جہانی ادارہ جانجوڑی ( ڈبلیو ایچ او ) پارینے کہ تہو ئٹی لڑدی بندغی جانجوڑی کن تیوہ آتیان بھلا ماحولیاتی خلیس آتیان اسٹ ئسے ہرانا سوب آن سال ئٹی 70 لکھ بندغ وخت آن مست مرگ نا گواچی مریرا دا کچ تیوہ آ جہان ئٹ کورونا وائرس آن کہوک آتیان بھاز زیات ءِ۔
رپورٹ نا رد ئٹ اقوام متحدہ نا ادارہ پارینے کہ تہو ئٹی لڑدی ءِ کم کننگ کن زوت گام ارفینگ نا خواست ءِ اندن تمباخ کشینگ و جانجوڑی آن خلاف کُننگ نا سوب آن ویل آتیٹ ودکی مننگ ءِ۔
ڈبلیو ایچ او نا کنڈان تہو ئنا معیار تون تفوک گائیڈ لائن ءِ پین سخت کریسہ خبردار کننگانے کہ گائیڈ لائنز تیان کاریم کننگ جانجوڑی کن خلیس نا سوب مننگ کیک او پارے کہ گائیڈ لائنز تیا عمل کریسہ لکھ آ ساک بچینگ کیرا گائیڈ لائنز نا مخصد مخلوق ءِ تہو ئٹی لڑدی نا منفی زہم آن بچفینگ ءِ، و حکومت آتے دا معیارات نا پوروی قانودی وڑ ئٹ پابند کروئی ءِ۔
اقوام متحدہ نا جانجوڑی ایجنسی ایسری وار 2005 ٹی تہو ئنا معیار ( اے کیوجی) آ تالان رپورٹ شینک کرے ہراڑان تیوہ آ جہان ئٹ تہو ئٹی لڑدی کم کننگ نا کہ پالیسی تیا گچینو زہم تما ڈبلیو ایچ او پارے کہ مچ مروکا ثبوت بیرہ خاص ملک یا تلہ آتیٹ بلکن جہانی تپہ آ تہو ئٹی لڑدی نا سوب مروک آ خاص عناصر ءِ کم کننگ نا خواست ءِ۔
یاتی مرے کہ ڈبلیو ایچ او نا کنڈان پوسکنو گائیڈلائنز گلاسگو ٹی 31 اکتوبر آن 12 نومبر اسکان ہڈ تروکا سی او پی 26 گلوبل کلائٹ سمٹ تون اوار کماشی اجلاس آن مست کننگانے ۔ ڈبلیو ایچ او پارے کہ ماحولیاتی بدلی تون اوار تہو ئٹی لڑدی بندغی جانجوڑی کن تیوہ آتیان بھلو ماحولیاتی خلیس ئسے۔
محکمہ مُد بدلی نا کماش ماریانیرا پارینے کہ ڈبلیو ایچ او گلاسگو ٹی مونا ہتنگ کن اسہ بھلو رپورٹ اس تیار کننگ اُن، تاکن تہو ئٹی لڑدی نا وڈ مد ئٹی بدلی ءِ کم کننگ نا زور تننگ کن ہراڑان جانجوڑی آ بھاز منفی زہم تمنگ ءِ، او صحافی تے پارے کہ نم تصور کننگ کیرے کہ نن اخس ساہ بچفون ڈبلیو ایچ او نا پوسکنا گائیڈ لائن ٹی نائٹرو جن ڈائی آکسائڈ سلفر ڈائی آکسائیڈ و کاربن مونو آکسائیڈ نا کچ ءِ تہو ئٹی کم کننگ آ زور تننگانے۔