بلوچستان نا ضلع ہرنائی نا علاقہ شاہرگ نا جاگہی بی بی حاجرہ بیگواہ غا بلوچ آتا آجوئی کن کاریم کروک تنظیم وائس فار بلوچ مِسنگ پرسنز نا کیمپ آ بریسہ تینا اَرغ مجیب الرحمٰن ولد عبدالرحمٰن نا کوائف ءِ جمع کرے۔
بیگواہ مجیب الرحمن نا اُرائی نا پاننگ ءِ کہ شش تو مُست پیرا ملٹری فورس (ایف سی)، سی ٹی ڈی و ڈھکوک ادارہ آتا کارندہ آک اونا اَرغ ءِ دزگیر کریسہ بیگواہ کرینو ہراڑان گڈ اونا بابت ئٹ اونا خاہوت ءِ ہچو حوال دو بتنے۔
اونا پاننگ ئس کہ ہموز دے او سہب ئنا ہشت ہجہ غا اُڑاغان پیشتماسس و کوئلہ کانکن آتے دننگ ئس کہ فورسز آک اودے دزگیر کریر۔
اونا دعویٰ ئس کہ فورسز آک اوڑے ساڑی بندغ آتے تڑی تسنو کہ اونا بیگواہی نا بابت ئٹ شاہدی تفس نہ تو اوفتے ہم بیگواہ کننگو۔
وی بی ایم پی نا کیمپ ئٹی ماما قدیر بلوچ نا پاننگ ئس کہ پاکستانی ریاست جہانی بندغی حق آتا قانود آتے لتاڑنگ ءِ ولے اودے سوج کروکو کس اف۔ جہانی بندغی حق آتا تنظیم آتا دعوی و بیان آک لوزی رہینگانو۔ بلوچستان بندغی حق آتا بابت ئٹ بلیک ہول جوڑ مریسٹ ءِ۔ نیشنل و انٹرنیشنل میڈیا بلیک آؤٹ ءِ غٹ خن تے تر تخانو۔
ایلو نیمہ غان کوئٹہ آن بیگواہ مروکا ورنا عبدلباسط نا دزگیری ڈیرہ بگٹی آن پاش کننگانے۔
کاؤنٹر ٹیرریزم ڈپارٹمنٹ (سی ٹی ڈی) ڈیرہ بگٹی نا علاقہ سوئی آن اسہ بندغ ئسے دزگیر کریسہ اوڑان پستول ئسے تون اوار تراکی ءُ مواد ہم ہلنگ نا دعویٰ کرینے۔
دزگیر مروکا بندغ نا چاہنداری خضدار نا ہندی عبدالباسط ولد عبدالغنی نا پنا مسنے ولے اونا دزگیری نا بابت ئٹ اونا خُڑک ئنا بندغ آتا پاننگ ءِ کہ عبدالباسط چار تو مُست کوئٹہ آن زوراکی نا بیگواہی تا گواچی مسس۔
عبدالباسط نا خُڑک ئنا بندغ آتا رد ئٹ اودے 17 فروری آ کوئٹہ نا علاقہ جیور کالونی ٹی پاکستانی ایف سی و ڈھکوک ادارہ آتا کارندہ آک اُراغا چھاپہ خلیسہ دزگیر کریسر و بے ڈس ءُ جاگہ سے آ دریسر۔
باسط ولد عبدالغنی نا زوراکی نا بیگواہی نا حوال ہمو وختا میڈیا غا اونا خُڑک ئنا بندغ آتا کنڈ آن شینک کننگاسس۔
یاتی مرے کہ بیگواہ غا بندغ آتا دزگیری یا جعلی مقابلہ ٹی خلنگ نا دعوی مُست ہم سی ٹی ڈی کریسہ بننگ ءِ۔ داکان مُست خضدار آن بیگواہ مروک خوانندہ حفیظ بلوچ ءِ بلوچستان نصیر آباد آن تراکی ءُ مواد تون اوار دزگیر کننگ نا دعوی کننگاسس ہرا داسکان ہم بندی ءِ۔