پام ادبی مجلس، راسکوہ ادبی دیوان، اوتان کلچراکیڈمی، براہوئی اکیڈمی، حلقہ ِ تخلیق ِ نو، شیوان ادبی کاروان ڈاک نوشکے نا پارہ غان نا نوشکے نا پِڑ آ ادبی تنظیم تا اوارو الائنس اس “نوشکے ادبی فورم” نا پن اٹ اینو جوڑ کننگا۔
مونی حوال آتا ردئٹ دا فورم نا اولیکو مجلس اینو شہزاد سٹی کیبل نا آفس ٹی پام ادبی مجلس نا کماش ڈاکٹرعالم عجیب نا کماشی ٹی اڈ ہلک۔
مجلس نا گچین آ مہمان راسکوہ ادبی دیوان نا سیکرٹری جنرل داد محمد جواد و اعزازی مہمان وحید عامر بلوچ ئس۔ شونکاری نا دوداتے پام ادبی مجلس نا ربنواز شاہ دوئی کرے۔
مجلس نا ٹِک آتیٹ شہید سمیع مینگل نا سال دے نا رِد اٹ اٹ نوشکے ٹی ادبی مچی ئسے نا اڈ تننگ اوار ئس۔
مجلس ٹی امنائی تون فیصلہ کننگا کہ شہید سمیع مینگل نا یات اٹ اسہ مشاعرہ مجلس اس بروکا یکشمبہ نا سُہب دہ بجہ غا ضلعی ہال نوشکے ٹی اڈ تننگو۔ دا مجلس ٹی نوشکے نا جم شاعر تون اوار سیاسی باسک، خوانندہ ورناک و ایلو فکر نا مخلوق ءِ ساڑی مننگ نا دعوت تننگانے۔
مجلس ٹی راسکوہ ادبی دیوان نا مسکوئی چیئرمین پروفیسر دستگیر صابر، داد محمد جواد، وحید عامر بلوچ، ابراہیم ابرار، قمبرقیس، پام ادبی مجلس نا ڈاکٹرعالم عجیب، حق نواز شاہ، رابنواز شاہ، عظیم عاصم، اوتان کلچر اکیڈمی نا غمخوارحیات، عثمان سوز، رفیق شوہاز، حلقہ تخلیق نو نا باسط فرہاد، شہیوان ادبی کاروان ڈاک نوشکے نا پیر جان مہر و براہوئی اکیڈمی نا لعل بخش صابر آن بید بی این پی نا سی سی ممبر میر خورشید جمالدینی و وحمید بلوچ (بحثیت مبصر) ساڑی ئسر۔
