آئرلینڈ نا پنی آ ناول نگار سیلی رُونی تینا پوسکنا ناول نا مَٹ و شینک کاری نا اسرائیلی پبلشر ءِ موْکل تتئو۔ زالبول ناول نگار دانا سوب اسرائیل نا نسلی گچینی نا بست و بند، و فلسطینی تے شیف خلنگ نا وڈ و ڈول ءِ پِن کرینے۔
30 سالہ آئرس نوشتکار و سکرین رائٹر سیلی رُونی انگریزی بولی نا پنی آ ناول نگار آتیٹ حساب مریک۔ اونا مُسہ ناول دا وخت اسکان شینک مسونو۔ اوفتیٹ اولیکو ناول 2017 ئٹ شینک مس ہرانا پِن “سنگت آتیتون حوالی” )کنورسیشن وِد فرینڈز( ئس۔ ارٹمیکو ناول 2018 ئٹ “لس مخلوق” )نارمل پیپل( نا سرحال تون شینک مس۔
مسٹمیکو ناول برجاء سال ستمبر ئٹ شینک مسونے، دانا پِن “زیبا غا جہان، نی ہرانگ اُس” )بیوٹیفُل ورلڈ، ویئرآر یُو( ءِ۔ اولیکو اِرا ناول آتیانبار سیلی رُونی نا مسٹمیکو ناول ءِ خوانوک آک بھاز دوست تخانو۔
سن 2017 ئٹ اودے جریدہ “سنڈے ٹائمز” سال ئنا گچین ورنا غا ادیبہ پِن کریسس۔ اونا ارٹمیکو ناول “نارمل پیپل” ءِ سن 2018 نا گچین آ آئرش ناول پِن کننگا۔ سیلی رونی ءِ 2019 ئٹ ویمن پرائز فار فکشن تون شرف تننگانے۔
سیلی رُونی نا ادبی نمائندگی وائلی ایجنسیز ءِ دوئی ءِ۔ دا ایجنسی زالبول ناول نگار نا پارہ غان اسہ کُلہو اس شینک کرینے و داٹی پارینے کہ مصنفہ تینے آن عبرانی یا ہبریو بولی نا چاہندار اس گچین کریسہ تینا ناول نا مَٹ ءِ کرفنگ نا ارادہ تخک۔ دا بیان اٹ دا ہم پاش پاننگانے کہ او تینا پوسکنا ناول نا مَٹ نا موْکل ہچو اسرائیلی پبلشر ئسے تننگ نا ارادہ تخپک۔ دا گڑا یاتی مرے کہ سیلی رُونی نا مالو نا اِرا ناول نا مَٹ و اسرائیل اٹ شینک کاری نا ذمہ وار اسہ ہندی شینکاری ادارہ مودان ئس۔
آئرلینڈ نا زالبول ناول نگار نا پاننگ ءِ کہ اودے گمان ارے کہ ہر کس اونا دا فیصلہ تون امنائی کپرو ولے ساڑی حالیت آتیٹ او اسرائیلی شینکاری ادارہ نا پارہ غان اسہ پوسکن ءُ کنٹریکٹ اس مننگ کن تیار اَف انتیکہ دا کمپنی زَنکی فرخ نا اسرائیلی پالیسی آن پاش مُری تختئو و فلسطینی راج نا حق آتا امنائی کتئو ہرا اقوام متحدہ آن ہم منوک ءُ۔
سیلی رُونی تدوک وخت ئٹ ہم فلسطینی تتون امنائی نا درشانی کرینے۔ آئرش نوشتہ کار نا فیصلہ ءِ تیوہ غاتیان مُست سوگوْ آ اسرائیلی اخبار ہاریٹس شینک کریسس۔
اسرائیلی شینکاری ادارہ مودان تینا اسہ بیان اسیٹ پارینے کہ مصنفہ ءِ حوال سر کننگانے کہ اونا مسٹمیکو و پوسکنا ناول نا شینک و مَٹ نا ہچ ءُ کوشست اس کننگپرو۔ مودان نا دا ہم پاننگ ءِ کہ اسرائیل ئٹ آئرش ادیبہ نا مالو نا ہڑتوم آ ناول آک بھاز پِنی مسوسر و اوفک کُل بہا مسونو۔
شینکاری ادارہ دا ہڑتوم آ ناول آتا بہا نا بابت ہچ حساب اس پاش کتئو کہ او اخس کچ اٹ شینک کننگاسر۔