٹ “ملا عمر ءِ بلکن دا گڑانا سما تماسس کہ اوڑتون انت مننگے اندا سوب آن او ریاست نا مہمان مننگ آن ابید ام ہیت ءِ تا ارفنگ الو۔
ملا عمر نا خڑک نا بندغ آتا پاننگ کہ ہرا وختا اودے بھاز گڑاک جوان لگتور گڑا او اسے گاڑی اسیٹی تینا ہرتوم آ مارتے ارفیسہ نرنگ نا کوشست کرے دنکہ پولیس و ایف سی مالو آن ہر جاغہ مورچہ ہلکوسس اندا سوب آن اودے ہمو جاگہ غا سم کاری کریسہ ہڑتوم آ مارتون اوار کسفنگا۔
ملا عمر دیر ئسے؟
اینو آن منہ سال مست 2013 نا اسے سہب اس دے ٹک وخت آ تربت آن 60 کلو میٹر دے کہی نا نیمہ غا کلاھو پنی آ خلق اٹی تراک آتا توار خلقی تے فریشان کریر۔ دے ٹک تننگ اسکان دا ہیت پاش مس کہ ملا عمر نا جاگہ غا بھاز بھلو جہلو اس مسونے۔
اصل ٹی ایرانی ڈرون اونا اُرا ءِ چاہنگ آن گڈ اودے ٹک کرے۔ ہرانا سوب آن ملا عمر نا چنکا مسڑ بیران مس ولے ملا تینٹ بچا۔
اندا تدینی آن پد او ریاستی ادارہ غاتا تیوی آ رکھ ئتون تربت نا علاقہ سیٹلائٹ ٹاؤن آ جاگہی مس و کسفنگ اسکان اندا علاقہ ٹی اس۔
ملا عمر بھاز وخت انداڑے اسے گاڑی اسیٹی تینا چرینگاک آ۔ اوڑتون ہچو گاٹ الو۔ اسے وڑ اسیٹی او تینے بھاز رکھوک سرپد اس. دعویٰ کننگک کہ انداکان اودے بلوچستان ٹی برجاء آجوئی نا جنز نا برخلاف کاریم اٹ ہتنگ نا بندات مس۔
احوال تا پاننگ نا ردئٹ او اسے بھاز سوگو ءُ نیٹ ورک اس چیلفنگ اس ہراٹی ڈھکوک ادارہ تا جوڑ کروکا جاگہی ڈیتھ اسکواڈ آتے اوار کریسر۔ ہرافتا مالی کمک ملا عمر نا ذمہ واری اس، دانا اسکواڈ ٹی یاسر بہرام پنی آ بندغ ام اوار ئس ہرا پاش آن پاش ضلع کیچ ٹی ڈیتھ اسکواڈ آتا کماشی کننگ ءِ۔
منہ سال مست بلوچستان نا اسے مر ءُ خلق کہیرن نگور ٹی ملا عمر و یاسر بہرام نا ڈیتھ اسکواڈ و بلوچ مزاحمت کار آتا میان ٹی بھاز سخت ءُ جنگ اس مس ہڑتوما نیمہ غان کئی گھنٹہ چلینگوک آ جنگ نا احوال تیوی بلوچستان ٹی تالان مس۔ ارٹمیکو دے ایف سی تربت تینا کارندہ غاتا کمک اٹ دا ہڑتوم آتے اوکان رکھ ئٹ کشا، و ہڑتوم آتے سیٹلائیٹ ٹاؤن نا علاقہ ٹی ہندی کرے۔
ملا عمر ہراکان بس؟
ملا عمر بنماسی وڑئٹ دے کہی (ایرانی) بلوچستان آن تعلقدار ئس۔ تینا ریاست مخالف کاریم تا سوب مقدمہ غاتیٹ پن کروک اس و ایرانی حکومت اونا رند ئٹ ئس۔ او ایران نا برخلاف مون تروک جیش العدل نا اسہ اہم ءُ کماندار اس ئس۔ جیش العدل دعویٰ کیک کہ او زیات شیعہ ملک ئٹ سنی بلوچ آتا حق و آجوئی کن جہد کننگے۔ ایران نا برخلاف مزاحمت کروک بلوچ مزاحمتی تنظیمک ساندہ دے ٹکی بلوچستان ءِ تاریخی وڑئٹ رکھوک ہند سرپد مریرہ و اوفتے گمانی وڑئٹ پاکستان و شیعہ مخالف طاغت آتا کمک دوئی ءِ۔
ملا عمر تینا ایران مخالف کاریم تا بناء ءِ ہمو تم کرے، ہراتم اونا اسہ ایلم ءِ ایرانی کوالخاک پاہو ایترہ۔ او باقاعدہ تینا سلاء بند کاروائی تا بناء ءِ مولا بخش پن کروک ملا ملوک نا سپاہ رسول اللہ آن کرے، 2006 ئٹ عبدالمالک ریکی نا جنداللہ نا بشخ اس مس۔ 2010 ئٹ عبدالمالک ریکی ءِ پاہو تننگ آن گڈ جنداللہ پروشت نا گواچی مس و جتا ٹولی تیٹ ونڈ مس۔ ملا عمر جیش العدل نا بشخ مس۔
حاجی حسن ایرانی، ہراڑا ممبئی جلہو تیٹ اوار مننگ و اجمل قصاب ءِ انڈیا غا رادہ کننگ نا دوبہ خلوک ءِ، ملاعمر اونا راست دو پاننگاکہ۔ حاجی حسن ایرانی نا رند اٹ ایران کئی سال آتیان ءِ، او بھلو وخت ئسے آن تربت ئٹ ہندی ءِ، ولے اونا اصل تڈا کراچی و لاہور مریرہ۔
پنی آ بھارتی صحافی ادتیا راج کول، ملا عمر نا کہنگ آن گڈ اسہ ٹوئٹ اسیٹی دعویٰ کریسس کہ “بھارتی شاری کلبھوشن یادو ءِ برمتہ کریسہ پاکستانی فوج نا دوٹی تروک بندغ ملا عمر ئسک۔”
ملا عمر نا کسفنگ نا بابت ذرائع دا دعویٰ کیرہ کہ ایران و پاکستان نا نیامٹ منہ دے مالو بڑز تلہ نا اوڑدئی اسیٹی اسٹ ایلو نا خواہوک دوبہ دار آک ہرافک اسٹ ایلو نا رہی آ ہندی ءُ، تننگ نا یا خلنگ نا معاہدہ مسوسس۔ چمشانک شاغوک آتا ردئٹ ملا عمر ءِ اولی ساہت ئتون خلیسہ پاکستان ایران تون تعلقداری تے اسیکہ وا کسر آ ہتنگ نا سگنل ءِ تسونے۔