کراچی: لاہور آ ہنوک ٹرین ویل ئنا گواچی، نیاڑی اس بیران، بھازاک ٹپی

کراچی آن لاہور آ ہنوک کراچی ایکسپریس ریلوے گاڑی روہڑی نا خڑک ویل ئنا گواچی مس، ٹرین نا 5 بوگی پٹڑی آن جتا مریسہ کڈ ئٹی تمار، ویل ئٹی نیاڑی اس مرگ نا گواچی مس، اندن 40 آن زیات بندغ ٹپی مسر۔

ریلوے کوالخوا تا پاننگ ءِ ویل روہڑی نا خڑک منڈو دیرو و سانگی ریلوے اسٹیشن ئنا نیام ئٹی مس، ویل ئٹی ٹرين نا 9 بوگی پٹڑی آن دڑینگار، بھاز آ مسافر آک تہٹی پاسینگار، اسپتال آن رسینگوک حوال تا رد ئٹ بھاز  ٹپی آک بد حالیت ئٹی ءُ۔

ہندی بندغ آک و ايدھی رضا کار آک تینا کمک ئٹ شاری تے کشنگ بناء کریر۔

ٹپی بندغ آتے اسپتال سر کننگ آن گڈ بوگیک کليئر کننگار، کوالخوا تا دا ہم پاننگ ئس کہ پٹڑیک پیش تماسر۔ 200 فٹ بشخ جتا مسونو، 2 کلو ميٹر لائن واپس خلوئی تمو۔

بناء ٹی تارمئی و آسراتی مفرنگ نا سوب آن کمک نا کارروائی تیٹ سختی تو مون تروئی تما، ویل ئنا سوب آن ٹریک آ ٹرين آتا ہن و بر توننگا، بھاز آ سائٹ آتیان برجاہ  آپريشن آن گڈ اسہ کنڈان ٹریک ملینگا۔

ڈی آئی سکھر فدا حسین نا پاننگ ءِ کہ ویل دہشت گرد آتا لگیپک، بھلا ویل آن بچانے، ویل ہرا سوب آن مس داسکان ہچ سما تمتو۔

یاتی مرے کہ 31 اکتوبر سال 2019 آ پنجاب نا ضلع رحیم یار خان ٹی مسافر ٹرین ٹی خاخر لگینگ آن کم آن کم 74 بندغ بیران مسوسر۔

دا خاخر کراچی آن راولپنڈی آ ہنوک  تیز گام ایکسپریس نا 3 بوگی ٹی لگاسس، کوالخوا تا رد ئٹ دا ویل ئٹی کہوک آ  بھازی بندغ  آتا چائنداری بھاز بد آ حالیت ئٹ مس۔