بلوچستان ئٹ گیس نا نیستی
دی بلوچستان پوسٹ سرگپ
بلوچستان دیر و تئو نا سوب داڑے تیوی سال ترند آ مُد ئتون مون تروئی تمک۔ یخ آتیٹ گچین وڑئٹ بلوچستان نا مشی آ علاقہ آتیٹ درجہ حرارت یخ تفنگ نا ٹِک آن شیف کائک، وختس درجہ حرارت منفی پانزدہ سینٹی گریڈ اسکان سر مریک و باسنی تیٹ داڑے مُد ترند باسن مریک۔
ہر سال یخ ئنا مد ئٹ برف و پِر ترند آ دے ٹکی تہو تیتون اوار مریسہ ہندی مخلوق کن زند ءِ عذات کیرہ۔ ہراڑے بلوچستان نا مخلوق زند نا ایلو آسراتی تیان دُو خلاس ءِ، اندن داڑے مخلوق یخ آ مد ئنا ترندی تون مون تس کن ہم آسراتی تیان دُو خلاس ءُ۔
بلوچستان قدرتی مڈی تیان پُر ءِ و تیوی پاکستان ءِ قدرتی گیس تروک تیوہ آتیان بھلا کمک ءِ۔ سوئی گیس فیلڈ، ہرا بلوچستان نا ضلع ڈیرہ بگٹی ئٹی ءِ، قدرتی گیس نا شابیت آ کوڑ انداڑکن ءِ و سنہ 1950 آن پاکستان نا نیمہ آن زیات گیس نا خواست آتے پورو کننگے۔ گیس پیپ لین آتا اسہ پوسکنو بست و بند اس سوئی گیس فیلڈ نا 87 دُون تیان ہردے 800 ایم ایم ایس سی ایف گیس ہزار آتا میل مُر پنجاب آ دیرہ۔ ولے گیس فیلڈ آن بیرہ منہ کلومیٹر مُر ڈیرہ بگٹی شار قدرتی گیس نا دا کوڑ آن ہورک ءِ و ہندی مخلوق دائسکان گیس نا بنماسی آسراتی تے دوئی کننگ کتنے۔ ایب کیب نا مخلوق اینو اسکان خواست آتیکن پاٹ تیا گزران کیک۔
دا نیستی بیرہ ڈیرہ بگٹی اسکان سلوک اف، بلوچستان نا 33 ضلع آتیان بیرہ 4 ضلع ءِ گیس نا آسراتی دوئی ءِ، ہرافتیٹ کوئٹہ، مستونگ و قلات اوار ءُ۔ دا ضلع غاک ہم یخ آتیٹ گیس پریشر نا کمبوتی و لوڈشیڈنگ تون مون ایترہ۔ ہر سال یخ بلوچستان نا مخلوق کن تینتون بنماسی آسراتی تا مفرنگ نا سوب بے حساب سختی تے ہم تینتون ہتیک۔
ہر سال بلوچستان نا مخلوق گیس نا مفرنگ آ سڑک آتیا پیشن مریسہ برانز کننگ آ خننگرہ، و حزب اختلاف اسمبلی تیٹ برانز کیک، ولے ہر تدوکا سال حالیت جُوان مننگ نا جاگہ غا بدحال مریسہ کارہ۔ تدوکا سال بلوچستان نا ضلع قلات ئٹ شیخڑی نا ہند آ گیس نا اسہ ٹریلین مکعب فٹ نا پوسکنا کوڑ آک خننگار۔ ولے داڑان بیدس ہم بلوچستان نا حالیت ئٹ ہچو بدلی بتو، دا تیوہ غاتیان بھلا سوب بلوچستان آن پیشن مروک گیس ءِ پنجاب و سندھ نا خواست آتے پورو کننگ کن پیپ لین خلیسہ اوڑاسکان سر کننگک۔
پن کروک ویل و بلوچستان نا اندا ڈول نا ایلو ویل آک بلوچ راج دوست آتا دا ہیت ءِ سبر کیرہ کہ ریاست پاکستان بلوچ مڈی تے لُٹنگ ءِ و بلوچستان نا مخلوق بے نیاد مڈی نا خواجہ مننگ آن بیدس ہم بنماسی آسراتی تیان ہورک ءُ۔
بلوچستان نا مخلوق ءِ ہراتم اسکان اوفتا تینا مڈی تیا پورو اختیار و حق رسینگپک، او وخت اسکان بلوچستان نا ڈغار آ بلوچ آتا منشا آن برخلاف مروک سی پیک کوْن آ معاہدہ غاک، بلوچ آتا سوختئی، ڈکھیہ ئی و بلوچستان ئٹ برجاء بے جاراتی ئٹ پین ودکی کریسہ کرور۔