سندھ ئنا بنجائی شار کراچی ٹی ہڈ تروکا بلوچ اسٹوڈنٹس ایکشن کمیٹی نا بنجائی کونسل سیشن ایسر مس۔
اِرا دے ئنا کونسل سیشن نا ایسری دے تنظیم نا گچین کاریک کننگار، ہراٹی صبیحہ بلوچ چیئرپرسن گچین مسونے۔
گیشتر حوال تا رد ئٹ بلوچ اسٹوڈنٹس ایکشن کمیٹی نا ارٹمیکو بنجائی کونسل سیشن بیاد شہید پروفیسر رزاق بلوچ، الیاس بلوچ و بنام فیروز بلوچ ایسر مس، ہراٹی ڈاکٹر صبیحہ بلوچ آن بیدس مون تس آن بلوچ اسٹوڈنٹس ایکشن کمیٹی نا پوسکنا بنجائی چیئرپرسن، اندن عاصف بلوچ بیدس مون تس آن بنجائی جنرل سیکریٹری گچین مسر۔
تنظیمی حوال تا رد ئٹ پوسکن گچین کابینہ نا سوغند ارفنگ نا مجلس اینو ملیر ٹی ہڈ تننگو، ہرانا خاص انگا مہمان بلوچ دانشور محمد علی تالپور مرو۔
یاتی مرے کہ بلوچ اسٹوڈنٹس ایکشن کمیٹی نا بنجائی کونسل سیشن تدوکا ارا دے ئنا ئسے کراچی ٹی برجاء ئس ہرا درو تینا ایسری ءِ سرمس۔
بلوچ اسٹوڈنٹس ایکشن کمیٹی نا اولیکو بنجائی کونسل سیشن نومبر 2018 ٹی ہڈ تننگاسس، ہراٹی بنجائی چیئرمین نواب بلوچ و جنرل سیکریٹری سلمان بلوچ گچین مسوسر۔
پوسکن گچین مروک آ چیئرپرسن صبیحہ بلوچ تدوکا اِرا سال ئنا ئسے بنجائی وائس چیئرپرسن نا حیثیت ئٹ تینا فرض ءِ ایسری تننگ ئس، اندن عاصف بلوچ تنظیم نا سنٹرل کمیٹی نا ممبر اس مسونے۔
اندن بلوچ آرگنائزیشن نا بنجائی ترجمان بلوچ اسٹوڈنٹس ایکش کمیٹی نا پوسکن گچین مروک باسک آتے مبارک بادی تسونے۔
بلوچ اسٹوڈنٹس آرگنائزیشن نا بنجائی ترجمان بلوچ اسٹوڈنٹس ایکشن کمیٹی نا گچین مروک آ چئیرپرسن ڈاکٹر صبیحہ بلوچ و تیوہ آ بنجائی اوغہدیدار و ورکنگ کمیٹی ممبر آتا مبارک بادی تریسہ دا اومیت نا درشانی ءِ کرے کہ پوسکن راہشونی بلوچ خوانندہ آتا نیام ئٹی شعوری سیاست ءِ مونی دننگ تون اوار تعلیمی ویل آ جہد کرون۔
بیان ٹی پاننگا کہ بلوچ ورنا تے دا وخت جتا سیاسی و تعلیمی چیلنج آتون مون تروئی تمو، ہرانا اسٹ آ ایسری تیوہ آ بلوچ خوانندہ تنظیم آتے اسٹ ایلو تو سیوت و اوار سیاسی جہد ءِ۔
ترجمان بی ایس او پارے کہ بساک ءِ ارٹمیکو بنجائی کونسل سیشن نا سرسہب مننگ نا آ ہم مبارک بادی تینا، اومیت ءِ کہ پوسکنا راہشونی سیوت نا اوار جہد ئنا کسر آ اوار مرو۔